اسلام آباد: (ویب ڈیسک) حکومت گوگل کو ادائیگی پر رضا مند ہو گئی ۔ صارفین کے لیےموبائل اکاؤنٹ کی مدد سے گوگل پلے سٹور تک رسائی معطل نہیں ہو گی۔
وزارت خزانہ اسحاق ڈار نے وزیر آئی ٹی امین الحق کی تجویز مان لی۔ حکومت گوگل کو ادائیگی پر راضی ہو گئی۔ وزیر آئی ٹی امین الحق کا کہنا ہے کہ ادائیگیاں شیڈول کے مطابق کی جاسکیں گی، پیڈ گوگل ایپس بند نہیں ہونگی۔
وزیر آئی ٹی امین الحق سے معاون خصوصی خزانہ طارق باجوہ نے رابطہ کیا ہے۔ امین الحق کا کہنا ہے کہ اسٹیٹ بینک کو ہدایت کردی گئی کہ ایک ماہ تک پالیسی پر عملدرآمد مؤخر کردیں۔ٹیلی کام آپریٹرز کو ادائیگیوں کے طریقہ کار پر عمل کیلئے ایک ماہ کا وقت دیدیا گیا۔
ایک ماہ میں وزارت آئی ٹی، خزانہ اور اسٹیٹ بینک باہمی مشاورت سے لائحہ عمل مرتب کریں گے۔ٹیلی کام آپریٹرز نے وزارت آئی ٹی سے معاملے پر معاونت کی اپیل کی تھی۔وزیرخزانہ اسحاق ڈار کو ادائیگیاں کرنے اور ٹائم فریم دینے کیلئے مراسلہ لکھا تھا۔
پاکستان کے سٹیٹ بینک کی جانب سے ڈائریکٹ کیریئر بلنگ یعنی براہ راست ادائیگیوں کے نظام کو معطل کرنے کا فیصلہ کیاگیا تھاجس کے بعد پاکستانی صارفین اپنے موبائل فون اکاؤنٹ میں موجود رقم کے ذریعے گوگل پلے سٹور سے اپلیکیشنز ڈاون لوڈ نہیں کر پاتے۔
فیصلے پر عملدر آمد کی صورت میں صارفین کو ڈیبٹ کارڈ اور کریڈٹ کارڈ کے ذریعے گوگل پلے سٹور سے ایپس ڈاون لوڈ کرنا پڑتی۔
ٹیلی کام کمپنیوں کی جانب سے وفاقی حکومت کو لکھے گئے ایک مشترکہ خط میں اس کی نشاندہی کی گئی تھی کہ ادائیگی کے اس نظام کی معطلی سے پاکستان میں عالمی اداروں گوگل، ایمازون اور میٹا وغیرہ کی جانب سے پیش کی جانے والی خدمات متاثر ہوں گی اور اس سے ملک کے ٹیلی کام اور انفارمیشن ٹیکنالوجی کے شعبے متاثر ہونے کا خدشہ ہے۔
جس کے بعد حکومت نے ٹیلی کام کمپنیوں کی درخواست منظور کرتے ہوئے ایک ماہ کے لیے گوگل کو ادائیگی کا فیصلہ کیا ہے۔ ایک ماہ کے اندر ادائیگیوں کے طریقہ کار پر پالیسی مرتب دی جائے گی۔

کراچی: (ویب ڈیسک) کراچی کے علاقے ٹیپو سلطان میں پولیس نے کارروائی کر کے دو سالہ بچی کو بازیاب کرا کر خاتون اغوا کار کو گرفتار کر لیا۔
پولیس کے مطابق ایڈمن سوسائٹی سے 2 سالہ بچی پراسرار طور پر لاپتہ ہوئی، بچی کی گمشدگی کی اطلاع پر پولیس نے گھر کے سامنے لگے سی سی ٹی وی کیمروں کی فوٹیج کی مدد سے ملزمہ کو شناخت کیا۔
فوٹیج میں خاتون کو بچی کو لے کر جاتے دیکھا گیا ہے، پولیس کا کہنا ہے کہ ملزمہ شائستہ جائے وقوعہ کے قریب کے گھر کی ملازمہ نکلی، بچی کو بازیاب کروا کر والدین کے حوالے کر دیا گیا ہے۔

اسلام آباد: (ویب ڈیسک) وزیراعظم میاں شہباز شریف نے کہا ہے کہ پاکستان پر امن افغانستان کا خواہاں ہے، بین الاقوامی برادری افغانستان کی صورت حال میں بہتری کے لیے اپنا کردار ادا کرے۔
وزیراعظم میاں شہباز شریف سے وزیر مملکت خارجہ امور حنا ربانی کھر نے ملاقات کی ،ملاقات کے دوران وزیر مملکت نے اپنے حالیہ دورہ افغانستان کے حوالے سے وزیراعظم کو آگاہ کیا۔
اس موقع پر وزیراعظم شہباز شریف نے کہا کہ پاکستان ایک پر امن افغانستان کا خواہاں ہے، بین الاقوامی برادری افغانستان کی صورت حال میں بہتری کیلئے اپنا کردار ادا کرے۔
وزیراعظم شہباز شریف نے کہا کہ پاکستان افغان بھائی بہنوں کی ہر ممکن مدد اور حمایت جاری رکھے گا۔

اسلام آباد: (ویب ڈیسک) وفاقی وزیر رانا ثناء اللہ نے کہا کہ کالعدم تنظیم ٹی ٹی پی کا دہشتگردی میں ملوث ہونا خطے کیلئے خطرہ ہے ۔
اسلام آباد میں پریس کانفرنس کرتے ہوئے وفاقی وزیر رانا ثناء اللہ نے کہا کہ اگرکالعدم تنظیم ٹی ٹی پی پاکستان کے اندر دہشتگردی کی کارروائیوں میں ملوث پائی جائے اور حملوں کی ذمہ داری بھی قبول کرے تو یہ خطرناک چیز ہے اور اس حوالے سے پاکستان کی حکومت اقدامات کررہی ہے ۔
وفاقی وزیر نے کہا کہ بلوچستان میں ہونے والا حملہ قابل مذمت ہے، ٹی ٹی پی پاکستان میں دہشتگردی میں ملوث ہے، مسائل کے حل کیلئے ضروری ہے کہ اس سے پہلے وفاقی حکومت معاملات اپنے ہاتھ میں لے صوبائی حکومتوں کو چاہیے کہ مسائل کے حل کیلئے موثر اقدامات کریں ۔
ان کا کہنا تھا کہ وفاقی حکومت صوبائی حکومتوں کی مدد کیلئے ہر طرح سے تیارہے، بالخصوص بلوچستان اور کے پی میں ضرورت ہے کہ انتظامیہ اس معاملات کو سنجیدہ لے ۔
انہوں نے کہا کہ سیاسی معاملات چلتے رہتے ہیں مگر ریاست مقدم ہے، وزیر اعلیٰ کے پی کی ذمہ داری ہے جو مدد درکار ہو وہ لیں ،جہاں فورسز کی مدد کی ضرورت ہے ہم صوبوں کی مدد کریں گے ۔