قذافی سٹیڈیم دلہن کی طرح سج گیا 8سال بعد انٹرنیشنل کرکٹ پاکستان لوٹ آئی

لاہور (خصوصی رپورٹ) پاکستان کرکٹ پرستار کا طویل انتظار عالمی کرکٹ کے سورج‘ چاند اور ستاروں کی لاہور آمد کے ساتھ ختم ہونے جارہا ہے۔ پاکستان میں ساڑھے آٹھ سال کے طویل عرصے بعد انٹرنیشنل کرکٹ کی بحالی کے لئے ورلڈ الیون آزادی کپ میچوں میں شرکت کے لئے آج صبح سویرے دبئی سے لاہور پہنچ رہی ہے۔ سکیورٹی حکاکم نے غیرملکی کرکٹرز کی حفاظت کے لئے سخت اقدامات کئے ہیں۔ سکیورٹی انتظامات کے تحت فیصلہ کیا گیا تھا کہ دنیا کے مشہور کھلاڑیوں کو سخت پہرے میں ایئرپورٹ سے مقامی ہوٹل منتقل کیا جائے گا۔ اتوار کو پاکستانی ٹیم فائیو سٹار ہوٹل منتقل ہوگئی۔ پاکستان کرکٹ بورڈ نے اعلان کیا ہے کہ لاہور کے علامہ اقبال ایئرپورٹ پر ورلڈ الیون کی آمد کے موقع پر میڈیا سے کوئی بات چیت نہیں ہوگی۔ البتہ پاکستان کرکٹ بورڈ ٹیم کی آمد کی ویڈیو اور تصاویر جاری کرے گا۔ شام کو دونوں ٹیمیں پانچ سے آٹھ بجے تک قذافی سٹیڈیم میں پریکٹس کریں گی۔ پاکستان ٹیم کے کپتان سرفراز احمد اور ورلڈ الیون کے عمران طاہر پریس کانفرنس سے خطاب کریں گے۔ سرفراز احمد اور ورلڈ الیون کے کپتان فاف ڈوپلیسی ٹرافی کے ساتھ فوٹو سیشن میں حصہ لیں گے۔ پاکستان کرکٹ بورڈ کے چیئرمین نجم سیٹھی اور آئی سی سی ٹاسک ٹیم کے سربراہ اور ڈائریکٹر جائیلز کلارک آج مقامی ہوٹل میں پریس کانفرنس کریں گے جس کے بعد ورلڈ الیون کے کپتان فاف ڈوپلیسی اور کوچ اینڈریو فلاور پریس کانفرنس سے خطاب کریں گے۔ جائیلز کلارک کی کوششوں سے ورلڈ الیون کا دورہ ممکن ہوا ہے۔ پاکستان اور ورلڈ الیون کے مابین تین ٹی ٹوئنٹی میچوں کی سیریز کا پہلا میچ کل کھیلا جائے گا۔ میچ مقامی وقت کے مطابق رات 8 بجے شروع ہوگا۔ پہلے ٹی ٹوئنٹی کے انعقاد کے لئے قذافی سٹیڈیم لاہور میں تمام تر انتظامات مکمل کرلئے گئے ہیں۔