اسلام آباد (ویب ڈیسک) وزیر اعظم شاہد خاقان عباسی کا کہنا ہے کہ پارٹی ٹکٹ کا فیصلہ کوئی ایک فرد نہیں کرسکتا، چوہدری نثار کے ٹکٹ کا فیصلہ پارلیمانی بورڈ کرے گا۔ وزیر اعظم شاہد خاقان عباسی نے اپنے ایک بیان میں چوہدری نثار علی خان کو پارٹی ٹکٹ ملنے یا نہ ملنے کی پالیسی واضح کردی۔ انہوں نے کہا کہ مسلم لیگ ن میں انتخابی ٹکٹ دینے کا فیصلہ مشاورت سے کیا جاتا ہے ، پارٹی ٹکٹ کا فیصلہ کوئی ایک فرد نہیں کرسکتا بلکہ اس کیلئے مجاز فورم پارلیمانی بورڈ ہے اور وہی پارٹی ٹکٹ دینے کا فیصلہ کرتا ہے۔

پشاور (ویب ڈیسک)پشاور سمیت صوبہ خیبر پختونخوا میں زلزلے کے جھٹکے محسوس کئے گئے، جس کی شدت 5 اعشاریہ 2 ریکارڈ کی گئی ہے۔زلزلہ پیما مرکز کے مطابق رات گئے اچانک پشاور سمیت صوبے میں زلزلے کے ہلکے جھٹکے محسوس ہوئے پشاور کے علاوہ مردان،نوشہرہ،صوابی، ضلع دیر،کوہستان اور دیگر اضلاع میں بھی یہ جھٹکے محسوس کئے گئے ہیں۔جس پر لوگوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں سے باہر نکل آئے۔امریکی جیولوجیکل سروے کے مطابق زلزلے کی شدت 5.2 ریکارڈ کی گئی ہے جس کا مرکز ہندو کش کے پہاڑ تھے۔

اوکاڑہ (بیورورپورٹ)زمین کے حصول او ر انتقام نے باپ کو اندھا کر دیا معصوم بیٹی کو موت کی گھاٹ اتار کر مخالفین پر قتل کا مقدمہ درج کرا دیا خو ن تو پھر خون ہے بول اٹھا پولیس افسر کی فرض شناسی اور پیشہ وارانہ مہارت کے وجہ سے تین بے گناہ تختہ دار پر جانے سے بچ گئے ترجمان پولیس کے مطابق اوکاڑہ کے نواحی گاﺅ ں چک36اے فورایل میں محمد یٰسین کا اپنے قریبی رشتہ داروں اللہ دتہ، زوہیب اور محمد صابر کے درمیان زمین کاتنازعہ چل رہا تھا جو کہ حد براری کے عنوان سے مقدمہ بازی بھی ہورہی تھی سفاک باپ محمد یٰسین نے مقدمہ وار کو پھنسانے کے لئے اپنی معصوم بیٹی 11/12سالہ کائنات کو 30بور کے پستول سے فائرکرکے موت کی گھاٹ اتار دیا اور ڈرامہ رچانا شروع کردیاکہ اس کے مخالفین نے میری بیٹی کوہلاک کیاہے واقعہ کی اطلا ع ملتے ہی ڈسٹرکٹ پولیس آفیسر حسن اسد علوی اور ایس ڈی پی او چودھری ضیاءالحق موقع پر پہنچ گئے جہاں کے حالات و واقعات کو دیکھتے ہوئے تجربہ کار اور اندھے قتل تک کا سراغ لگانے والے پولیس آفیسرنے ڈی پی او حسن اسد علو ی کواپنے شک کا اظہار کیاجو ڈی پی او کو بھی محسوس ہورہا تھا کہ اسکا معاملہ کچھ اور ہے اس پر ڈی پی او اوکاڑہ حسن اسد علوی نے ایس ڈی پی او چودھری ضیاءالحق ، ایس ایچ اوشاہھبور نواب احمدڈوگر اور اے ایس آئی نعیم خان پر مشتمل ٹیم تشکیل دے دی اور حکم دیاکہ انہیں لمحہ بہ لمحہ تفتیش سے آگاہ کیاجائے قتل کے مقدمہ کو منطقی انجام تک پہنچانے کے لئے جو بھی وسائل درکار ہوں بتایا جائے وسائل فراہم کر دئے جائیں گے لیکن معصوم بچی کے قاتل جو بھی ہوں ان کوپولیس منطقی ا نجام تک پہنچائے بغیر سکون سے نہیں بیٹھے گی ایس ڈی پی او چودھری ضیاءالحق نے پیشہ وارانہ صلاحیتوں کو بروئے کار لاتے ہوئے اور جدید سائنسی سہولیات سے استفادہ کرتے ہوئے تمام آپشن کو پیش نظر رکھتے ہوئے تفتیش کی جس کے دوران کرائم سین یونٹ ، فرانزک سائنس لیبارٹری اور دیگر ذرائع کو استعمال کیا گیا تمام شواہد کی روشنی میںکم سن کائنات کاقاتل اس کا باپ ہی نکلا ملزم شواہد کو جھٹلا نہ سکا اور اقرار جرم پر مجبورہوگیا اور بتایاکہ وہ اللہ دتہ، زوہیب اور محمد صابر کوپھنسا کر حد براری کے مقدمہ کا فائدہ اٹھانا چاہتا تھا اور کوشش تھی کہ وہ قصاص کی مد میں بھی زمین اور رقم وصول کر لے گا جس پر اس نے اپنی ہی بیٹی کو 30بور پسٹل سے فائر مار کر ہلاک کر دیا ۔
باقی صفحہ5بقیہ نمبر

قصور (ڈسٹرکٹ رپورٹر) نو تعینات ڈی پی اوزاہد نواز مروت بھی پولیس وردی پر لگے ہوئے دھبے کو صاف نہ کرسکے۔ خبریں کی خبر پر بھی انصاف پسندی جاگ نہ سکی ،خبر کی اشاعت پر سارا دن خبریں ٹیم کو شہری حلقوں کی جانب سے فون کالز کا تانتا بندھا رہا اور مظلوموں کی آواز بننے پر خبریں کو خراج تحسین پیش کیا جاتا رہا مگر پولیس کے کانوں تک جوں نہ رینگی ۔سابق ایس ایچ او تھانہ راجہ جنگ ذوالفقار حمیدراںا ور اسکے ساتھیوں امانت ،آصف ندیم ،اکبر غنی اے ایس آئیز ،ارشد منشی ،طاہر اسلام و تین کس نامعلوم افراد کے ہاتھوں تھانہ راجہ جنگ کے علاقہ حویلی گھٹیانوالی کے رہائشی محمد اقبال کو ہلاکو خاں بن کر وحشیانہ و بدترین تشدد کر کے موت کے گھاٹ اتار دئیے جانے جبکہ اسکے ساتھ گرفتار کیے گئے اسکے بھتیجے محمد فاروق کو بھی بے تحاشہ تشدد کر کے شدیدزخمی کر نے اور محمد اقبال کی ہلاکت کے بعد اسے ڈی ایچ کیو ہسپتال قصور کی ایمرجنسی میں پھینک دئیے جانے کے 3ماہ پہلے کے واقعہ میں پولیس حکام کی مبینہ بے حسی ، سابق ایس ایچ او راجہ جنگ و دیگر ملازمین کیخلاف پورے علاقہ کی عوام میں شدید غم و غصہ پایا گیا جنہوں نے مین روڈ پر احتجاجی دھرنا دیکر روڈ بلاک کر دی تھی جس پر پولیس نے مذکورہ پولیس افسران و ملازمین کیخلاف مقدمہ قتل تودرج کر لیا تھا لیکن پندرہ دسمبر 2017ءکے بعد آج تک کسی ملزم کو گرفتار نہیں کیا جا سکا بلکہ پولیس افسران و تفتیشی غلام عباس ایس آئی اپنے پیٹی بند بھائیوں کے سرپرست بن چکے ہیں اور انہیں کھلی چھٹی دے رکھی ہے اتنے بڑے وحشت ،دہشت ،غنڈہ گردی و درندگی کے واقع کے بعد سابقہ ایس ایچ او ذوالفقار حمید و دیگر ملازمین اسی تھانہ میں پائے جاتے ہیں اور مظلوم فیملی و مقدمہ کے مدعی مقتول کے بھائی محمد منشاءاور اسکے مضروب بھتیجے فاروق کو مقدمہ واپس لینے کیلئے شدید دباﺅ ڈالا جا رہا ہے اور گواہان مقدمہ کو بھی خوف زدہ ،ہراساں ،تنگ و پریشان کیا جا رہا ہے کہ وہ اپنی گواہی سے منحرف ہوجائیں ۔پولیس سابقہ جعلی و فرضی ،خود ساختہ پولیس مقابلوں میں مارے جانے والے افراد کی طرح اس مقدمہ کو بھی دبانا و سرد خانے کی نظر کرنا چاہتی ہے جبکہ مظلوم خاندان انصاف کیلئے دربدر کی ٹھوکریں کھانے پر مجبور ہو چکا ہے لیکن کسی فورم پر بھی انکی کوئی شنوائی نہ ہو رہی ہے اور نہ ہی آج تک انصاف مل سکا ہے جبکہ مقدمہ قتل کے ملزمان بھی آزاد گھوم پھر رہے ہیں ۔مقتول کے بھائی محمد منشاءنے بتایا کہ پوسٹ مارٹم رپورٹ میں بھی ملزمان کیخلاف تشدد کر کے ہلاک کرنے کا جرم ثابت ہو چکا ہے لیکن آج تک چار ماہ کا عرصہ گزرنے فارنزک سائنس لیب لاہور سے رپورٹ موصول نہ ہو رہی ہے نہ ہی اتنے بڑے وقوعہ کے ملزمان کو گرفتار کیا جار ہا ہے یہ ظلم و بربریت کی انتہا ہے محمد منشاءنے چیف جسٹس سپریم کورٹ آف پاکستان ،چیف جسٹس لاہور ہائیکورٹ لاہور سے مطالبہ کیا ہے کہ وہ دیگر کیسز کی طرح انہیں بھی انصاف فراہم کرتے ہوئے سوموٹو ایکشن لیکر اسکے بھائی محمد اقبال کو بھینس چوری کے جعلی و فرضی مقدمہ میں جس میں قابل ذکر یہ ہے کہ مدعی مقدمہ جو کہ اس دوران عمرہ کی سعادت حاصل کرنے سعودیہ گیا ہوا تھا کی تحریری/زبانی درخواست کے نہ ہوتے ہوئے بھی بلا جواز و غیرقانونی طور پر چادر و چاردیواری کا تقدس پامال کر کے اسکے بھائی محمد اقبال اور بھتیجے فاروق کو گرفتار کر کے خون کی ہولی کھیل کر اقبال کو ہلاک کر نے اور فاروق کو شدید زخمی کرنے کے دلخراش واقعہ کا نوٹس لیکر ملزمان کو گرفتار کروائیں جبکہ وزیر اعلیٰ پنجاب میاں شہباز شریف اور آئی جی پولیس پنجاب ،ڈی آئی جی شیخوپورہ رینج سے بھی پرزور مطالبہ کیا کہ اسکے بھائی کو بے گناہ و ناحق طور پر تشدد کر کے ہلاک کرنے والے ملزمان کو فی الفور گرفتار کر کے کیفر کردار تک پہنچایا جائے۔

اسلام آباد (آن لائن) بے نظیر انکم سپورٹ پروگرام کی چیئرپرسن ماروی میمن نے مسلم لیگ (ن) چھوڑنے کا عندیہ دیتے ہوئے کہا ہے کہ غلطی کسی اور کی اور سزا کسی اور کو دی جا رہی ہے۔ ہفتہ کے روز ماروی میمن نے اپنے ٹویٹ میں اعلی قیادت کو مخاطب کرتے ہوئے کہا ہے کہ واہ لیڈر شپ واہ، غلطی کسی کی اور سزا کسی اور کو دی جا رہی ہے سیاست انسان عزت کے لئے کرتا ہے جبکہ جرم پر اکسانے والوں کو پہلے بے نقاب کرنا ہو گا پھر کسی اور کو مورد الزام ٹھہرایا جانا چاہئے۔