رگبی لیگ کے عظیم کھلاڑی اور اس کھیل کی تاریخ میں نائٹ ہڈ حاصل کرنے والے پہلے کھلاڑی سر بلی بوسٹن 92 برس کی عمر میں انتقال کرگئے۔
ویلز میں پیدا ہونے والے بلی بوسٹن نے اپنے کیریئر کا بڑا حصہ ویگن کلب کے ساتھ گزارا، جہاں انہوں نے 488 میچز میں ریکارڈ 478 ٹرائیز اسکور کیں۔ وہ برطانیہ کی نمائندگی کرنے والے پہلے غیر سفید فام کھلاڑی بھی تھے۔
انہوں نے برطانیہ کے ساتھ تین ایشز سیریز جیتیں اور 1960 کا ورلڈ کپ بھی اپنے نام کیا۔ مجموعی طور پر ان کے کیریئر میں 571 ٹرائیز شامل تھیں۔
2025 میں کنگ چارلس سوم نے انہیں نائٹ ہڈ سے نوازا، جس کے بعد وہ رگبی لیگ کی 130 سالہ تاریخ میں سر کا خطاب حاصل کرنے والے پہلے کھلاڑی بن گئے۔
ان کا انتقال اہلیہ لیڈی جان بوسٹن کی وفات کے چند ہفتے بعد ہوا۔ ویلز رگبی یونین اور ویگن واریئرز نے لیجنڈری کھلاڑی کو خراج عقیدت پیش کیا۔
