لاہور (ویب ڈیسک) علامہ خادم حسین رضوی سمیت تحریک لبیک کی مرکزی قیادت کی گرفتاری کے بعد ترجمان پنجاب حکومت ڈاکٹر شہباز گل نے عوام کے نام اہم پیغام جاری کردیا۔شہباز گل نے ایک ویڈیو پیغام میں عوام سے درخواست کی ہے کہ امن و امان کی صورتحال کو اپنے ہاتھ میں نہ لیں۔ انہوں نے عوام کو مخاطب کرکے کہا کہ کسی بھی جگہ پر ٹریفک جام نہیں ہے۔ اگر کوئی شخص ٹریفک کو بلاک کرتا یا عوام کی املاک کو نقصان پہنچاتا نظر آئے تو اس کی اطلاع فوری طور پر ون فائیو (15) پر دی جائے۔ترجمان پنجاب حکومت نے کہا کہ خادم رضوی کو گرفتار کرلیا گیا ہے اور ان کے ساتھ ایسے تمام لوگ جو امن و امان کی صورتحال میں خلل ڈال رہے تھے انہیں وزیر اعلیٰ پنجاب عثمان بزدار اور وزیر اعظم کی ہدایت پر گرفتار کرلیا گیا ہے۔ گرفتاریاں بڑی تعداد میں کی گئی ہیں۔انہوں نے کہا کہ تحریک لبیک کے گزشتہ دھرنے میں غریبوں کا نقصان ہوا اور لوگوں کو مارا پیٹا گیا اور ان تمام کاموں میں ہمارے پیارے نبی ? کا نام استعمال کیا گیا لیکن اب کسی شخص کو امن و امان میں خلل ڈالنے کی اجازت نہیں دی جائے گی۔

لاہور(ویب ڈیسک)ملک بھر میں سیکیورٹی اداروں اور پولیس نے گذشتہ روز تحریک لبیک پاکستان کے خلاف کریک ڈاو¿ن کرتے ہوئے علامہ خادم حسین رضوی سمیت مرکزی رہنماو¿ں اور سینکڑوں متحرک کارکنوں کو حراست میں لیا ،علامہ خادم حسین رضوی کو کتنے عرصہ زیر حراست رکھا جائے گا اور اب تک ملک بھر میں تحریک لبیک کے کتنے کارکنوں کو گرفتار کیا گیا ہے ،اہم ترین معلومات منظر عام پر آ گئیں ۔تفصیلات کے مطابق امریکی خبر رساں ادارے نے اپنی رپورٹ میں ضلع لاہور کے اہم سرکاری عہدے دار کے حوالے سے انکشاف کرتے ہوے کہا ہے کہ تحریک لبیک کے سربراہ خادم حسین رضوی، ڈاکٹر اشرف آصف جلالی اور دیگر کارکنوں کو تین ایم پی اوز کے تحت حراست میں لیا گیا ہے،انہیں 30دن سے 80دن تک حراست میں رکھا جاسکتا ہے جبکہ ابتدائی طور پر خادم حسین رضوی کو تیس دن کے لیے حراست میں لیا گیا ہے۔انتظامیہ کے مطابق تین ایم پی او کے تحت پکڑے جانے والے شخص کی مدت میں ڈپٹی کمشنر لاہور کی درخواست پر چیف سیکرٹری اس کی مدت بڑھا کر ساٹھ اور اسی دن بھی کر سکتا ہے جبکہ ریویو ہائیکورٹ کا بورڈ کرتا ہے۔اسی حوالے سے گفتگو کرتے ہوئے معروف ماہر قانون بیرسٹر آفتاب مقصود کا کہنا تھا کہ آئین پاکستان کے تحت حکومت پاکستان کو یہ اختیارات حاصل ہیں کہ وہ کسی بھی شخص کو امن میں خلل ڈالنے کے شبے میں حراست میں لے سکتی ہے،ایسے زیر حراست افراد کو باقاعدہ چارج شیٹ کر کے بتایا جاتا ہے کہ انہیں کس جرم کے تحت حراست میں لیا گیا ہے؟۔ان کا کہنا تھا کہ شخصی آزادی کا یہ مطلب نہیں کہ کوئی بھی شخص عوام کو مذہبی بنیادوں پر اکسائے اور لوگوں کی املاک کو نقصان پہنچائے۔دوسری طرف آئی جی پنجاب پولیس آفس کے ایک افسر نے امریکی خبر رساں ادارے کوبتایا کہ صوبہ پنجاب میں ایک ہزار 75 افراد کو تین ایم پی او کے تحت حراست میں لیا گیا ہے، تحریک لبیک کی مرکزی قیادت اور کارکنوں کے خلاف کوئی نیا مقدمہ درج نہیں کیا گیا تمام کو پرانی درج ایف آئی آر کے تحت حراست میں لیا گیا جن میں دہشت گردی، نقص امن میں خلل ڈالنا، شہریوں کی املاک کو نقصان پہنچانا اور کارسرکار میں مداخلت سمیت دیگر دفعات درج ہیں۔a

راولپنڈی(ویب ڈیسک)انسدادِ بدعنوانی عدالت (اے سی سی) نے بحریہ ٹاو¿ن کے چیئرمین ملک ریاض اور دیگر ملزمان کی عبوری ضمانت میں 8 دسمبر تک توسیع کردی۔اے سی سی کے اسپیشل جج مشتاق احمد تارڑ نے محکمہ جنگلات کی ایک ہزار ایک سو 70 کنال اراضی پر قبضہ کیس میں ملزمان کی درخواست ضمانت کی سماعت کی، ملک ریاض کی جانب سے ان کے وکیل زاہد بخاری عدالت میں پیش ہوئے۔اس موقع پر مقدمے میں نامزد دیگر 10 ملزمان عبوری ضمانت کے لیے انسدادِ بدعنوانی عدالت میں پیش ہوئے لیکن بحریہ ٹاو¿ن کے چیئرمین ملک ریاض عدالت میں پیش نہ ہوسکے۔سماعت میں ملک ریاض کے وکیل اور جج مشتاق احمد تارڑ کے درمیان مکالمہ ہوا جس میں وکیل نے موقف اختیار کیا کہ کیس ہائی کورٹ میں زیر سماعت ہے۔ان کا کہنا تھا کہ ہائی کورٹ کا حکم ہے کہ ڈائریکٹر جنرل (ڈی جی) قومی احتساب بیورو (نیب) اور ڈی جی انسدادِ بدعنوانی آپس میں بیٹھ کر کیس کے ٹرائل کا فیصلہ کر لیں، جس پر جج نے ریمارکس دیے کہ یہ تو آپ یکطرفہ بتا رہے ہیں۔اس حوالے سے محکمہ انسدادِ بدعنوانی کے اسسٹنٹ ڈائریکٹر (اے ڈی) نے عدالت کو بتایا کہ دونوں ڈی جیز کی ملاقات ہو چکی ہے لیکن ابھی تک اس میں ہونے والے فیصلے سے ا?گاہ نہیں ہیںَاے ڈی اینٹی کرپشن نے عدالت سے استدعا کی کہ تاریخ دے دیں تاکہ اس وقت تک کلئیر ہو جائے گا کہ ٹرائل کس نے کروانا ہے۔اس پر عدالت نے ملک ریاض کی عدم حاضری کے بارے میں استفسار کیا کہ کیا مقدمے میں نامزد تمام ملزمان عدالت میں حاضر ہیں جس پر چیئرمین بحریہ ٹاو¿ن کے وکیل زاہد بخاری نے عدالت کو ا?گاہ کیا کہ ملزم ملک ریاض کو سیکیورٹی خدشات پر پیش نہیں کیا گیا۔عدالت نے کہا کہ عبوری ضمانت میں ملزم کو پیش ہونا پڑے گا جس پر ملک ریاض کے وکیل نے جواب دیا کہ آپ حکم دیتے ہیں تو ملزم پیش ہو جائے گا، جس پر عدالت نے ملک ریاض کو ساڑھے دس بجے تک عدالت میں پیش ہونے کا حکم دیا۔بعد ازاں ملک ریاض خود عدالت میں پیش ہوئے جس پر عدالت نے ان کی اور دیگر ملزمان کی عبوری ضمانت میں 8 دسمبر تک توسیع کرتے ہوئے سماعت ملتوی کردی۔پیشی کے بعد ڈان نیوز کے صحافی کے سوال کے جواب میں ملک ریاض کا کہنا تھا کہ ’ہم ڈیم فنڈ میں پورا حصہ ڈالیں گے سب سے زیادہ حصہ ہمارا ہی ہوگا‘۔تاہم جب اراضی پر قبضے کے حوالے سے صحافی نے سوال کیا تو وہ ’اللہ اللہ‘ کہہ کر سوال کو نظر انداز کرگئے۔خیال رہے کہ گزشتہ ماہ تھانہ اینٹی کرپشن سرکل راولپنڈی میں مشترکہ تحقیقاتی ٹیم (جے ا?ئی ٹی) کی سفارشات پر ملک ریاض اور دیگر کے خلاف مقدمہ درج کیا گیا تھا۔اس مقدمے میں دھوکا دہی، سرکاری ریکارڈ میں تبدیلی، مجرمانہ غفلت اور جعل سازی کی دفعات شامل کی گئیں تھیں۔مقدمے میں محکمہ جنگلات کے حکام، ریونیو افسران سمیت سابق وزیراعلیٰ پنجاب کے چیف سیکریٹری جی ایم سکندر کو بھی نامزد کیا گیا تھا، جن پر دھوکا دہی کے ذریعے زمین فراہم کرنے کا الزام لگایا گیا تھا۔خیال رہے کہ بحریہ ٹاو¿ن اور ملک ریاض کے خلاف اس سے قبل بھی ’زمین پر قبضے‘ سے متعلق مقدمات درج ہوچکے ہیں جبکہ غیر قانونی طور پر بحریہ ٹاو¿ن کو زمین کی اراضی دینے پر عدالت عظمیٰ فیصلہ بھی دے چکی ہے۔

کراچی(ویب ڈیسک)صرافہ مارکیٹ میں سونے کی فی تولہ قیمت 800 روپے اضافے سے 63 ہزار 700 روپے تک پہنچ گئی ہے۔ بین الاقوامی مارکیٹ میں سونے کی قیمت میں کمی کے باوجود پاکستان کی مقامی سونے کی قیمت میں اضافہ کا رجحان رہا اور سونے کی فی تولہ قیمت میں 800 روپے اضافہ کردیا گیا۔عالمی منڈی میں سونے کی فی اونس قیمت 7 ڈالر کمی کے بعد 1 ہزار 222 ڈالر فی اونس کی سطح پر آگئی تاہم ملکی صرافہ مارکیٹ میں سونے کی فی تولہ قیمت 800 روپے اضافے سے 63 ہزار 700 روپے تک پہنچ گئی جو ملکی تاریخ میں بلند ترین قیمت قرار دی گئی ہے، قیمتوں میں اضافے کے بعد صرافہ مارکیٹ میں سونے کی خرید و فروخت محدود ہوگئی ہے۔دوسری جانب شرح سود میں اضافہ کے خدشات کے پیش نظر سرمایہ دار اپنا سرمایہ سونے کی شکل میں محفوظ کررہے ہیں جس سے مقامی مارکیٹ میں سونے کی طلب میں بھی اضافہ دیکھا جارہا ہے۔

اسلام آباد(ویب ڈیسک)وزارت داخلہ نے وزیراعظم عمران خان کے بنی گالا گھر سمیت زون چار کے گھروں کو ریگولرائز کرنے کے لیے کیپیٹل ڈیولپمنٹ اتھارٹی (سی ڈی اے) کو خصوصی کمیشن تشکیل دینے کا حکم دے دیا۔مجوزہ کمیشن کا سربراہ ڈائریکٹر ماسٹر پلان کو بنانے کی سفارش کی گئی ہے جس میں شعبہ اربن پلاننگ اور متعلقہ شعبوں کے افسران بھی شامل ہوں گے۔ کمیشن بننے سے وزیراعظم کو نوٹس جاری کرنے والے شعبہ ون ونڈو کا اختیار عارضی طور پر معطل ہوگا۔ وزارت داخلہ نے یہ اقدام وزیراعظم کو سی ڈی اے کا نوٹس جاری ہونے کے بعد اٹھایا ہے۔گزشتہ روز سی ڈی اے نے گھر ریگولر کرانے کے خواہش مند وزیراعظم عمران خان اور 165 دیگر افراد کی درخواستوں کو نامکمل قرار دے کر ان پر اعتراضات لگاکر نوٹس جاری کیے تھے۔ عمران خان نے گھر کے دو حصوں کے نقشوں سمیت 7 سے زائد دستاویزات جمع کرائی تھیں جن میں سے ایک بھی مکمل نہیں تھی۔انہوں نے گھر کے فرد اور انتقال کے کاغذات بھی پرانے جمع کرائے جو ان کی سابق اہلیہ جمائما کے نام پر ہیں۔ وزیراعظم کو اپنے نام کا فرد و زمین کے انتقال کے تصدیق شدہ کاغذات جمع کرانے کا نوٹس جاری کیا گیا تھا۔

راولپنڈی(ویب ڈیسک) آرمی چیف جنرل قمر جاوید باجوہ نے اسپیشل سروسز گروپ ہیڈ کوارٹرز کا دورہ کیا۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے اسپیشل سروسز گروپ ہیڈ کوارٹرز پہنچنے پر یادگارِ شہداءپر حاضری دی اور پھول چڑھائے۔آئی ایس پی آر کے مطابق آرمی چیف نے یہ دورہ کرنل کمانڈنٹ کی تقریب کے لیے کیا جہاں میجر جنرل عابد رفیق کو ایس ایس جی کا پہلا کرنل کمانڈنٹ بنایا گیا۔اس موقع پر آرمی چیف نے دہشت گردی کے خلاف ایس ایس جی کے بے مثال کردار کو سراہا۔آرمی چیف جنرل قمر جاوید باجوہ نے تقریب میں موجود ریٹائرڈ، حاضر سروس اور جوانوں سے گفتگو کرتے ہوئے کہا کہ پاک فوج کی ایس ایس جی دنیا کی بہترین اسپیشل فورس ہے۔

اسلام آباد(ویب ڈیسک)وزیراعظم عمران خان نے کہا ہے کہ لاہور میں بے گھر افراد کیلئے فٹ پاتھوں پر خیمے لگادیئے گئے ،خیمے عارضی پناہ گاہ کے طور پر لگائے گئے ہیں۔سماجی رابطے کی ویب سائٹ ٹوئٹر پر اپنے پیغام میں وزیراعظم عمران خان نے تصاویر شیئر کی ہیں جن میں دیکھا جا سکتا ہے کہ سخت سردی میں لاہور میں فٹ پاتھوں پر سونے والے افراد کیلئے خیمہ لگائے جا رہے ہیں ،وزیراعظم عمران خان کا اپنے پیغام میں کہنا ہے کہ لاہور میں بے گھر افراد کیلئے فٹ پاتھوں پر خیمے لگائے جا رہے ہیں ،خیمے عارضی پناہ گاہ کے طور پر لگائے گئے ہیں۔بے گھرافرادپناہ گاہیں تعمیرہونے تک ان شامیانوں میں رہیں گے۔قبل ازیں وزیراعظم نے سماجی رابطے کی ویب سائٹ ٹوئٹر پر پیغام میں کہا تھا کہ وزیراعلیٰ پنجاب کوکہاہے کہ فٹ پاتھ پرسونے والوں کوٹینٹ اور کھانافراہم کریں،ان افرادکوشیلٹرہوم کی تعمیرتک کھانااورٹینٹ فراہم کیاجائے کیونکہ موسم مزید سردہوتا جا رہاہے، وزیراعظم نے مزید کہا کہ لاہور کے بعد پشاوراورکراچی میں شیلٹرہوم کے مقامات کاانتخاب کیاجارہاہے۔

کراچی (ویب ڈیسک) گزشتہ دنوں معروف اینکر پرسن اور تحریک انصاف کے رہنما ڈاکٹرعامر لیاقت حسین نے دوسری شادی کی تو سوشل میڈیا پر ہنگامہ برپا ہوگیا اور پھر ان کی پہلی بیٹی دعا عامر نے بھی اپنے جذبات کااظہار کیالیکن اب عامر لیاقت حسین ایک مرتبہ پھر میدان میں آگئے اور ایسی بات کہہ دی کہ پاکستانیوں کو سوچ میں ڈال دیا۔دعاعامر نے اپنی ٹوئیٹ میں لکھاتھاکہ’ ایک اوردن، ایک اور صدمہ، جب سے آپ نے اپنی فیملی کے جذبات مجروح کیے ، آپ کے لیے ہماری دعائیں ہیں، امید ہے کہ اللہ تعالیٰ آپ کو سیدھی راہ دکھائے گا، اپنے بچوں کے آنسو پونچھیں، آپ کی بیٹی شدید کرب میں مبتلاہے۔اب اس ضمن میں عامر لیاقت حسین کھل کر سامنے آگئے ہیں اور انہوں نے کہاکہ دوسری شادی ان کاشرعی حق ہے ، خانگی معاملات کو میڈیا کو اس طرح نہیں اچھالنا چاہیے اور وہ اتنی استطاعت رکھتے ہیں کہ دونوں گھرانوں کی کفالت کر سکیں۔انہوں نے کہاکہ کسی کو کچھ نہیں پتہ، اخبارات، یوٹیوب چینل وغیرہ سب لکھ رہے ہیں لیکن کوئی کیسے کسی کے گھر میں مداخلت کرسکتاہے، میں اپنے گھر کی باتیں منظرعام پر نہیں لے کر آتا، اتنا بتاناچاہتاہوں کہ بچے آج بھی میری کفالت میں ہیں،وہ گھرآج بھی میری کفالت میں ہے اور جوکچھ میں کماتاہوں، اسی وجہ سے وہ گھر چل رہاہے، آپ کو کچھ نہیں پتہ اور گھر کی اندرونی باتیں سامنے نہیں لاناچاہتا۔عامرلیاقت حسین نے کہاکہ ٹوئٹر چل رہاہے تو کیوں چل رہاہے ، پیسے ہیں تو چل رہاہے، بچے سکول جارہے ہیں، گھر جارہے ہیں، سب کچھ پرامن ہے ،جوکچھ دیگرلوگ کرنے کی کوشش کررہے ہیں، یہ سب غلط ہے۔ انہوں نے کہاکہ ہم ہندووانہ معاشرے میں رہ رہ کر اتنے تنگ نظرہوگئے ہیں کہ ہم نے دوسری شادی کو گالی بنالیا، زناآسان اور نکاح مشکل بنادیاہے ، نکاح کریں تو ہرکوئی پوچھتاہے لیکن زناکریں تو کوئی نہیں پوچھتا۔ان کاکہناتھاکہ نکاح کرنا سنت ہے اور ہم سنت کا راستہ اختیار کرنیوالے ہیں، میری زندگی ٹوئٹر اور فیس بک نہیں ، میری زندگی بچے اور اہلیہ ہیں ، مزید کوئی بات نہیں کرنا چاہتا، میرا کوئی گھر تباہ نہیں ہورہا، اللہ تعالیٰ نے دوسری شادی کو خوش آئندکام قراردیاہے، نکاح کیجئے ، زنانہیں۔