لاہور: (ویب ڈیسک) پاکستان تحریک انصاف کی اعلیٰ سطحی کمیٹی نے صوبائی اسمبلیوں کی تحلیل کے معاملے پر اپنی سفارشات تیار کرلیں۔
ذرائع کے مطابق پاکستان تحریک انصاف (پی ٹی آئی) کے وائس چیئرمین شاہ محمود کی زیرصدارت اجلاس ہوا جس میں میاں اسلم اقبال، محمود الرشید، حماد اظہر اور اعجاز چودھری سمیت دیگر ارکان شریک ہوئے۔
ذرائع کا کہنا ہے کہ کمیٹی کے ارکان کی جانب سے 20 دسمبر تک اسمبلیاں تحلیل کرنے کی سفارش کی گئی ہے جبکہ پنجاب سے تعلق رکھنے والے کچھ ارکان نے فوری اسمبلیاں تحلیل نہ کرنے کا مشورہ دیا ہے۔
ارکان نے رائے دی کہ سیاسی کارڈز کھیلتے ہوئے ٹائمنگ کو مد نظر رکھا جائے، اسمبلیوں کی تحلیل تب کی جائے جب وفاق اوردیگرصوبوں کی اسمبلیاں تحلیل کرنے کے لیے دباؤ بڑھ سکے، اس وقت حلقوں میں ترقیاتی کاموں کے لیے اربوں روپے مالیت کے ٹیندرز ہوچکے ہیں اور متعدد حکومتی منصوبے تکمیل کے آخری مراحل میں ہیں۔
ذرائع نے بتایا کہ کمیٹی کی سفارشات پر پارلیمانی بورڈز کے اجلاسوں کے بعد تاریخ کا حتمی فیصلہ عمران خان کریں گے۔
دوسری جانب چیئرمین پی ٹی آئی کے ساتھ اہم سیاسی رہنماؤں کی ملاقات کا سلسلہ جاری ہے، عمران خان آج زمان پارک لاہور میں اپنی رہائش گاہ پر موجود ہیں، جہاں اہم سیاسی رہنما ان سے ملاقات کریں گے، وزیراعلیٰ پنجاب چودھری پرویز الٰہی بھی آج سابق وزیراعظم سے اہم ملاقات کریں گے۔
عمران خان سے وزیر اعلیٰ کی ملاقات میں پنجاب اسمبلی کی تحلیل سمیت دیگر امور پر مشاورت ہوگی جبکہ چودھری پرویز الٰہی عمران خان کو اپنی مکمل حمایت کا اعادہ کریں گے۔
ذرائع کے مطابق پی ٹی آئی پارلیمانی پارٹی کا اجلاس کل دوپہر اڑھائی بجے 90 شاہراہِ قائد اعظم ایوان وزیراعلیٰ میں ہو گا جس میں ارکان اسمبلی سے اسمبلیوں کی تحلیل کے معاملے پر رائے لی جائے گی۔

اسلام آباد: (ویب ڈیسک) الیکشن کمیشن آف پاکستان نے ملک میں عام انتخابات کیلئے تیاریاں شروع کردیں۔
ذرائع الیکشن کمیشن کے مطابق آئندہ عام انتخابات میں خصوصی فیچرز پر مبنی بیلٹ پیپرز استعمال کرنے کا فیصلہ کیا گیا ہے، جبکہ واٹر مارک بیلٹ پیپرز کا بھی استعمال کیا جائے گا۔
واضح رہے کہ گزشتہ عام انتخابات میں 22 کروڑ بیلٹ پیپرز چھاپے گئے تھے، اس بار عام انتخابات کے لئے 24 کروڑ بیلٹ پیپرز چھاپنے کا امکان ہے جبکہ ملک میں رجسٹرڈ ووٹرز کی تعداد 12 کروڑ 21 لاکھ سے زائد ہے۔
یاد رہے کہ الیکشن کمیشن کی رپورٹ کے مطابق گزشتہ عام انتخابات میں ملک بھر میں ووٹرز کی تعداد 11 کروڑ 82لاکھ تھی۔

لاہور : (ویب ڈیسک) صوبائی وزیر صحت ڈاکٹر یاسمین راشد نے کہا کہ معیشت کا بیڑا غرق ہو گیا، ملک ڈیفالٹ کی طرف جا رہا ہے۔
تفصیلات کے مطابق صوبائی وزیر صحت ڈاکٹر یاسمین راشد نے میڈیا سے گفتگو کرتے ہوئے کہا کہ 2 دفعہ کے وزیراعلیٰ نے اعلان کیا ہے عمران خان کے کہنے پر اسمبلی تحلیل کردوں گا، سار ے پاکستان کی خواتین ہمارے ساتھ کھڑی ہوئی ہیں، اس طرح کے ظلم کے ضابطے ہم برداشت نہیں کرسکتے۔
انہوں نے کہا کہ مرد پولیس نے مجھے گھسیٹا، ہماری سینکڑوں عورتوں کے ساتھ برا رویہ اختیار کیا گیا، خواتین اگر پاکستان کی آزادی میں شمولیت نہ کرتیں تو شاید پاکستان آزاد نہ ہوتا۔25مئی کو عورتوں اور بچوں پر زیادتی کسی کے سامنے ڈھکی چھپی نہیں۔
میڈٰیا سے گفتگو کرتے ہوئے ان کا مزید کہنا تھا کہ ڈیزل فضل الرحمان سے زیادہ گھٹیا انسان کوئی نہیں،اس کے خلاف ایف آئی آر درج کریں گے، اعظم سواتی کو پھر پکڑ کر لے گئے، اس سے بڑی فاشسٹ حکومت اور کوئی نہیں ہوسکتی، ویڈیو کے بعد وہ بزرگ انسان آنسوؤں سے روتا تھا۔
صوبائی وزیر نے کہا ہے کہ رانا ثنااللہ جس طرح تم نے زیادتی کی وہ ریکارڈ پر موجود ہے، امپورٹڈ حکومت کو شرم اور حیا آنی چاہیے، ہماری طرف سے پٹیشن دائر ہورہی ہے، جو ظلم سواتی اور ان کے خاندان پر ہوا اس پر ہم چاہتے ہیں سپریم کورٹ سوموٹو ایکشن لے، خواتین کی چادر اور چاردیواری کے تحفظ کو یقینی بنایا جائے۔

پشاور: (ویب ڈیسک) وزیراعلیٰ سیکرٹریٹ خیبرپختونخوا میں 35 سے زائد گھوسٹ ملازمین کا انکشاف ہوا ہے۔
آڈیٹر جنرل آف خیبر پختونخوا کی آڈٹ رپورٹ کے مطابق غیرضروری اخراجات اورشاہ خرچیوں کی مد میں صوبائی خزانے کو کروڑوں کا نقصان ہورہا ہے۔
آڈٹ رپورٹ میں مزید انکشاف ہوا ہے کہ بیورو کریسی نے وزیراعلیٰ کو بےخبررکھ کرفنڈزنکالے۔ بیورو کریسی کی شاہ خرچیوں سے خزانہ کو 25 کروڑ52 لاکھ روپے سے زائد کا نقصان ہوا۔ فنڈز سے نکالے گئے 17 کروڑ روپے سے زائد کا ریکارڈ بھی موجود نہیں ہے۔
رپورٹ کے مطابق قبائلی اضلاع کا فنڈ بندوبستی اضلاع میں خرچ کیا گیا۔ 76لاکھ 50 ہزار روپے قبائلی اضلاع کی بجائے بندوبستی اضلاع میں تقسیم کئے گئے۔ فنڈ سے نکالے گئے 17 کروڑ روپے کی تصدیق نہ ہوسکی۔ دھوکہ دہی سے ایک کروڑ 81 لاکھ سے زائد روپے نکلوائے گئے۔

لاہور : (ویب ڈیسک) پنجاب اسمبلی کب تحلیل کی جائے ؟ حتمی فیصلہ آج عمران خان اور وزیراعلیٰ پنجاب چودھری پرویز الہیٰ کی ملاقات میں ہو گا۔
ذرائع کے مطابق ہفتے کے روز خیبرپختون خوا کے اراکین کی عمران خان سے ملاقات شیڈول ہے، سینئر وزیر پنجاب میاں اسلم اقبال نے کہا ہے کہ ہم جابرابہ نظام کا مزید حصہ نہیں رہنا چاہتے۔
سینئر وزیر پنجاب میاں اسلم اقبال نے میڈیا ٹاک کرتے ہوئے کہا کہ پہلی اپوزیشن ہے جو کہتی ہے اسمبلیاں تحلیل نہ کرو، اپوزیشن کے 70 فیصد کیسز ختم ہو چکے ہیں یہ باقی کیسز بھی ختم کرانا چاہتے ہیں، آج عمران خان اور پرویز الہی کی ملاقات ہے جس میں اسمبلی توڑنے کے وقت کا تعین ہو گا، ہفتے کو کے پی ممبران اسمبلی لاہور عمران خان سے ملیں گے۔
انہوں نے مزید کہا کہ ان ملاقاتوں کے بعد حتمی تاریخ کا اعلان کر دیں گے، 18 ویں ترمیم بنانے والے اس پر عمل بھی کر لیں وہ صوبوں کو کام نہیں کرنے دے رہے، ہم جابرابہ نظام کا مزید حصہ نہیں رہنا چاہتے، اس نظام سے نکل رہے ہیں، سڑکوں سے زیادہ اہم پارک ہیں۔