گلی قاضی عبدالباری والی میںغیر قانونی جمپ عوام کیلئیسردرد بن گئے

فتح جنگ (بیورو رپورٹ)گورنمنٹ گرلز ہائی سکول نمبر 1 فتح جنگ کو جانے والی شہر کی معروف گلی قاضی عبدالباری والی میں بنے غیر قانونی جمپ عوام کے لیے وبالِ جان بن گئے ہیں۔ موٹر سائیکل پر بچیوں کو سکول لے کر جانے والے افراد اکثر  جمپوں کا شکار ہو کر نہ صرف خود زخمی ہو جاتے ہیں بلکہ بچیوں کو بھی شدید چوٹیں آتی ہیں۔خاص طور پر گول گپے بیچنے والے ایک شخص نے اپنے گھر کے قریب اونچا جمپ بنا کر ساتھ پتھر بھی رکھ دیے ہیں جن کی وجہ سے عام شہریوں خصوصاً سکول جانے والی بچیوں اور ان کے والدین کو روزانہ شدید مشکلات کا سامنا کرنا پڑتا ہے۔ ان غیر قانونی رکاوٹوں کی وجہ سے متعدد حادثات رونما ہو چکے ہیں جن میں زخمی ہونے والوں کی تعداد میں اضافہ ہو رہا ہے۔مرکزی انجمن تاجران کے سینئر نائب صدر بابر حسین نے ایڈمنسٹریٹر بلدیہ اور پیرا فورس سے مطالبہ کیا ہے کہ ان غیر قانونی جمپوں کو فوری طور پر ختم کرایا جائے اور سڑک کو عوام کے لیے ہموار بنایا جائے تاکہ حادثات کی روک تھام ممکن ہو سکے۔ ان کا کہنا تھا کہ شہریوں کی جان و مال کا تحفظ انتظامیہ کی بنیادی ذمہ داری ہے اور ایسے غیر قانونی ڈھانچے کسی بھی صورت برداشت نہیں کیے جا سکتے۔مقامی رہائشیوں اور والدین نے بھی شکایت کی ہے کہ ان جمپوں کی وجہ سے سکول کے وقت رش میں حادثات کا خطرہ اور بھی بڑھ جاتا ہے۔ ان کا مطالبہ ہے کہ متعلقہ حکام فوری کارروائی کریں تاکہ بچوں اور عام شہریوں کی حفاظت یقینی بنائی جا سکے۔