اسلام آباد (آن لائن) نا اہل سابق وزیر اعظم نواز شریف اور شریف خاندان کو نیب ریفرنسز پر ملزمان قرار دینے کے حوالے سے معاملات طوالت کا شکار ہونے کا امکان ہے جبکہ اسلام آباد اور راولپنڈی کی احتساب عدالتوں میں نئے ججز تعینات کرنے کی سمری وزیراعظم آفس کو ارسال کر دی گئی ہے۔ وزارت قانون و اں صاف کے حکام کے مطابق اسلام آباد اور راولپنڈی میں دو ، دو احتساب عدالتیں قائم ہے تاہم احتساب عدالت اسلام آباد کے جج نثار بیگ اصل محکمہ میں واپس چلے گئے ہیں اور احتساب عدالت راولپنڈی کے جج راجہ اخلاق بھی رواں ماہ ذمہ داروں سے سبکدوش ہونگے جس کے باعث احتساب عدالت میں پہلے ہی دائر درجنوں کیسز التوا شکار ہے۔ حکام کے مطابق احتساب عدالتوں میں نئے ججز تعینات کرنے کیلئے سمری وزارت قانون نے وزیر اعظم آفس کو منظوری کیلئے بھجوا ئی ہے اور وزیر اعظم سمری کی منظوری کیلئے صدر مملکت کو ایڈوائس بھجوائیں گے ، حکام کا کہنا ہے کہ سید پرویز علی اور شکیل احمد کے نام احتساب عدالتوں کے جج لگانے کیلئے بھجوائے گئے ہیں ،دونوں سیشن ججز کی تقرری کا نوٹیفکیشن رواں ماہ کے آخر تک جاری کر دیا جائیگا۔جس کے تحت دونوں شہروں کی ایک ، ایک عدالت میں نئے جج تعینات ہونگے۔ ذرائع کے مطابق احتساب عدالتوں میں درجنوں کیسز زیر التو ہیں جبکہ نیب نے چاروں ریفرنسز احتساب جج محمد بشیر کی عدالت میں پیش کئے جن کی مدت بطور احتساب جج آئندہ سال مکمل ہو گی۔

اسلام آباد (مانیٹرنگ ڈیسک) حکمرانی ایک سائنس بھی ہے اور آرٹ بھی۔ پارٹی کے چند ارکان نے نواز شریف کو فوج اور سپریم کورٹ سے محاذ آرائی کا مشورہ دیا ابھی بھی وقت ہے محاذ آرائی ختم کر کے ملک کو خطرات سے بچایا جائے۔ سابق وفاقی وزیر داخلہ چوہدری نثارعلی خان نے سابق وزیراعظم نوازشریف سے اختلافات کا اعتراف کرتے ہوئے کہا ہے کہ حالیہ تین چار سال میں نواز شریف سے اختلافات آئے،محسوس کیامجھے جان بوجھ کر مشاورت سے الگ رکھا جا رہا ہے،2013 کے بعد نواز شریف کے چہرے پر متعدد بار ناراضگی دیکھی،فوج کا پانامہ معاملے سے تعلق نہیں ہے نا ہی فوج نے کوئی کردار ادا کیا،سپریم کورٹ سے محاذآرائی کر کے کوئی سیاسی مقاصد حاصل نہیں کیے جا سکتے ،ابھی وقت ہے کہ محاذ آرائی کو ترک کر کے ملک کو بین الاقوامی خطرات سے بچایا جا سکے ،میری رائے ہے کہ ابھی پانی سر کے قریب ہے،میرے مخالفین کہتے ہیں میں مغرورہوں لیکن میں مغرور نہیں ہوں بلکہ محدود رہتا ہوں ،زیادہ سوشل نہیں ہوں ، دشمنیوں اور دوستیوں کو بہت لمبا نبھاتا ہوں،ایان علی کا کیس وزارت داخلہ نہیں وزارت خزانہ کے پاس تھا،خاندانی پس منظر فوجی ہونے پر فخرہے،جنرل اسلم بیگ سے آج بھی اچھے تعلقات ہیں ۔ایک نجی ٹی وی کو دیئے گئے انٹرویو میں چوہدری نثار علی خان نے کہا کہ مجھے فخر ہے میرا خاندان اور مکمل بیک گراﺅنڈ فوجی ہے اسی وجہ سے میری سیاست میں اسکی جھلک موجود ہے۔ انہوں نے کہا کہ انا پرست نہیں ہوں بس تھوڑا ریزرو ضرور کہہ سکتے ہیں ، 1985سے میرے حلقے کے عوام مجھ پر اعتماد کرتے آئے ہیں ، نظم وضبط ، اوقات کی پابندی اور وطن سے محبت میں نے فوج سے سیکھی ، زیادہ سوشل نہیں اسلئے مخالفین مجھے مغرور کہتے ہیں مگر میں مغرور نہیں ہوں۔ چوہدری نثار علی خان نے کہا کہ 1985سے لیکر 2013تک نوازشریف کو میری کوئی تنقید گوار نہیں گزری لیکن گزشتہ چار سالوں میں ناگوار گزرنے لگی لگی ، اس دور میں ہمارے درمیان اختلافات آئے میں وفاداری سچ بات کہنے کو سمجھتا ہوں ، دوستی اور دشمنی بھی نبھاتا ہوں۔سابق وزیرداخلہ نے کہا کہ مجھے جان بوجھ کر اہم مشاورت سے دوررکھانے لگا، زیادہ اختلافات پچھلے ادوار میں پالیسی کی وجہ سے آئے اس کا ذکر کابینہ اجلاس میں کیا اور بہت سی چیزوں کا پوسٹ مارٹم کیا ، نوازشریف سے اختلافات کا ذکر میں نے کبھی نہیں کیا۔نوازشریف کے قریب ہونے کے ذریعے یہ کوشش کی ہے کہ حالات کو مینج کیا جائے ،لیکن جو راستہ چند لوگوں نے اپنایا ہے وہ غلط ہے ۔انہوں نے کہا کہ فوج کا نوازشریف کو ہٹانے میں کوئی کردار نہیں ہے ، ابھی بھی وقت ہے کہ محاذ آرائی کو ترک کر کے ملک ک خطرات سے بچایا جائے ، فوج سے محاذآرائی ترک کرنا مسلم لیگ (ن) سے زیادہ نوازشریف کے مفاد میں ہے ، پانی سر تک پہنچ چکا ہے۔انھوںنے کہاکہ جنرل بیگ سے اچھے تعلقات تھے اور ہیں مگر حکومت کی خاطر ایک بیان دیا جس کے بعد میرے تعلقات خراب ہو گئے، وہی لوگ تنقید کرتے ہیں کہ میں فوج کا آدمی ہوں جن کے پاس تنقید کرنے کیلئے کچھ اور نہیں۔انہوں نے بتایا کہ میں نے کبھی کسی سے لائن نہیں لی۔ا یک سوال کے جواب میں چوہدری نثار نے کہا کہ پرویز مشرف نے مارشل لاء لگایا تو مجھے صرف دو سال تک نظر بند رکھا گیا ، میری نظر بندی کے دوران پرویز مشر ف نے مجھ سے ملاقات کےلئے فون کیا جس سے میں نے معذرت کر لی۔ مشرف نے میرے حلقے کو دو حصوں میں تقسیم کر دیا تاکہ میں الیکشن نہ جیت سکوں ۔ ایان علی کیس سے متعلق سوال کے جواب میں چوہدری نثار نے کہا کہ ایان علی کا کیس وزارت داخلہ کے پاس نہیں بلکہ وزارت خزانہ کے پاس تھا ۔ وزارت خزانہ کے کہنے پر ایان علی کا نام ای سی ایل میں ڈالا اور نکالا جاتا رہا تھا از خود وزارت داخلہ نے ایان علی کے خلاف کوئی ایکشن نہیں لیا اسی طرح ڈاکٹر عاصم کیس میں میرا یا میری وزارت کا کوئی کردار نہیں تھا ۔ ڈاکٹر عاصم کا کیس رینجرز کے پاس تھا ۔ انہوں نے کہا کہ حکیم اللہ محسود سے مذاکرات میں فوج اور امریکہ سمیت دیگر دوست ممالک کو اعتماد میں لیا گیا تھا تاکہ ہم پر کوئی قدغن نہ آئے ۔ ڈان لیکس کے متعلق سوال کے جواب میں چوہدری نثار نے کہا کہ ڈان لیکس پر پرویز رشید کو ہٹانے میں میرا کوئی کردار نہیں ہے ۔ ڈان لیکس پرحکومت کے حق میں صرف میں بولا۔ ڈان لیکس کی ابتدائی تحقیقاتی رپورٹ آرمی نے دی اور وزیر اعظم سیکریٹریٹ کے تحت آئی بی نے تصدیق کی ۔ فوج اور وزیر اعظم کی خواہش تھی کہ ڈان لیکس کی انکوائری میں اور اسحاق ڈار کریں مگر اسحاق ڈار نے ڈان لیکس کی انکوائری میں شامل ہونے سے معذوری ظاہر کر دی اور وہ شامل نہیں ہوئی ۔انھوںنے کہاکہ کسی نے نواز شریف سے کابینہ میں ہونیوالی باتیں لیک کر دیں، کابینہ میں ہونیوالی باتیں جس نے لیک کی اس نے اپنے انداز میں کی میں نے کچھ اور باتیں بھی کی تھیں، میری کی ہوئی تمام باتیں اگر لیک ہو جاتی تو شاید میری پرسنلٹی بلڈنگ ہوتی۔ اپنی سیاسی اور عام زندگی اسلام کی روش پر چلانے کی کوشش کی ہے۔چوہدیری نثار نے کہاکہ میں تنہائی پسند ہوں، شادیوں میں نہیں جاتا، میں نے ڈسپلن اور وقت کی پابندی فوج سے سیکھا، فوجی ماحول میں پلنے بڑھنے سے اثر تو ہوتا ہے، میں کنٹونمنٹ بورڈ کے ماحول میں پلا بڑھا، میرا خاندان چار پشتوں سے فوج میں ہے، میرے والد پاک فوج میں اعلی عہدے پر تھے۔

اسلام آباد (مانیٹرنگ ڈیسک، صباح نیوز) پاکستان کی سیکریٹری خارجہ تہمینہ جنجوعہ نے میانمار کے سفیر یو ون مائینٹ کو دفتر خارجہ طلب کر کے روہنگیا مسلمانوں پر جاری ظلم و بربریت کے خلاف شدید احتجاج ریکارڈ کرا دیا۔دفترخارجہ کی جانب سے جاری کردہ اعلامیے کے مطابق پاکستان نے میانمار کی ریاست رخائن میں جاری روہنگیا مسلمانوں پو ہونے والے ظلم کے خلاف شدید احتجاج کیا۔سیکریٹری خارجہ نے میانمار کے سفیر سے روہنگیا مسلمانوں کے خلاف جاری ظلم و بربریت کو ختم کرنے کے حوالے سے مناسب اقدامات کا مطالبہ کردیا۔اعلامیے کے مطابق سیکریٹری خارجہ نے میانمار کے سفیر سے ریاست رخائن میں روہنگیا مسلمانوں کو سیکیورٹی فراہم کرنے، حقوق کا تحفظ اور انھیں بلا امتیاز اور بغیر کسی خوف کے نقل و حمل کی اجازت دینے کا بھی مطالبہ کیا۔پاکستانی وزارت خارجہ نے میانمار کے سفیر سے مطالبہ کیا کہ روہنگیا مسلمانوں کے خلاف جاری ظلم کی تحقیقات کرائی جائے اور ان کی خون ریزی میں ملوث افراد کو کیفر کردار تک پہنچایا جائے۔رخائن میں جاری تنازع کے پائیدار حل کے لیے اقوام متحدہ کے سابق سیکریٹری جنرل کوفی عنان کے کمیشن کی سفارشات کو فوری طور پر عمل درا?مد پر زور دیا گیا۔خیال رہے کہ اس کمیش کی سفارشات میں میانمار کی ریاست رخائن میں فوری طور پر جاری شورش کو ختم کرنے کے لیے اقدامات، امن بحال رکھنے، رضا کارانہ مصالحت، غیر جانبدارانہ طور پر متاثرہ لوگوں تک رسائی اور شہریت کے مسائل کے حل پر مشتمل تجاویز بھی شامل ہیں۔میانمار کے سفیر یو ون مائینٹ نے سیکریٹری خارجہ کو یقین دہانی کرائی کہ وہ میانمار حکومت تک پاکستانی حکومت اور پاکستانی عوام کے تحفظات پہنچائیں گے۔خیال رہے کہ میانمار کی ریاست رخائن میں فوجی بیس پر دہشت گردوں کے حملے کے بعد سیکیورٹی فورسز نے روہنگیا مسلمانوں کے خلاف کارروائی کا ا?غاز کردیا تھا۔میانمار کی فورسز کی کارروائیوں کے نتیجے میں اب تک 400 سے زائد افراد ہلاک ہو چکے ہیں جن میں اکثریت روہنگیا مسلمانوں کی ہے۔میانمار کی سیکیورٹی فورسز کا کہنا ہے کہ روہنگیا مسلمانوں نے ان پر حملے کیے تاہم روہنگیا مسلمان اس کی ترید کر رہے ہیں۔روہنگیا مسلمان میانمار کی فوج کے مظالم سے بچنے کے لیے پڑوسی ملک بنگلہ دیش کی جانب ہجرت کر رہے ہیں۔بنگلہ دیش میں موجود اقوامِ متحدہ کے نمائندے نے غیر ملکی خبر رساں ایجنسی کو بتایا کہ اب تک میانمار سے 3 لاکھ مسلمان گذشتہ ایک ماہ میں بنگلہ دیش ا?چکے ہیں۔انھوں نے یہ بھی بتایا کہ بنگلہ دیش پہنچنے والے افراد نے بتایا کہ ان لوگوں کو میانمار میں بربریت کا نشانہ بنایا گیا جبکہ میانمار فوج نے ان کی خواتین کو ریپ کا بھی نشانہ بنایا۔بدھ مت اکثریت کے حامل اس ملک کی فورسز کی نہتے مسلمانوں پر جاری مظالم کے خلاف پوری دنیا کی جانب سے شدید ردِ عمل سامنے آرہا ہے اور بین الاقوامی فورم پر میانمار کو شدید تنقید کا نشانہ بھی بنایا جارہا ہے۔

لاہور(صباح نیوز)لاہور کی سول عدالت میں پی ٹی آئی چیئرمین عمران خان کے خلاف وزیراعلیٰ پنجاب میاں شہباز شریف کی جانب سے دائر10 ارب روپے کے ہرجانہ کے کیس کی سماعت ہوئی۔عمران خان کی جانب سے عدالت میں کوئی جواب جمع نہیں کروایا گیا۔عدالت نے عمران خان کو دوبارہ نوٹس جاری کرتے ہوئے 25 ستمبر تک جواب طلب کر لیا ہے۔پی ٹی آئی سربراہ عمران خان نے الزام عائد کیا تھا کہ پانامہ پیپرز کیس میں منہ بند کرنے کے لیے شریف فیملی کی طرف سے انہیں دس ارب روپے رشوت کی پیشکش کی گئی تھی۔اس الزام پر وزیراعلیٰ پنجاب میاں شہباز شریف نے عمران خان کے خلاف 10 ارب روپے ہرجانے کا دعویٰ دائر کیا تھا تاہم اب تک اس دعویٰ کی جتنی بھی سماعتیں ہوئی ہیں ان میں اب تک نہ تو عمران خان کی جانب سے کوئی جواب داخل کیا گیا ہے اور نہ ہی وہ خود عدالت میں پیش ہوئے ہیں ہفتہ کے روز کیس کی سماعت سول عدالت کے جج اظفر سلطان نے کی۔دوران سماعت عدالت نے استفسار کیا کہ کیا عمران خان کی جانب سے کوئی وکیل پیش ہوا ہے تو اس پر عدالت کو بتایا گیا کہ عمران خان کی جانب سے کوئی وکیل پیش نہیں ہوا تاہم ایک جونیئر وکیل نے عدالت سے استدعا کی کہ عمران خان کی جانب سے بابر اعوان پیش ہونا چاہتے ہیں انہیں پیش ہونے کے لیے مہلت دی جائے اس پر عدالت نے عمران خان کو 25 ستمبر کے لیے دوبارہ نوٹس جاری کرتے ہوئے جواب طلب کر لیا۔

لاہور(خبرنگار) تحریک انصاف کی رہنما یاسمین راشد نے کہا ہے کہ صرف انگوٹھے کے نشان سے ووٹ کی تصدیق ہوسکتی ہے، ہم نے30 ہزار غیر تصدیق شدہ ووٹوں کا معاملہ اٹھایا ہے، معاملہ نادرا اور الیکشن کمیشن ایک دوسرے پر ڈال رہا ہے، نجی ٹی وی پروگرام میں گفتگو کرتے ہوئے انہوں نے کہا کہ ہم نے نئی لسٹیں مانگی ہیں لیکن ابھی تک نہیں ملیں، غیر تصدیق شدہ ووٹوں کا معاملہ پیر کو عدالت لے جارہے ہیں، ہمارا مقصد ہے کہ صاف وشفاف الیکشن ہوں جبکہ الیکشن کمیشن غیر جانبداری کا مظاہرہ نہیں کررہا۔ انہوں نے مزید کہا کہ مریم نواز کی ویڈیو بنانے پر لڑکی پر تشددکے واقعے کا مقدمہ درج ہوگیا ہے، پولیس فوری ملزم کو گرفتار کرے۔