کراچی: (ویب ڈیسک) اداکارہ حرا مانی طعنے دینے والے شوہر کی حمایت میں بیان دینے پر مشکل میں پڑگئیں۔
حال ہی میں اداکارہ حرا نے اپنے شوہر مانی کے ہمراہ عید کے موقع پر انٹرویو دیا۔ انٹرویوکے دوران ایک موقع پر حرا مانی ون کم کرنے اور طعنے دینے والے شوہر کے حوالے سے دئیے گئے بیان کی وجہ سے مشکل میں پڑ گئیں۔
حرا مانی نے اپنے وزن کم کرنے کے حوالے سے بتاتے ہوئے کہا ’’اس بار جو میں نے وزن کم کیا ہے میرے پاس کوئی ٹرینر نہیں تھا، میرے پاس میرا شوہر مانی تھا اور مانی نے میرا جتنا وزن کم کروایا ہے وہ پچھلے تمام ٹرینرز نہیں کرواپائے۔
حرا نے کہا میرا وزن بہت بڑھ گیا تھا اور 64 کلو گرام ہوگیا تھا، اس موقع پر مانی نے حرا سے کہا کہ تم نے ٹی وی پر اپنا ڈراما دیکھ لیا تھا نا؟ مانی کی بات کے جواب میں حرا نے کہا ہاں میں نے ٹی وی پر اپنا ایک ڈراما دیکھ لیا تھا اور ڈرامے میں خود کو دیکھ کر میں حیران رہ گئی کہ یہ کون بڑی سی آنٹی ہے۔ جس کے بعد مانی نے مجھے میرا وزن کم کرنے میں بہت مدد کی اور تین ماہ میں میراوزن 10 کلوگرام کم کروایا جو کوئی ٹرینر نہیں کرسکا۔
حرا نے مزید کہا مانی مجھے اتنے طعنے دیتا ہے کہ وہ دیکھو کترینہ کو، وہ دیکھو دپیکا کو۔۔ جس پر میں مانی کو کہتی ہوں میں دپیکا اور کترینہ نہیں ہوں میرے دو بچے ہیں، لیکن مانی پھر بھی مجھے طعنے دیتا ہے تو مجھے لگتا ہے کہ طعنے دینے والے شوہر ٹھیک ہوتے ہیں کیونکہ شوہر کے طعنے سن کر عورتیں وزن کم کرلیتی ہیں۔ حرا کی اس بات پر ان کے شوہر مانی اور میزبان دونوں ہنسنے لگے۔
حرامانی کا یہ بیان ان کے شوہر اور میزبان کو تو پسند آیا لیکن سوشل میڈیا صارفین اس بیان پر بھڑک گئے اور حرا پر تنقید کرتے ہوئے کہا کہ حرا نے ایک اور جارحانہ بیان دیا ہے جس سے ان کی ذہنیت کا اندازہ ہوتا ہے۔
صارفین نے مزید کہا اداکارہ حراکا یہ بیان انتہائی غیر ذمہ دارانہ ہے جو باڈی شیمنگ کی عکاسی کرتا ہے۔ حرا مانی کو سیکھنے کی ضرورت ہے کہ عوامی مقام پر کس طرح بات کرنی چاہیے۔

ممبئی: (ویب ڈیسک) بالی ووڈ اداکار رتیش دیش مکھ نے 13 سالہ کم عمر بچی کیساتھ زیادتی کرنے والے ایس ایچ او پر شدید برہمی کا اظہار کیا ہے۔
بھارتی میڈیا کے مطابق بھارتی فلم انڈسٹری کے معروف اداکار رتیش دیش مکھ نے حال ہی میں بھارتی ریاست اتر پردیش میں ایس ایچ او کی جانب سے 13 سالہ کم عمر بچی کو زیادتی کا نشانہ بنائے جانے کے خلاف آواز اٹھائی ہے۔
رتیش دیش مکھ نے سوشل میڈیا پر واقعے کے بارے میں کہا ’’اگر یہ سچ ہے تو اس سے بدتر کچھ اور نہیں ہوسکتا۔ اگر محافظ ہی شکاری بن جائیں تو لوگ انصاف کے لیے کہاں جائیں گے؟
اداکار رتیش دیش مکھ نے 13 سالہ بچی کے ساتھ زیادتی کرنے والے اسٹیشن ہاؤس آفیسر (ایس ایچ او) کو پھانسی دینے کا مطالبہ کرتے ہوئے کہا کہ اس طرح کے لوگوں کو سرعام سڑکوں پر لٹکایا جائے۔ انہوں نے حکومت سے درخواست کی کہ حکومت کو ایسے لوگوں کے خلاف کارروائی کرنی چاہیے اور انہیں سخت سزا دینی چاہیے‘‘۔
واضح رہے کہ بھارتی ریاست اتر پردیش میں چار افراد نے 13 سالہ کم عمر بچی کو اغوا کرکے اجتماعی زیادتی کا نشانہ بنایا تھا اور جب لڑکی ان چاروں کے خلاف شکایت درج کروانے تھانے پہنچی تو اسٹیشن ہاؤس آفیسر نے اس بچی کو زیادتی کا نشانہ بنا ڈالا۔
کیس خبروں میں آنے کے بعد 6 افراد کے خلاف مقدمہ درج کرکے ملزم ایس ایچ او کو گرفتار کرلیا گیا ہے، جب کہ اسٹیشن کے تمام پولیس اہلکاروں کو معطل کرکے ڈی آئی جی سطح کی انکوائری شروع کردی گئی ہے۔

واشنگٹن: (ویب ڈیسک) امریکن رئیلیٹی شو ’’ٹوڈلرز اینڈ ٹیاراز‘‘ سے شہرت حاصل کرنے والی اسٹار کیلیا پوسی نے اپنے ہی ہاتھوں اپنی زندگی کا خاتمہ کرلیا۔
بین الاقوامی میڈیا کے مطابق کیلیا پوسی کی عمر محض 16 برس تھی، انہوں نے مبینہ طور پر خودکشی کی ہے۔ کیلیا کی والدہ مرسی پوسی گیٹرمین جو کہ اپنی بیٹی کے اچانک انتقال کی وجہ سے صدمے میں ہیں، انہوں نے سوشل میڈیا پر اس افسوسناک خبر کا اعلان کیا۔
مرسی نے کہا کہ ان کے پاس الفاظ نہیں ہیں، ایک خوبصورت بچی چلی گئی۔ انہوں نے تمام لوگوں سے درخواست کی کہ وہ لوگ کیلیا کی موت کا غم منارہے ہیں لہذا ان کی پرائیویسی کا خیال رکھا جائے۔
واضح رہے کہ کیلیا نے اس وقت شہرت حاصل کی جب انہوں نے امریکن رئیلیٹی شو ’’ٹوڈلرز اینڈ ٹیاراز‘‘ میں شرکت کی۔ اس شو میں کئی خاندان اپنے بچوں کو مقابلہ حسن کے لیے تیار کررہے تھے۔
’’ٹوڈلرز اینڈ ٹیاراز‘‘ ایک امریکن رئیلیٹی ٹی وی سیریز ہے جو کہ 27 جنوری 2009 سے نشر ہورہا ہے۔ تاہم کچھ تنازعات کی وجہ سے یہ شو درمیان میں بند کردیا گیا تھا۔ تاہم 3 سال کے وقفے کے بعد 2016 میں اس کا سیکوئل نشر کیا گیا۔ اس شو میں بچوں کی خوبصورتی کے مقابلے میں حصہ لینے والے خاندانوں کی ذاتی زندگیوں کے بارے میں دکھایا جاتا ہے۔