ہوائی: (ویب ڈیسک) امریکی ریاست ہوائی میں موجود دنیا کا سب سے بڑا فعال آتش فشاں ماونا لوا تقریباً 40 سال بعد پھٹ پڑا،آتش فشاں کے اخراج سے فی الحال رہائشی آبادی کو خطرہ نہیں۔
غیر ملکی میڈیا رپورٹس کے مطابق آتش فشاں ماونا لوا سے لاوے کا بہاؤ زیادہ تر چوٹی کے اندر موجود ہے لیکن ارد گرد کے رہائشیوں کو گیسز کے اخراج اور راکھ گرنے کے خطرے کے بارے میں پیشگی خبردار کردیا گیا تھا۔
ہنگامی امدادی حکام کا کہنا ہے کہ فی الحال انخلا کے لیے کوئی احکامات جاری نہیں کیے گئے ہیں اور آبادی والے علاقوں کے ابھی متاثر ہونے کا امکان نہیں ہے۔
امریکی جیولوجیکل سروے کا کہنا ہے کہ لاوے کے بہاؤ کا مقام اوررفتار تیزی سے تبدیل ہو سکتی ہے۔

ریاض: (ویب ڈیسک) سعودی عرب نے دارالحکومت ریاض میں تیز رفتار ترقی کو فروغ دینے اور ساتھ ہی ساتھ ایوی ایشن کو جدید بنانے کے شاہی عزائم کی تکمیل کو مد نظر رکھتے ہوئے نئے ہوائی اڈے کی تعمیر کے منصوبے کا اعلان کیا ہے۔
سعودی خبر رساں ادارے کے مطابق نئے ہوائی اڈے کا نام 86 سالہ شاہ سلمان کے نام پر رکھا جائے گا۔ یہ اعلان ان کے بیٹے ولی عہد شہزادہ محمد بن سلیمان نے کیا ہے جو عملی طور پر سعودی عرب کے حکمران ہیں۔
ایئرپورٹ کو اس انداز میں تعمیر کیا جائے گا کہ 2030 تک یہ سالانہ 12 کروڑ مسافروں کا بوجھ اٹھانے کے قابل ہو گا اور 2050 تک یہ ایئر پو ٹ 18 کروڑ مسافروں کو آمد و رفت کی سہولت فراہم کر سکے گا۔
سرکاری خبر رساں ادارے کے مطابق ہوائی اڈے کا منصوبہ سعودی عرب کے تصور کے مطابق ہے ریاض کو دنیا کے 10 بڑے شہروں کی معیشتوں میں شامل کیا جائے اور 2030 تک ریاض کی آبادی ڈیڑھ سے دو کروڑ تک پہنچنے اور انہیں شہری سہولیات مہیا کرنے میں مدد فراہم کی جا سکے۔ اس وقت ریاض کی آبادی 80 لاکھ سے بھی کم ہے۔
سعودی عرب کے ہوا بازی کے اہداف، شہزادہ محمد کی “وژن 2030” نامی وسیع اصلاحات کا حصہ ہیں، جن میں اس دہائی کے آخر تک سفر کی گنجائش تین گنا بڑھا کر سالانہ ٹریفک کو 33 کروڑ مسافروں تک لانا ہے۔ اس وژن میں 2030ء تک اس شعبے میں 100 ارب ڈالر کی سرمایہ کاری کرنا، ایک نئی قومی ایئر لائن قائم کرنا اور ہر سال 50 لاکھ ٹن سامان کی نقل و حمل بھی شامل ہے۔
ایس پی اے کا کہنا ہے کہ ایئر پورٹ عالمی لاجسٹک کے ایک مرکز کے طور پر ریاض کی پوزیشن کو فروغ دے گا، نقل و حمل، تجارت اور سیاحت میں پیش رفت کرے گا، اور مشرق کو مغرب سے ملانے والے ایک اہم رابطے کے طور پر کام کرے گا۔ اعلان میں اس منصوبے کی لاگت کے بارے میں معلومات فراہم نہیں کی گئیں جسے 57 مربع کلومیٹر کے احاطے پر تعمیر کیا جائیگا۔
اس وقت سعودی عرب کا مصروف ترین بین الاقوامی ہوائی اڈہ بحیرہ احمر کے ساحلی شہر جدہ میں قائم ہے، جو لاکھوں مسلمانوں کے حج اور عمرہ کی ادائیگی کے لیے استعمال ہوتا ہے اور یہ ایئرپورٹ گیٹ وے ٹو مکہ کے نام سے بھی موسوم ہے۔
سعودی حکام اب وسطی سعودی عرب میں واقع ریاض کو متحدہ عرب امارات کے معاشی اہمیت کے شہر دبئی کے مقابل لانے کی کوشش کر رہے ہیں۔

نیویارک: (ویب ڈیسک) اقوام متحدہ کے سیکرٹری جنرل انتونیو گوتریس نے حیاتیاتی ہتھیاروں سے تباہی کو روکنے کے لیے 3 شعبوں میں موجودہ دور کے مطابق اقدامات کرنے کی اپیل کی ہے۔
غیر ملکی خبر رساں ادارے کے مطابق یہ اپیل انہوں نے جنیوا میں منعقدہ حیاتیاتی ہتھیاروں کے کنونشن کی 9ویں جائزہ کانفرنس میں شرکا سے اپنے وڈیو پیغام میں کی۔
انہوں نے کہا کہ کنونشن کے اقدامات کا پہلا شعبہ احتسابی عمل کو یقینی بنانا ہے تاکہ سائنسی پیشرفت اور ٹیکنالوجی کو دشمنی کے مقاصد کے لیے نہیں بلکہ انسانیت کے فائدے کے لیے استعمال کیا جائے کیونکہ امن سائنسی ترقی اور تعاون کا مرکزہے۔
ان کا کہنا تھا کہ اقدامات کے لیے دوسرے، موجودہ خطرات سے نمٹنے کی استعداد کی تصدیق اور اس پر عملدرآمد کے حوالے سے سوچ کو بہتر بنانا کیونکہ گزشتہ 5 دہائیوں میں دنیا ڈرامائی طور پر تبدیل ہوئی ہے اور کنونشن کو اس کے مطابق بدلنا چاہیے۔
انہوں نے کہا کہ تیسرا یہ کہ کنونشن کو اس اہم کام کو انجام دینے کے لیے درکار مالی اور انسانی وسائل میں اضافہ کرنا چاہیے۔
اقوام متحدہ کے سیکرٹری جنرل نے کہا کہ دنیا کیمیائی ہتھیاروں اور جوہری پھیلاؤ کے خلاف بڑی عالمی طاقتوں کی حمایت کرتی ہے، ہمیں حیاتیاتی ہتھیاروں کے لیے بھی ایسا ہی کرنا چاہیے اور کنونشن کے بجٹ میں نمایاں اضافہ کرنا چاہیے۔
انہوں نے کہا کہ اب وقت آگیا ہے کہ ان ہتھیاروں کی ترقی اور استعمال کے ہر راستے کو بند کیا جائے، 50 سال قبل جب حیاتیاتی ہتھیاروں کا کنونشن دستخط کے لیے کھلا تھا، عالمی برادری ایک صف پر کھڑی ہوئی اور اعلان کیا کہ جان بوجھ کر امراض کی روک تھام کو بطور ہتھیار استعمال کرنا انسانیت کی توہین ہے اور یہ کنونشن انسانیت کے ضمیر کی توثیق کرتا ہے۔
ان کا کہنا تھا کہ حیاتیاتی ہتھیار سائنس فکشن کی پیداوار نہیں ہیں، یہ ایک واضح اور موجودہ خطرہ ہیں اسی لیے حیاتیاتی ہتھیاروں کے کنونشن کو مضبوط کرنا پہلے سے کہیں زیادہ اہم ہو گیا ہے۔