خیرپور کمپریہنسو ہائیر سیکنڈری اسکول کا تاریخی اسپورٹس گراؤنڈ ویران

خیرپور (نمائندہ خبریں) وفاقی حکومت، سندھ حکومت اور بین الاقوامی اداروں کی جانب سے ملک میں کھیلوں کے فروغ کے لیے کروڑوں روپےکے بجٹ مختص کیے جانے کے باوجود خیرپور کے کمپریہنسو ہائیر سیکنڈری اسکول کا تاریخی اسپورٹس گراؤنڈ انتظامی عدم توجہی اور مبینہ غفلت کے باعث بھوت بنگلے میں تبدیل ہوگیا ہے۔ گزشتہ 30 سال سے زائد عرصے کے دوران گراؤنڈ کی مناسب مرمت اور بحالی نہ ہونے کے باعث اسٹیڈیم بھی ٹوٹ پھوٹ کا شکار ہے، جبکہ ماضی کا خوبصورت اور تاریخی کھیلوں کا میدان اب ویران اور خوفناک جنگل کا منظر پیش کر رہا ہے۔ماضی میں مذکورہ گراؤنڈ میں بڑے پیمانے پر کھیلوں کے مقابلے منعقد ہوتے رہے ہیں، جہاں کھلاڑی اپنی صلاحیتوں کا مظاہرہ کرتے تھے، تاہم طویل عرصے سے دیکھ بھال اور مرمت نہ ہونے کے باعث کھیلوں کی سرگرمیاں تقریباً ختم ہوچکی ہیں۔ حیرت انگیز امر یہ ہے کہ مذکورہ گراؤنڈ ڈسٹرکٹ ایجوکیشن آفس اور ایجوکیشن ورکس کے دفاتر کے درمیان واقع ہے، اس کے باوجود متعلقہ محکموں اور انتظامیہ کی جانب سے اس کی بحالی کے لیے کوئی مؤثر اقدامات سامنے نہیں آسکے۔گراؤنڈ کی مرمت اور دیکھ بھال کے لیے مختص ہونے والے سالانہ بجٹ کے استعمال کے حوالے سے بھی مختلف سوالات جنم لے رہے ہیں کہ یہ رقم کہاں اور کیسے خرچ ہوتی رہی ہے۔ دوسری جانب حکومت کی جانب سے کھیلوں کے فروغ کے لیے ملک بھر میں کروڑوں روپے خرچ کرنے اور کھیلوں کے میدان آباد کرنے کے دعوے کیے جارہے ہیں، مگر خیرپور کے ایک تاریخی تعلیمی ادارے کا اسپورٹس گراؤنڈ تباہ حالی کا شکار ہے، جس کے باعث طلبہ اور نوجوان کھیلوں کی سہولیات سے محروم ہوکر رہ گئے ہیں۔اس سلسلے میں سینئر کھلاڑیوں اور سماجی رہنماؤں سید ڈاکٹر حسین زیدی، محمد اشرف مغل، میثم عباس، محمد افضل اور دیگر نے بتایا کہ مذکورہ گراؤنڈ کو تباہ حالی کا شکار ہوئے 30 سال سے زائد عرصہ گزر چکا ہے، لیکن سندھ حکومت، محکمہ کھیل اور دیگر متعلقہ اداروں کی جانب سے اس کی بحالی اور مرمت کے لیے خاطر خواہ اقدامات نہیں کیے جاسکے۔