امیر مقام کا پشاور میں نجی سکول کے جائے حادثے کا دورہ’ معاوضہ دوگنا کرنے اور سرکاری سکول تعمیر کرنیکا اعلان

پشاور (این این آئی) وفاقی وزیر برائے امور کشمیر، گلگت بلتستان و سیفران انجینئر امیر مقام نے پشاور دیر کالونی میں سرکاری سکول تعمیر کرنے کا اعلان کرتے ہوئے نجی سکول کے حادثے پر افسوس کا اظہار کیا ہے۔ وفاقی وزیر انجینئر امیر مقام نے جمعہ کوجائے حادثہ کا دورہ کیا اور جاں بحق ہونے والوں بچوں کے لواحقین سے اپنی طرف سے، پارٹی قائد محمد نواز شریف اور وزیراعظم محمد شہباز شریف کی جانب سے واقعے پر افسوس اور ہمدردی کا اظہار کیا۔ انہوں نے جاں بحق ہونے والوں کے ایصال ثواب کیلئے فاتحہ خوانی بھی کی۔ اس موقع پر میڈیا سے گفتگو کرتے ہوئے وفاقی وزیر انجینئر امیر مقام نے کہا کہ انہوں نے جائے حادثہ کا جائزہ لیا، یہ انتہائی افسوسناک واقعہ ہے، گارڈر پر اتنی بڑی عمارت بنا دینا اور اسے نہ دیکھنا افسوسناک ہے۔ انہوں نے کہا کہ وزیراعظم نے واقعے کی انکوائری کا حکم دیدیا ہے، اس طرح کے واقعات کی روک تھام ہونی چاہیے، دیکھا جائے گا کہ اس طرح کی عمارت بنانے کی کس نے اجازت دی۔ انہوں نے کہا کہ تحقیقات جلد مکمل کرکے ذمہ داروں کا تعین کیا جائے اور ان کو سزا دی جائے۔ وفاقی وزیر انجینئر امیر مقام نے کہا کہ گورنر خیبر پختونخوا نے جو معاوضے کا اعلان کیا ہے، اسے دوگنا کیا جائے گا۔