یمن کے دارالحکومت صنعاء میں نبی کریم حضرت محمد مصطفیٰ ﷺ کی ولادتِ باسعادت کی مناسبت سے جشن کا سلسلہ جاری ہے۔ گزشتہ چند گھنٹوں کے دوران شہر میں سبز روشنیوں سے سجی گاڑیوں کی ریلی اور جشنِ میلاد کے حوالے سے خصوصی لائٹ مارچ کا انعقاد کیا گیا۔
ریلی میں سینکڑوں گاڑیاں شریک ہوئیں جنہیں سبز قمقموں اور روشنیوں سے سجایا گیا تھا۔ دارالحکومت کے مختلف اضلاع سے آنے والی گاڑیوں پر مشتمل یہ قافلہ جنوبی صنعاء کے السبعین اسکوائر سے روانہ ہوا اور شہر کی مختلف اہم شاہراہوں کا دورہ کیا۔
ریلی کے دوران گاڑیوں پر سبز روشنیاں نمایاں تھیں، جبکہ شرکا نبی کریم ﷺ کی ولادتِ باسعادت کی خوشی کا اظہار کر رہے تھے۔ اس موقع پر صنعاء کی سڑکوں، محلوں اور اہم مقامات کو بھی سبز برقی روشنیوں سے خوبصورتی سے سجایا گیا۔
یمن کے دیگر بڑے شہروں میں بھی جشنِ میلاد النبی ﷺ کے حوالے سے خصوصی انتظامات کیے گئے ہیں۔ مختلف علاقوں میں عمارتوں، شاہراہوں اور بازاروں کو سبز روشنیوں سے مزین کیا گیا ہے، جس سے شہروں کا منظر انتہائی دلکش دکھائی دے رہا ہے۔
جشنِ میلاد کے سلسلے میں یمن میں مختلف مذہبی اور عوامی تقریبات کا انعقاد بھی کیا جا رہا ہے، جبکہ شہری بڑی تعداد میں ان تقریبات میں شرکت کرکے نبی کریم حضرت محمد مصطفیٰ ﷺ سے اپنی عقیدت و محبت کا اظہار کر رہے ہیں۔
