فاطمہ ثنا پُرعزم، پاکستان کی ایشیا کپ میں شاندار کارکردگی پر نظریں
پاکستان ویمنز کرکٹ ٹیم کی کپتان فاطمہ ثنا نے متحدہ عرب امارات میں ہونے والے ویمنز ایشیا کپ سے قبل ٹیم کی مسلسل اور مستقل کارکردگی کے عزم کا اظہار کیا ہے۔ ان کا کہنا ہے کہ پاکستان ہر میچ کو اہمیت دے گا اور کسی ایک حریف پر توجہ مرکوز کرنے کے بجائے پورے ٹورنامنٹ میں یکساں فوکس برقرار رکھے گا۔
فاطمہ ثنا کے مطابق ٹیم کی ایشیا کپ کے لیے تیاریاں اچھی انداز میں جاری ہیں اور کھلاڑیوں کی توجہ اپنی غلطیوں پر قابو پانے اور بہتر کارکردگی پیش کرنے پر ہے۔ ان کا کہنا تھا کہ ہر میچ اہم ہوگا اور ٹیم کسی مخصوص مقابلے کو ہدف بنانے کے بجائے پورے ٹورنامنٹ میں مستقل کارکردگی دکھانے کی کوشش کرے گی۔
پاکستان کو ایشیا کپ کے گروپ اے میں بھارت، تھائی لینڈ اور ہانگ کانگ کے ساتھ رکھا گیا ہے۔ ٹورنامنٹ 28 اگست سے 13 ستمبر تک دبئی میں کھیلا جائے گا، جبکہ پاکستان اپنا پہلا میچ یکم ستمبر کو تھائی لینڈ کے خلاف کھیلے گا۔ بھارت کے خلاف اہم مقابلہ 5 ستمبر کو شیڈول ہے۔
قومی کپتان نے دبئی کے حالات سے واقفیت کو بھی پاکستان کے لیے ممکنہ فائدہ قرار دیا۔ ان کے مطابق ٹیم نے گزشتہ سیریز کی خامیوں کا جائزہ لیا ہے اور کوشش کی جا رہی ہے کہ سابقہ غلطیوں کو دوبارہ نہ دہرایا جائے۔
فاطمہ ثنا حال ہی میں انگلینڈ کے دی ہنڈرڈ میں شرکت کرنے والی پہلی پاکستانی خاتون کرکٹر بھی بنیں۔ ان کا کہنا ہے کہ اعلیٰ معیار کے کھلاڑیوں کے خلاف کھیلنے سے انہیں قیمتی تجربہ حاصل ہوا، جو ایشیا کپ میں پاکستان کے لیے مفید ثابت ہوسکتا ہے۔
پاکستان نے ایشیا کپ کے لیے 15 رکنی اسکواڈ کا اعلان کیا ہے، جس کی قیادت فاطمہ ثنا کریں گی۔ قومی ٹیم کی نظریں ٹورنامنٹ میں مستقل کارکردگی کا مظاہرہ کرتے ہوئے ٹائٹل کے لیے مضبوط دعویٰ پیش کرنے پر ہیں۔
