اسلام آباد(وائس آف ایشیا)قومی اسمبلی میں اپوزیشن لیڈر شہباز شریف سے سابق وزیر اعظم نواز شریف نے ون آن ون ملاقات کی جس میں نواز شریف نے شہباز شریف کی میڈیکل رپورٹ میں کینسر کی تشخیص پر تشویش کا اظہار کیا۔حکومت کے 100 روز مکمل ہونے کے بعد الیکشن 2018 میں مبینہ دھاندلی پر وائٹ پیپر جاری کرنے پر بھی اتفاق ہوا۔تفصیلات کے مطابق پیر کے روز سابق وزیر اعظم نواز شریف قومی اسمبلی میں اپو زیشن لیڈر شہباز شریف سے منسٹر انکلیو میں ملاقات کے لئے پہنچے تو وہاں پر ان کے ہمراہ مشاہد حسین سید ، آصف کرمانی ، طارق فضل چودھری اور دیگر لیگی راہنما ہمراہ تھے لیکن نیب حکام نے صرف نوازشریف کو ہی شہباز شریف سے ملاقات کرنے کی اجازت دی ۔جس کے بعد نواز شریف نے شہباز شریف سے ون آن ون ایک گھنٹہ ملاقات کی ۔سابق وزیر اعظم نے سب سے پہلے اپنے چھوٹے بھائی شہباز شریف کی حالیہ میڈیکل رپورٹ میں کینسر کی تشخیص پر تشویش کا اظہار کیا جس پر شہباز شریف نے نیب حراست میں صحت کے درپیش مسائل پر بڑے بھائی کو آگاہ کیا ۔دونوں بھائیوں کے درمیان آئندہ علاج معالجہ پر بھی مشاورت ہوئی ۔اس کے علاوہ نیب کیسز سمیت حکومت کے 100 روزہ کارکردگی کا بھی جائزہ لیا گیا کہ حکومتی 100 روز مکمل ہونے پر آئندہ کا مسلم لیگ(ن) کا کیا ردعمل ہونا چاہئے جبکہ نواز شریف اور شہباز شریف کے درمیان الیکشن 2018 میں مبینہ دھاندلی پر وائٹ پیپر جاری کرنے سے متعلق بھی تبادلہ خیال ہوا کہ جیسے ہی حکومت کے 100 روز مکمل ہوں گے اس کے بعد وائٹ پیپر جاری کیا جائے گا علاوہ ازیں شہباز شریف نے بھی نواز شریف کو اپوزیشن جماعتوں کے ساتھ رابطوں حوالے سے آگاہ کیا ۔دونوں بھائیوں کے درمیان پارٹی معاملات پر بھی تفصیلی بحث ہوئی۔ واضح رہے کہ نواز شریف نے نیب حکام سے گزشتہ روز شہباز شریف سے ملنے کی درخواست کی تھی۔

لاہور (خبرنگار)وزیراعلیٰ پنجاب سردار عثمان بزدارکی زیرصدارت وزیراعلیٰ آفس میں اعلیٰ سطح کا اجلاس ہوا، جس میں قبضہ مافیا اور تجاوزات کے خلاف جاری آپریشن پر پیشرفت کا جائزہ لیا گیا- وزیراعلیٰ نے اجلاس سے خطاب کرتے ہوئے کہاکہ با اثر اور طاقتور مافیا سے سرکاری اراضی کا ایک ایک انچ قبضہ چھڑایا جائے گا۔ انہوںنے کہاکہ غریب لوگوں، ریڑھی بانوں، چھابڑی فروشوں کے خلاف اور کچی آبادیوں میں آپریشن ہر گز نہیں کیا جائے گا اورواگزار کرائی گئی اراضی پر کسی صورت دوبارہ تجاوزات قائم نہیں ہونی چاہئیں-واگزار کرائی گئی زمین کا بہترین استعمال کرنے کے لئے قابل عمل سفارشات مرتب کی جائیں اورواگزار کرائی گئی اراضی کا مکمل ڈیٹا تیار کیا جائے اور ریکارڈ مرتب کیا جائے-وزیراعلیٰ نے ہدایت کی کہ قبضہ مافیا اور تجاوزات کے خلاف آپریشن پوری قوت سے جاری رکھا جائے -وزیراعلیٰ نے کہاکہ بڑے مگر مچھوں کے خلاف کارروائی میں کسی قسم کا تسائل برداشت نہیں کروں گا-انہوںنے کہاکہ قبضہ مافیا او رتجاوزات کے خلاف آپریشن میں اچھی کارکردگی کا مظاہرہ کرنےوالے اضلاع کی حوصلہ افزائی کی جائے گی-وزیراعلیٰ نے ہدایت کی کہ ضلع کی سطح پر قائم ا نسداد تجاوزات کمیٹیاں باقاعدگی سے آپریشن پر پیشرفت کا جائز ہ لیں اورمیں خود بھی تجاوزات اور قبضہ مافیا کے خلاف جاری آپریشن پر ہونے والی پیشرفت کا باقاعدہ جائزہ لے رہا ہوں- وزیراعلیٰ کو بریفنگ کے دوران بتایا گیاکہ اب تک پنجاب بھر میں جاری آپریشن کے دوران 84ہزار ایکڑ اراضی واگزار کرا ئی جا چکی ہے اورواگزار کرائی گئی زمین کی لاگت تقریبا ً 145ارب روپے ہے-اجلاس میںصوبائی وزیر ہاﺅسنگ میاں محمود الرشید، ایڈیشنل چیف سیکرٹری داخلہ ، متعلقہ حکام ، کمشنر لاہو رڈویژن ، ترجمان وزیراعلیٰ پنجاب اور اعلی افسران نے شرکت کی ۔ وزیراعلیٰ پنجاب سردار عثمان بزدار نے کہا ہے کہ ہمارا ایجنڈا صرف عوام کی بے لوث خدمت ہے۔ اس کے علاوہ کوئی دوسرا ایجنڈا تھا، نہ ہے ، نہ ہوگا۔اپنا گھر ہاﺅسنگ پراجیکٹ ایک انقلابی منصوبہ ہے۔ اس منصوبے کے تحت بے گھر افراد کو چھت ملے گی۔ ہاﺅسنگ سیکٹر میں سرمایہ کاری سے روزگار کے نئے مواقع پیدا ہوں گے۔ وہ آج وزیراعلیٰ آفس میں منتخب نمائندوں سے گفتگو کرر ہے تھے جنہوں نے آج ان سے ملاقات کی -وزیراعلیٰ نے کہاکہ پسے ہوئے طبقے کے مسائل کو ترجیحی بنیادوں پر حل کیا جا رہا ہے۔ ماضی میں وسائل کو صرف مخصوص علاقوںکیلئے رکھے گئے۔ تحریک انصاف کی حکومت نے پسماندہ علاقوں کی ترقی پر توجہ مرکوز کی ہے۔ دور دراز کے علاقوں کو ترقی دے کر عوام کو ان کا حق لوٹائیں گے۔ ترقیاتی منصوبوں میں اراکین اسمبلی کی مشاورت شامل ہے۔انہوںنے کہاکہ عوامی مسائل کے حل کیلئے اراکین اسمبلی عوام سے قریبی رابطہ رکھیں۔ وزیراعلیٰ سے ملاقات کرنے والو ںمیں وزیر مملکت ہاﺅسنگ اینڈ ورکس غلام شبیر علی، رکن قومی اسمبلی غلام بی بی بھروانہ اور رکن پنجاب اسمبلی آسیہ امجد شامل تھیں۔دریں اثناءوزیراعلیٰ نے نوجوانوں کے وفد سے گفتگو کرتے ہوئے کہاکہ نوجوان ملک کا قیمتی اثاثہ ہیں۔ نوجوانوں کو معیاری تعلیمی مواقع کی فراہمی ملک کی ترقی کیلئے ناگزیر ہے اور اس مقصد کیلئے نصابی و غیر نصابی سرگرمیوں کو فروغ دے کر نوجوانوں کی صلاحیتوں میں نکھار لانے کیلئے حکمت عملی پر عمل پیرا ہیں۔ انہوں نے کہا کہ نوجوانوں کی تربیت کیلئے سکل ڈویلپمنٹ کے منصوبوں پر کام جاری ہے۔ مارکیٹ کی ضروریات کے مطابق نوجوانوں کو ہنرمند بنا کر روزگار کے مواقع فراہم کئے جائیں گے۔ وزیراعلیٰ نے کہا کہ رواں مالی سال شمالی، جنوبی اور وسطی پنجاب میں 3 اعلیٰ معیار کی یونیورسٹیاں قائم کی جائیں گی۔ ان یونیورسٹیوںکے قیام کیلئے فزیبلٹی سٹڈی کرائی جا رہی ہے۔ وزیراعلیٰ پنجاب سردار عثمان بزدار نے مقبوضہ کشمیر میں بھارتی فوج کی فائرنگ سے کشمیری نوجوانوں کی شہادت اور پے درپے مظالم کے حالیہ واقعات کی شدید مذمت کی ہے۔ وزیراعلیٰ نے شہید ہونے والے کشمیریوں کے لواحقین سے دلی ہمدردی اور تعزیت کا اظہار کیا ہے۔ وزیراعلیٰ عثمان بزدار نے کہا کہ بھارتی فوج نے مقبوضہ کشمیر میں ظلم و بربریت کا بازار گرم کر رکھا ہے اور موجودہ حالات کے تناظر میں عالمی برادری مقبوضہ کشمیر میں بھارتی فوج کی وحشیانہ کارروائیاں رکوانے میں اپنا کردار ادا کرے۔ وزیراعلیٰ پنجاب سردار عثمان بزدار سے وزیراعلیٰ آفس میں چیئرمین پاکستان کرکٹ کنٹرول بورڈ احسان مانی نے ملاقات کی،جس میں پنجاب کے دور دراز علاقوں میں کرکٹ کے فروغ کے لئے اقدامات پر تبادلہ خیال کیا گیا-ملاقات میں فیصلہ کیا گیا کہ جنوبی پنجاب اور دور دراز کے علاقوں میں نئے ٹیلنٹ کو سامنے لانے کے لئے ٹرائلز کرائے جائیں گے اورمنتخب کھلاڑیوں کو ملتان میں تربیت دی جائے گی- وزیراعلیٰ سردار عثمان بزدار نے اس موقع پر گفتگو کرتے ہوئے کہاکہ صحت مند سرگرمیوں میں اضافے کے لئے کھیلوں کا فروغ ضروری ہے-پی سی بی کی جانب سے نئے ٹیلنٹ کی تلاش کے لئے ٹرائلز کرانے کے حوالے سے ہر ممکن تعاون کریں گے۔ وزیراعلیٰ پنجاب سردار عثمان بزدار نے رائے ونڈ تبلیغی مرکز کی مسجد کے امام و خطیب مولانا جمیل کے انتقال پر گہرے دکھ اور افسوس کا اظہار کیا ہے۔

اسلام آباد (این این آئی) وفاقی حکومت نے نیپرا سے بجلی کے نرخوں میں ایک روپے 27 پیسے فی یونٹ اضافے کی سفارش کردی ہے۔ نجی ٹی وی کے مطابق حکومت نے بجلی کے نرخوں میں ایک روپے 27 پیسے فی یونٹ اضافے کی سفارش نیپرا کو ارسال کردی ہے جس کے بعد بجلی کے صارفین پر 22 پیسے سے ایک روپے 60 پیسے تک فی یونٹ اضافہ ہوگا ¾ حکومت بجلی کے صارفین کو 117 ارب روپے کی سبسڈی دے گی۔نیپرا اتھارٹی نے حکومتی درخواست پر فیصلہ محفوظ کر لیا تاہم بجلی کے ٹیرف میں اضافے کا اطلاق 300 سے زائد یونٹ استعمال کرنے والے صارفین پر ہوگا۔

لاہور (کورٹ رپورٹر) آشیانہ سکینڈل اور پیراگون کیس کے اہم ملزم قیصر امین بٹ وعدہ معاف گواہ بن گئے، نیب نے بیان مجسٹریٹ کے روبرو قلمبند کروا دیا،میں جو کہوں گا سچ کہوں گا، 1998 میں پراپرٹی کا کام شروع کیا، 2002 میں خواجہ سعد رفیق نے ندیم ضیا نامی شخص سے ملوایا اور کہا کہ یہ آپ کے ساتھ کام کرےگا،2006 میں ندیم ضیا 92 فیصد کاروبار کا شیئر ہولڈ ہو گیا۔ تفصیلات کے مطابق آشیانہ سکینڈل اور پیراگون کیس کے اہم ملزم نے مجسٹریٹ کے سامنے اپنے بیان حلفی میں کہا ہے کہ میں جو کہوں گا سچ کہوں گا، 1998 میں پراپرٹی کا کام شروع کیا، 2002 میں خواجہ سعد رفیق نے ندیم ضیا نامی شخص سے ملوایا اور کہا کہ یہ آپ کے ساتھ کام کرےگا۔قیصر امین بٹ نے اپنے بیان حلفی میں کہا کہ 2006 میں میرا 50 فیصد پر کاروبار شروع ہو گیا تھا جبکہ بعد ازاں ندیم ضیا 92 فیصد کاروبار کا شیئر ہولڈ ہو گیا۔قیصر امین بٹ نے شکوہ بھی کیا کہ میں 50 فیصد کا کاروبار ہولڈر ہوں، میری بات کو اہمیت نہ دی گی اور مجھ سے انصافی کی گئی۔

لاہور(خبر نگار)نیب نے ملتان میٹرو بس منصوبے میں انکوائری کا دائرہ کار وسیع کرتے ہوئے شواہد اکٹھے کرنا شروع کر دیئے ہیں۔ سابق وزیراعلی پنجاب شہباز شریف کے احکامات پر مشتمل سرکاری دستاویزات منگوانے کیلئے متعلقہ محکموں کو مراسلے بھجوا دیئے گئے۔نیب کے ملتان سرکل نے چیئرمین پی اینڈ ڈی کو بھیجے گئے مراسلے میں ملتان میٹرو بس منصوبے کی تفصیلات طلب کر لی ہیں اور میٹروبس منصوبے کے منظور کیے گئے پی سی ون کی دستاویزات بھی مانگ لی ہیں۔ملتان میٹرو بس منصوبے میں انکوائری کا دائرہ وسیع کرتے ہوئے نیب نے فنڈز کی منظوری پر مشتمل سرکاری ریکارڈ کا جائزہ لینے کیلئے متعلقہ محکموں کو مراسلے بھجوائے ہیں۔ پی اینڈ ڈی بورڈ میں صوبائی ڈویلپمنٹ ورکنگ پارٹی اجلاس کی تفصیلات بھی طلب کی گئی ہیں۔ ذرائع کے مطابق چیئرمین پی اینڈ ڈی کو جاری مراسلے میں سابق وزیراعلی کے احکامات اور دیگر دستاویزات پر مشتمل ریکارڈ بھوانے کا کہا گیا ہے۔یاد رہے سابق وزیراعلی پنجاب شہباز شریف پہلے ہی آشیانہ ہاوسنگ سکینڈل میں نیب کی حراست میں ہیں اور ن لیگ کی بھرپور کوشش کے باوجود شہباز شریف کو پے در پے عدالتی ریمانڈز کے باعث مسلسل تفتیش کا سامنا ہے۔

لاہور (نمائندہ خصوصی) سرکاری افسران کی کرپشن پکڑنے اور کرپشن کی روک تھام کے لیے بنایا گیا محکمہ اینٹی کرپشن خود کرپشن کی دلدل میں پھنس گیا، آفیسرز اینڈ ایگزیکٹو کوآپریٹو سوسائٹی (باغ ارم) میں مبینہ بدعنوانیاں ، مالی بے ضابطگیاں، اختیارات کا ناجائز استعمال، رقم خورد برد کرنے اور ممبران سوسائٹی کو نقصان پہنچانے میں مرکزی کردار سابق صدر سوسائٹی رانا مبشراقبال کی گرفتاری عمل میں نہ لائی جاسکی۔ محکمہ اینٹی کرپشن کے انکوائری آفیسر نے 5 لاکھ روپے رشوت لیکر سابق جنرل سیکرٹری فاروق حلیم کو 2 دن ریمانڈ پر رکھنے کے بعد جوڈیشل کردیا اورکوئی ریکوری نہ ہوسکی۔ اس سوسائٹی میں 6 ارب سے زیادہ کا فراڈ منظر عام پر آیا تھا اس فراڈ کے مرکزی ملزم رانا مبشر، سید ظفر عباس کاظمی، سابق فنانس سیکرٹری و نائب صدر کرنل (ر) راناآغا کمال الدین سمیت دیگر لوگ شامل ہیں۔ باغ ارم سوسائٹی کے ایگزیکٹو ممبر شیخ اجمل رو¿ف نے اس فراڈئیے لینڈ گروپ کے خلاف درخواست دی جس کے بعد ان کے خلاف مقدمہ درج ہوا۔ ذرائع نے بتایا ہے کہ پلاٹ نمبر 23 ڈی شیخ اجمل رو¿ف کو دیا گیا تھا مگر ایل ڈی اے نے لیٹر تحریر کیا کہ جو پلاٹ سوسائٹی باغ ارم نے آپ کو ٹرانسفر کیا ہے وہ ایل ڈی اے کے پاس دیگر رہن شدہ پلاٹوں میں سے ایک پلاٹ ہے جو قانونی طور پر فروخت نہیں ہوسکتا۔ ذرائع نے بتایا ہے کہ اس سوسائٹی کے ایل ڈی اے میں رہن شدہ پلاٹوں کو بھی فروخت کر دیا گیا ہے اور یہ فراڈ سحر ایسوسی ایٹس کی ملی بھگت سے کیا گیا ہے۔ ذرائع نے بتایا ہے کہ 1996ءمیں 1402 کینال کا نقشہ ایل ڈی اے نے منظور کیا پھر اکتوبر 2011ءمیں 500 کینال ہڑپ کر کے سوسائٹی کانقشہ ہی بدل دیا گیا۔ 983 کینال کا ترمیمی نقشہ منظور کروانے کی کوشش کی گئی۔ ایل ڈی اے میں نقشہ جمع کروا دیا گیا جو پہلے والے نقشے سے مختلف تھا جس میں سکول ، مسجد اور کمرشل مارکیٹ سمیت دیگر جگہوں کو تبدیل کر دیا گیا۔ ذرائع نے بتایا ہے کہ 30-9-2008 اور 13-9-2009کو رجسٹرار کوآپریٹو پنجاب اور سرکل رجسٹرار کوآپریٹو لاہور کو اس میگا فراڈ سے آگاہ کیا گیا کہ نام نہادلینڈ مافیا سحر ایسوسی ایٹس کے ساتھ معاہدہ منسوخ کر دیا جائے مگر اس کے باوجود کوئی کارروائی نہ کی گئی۔ ذرائع نے بتایا ہے کہ سوسائٹی انتظامیہ کے ساتھ محکمہ کوآپریٹو کے افسران بھی اس میگا سکینڈل میں ملوث ہیں جس کی وجہ سے ان کو بروقت اطلاع کی گئی مگر فراڈیوں کے خلاف کوئی کارروائی نہ ہوسکی۔ ذرائع نے مزید بتایا ہے کہ فاروق حلیم نے اپنے بیان میں کہا ہے کہ اس سوسائٹی میں کرپشن سابق صدر رانا مبشر اقبال ، سابق فنانس سیکرٹری سید ظفر عباس کاظمی اور سابق نائب صدر کرنل (ر) رانا آغا کمال الدین نے کی ہے مجھ ان لوگوں نے استعمال کیا ہے۔ خبریں سے جیل میں خصوصی گفتگو کرتے ہوئے فاروق حلیم نے کہا کہ مجھ کو ریونیو کے متعلق کوئی معلومات نہیں ہے خسرہ، کھتونی کے سارے معاملات یہ تینوں چیک کرتے تھے مجھ کو صرف اور صرف دستخط کے لیے بلوایا گیا تھا اور میں نے دستخط کر دیئے۔