راولپنڈی(خصوصی رپورٹر)پاکستان پیپلز پارٹی ورکرز (PPPW) کے صدر ڈاکٹر صفدر علی عباسی، سابق رکن قومی اسمبلی محترمہ ناہید خان، سینئر نائب صدر فیاض علی خان، ایڈووکیٹ امجد بلوچ، سیکرٹری جنرل کنور زاہد، سابق رکن صوبائی اسمبلی ساجدہ میر، حر بخاری، ابراہیم خان، ملک مظہر، عماد احمد، فرح اسلم، رانا عثمان، نوید صادق، ہاشم خان بابر اور دیگر رہنماں نے شاعرِ مشرق ڈاکٹر علامہ محمد اقبال کے یومِ ولادت کے موقع پر اپنے مشترکہ پیغام میں کہا کہ علامہ اقبال کے جمہوری افکار ایک ایسے معاشرے کی تشکیل کا درس دیتے ہیں جہاں اقتدار کا سرچشمہ عوام، قانون کی بالادستی، انسانی وقار اور سماجی انصاف ہو۔انہوں نے کہا کہ علامہ اقبال نے جمہوریت کے نام پر قائم ایسے نظام پر تنقید کی جس میں عوام کے بجائے دولت اور سرمایہ طاقت کا معیار بن جائیں۔ ان کے نزدیک حقیقی جمہوریت وہ ہے جس میں مساوات، آزادی، اخوت اور عدل و انصاف کو بنیادی اہمیت حاصل ہو اور ہر شہری کو ترقی کے یکساں مواقع میسر آئیں۔ اقبال کا تصورِ اجتہاد بھی مسلم معاشرے میں اجتماعی مشاورت، فکری آزادی اور بدلتے ہوئے حالات کے مطابق قانون سازی کی اہمیت اجاگر کرتا ہے۔پیپلز پارٹی ورکرز کے رہنماں نے مزید کہا کہ علامہ اقبال کا پیغام آج بھی پاکستان کے جمہوری مستقبل کے لیے رہنمائی فراہم کرتا ہے۔ جمہوریت صرف انتخابات کے انعقاد کا نام نہیں، بلکہ عوامی حاکمیت، آئین کی پاسداری، پارلیمان کی خودمختاری، اظہارِ رائے کی آزادی، اقلیتوں کے حقوق اور معاشی و سماجی مساوات کے تحفظ کا نام ہے۔ ملک میں جمہوری اداروں کے استحکام اور عوامی مسائل کے حل کے لیے اقبال کے افکار کو قومی زندگی میں عملی طور پر اپنانا ہوگا۔انہوں نے کہا کہ علامہ اقبال کو حقیقی خراجِ عقیدت یہی ہے کہ پاکستان کو ایک ایسی فلاحی اور جمہوری ریاست بنایا جائے جہاں ہر شہری کو عزت، انصاف اور بنیادی حقوق حاصل ہوں۔
