اسلام آباد: (ویب ڈیسک) سپریم کورٹ آف پاکستان نے الیکشن کمیشن کو عمران خان، اسد عمر اور فواد چودھری کیخلاف کارروائی کی اجازت دیدی۔
تفصیلات کے مطابق سپریم کورٹ میں عمران خان ،اسد عمر اور فوادچودھری کیخلاف توہین الیکشن کمیشن کیس کی سماعت ہوئی، چیف جسٹس عمر عطا بندیال کی سربراہی میں بنچ نے سماعت کی۔
سپریم کورٹ نے الیکشن کمیشن کو پی ٹی آئی رہنماﺅں کیخلاف کارروائی کی اجازت دیدی، سپریم کورٹ نے کہا کہ الیکشن کمیشن کی کارروائی کے خلاف کسی ہائیکورٹ کا حکم امتناعی نہیں، الیکشن کمیشن قانون کے مطابق توہین عدالت کیس کی کارروائی کرے۔
عدالت نے کہا کہ عمران خان، اسد عمر اور فواد چودھری کو جاری کئے گئے نوٹس پر اعتراض ہے، الیکشن کمیشن کے شوکاز نوٹس پر عمل ہونا چاہئے۔
بعدازاں سپریم کورٹ آف پاکستان نے الیکشن کمیشن کی عمران خان، اسد عمر اور فواد چودھری کیخلاف توہین کی اپیل نمٹا دی۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ عمران خان کی وجہ سے خارجہ تعلقات تباہ ہوئے۔
وفاقی وزیر اطلاعات مریم اورنگزیب نے اپنے ایک بیان میں کہا ہے کہ نااہل عمران خان کی وجہ سے خارجہ تعلقات تباہ ہوئے اور اب وہ کشمیر پر سیاست کر رہے ہیں۔ سیاسی مخالفین پر ظلم کرنے والا وزیر اعظم شہباز شریف کو نہ بتائے کہ کشمیر پر کیا کرنا ہے۔
انہوں نے کہا کہ چیئرمین پاکستان تحریک انصاف (پی ٹی آئی) عمران خان نے سیاسی مخالفین پر مظالم ڈھائے جبکہ عمران خان نے ہیروں اور گھڑیوں کی سوداگری کی۔
مریم اورنگزیب نے کہا کہ عمران خان نے گورننس، معیشت اور خارجہ تعلقات تباہ کیے جبکہ عمران خان کا امریکی سازش کا بیانیہ دفن ہو گیا ہے۔

کوئٹہ: (ویب ڈیسک) پاکستان تحریک انصاف (پی ٹی آئی) کے رہنما اعظم سواتی کے خلاف درج مقدمات ختم کرنے کے لیے بلوچستان ہائی کورٹ میں درخواست دائر کردی گئی ہے۔
تفصیلات کے مطابق بلوچستان میں درج مقدمات کے خاتمے کے لیے عدالت عالیہ میں درخواست سینیٹر اعظم سواتی کے بیٹے عثمان سواتی کی جانب سے گزشتہ روز دائر کی گئی۔
دریں اثنا انصاف لائرز فورم کی جانب سے بھی سینیٹر اعظم سواتی کا ریمانڈ ہائی کورٹ میں چیلنج کردیا گیا ہے۔
واضح رہے کہ بلوچستان پولیس کی تحویل میں سینیٹر اعظم خان سواتی کے ریمانڈ کا آج دوسرا دن ہے۔ انہیں 4 دسمبر کو ضلعی عدالت کے جوڈیشل مجسٹریٹ دہم کی عدالت میں پیش کیا گیا تھا، جہاں پولیس نے اعظم سواتی کے 10 روزہ ریمانڈ کی درخواست کی تھی، تاہم جوڈیشل مجسٹریٹ نے پولیس کو 5 روزہ ریمانڈ کی اجازت دی تھی۔

اسلام آباد: (ویب ڈیسک) وزیراعظم شہباز شریف نے کہا ہے کہ آزادی اظہار رائے ہر معاشرے کیلئے ضروری ہے، صحافیوں کے حقوق کیلئے حکومت اقدامات کر رہی ہے۔
تفصیلات کے مطابق اسلام آباد میں جرنلسٹ سیفٹی فورم کے تحت تقریب سے خطاب کرتے ہوئے وزیراعظم شہبازشریف نے کہا کہ ارشد شریف کا قتل انتہائی افسوسناک واقعہ تھا، کینیا کے صدر سے ارشد شریف کی ہلاکت کے معاملے پر بات کی، صحافی ارشد شریف کی قتل کی تحقیقات کیلئے چیف جسٹس کو جوڈیشل کمیشن کیلئے خط لکھا۔
وزیراعظم نے کہا کہ تمام صحافی برادری میرے دل کے قریب ہے، صحافیوں کی سکیورٹی اور تحفظ بہت ضروری ہے، میڈیا کسی بھی جمہوری ریاست کا اہم ستون ہے، پاکستان نے صحافیوں کے تحفظ قانون سازی کی۔

لاہور: (ویب ڈیسک) سابق وزیراعظم عمران خان نے کہا ہے کہ پی ڈی ایم مافیا کی طرف سے سینٹورس مال کو سیل کرنا ظاہر کرتا ہے کہ 8 مہینے سے ملک میں جنگل کا قانون ہے۔
چیرمین تحریک انصاف عمران خان نے سینٹورس مال کو سیل کرنے پر تنقید کرتے ہوئے ٹوئٹ کی ، جس میں لکھا کہ سینٹورس کو وزیر اعظم آزاد کشمیر کی طرف سے شہباز شریف پر تنقید کی وجہ سے سیل کیا گیا، وزیر اعظم آزاد کشمیر نے کہا تھا کہ شہباز شریف نے کشمیریوں کی قربانی کا ذکر نہیں کیا
انہوں نے مزید کہا کہ ایسی انتقامی کارروائیوں سے کشمیریوں کو بھی منفی پیغام دیا جاتا ہے۔

لاہور: (ویب ڈیسک) پی ٹی آئی کی جانب سے اسمبلیاں تحلیل کرنے کے اعلان کے بعد سیاسی میدان میں مشاورت ، مذاکرات اور رابطوں کا سلسلہ جاری ہے۔
چیئرمین پی ٹی آئی عمران خان نے قبل از وقت انتخابات کے مطالبہ پرپنجاب اور خیبر پختونخوا کی اسمبلیاں تحلیل کرنے کا اعلان کر رکھا ہے۔ تاہم اس پر عملدرآمد سے پہلے اتحادی جماعت ق لیگ اور پی ٹی آئی کے اندر مشاورت کا سلسلہ جاری ہے حکومت سے مذاکرات بھی کیے جا رہے ہیں۔ دوسری جانب حکومت نے اسمبلیوں کی تحلیل روکنے کے لیے رابطے تیز کردیے ہیں۔
تحریک انصاف کے منتخب ارکان قومی و صوبائی اسمبلی نے عمران خان کے اسمبلیوں کی تحلیل کے فیصلے کی حمایت کردی ہے۔
لاہور میں چیئرمین تحریک انصاف عمران خان کی زیرِصدارت اہم اجلاس ہوا جس میں پی ٹی آئی کے ارکان قومی و صوبائی اسمبلی نے شرکت کی۔
اجلاس میں ملکی سیاسی صورتحال، اسمبلیوں کی تحلیل اور آئندہ انتخابات کی تیاریوں کے حوالے سے تفصیلی تبادلہ خیال کیا گیا۔ شرکا نے اسمبلیوں کی تحلیل کے عمران خان کے فیصلے کی بھرپور حمایت کا اعلان کیا۔
شرکا نے فوری انتخابات کے انعقاد کو ناگزیر قرار دیا ہے۔ اجلاس میں انتخابات کو التواء میں ڈالنے کی ہر کوشش کی بھرپور مزاحمت پر بھی اتفاق کیا گیا ہے
تحریک انصاف کو اسمبلیاں توڑنے کے لیے اسحاق ڈار کے جواب کا انتظار ہے۔ فوادچودھری کا کہنا ہے کہ جواب نہ آیا تو بیس دسمبر تک اسمبلیاں توڑ دیں گے۔
انہوں نے کہا صدرعارف علوی اور اسحاق ڈار کی دوملاقاتیں ہوئی ہیں۔ اسحاق ڈار نے کہا الیکشن پر بات کرنے کے لئے تیار ہیں۔
ان کا کہنا ہے کہ ہم کہتے ہیں اعلان کریں وہ کہتے ہیں بیٹھ کر بات کرلیتے ہیں۔ اسحاق ڈار نے صدر کو کہا تھا نوازشریف سے مشاورت کرکے آپ کو بتاؤں گا۔ لیکن ابھی تک بات آگے نہیں بڑھی۔
دوسری جانب  پنجاب اسمبلی کو تحلیل ہونے سے بچانے کے لیے آصف زرداری نے سیاسی رابطے تیز کردئیے ہیں۔سابق صدر آصف زرداری نے مسلم لیگ ق کے سربراہ چودھری شجاعت حسین سے ان کی رہائش گاہ پر ملاقات کی اور سیاسی صورتحال پر صلاح مشورے کیے۔
اس سے پہلے آصف زرداری ، نواز شریف، اور مولانا فضل الرحمان کے درمیان ٹیلی فونک رابطہ ہوا۔ تینوں رہنماؤں نے موجودہ سیاسی صورتحال پر تبادلہ خیال کیا۔
تینوں کے درمیان پنجاب حکومت سے متعلق بھی مشاورت کی گئی۔ ذرائع کے مطابق، تمام اتحادی جماعتوں کو فیصلوں پر اعتماد میں لینے کا فیصلہ کیا گیا۔

کوئٹہ: (ویب ڈیسک) پاکستان تحریک انصاف (پی ٹی آئی) رہنما شہباز گل کے خلاف بلوچستان میں درج مقدمے میں انہیں پولیس نے طلب کرلیا۔
تفصیلات کے مطابق پی ٹی آئی رہنما شہباز گل کے خلاف ضلع قلعہ عبداللہ میں ایف آئی آر درج ہے جس میں پیکا ایکٹ کے تحت 7 دفعات شامل کی گئی ہیں۔
پولیس کا کہنا ہے کہ مقدمے کی روشنی میں شہباز گل کو آگاہ کرنے کے ساتھ انہیں طلب بھی کرلیا گیا ہے، تاہم اگر وہ نہیں آتے تو گرفتار کریں گے۔
حکام کے مطابق شہباز گل نے کوئٹہ آنے کی ہامی بھری ہے، لیکن شہباز گل کے کوئٹہ نہ آنے کی صورت میں بلوچستان پولیس کی ٹیم ان کی گرفتاری کے لیے جائے گی۔