اسلام آباد: (ویب ڈیسک) وفاقی وزیر داخلہ رانا ثنا اللہ نے کہا ہے کہ عمران خان سیاسی مخالف ہیں دشمن نہیں،حملہ انتہائی قابل مذمت ہے، اسدعمر نے بغیرتحقیق الزام لگایا، معاشرے میں تقسیم کا عمل گہرا کردیا گیا، ایسارویہ جمہوریت کیلئے بہت نقصان دہ ہے، پی ٹی آئی مارچ پر حملہ مذہبی انتہاپسندی کا واقعہ ہے، پی ٹی آئی کا رویہ کسی بڑے حادثے کا باعث بن سکتا ہے۔
اسلام آباد میں پریس کانفرنس کرتے ہوئے رانا ثنا اللہ نے کہا کل کا واقعہ تشویشناک جس کی جتنی مذمت کی جائے کم ہے، واقعے پر پی ٹی آئی کا رویہ بھی افسوسناک اور قابل مذمت ہے، ہم عمران خان کو سیاسی مخالف سمجھتے ہیں اپنا دشمن نہیں، عمران خان اپنے رویے کو بدلیں۔
وزیر داخلہ نے کہا انہیں کیسے سمجھائیں یہ تباہی کا راستہ ہے، نفرت اور تقسیم کے عمل کو بہت گہرا کردیا گیا ہے، عمران خان نے بغیر کسی تحقیق ہم پر الزامات لگائے، اسد عمر نے جو بات کی وہ قابل مذمت ہے، پی ٹی آئی کے کچھ عناصر نے پر تشدد احتجاج کیا، کچھ لوگ اسلحہ نکال کر لہراتے رہے، ملزم نے اپنے بیان میں 2 وجوہات کا ذکر کیا کہ اس نے حملہ کیوں کیا؟، ملزم نے نبوت اور پیغمبری کے دعوؤں کو بھی حملے کی وجہ قرار دیا۔
رانا ثنا اللہ نے کہا ملزم کے بیان کی ایک قسط کل جاری ہوئی تھی، اس کےبعد پنجاب حکومت نے اس پورے تھانے کےعملے کو معطل کردیا، پہلے بیان کا ایک حصہ لیک ہوا پھر اس کا دوسرا حصہ لیک ہوا، بیان ریکارڈ کرنے والے نے لیک کیا یا کسی اور نے بیان لیکر لیک کیا؟
وفاقی وزیر داخلہ نے کہا حملے سے متعلق تحقیقات پنجاب حکومت کو کرنی چاہئے، ملزم کی جانب سے لگائے جانے والے الزامات انتہائی تشویشناک اورخوفناک ہیں، پی ٹی آئی لانگ مارچ میں 4 افراد جاں بحق ہوچکے ہیں، وزیراعظم نے صدف نعیم کے لواحقین کیلئے معاوضے کا اعلان کردیا تھا اور باقی تین افراد کیلئے معاوضے کا اعلان کر دیا ہے۔

اسلام آباد: (ویب ڈیسک) پاکستان پیپلز پارٹی کے چیئرمین بلاول بھٹو کی ہمشیرہ بختاور بھٹو نے اپنے دوسرے بیٹے میر سجاول کی ماموں کے ہمراہ تصویر شیئر کردی۔
انسٹاگرام اسٹوری پر بختاور کی جانب سے چھوٹے بیٹے میر سجاول اور بلاول بھٹو کی ایک تصویر شیئر کی گئی ہے جس کا کیپشن ہے ’جب میر سجاول بلاول سے ملے‘
بختاور نے دوسرے بیٹے کی ماموں کے ہمراہ تصویر شیئر کردی
یاد رہے کہ اکتوبر کے ماہ بختاور بھٹو کے ہاں دوسرے بیٹے کی پیدائش ہوئی تھی۔ بختاور بھٹونے سوشل میڈیا پر دوسرے بیٹے کی پیدائش کی اطلاع دی اور اللہ کا شکر ادا کیا، ٹوئٹ میں بختاور نے میر سجاول کی تاریخ پیدائش 5 اکتوبر 2022 درج کی تھی۔

اسلام آباد: (ویب ڈیسک) وزیردفاع خواجہ آصف کا کہنا ہے کہ عمران خان پر فائرنگ کے واقعے کا رخ سیاست دانوں اور ادارے کے سینئر افسر کا نام لے کر موڑا جا رہا ہے، عمران خان پر حملے کو سیاسی رنگ دیا جا رہا ہے، چاہتے ہیں واردات کرنے والوں کی پشت پناہی کرنیوالے بے نقاب ہوں۔
وزیردفاع خواجہ آصف نے قومی اسمبلی میں خطاب کرتے ہوئے کہا کہ واقعہ کا رخ ایسی جانب موڑا جا رہا ہے جہاں قاتلانہ حملے کا کوئی ملزم نہیں ملے گا، اس ساری چیز کو سبوتاژ کر کے سیاسی مقاصد حاصل کرنے کی کوشش کی گئی، کل کا واقعہ ہمارے لئے شرمندگی کا باعث ہے، ساری دنیا دیکھ رہی ہے کہ اس واقعہ کے بعد پاکستان کا کیا بنے گا۔
انہوں نے کہا کہ وفاقی حکومت چاہتی ہے کہ کل کے واقعے کے پیچھے اگر کوئی سازش ہے تو اسے سامنے لایا جائے، اس مسئلے کو سیاسی رنگ دیا گیا تو اس قسم کے معاملات تاریخ میں دفن ہوچکے ہیں، عمران خان نے بار بار کہا کہ مجھے خون نظر آرہا ہے، آج پنجاب کے ڈاکو کی وزارت اعلیٰ کے نیچے عمران خان کے خلاف یہ واقعہ ہوا، لاشیں گری ہیں۔ اللہ نے عمران خان کو بچایا اللہ انہیں محفوظ رکھے۔
وزیردفاع کا کہنا تھا کہ عمران خان پر فائرنگ کے واقعے پر جے آئی ٹی بنائی جائے، حملے پر سیاست کے بجائے مجرموں کے پیچھے جانا چاہیے، انہوں نے وزیر اعظم، رانا ثنااللہ اور ایک ادارے کے افسر کو ملزم بنا دیا، پرسوں تک کہہ رہے تھے اسٹیبلشمنٹ سے رابطے ہیں، اس واردات کو استعمال کر کے کسی ادارے کو بدنام کرنے کی مذمت کرتا ہوں۔

لاہور : (ویب ڈیسک) لاہور ہائیکورٹ کے مستقل ہونے والے 11 جج صاحبان نے حلف اٹھا لیا۔
لاہور ہائیکورٹ کے چیف جسٹس امیر بھٹی نے مستقل ہونے والے جج صاحبان سے حلف لیا۔ جسٹسس شکیل احمد، جسٹس صفدر سلیم شاہد، جسٹس احمد ندیم ارشد، جسٹسس محمد طارق ندیم، جسٹس محمد امجد رفیق اور جسٹس عابد حسین چٹھہ نے حلف اٹھا لیا۔
اس کے علاوہ حلف اٹھانے والوں میں جسٹسس انوار حسین، جسٹس علی ضیا باجوہ، جسٹس سلطان تنویر احمد، جسٹس محمد رضا قریشی اور جسٹس راحیل کامران بھی شامل ہیں۔

لاہور: (ویب ڈیسک) پنجاب کے وزیر تعلیم ڈاکٹر مراد راس کا کہنا ہے کہ عمران خان رکنے والوں میں سے نہیں لہٰذا لانگ مارچ ضرور چلے گا۔
صوبائی وزیر تعلیم ڈاکٹر مراد راس شوکت خانم اسپتال میں عمران خان کی عیادت کے لیے پہنچے۔اس موقع پر میڈیا نمائندوں سےگفتگو میں مراد راس نے کہا کہ عمران خان کی طبیعت کافی بہتر ہے، اب دیکھتے ہیں ڈاکٹر انہیں کیا مشورہ دیتے ہیں۔
انہوں نے کہا کہ لانگ مارچ تو ضرور چلے گا، عمران خان رکنے والوں میں سے نہیں ہے، جو بھی فیصلہ ہو گا، بہتر ہو گا۔
واضح رہے عمران خان پر گزشتہ روز قاتلانہ حملہ کیا گیا تھا جس میں وہ ٹانگ پر گولی لگنے سے زخمی ہوئے۔

لاہور: (ویب ڈیسک) شوکت خانم اسپتال کے باہر سے پولیس نے مشکوک شخص کو حراست میں لے لیا ہے۔
مشکوک شخص کو پولیس ڈالے میں بٹھا کر لے گئی، پولیس کا کہنا ہے کہ مشکوک شخص کا تعلق رائیونڈ سے ہے، مشتبہ شخص اسپتال کے باہر کھڑی گاڑی کو مبینہ طور ہر کھولنے کی کوشش کر رہا تھا۔
فواد چودھری، ذلفی بخاری ، عمران اسماعیل ،عثمان بزدار، شاہ محمود قریشی بھی شوکت خانم اسپتال پہنچ گئے ہیں، پی ٹی آئی رہنماوں کی جانب سے چیئرمین عمران خان کی عیادت کی گئی۔
لاہو رجناح اسپتال کے میڈیکو لیگل کی ٹیم شوکت خانم اسپتال پہنچ گئی ہے، ٹیم میں ایچ او ڈی فارنزک فرحت سلطانہ، جنرل سرجن کامران چودھری ، آرتھوپیڈک سجاد گورائیہ شامل ہیں۔
ذرائع کے مطابق عمران خان کا میڈیکو لیگل ورک مکمل کر لیا گیا ہے، عمران خان کی ہڈی فریکچر ہونے سے محفوظ رہی ہے۔
اسپتال انتظامیہ کے مطابق عمران خان کی دونوں ٹانگوں میں ایک ایک گولی لگی ہے دائیں ٹانگ پرگولی چھوکر گزری جبکہ دوسری گولی نےبائیں ٹانگ کی ہڈی کومتاثرکیا۔

اسلام آباد: (ویب ڈیسک) ملک بھر میں 2 سے 3 روز میں بارشوں کا نیا سلسلہ شروع ہونے کا امکان ہے۔
محکمہ موسمیات کے مطابق ملک میں مغربی ہواؤں کا سلسلہ آج داخل ہو گا جو 7 نومبر تک موجود رہے گا۔ آئندہ 2 سے 3 روز میں گلگت بلتستان اور خیبر پختونخوا کے بالائی علاقوں چترال، دیر، سوات، کوہستان، شانگلہ، بونیر، مانسہرہ، ایبٹ آباد، ہری پور، مالاکنڈ، کشمیر میں بارش اور برفباری کا امکان ہے۔
خیبر پختونخوا کے علاقے باجوڑ، پشاور، مردان، چارسدہ، صوابی، نوشہرہ، کرم، کوہاٹ، وزیرستان، بنوں، ڈی آئی خان میں بھی بارش کا امکان ہے۔
پنجاب کے بیشتر علاقوں اسلام آباد، راولپنڈی، مری، اٹک، چکوال، تلہ گنگ، جہلم، سیالکوٹ، نارووال، لاہور، گوجرانوالہ، گجرات، شیخوپورہ اور میانوالی سمیت دیگر اضلاع میں بھی بارش کا امکان ہے۔
7 نومبر کو بلوچستان کے کئی علاقوں میں بارش کا امکان ہے جن میں کوئٹہ، ژوب، بارکھان، چمن، پشین، قلعہ سیف اللہ، لورالائی، بولان، سبی، قلات، خضدار، لسبیلہ اور آواران شامل ہیں۔
محکمہ موسمیات کے مطابق دادو، بینظیر آباد، کراچی، قمبر شہدادکوٹ، سکھر، جیکب آباد اور نصیر آباد سمیت سندھ بھر میں بھی گرج چمک کے ساتھ بارش کا امکان ہے۔
شمالی بلوچستان سمیت ملک کے بالائی علاقے سردی کی لپیٹ میں رہیں گے اور تیز بارش کے باعث خیبر پختونخوا کے پہاڑی علاقوں، گلگت بلتستان اور کشمیر میں لینڈ سلائیڈنگ کا خطرہ ہے۔

لاہور: (ویب ڈیسک) لاہور ہائیکورٹ نے عمران خان کو پارٹی چیئرمین کے عہدہ سے ہٹانے کے لئے درخواست قابل سماعت قرار دیدی۔
لاہور ہائیکورٹ کے جسٹس ساجد محمود سیٹھی عمران خان کو چیئرمین تحریک انصاف کے عہدے سے ہٹانے کے درخواست پر محفوظ فیصلہ سنایا۔
دوران سماعت عدالت نے عمران خان کو پارٹی چیئرمین کے عہدہ سے ہٹانے کے لئے درخواست قابل سماعت قرار دی۔
لاہور ہائی کورٹ نے اٹارنی جنرل کو نوٹس جاری کرتے ہوئے 11 نومبر کو جواب بھی طلب کر لیا۔