لاہور(بی این پی ) قومی کرکٹ ٹیم کے ہیڈ کوچ مکی آرتھر کا کہنا ہے کہ ورلڈ الیون کیخلاف تینوں میچ جیتنے کیلیے میدان میں اتریں گے۔مکی آرتھر نے کہا کہ ٹی ٹوئنٹی اسٹارز سے مزین مہمان اسکواڈ خاصا مضبوط ہے، کسی میچ کو آسان نہیں لے رہے، ورلڈ ٹی ٹوئنٹی کیلیے بہترین ٹیم تیار کرنے کی کوشش میں مصروف ہیں، اس کیلیے نوجوانوں کو زیادہ سے زیادہ موقع دینا چاہتے ہیں، انٹرنیشنل کرکٹرز کے مقابل کھیل کر ان کی صلاحیتیوں کی پرکھ ہوگی اور انہیں مستقبل کیلیے تجربہ حاصل ہو گا۔ایک سوال کے جواب میں مکی آرتھر کا کہنا تھا کہ محرومی کا شکار ملک میں انٹرنیشنل کرکٹرز کا آنا بڑا خوش آئند ہے، سیریز سے پاکستان میں انٹرنیشنل کرکٹ بحال ہوگی، ہوم گراو¿نڈز پر کھیلنے سے ملکی نوجوان کھلاڑیوں کو فائدہ ہو گا۔ ہیڈ کوچ نے کہا کہ مستقبل کیلیے کھیپ تیار کرنے میں ہوم سیریز اہم کردار اداکرتے ہیں، نوجوان کھلاڑیوں کے پاس موقع ہے کہ ورلڈ الیون کیخلاف اچھی کارکردگی دکھاتے ہوئے اپنے پرستاروں سے داد سمیٹیں۔

لاہور(بی این پی ) محمد عامر ورلڈ الیون کے خلاف پہلا میچ نہیں کھیل سکیں گے۔ٹیم منیجر طلعت علی نے کہا ہے کہ فاسٹ بولر نجی مصروفیات کی وجہ سے انگلینڈ میں موجود ہیں اور پہلے مقابلے کیلیے دستیاب نہیں ہوں گے تاہم امید ہے کہ وہ دوسرے میچ میں قومی ٹیم کو جوائن کر لیں گے۔ انہوں نے مزید کہا کہ چیمپئنز ٹرافی جیتنے کے بعد قومی ٹیم کا مورال بلند ہے، کھلاڑی جیت کا تسلسل برقرار رکھنا چاہتے ہیں، ورلڈ الیون میں دنیا کے بہترین کرکٹرز شامل ہیں اور بہت سخت مقابلے دیکھنے کو ملیں گے۔واضح رہے کہ محمد عامر کے گھر پہلے بچے کی پیدائش متوقع ہے جس کی وجہ سے وہ انگلینڈ میں موجود ہیں، خوشخبری ملتے ہی پیسر ٹیم کو جوائن کر لیں گے۔

لاہور(سپورٹس ڈیسک) ہاشم آملا پاکستان میں انٹرنیشنل کرکٹ کی بحالی کا حصہ بننے پر مسرور ہیں۔ ہاشم آملا نے کہا کہ ”پلیئرز کیلیے پاکستان میں انٹرنیشنل کرکٹ کی بحالی اہم ہے کیونکہ یہ عالمی کرکٹ کیلیے بھی اہم ہے۔ میرا پاکستان جانا میرے لیے باعث مسرت ہو گا۔“
بنگلا دیشی اوپنر تمیم اقبال نے کہا ہے کہ ”سب سے اہم یہ بات ہے کہ پاکستان کرکٹ فیملی کا حصہ ہے اور ہم ان کی انٹرنیشنل سرکل میں واپسی کیلیے مدد کی کوشش کر رہے ہیں۔“ورلڈ الیون کے کوچ اینڈی فلاور نے کہا ہے کہ ”پاکستان سے میری بہت سی خوشگوار یادیں وابستہ ہیں اور اس ملک کے لوگوں کے ساتھ میرا اچھا رشتہ ہے۔“

لاہور(بی این پی ) شعیب ملک کا کہنا ہے کہ پاکستان میں ورلڈ الیون کا آنا بہت اچھا اقدام ہے اس سے ملک میں عالمی کرکٹ کی بحالی کی راہیں کھلیں گی۔ شعیب ملک کا کہنا تھا کہ کرکٹ بورڈ کی جانب سے آزادی کپ کا انعقاد بہترین اقدام ہے پاکستان میں دنیا کے بہترین کھلاڑی آئیں گے۔اور اس اقدام سے ملک میں عالمی کرکٹ کی راہیں کھلیں گی۔شعیب ملک کا کہنا تھا کہ ورلڈ الیون سے بہت اچھا مقابلہ ہوگا تاہم بحثیت سینئر کھلاڑی بہت زیادہ دباو¿ بھی ہوتا ہے