اسلام آباد: (ویب ڈیسک) وفاقی حکومت نے آئندہ عام انتخابات کے پیش نظر الیکشن کمیشن آف پاکستان کے لیے 15 ارب روپے کی تکنیکی گرانٹ کی منظوری دیدی۔
وفاقی وزیر خزانہ اسحاق ڈار کی زیر صدارت اقتصادی رابطہ کمیٹی (ای سی سی) کا اجلاس ہوا، اجلاس کے دوران اہم امور زیر غور آئے۔
اجلاس کے بعد جاری کردہ اعلامیہ کے مطابق آئندہ عام انتخابات کیلئے الیکشن کمیشن کیلئے تکنیکی گرانٹ کی منظوری دیدی گئی، یہ گرانٹ 15 ارب روپے کی ہے۔ الیکشن کمیشن کو پہلی قسط 5 ارب روپے کی دی جائے گی۔
اجلاس میں وزارت اطلاعات کی سمری پر میڈیا کمپین چلانے کیلئے بجٹ منظور کر لیا گیا، سرکاری پاور پلانٹس کو ادائیگی کیلئے 93 ارب سے زائد فنڈز کی منظوری دیدی گئی۔
وزارت خزانہ کے مطابق ای سی سی نے کریڈٹ گارنٹی ٹرسٹ سکیم کی منظوری دے دی، سکیم کیلئے عالمی بینک ساڑھے 8 کروڑ ڈالر فراہم کرے گا، 2023 کی تمباکو کی فصل کیلئے کم از کم امدادی قیمت کی منظوری دی گئی۔ مختلف تمباکو کی قیمت 146 روپے سے 351 روپے فی کلو تک مقرر کر دی گئی۔
اقتصادی رابطہ کمیٹی (ای سی سی) نے کے الیکٹرک کیلئے بجلی کے یکساں ٹیرف کی منظوری دے دی، سرکاری پاور پلانٹس کو واجبات کی ادائیگی کیلئے 93 ارب 43 کروڑ کی ضمنی گرانٹ منظور کر لی گئی، 31 ارب 14 کروڑ روپے کی 3 اقساط میں رقم ادا کی جائے گی۔
وزارت خزانہ کے مطابق زرعی ٹیوب ویلز کیلئے بجلی ٹیرف میں 3 روپے 60 پیسے فی یونٹ کمی، ٹیوب ویلز کیلئے ٹیرف 16 روپے 60 پیسے سے کم کر کے 13 روپے یونٹ مقرر کر دیا گیا۔
ای سی سی کے مطابق سیلاب سے متعلق میڈیا مہم کیلئے 2 ارب روہے کی گرانٹ منظور دی گئی، وزارتِ ہاوسنگ کیلئے 16 کروڑ 25 لاکھ روپے کی تکنیکی گرانٹ منظور کر لی گئی۔
