اسلام آباد: (ویب ڈیسک) اسلام آباد کے گاؤں سید پور میں چار سے پانچ چیتوں کی مبینہ موجودگی کی اطلاع ملی ہے۔
چیتوں کی مبینہ موجودگی کے باعث سید پور گاوں میں مساجد سے شہریوں کو گھروں میں رہنے کی تاکید کی گئی ہے۔
ترجمان اسلام آباد پولیس کا کہنا ہے کہ اسلام آباد پولیس کی نفری سید پور کے علاقوں میں تعینات کردی گئی ہے، محکمہ وائلڈ لائف کو بھی اطلاع کردی گئی ہے، سید پور کے رہائشیوں سے پرسکون رہنے کی گزارش ہے، وائلڈ لائف اہلکار سے مل کر علاقہ محفوظ رکھنےمیں کردار ادا کریں گے۔
ترجمان پولیس کا کہنا ہے کہ کسی بھی ہنگامی صورتحال میں پکار 15 پر اطلاع دیں۔

لاہور: (ویب ڈیسک) آرمی چیف جنرل قمر جاوید باجوہ نے بہاولپور اور اوکاڑہ کا دورہ کیا اور فائر پاور مشقوں کا مشاہدہ کیا۔
پاک فوج کے شعبہ تعلقات عامہ ( آئی ایس پی آر ) کی طرف سے جاری کردہ بیان کے مطابق آرمی چیف جنرل قمر جاوید باجوہ نے بہاولپور میں یادگار شہداء پر حاضری دی اس دوران پھول چڑھائے اور فاتحہ خوانی بھی کی۔
بیان کے مطابق سپہ سالار نے بہاولپور میں خیرپور ٹامیوالی میں فائر پاور مشقوں کا مشاہدہ بھی کیا، مشق میں جے ایف 17 تھنڈر، گن شپ ہیلی کاپٹرز اور مشینوں نے شرکت کی۔
آئی ایس پی آر کے مطابق آرمی چیف نے مشقوں میں شریک فوجی جوانوں کے بلند جذبے، اعلیٰ تربیتی معیار کو سراہا جبکہ جوانوں کو ہر طرح کے حالات میں قوم کی خدمت کی ہدایت کی۔

سیہون: (ویب ڈیسک) خیر پور سے سیہون آنے والی زائرین کی مسافر وین کو انڈس ہائی وے روڈ پر حادثہ پیش آیا جس کے باعث 20 افراد زندگی کی بازی ہار گئے۔
اسسٹنٹ کمشنر سیہون اقبال حسین کے مطابق حادثے میں 20 افراد جاں بحق ہوئے، جاں بحق افرادمیں 8 خواتین، 6 بچیاں، 4 بچے ، دو مرد بھی شامل ہیں، جبکہ 10 افراد زخمی ہوئے ہیں، زخمیوں میں سے دو افراد کی حالت نازک بتائی جا رہی ہے۔
پولیس کا کہنا ہے کہ انڈس ہائی وے روڈ پر ٹول پلازہ کے قریب قلندرکے زائرین کے ساتھ خوفناک حادثہ پیش آیا ، خیرپور سےسہیون آنے والی مسافر وین انڈس ہائی وے روڈ کو لگائے گئے کٹ میں گر گئی، مسافر وین میں معصوم بچے اور خواتین سوار تھے۔
پولیس کے مطابق وین پانی میں گر گئی تھی، پانی کے کٹ سے 15 لاشیں نکال کر سیّد عبد اللہ شاہ انسٹیٹیوٹ سیہون منتقل کر دی ہیں، جاں بحق افراد میں بچے اور خواتین بھی شامل ہیں۔ حادثے میں کئی افراد زخمی ہیں۔
یاد رہے کہ منچھر جھیل کے سیلابی پانی کو دریائے سندھ میں اخراج کرنے کیلیئے 2 ماہ قبل انڈس ہائی وے روڈ کو کٹ لگایا گیا تھا۔
عینی شاہدین کا کہنا ہے کہ نیشنل ہائی ویز اتھارٹی کی غفلت کے باعث دو ماہ سے کٹ بند نہیں ہوا جس کے باعث حادثہ پیش آیا۔

لاہور: (ویب ڈیسک) پاکستان تحریک انصاف کے چیئرمین عمران خان نے لانگ مارچ کے لیے اوورسیز پاکستان سے فنڈز فراہم کرنے کی اپیل کر دی۔
انہوں نے کہا کہ کوئی بھی دنیا کی تحریک فنڈزاور پیسے کے بغیر کامیاب نہیں ہوتی،ہماری حقیقی آزادی مارچ کو آپ کی ڈونیشنز کی ضرورت ہے۔
ان کا کہنا تھا کہ زیادہ سے زیادہ ڈونیشنز فراہم کرکے ہماری تحریک کو کامیاب کریں۔

اسلام آباد: (ویب ڈیسک) صدر مملکت ڈاکٹر عارف علوی نے بین الاقوامی تعلقات میں تباہ کن فلسفوں اور نظریات کو مکمل امن کے فلسفے سے تبدیل کرنے کی ضرورت پر زور دیتے ہوئے کہا ہے کہ عالمی نظام کو قوانین، اخلاقیات اور اقدار پر مبنی ہونا چاہیے تاکہ دنیا کو سب کے لیے ایک بہتر جگہ بنایا جاسکے، سائبر وارفیئر کی بے پناہ طاقت کو ہوشیاری سے انسانیت کی تباہی کے لیے نہیں بلکہ پوری انسانیت کی ترقی اور خوشحالی کے لیے استعمال کیا جانا چاہیے۔
ان خیالات کا اظہار انہوں نے جمعرات کو یہاں ”مارگلہ ڈائیلاگ“ کے خصوصی سیشن سے خطاب کرتے ہوئے کیا جس کا اہتمام اسلام آباد پالیسی ریسرچ انسٹی ٹیوٹ نے کیا تھا۔ سیشن میں سفارت کاروں، غیر ملکی شخصیات، ماہرین تعلیم اور دانشوروں نے شرکت کی۔
انہوں نے کہا کہ باہمی طور پر یقینی تباہی، ہیومن وارفیئر اور سرد جنگ کی ذہنیت جیسے نظریات کو ختم کرکے ان کی جگہ کامل امن کے فلسفے کو لانا چاہیے تاکہ جنگ کو مکمل طور پر ختم کردیا جائے۔ تباہ کن فلسفوں اور نظریات کو مکمل امن کے فلسفے سے تبدیل کرنے کی ضرورت ہے جہاں جنگ کا سہارا لینا کوئی آپشن نہ ہو۔ یہ تب ہی ممکن ہے جب تمام قوموں، ملکوں اور وہاں رہنے والے لوگوں کے ساتھ بلا تفریق رنگ و نسل اور زبان ان سے عزت، وقار اور احترام کا سلوک کیا جائے۔
عارف علوی نے کہا کہ ویٹو پاور کی صورت میں کچھ قوموں کو ترجیحی حیثیت دینے کے اصول کی نئے ورلڈ آرڈر میں کوئی جگہ نہیں ہونی چاہیے جو تجربے کی بنیاد پر کم طاقت ور قوموں کو بدحالی اور جنگ کے غلط استعمال کی صلاحیت رکھتی ہو۔ عالمی طاقتیں باہمی یقینی تباہی، جنگ اور سرد جنگ کے فلسفے پر عمل پیرا ہیں جہاں ہر قوم قیمتی وسائل لگا کر پوری دنیا کو کئی گنا تباہ کرنے کی صلاحیت رکھنے والے مہلک اور خطرناک ہتھیار تیار کررہی ہے۔
انہوں نے کہا کہ سپر پاورز نے مہلک اور طاقتور ہتھیاروں کے نظام بنانے پر کھربوں ڈالر خرچ کیے، اس بھاری رقم کا ایک حصہ بھی موسمیاتی تبدیلیوں اور گلوبل وارمنگ کے اثرات کو کم کرنے اور دنیا سے بھوک اور بدحالی کو ختم کرنے میں مدد دے سکتا تھا۔ دنیا جنگ کے ایک اور مرحلے میں داخل ہو رہی ہے جو اس سے بھی زیادہ تباہ کن، مہلک اور خطرناک ہے، سائبر وارفیئر کی صلاحیتیں انتہائی تیز رفتاری سے تیار کی جارہی ہیں اور اسے کسی ملک کے مواصلاتی نیٹ ورک کو بے اثر کرنے، اس کے دفاعی نظام کو غیر فعال بنانے، صحت سمیت دیگر خدمات کی فراہمی میں خلل ڈالنے کے لیے استعمال کیا جا سکتا ہے جو اسے مکمل طور پر مفلوج کرسکتا ہے۔ سائبر وارفیئر کی بے پناہ طاقت کو ہوشیاری سے انسانیت کی تباہی کے لیے نہیں بلکہ پوری انسانیت کی ترقی اور خوشحالی کے لیے استعمال کیا جانا چاہیے۔
ڈاکٹر عارف علوی نے کہا کہ موجودہ دور میں سوشل میڈیا سے ”فیک نیوز“ پھیل رہی ہیں جس کے نتیجے میں تشدد کے ساتھ ساتھ ممالک اور معاشروں میں غلط فہمیاں پیدا ہورہی ہیں جس کا مقابلہ خود سیکھنے اور تعلیم کے ذریعے کیا جانا چاہیے۔ اقوام کے داخلی نظام کی بنیاد جمہوری اقدار پر ہونی چاہیے، مذاکرات، مشاورت اور غور و خوض اور اتفاق رائے پیدا کرنے اور آگے بڑھنے کا راستہ طے کرنے کے لیے متعلقہ فریقوں کو شامل کرنا چاہیے جبکہ اقوام کے درمیان دوطرفہ تعلقات تنازعات اور اختلافات کو منصفانہ اور شفاف طریقے سے حل کیا جانا چاہیے۔
صدر نے کہا کہ موجودہ عالمی نظام کو درپیش بڑے مسائل میں گلوبل وارمنگ اور گرین ہائوس گیسوں کا اخراج شامل ہے جو بہت سے کمزور ممالک کو خطرے میں ڈال رہے ہیں اور مختلف خطوں میں لوگوں کی زندگیوں اور معاش پر منفی اثر مرتب کر رہے ہیں۔ ترقی یافتہ ممالک کو موسمیاتی تبدیلیوں سے ہونے والے نقصان کو پورا کرنے اور گرین ہائوس گیسوں کے اخراج کو روکنے کے لیے اپنے وسائل کو اکٹھا کرنا چاہیے۔ ٹیکنالوجی کی ان ممالک میں منتقل کی جانی چاہیے جہاں اس کی سب سے زیادہ ضرورت ہے، ہالینڈ جو کہ پاکستان سے 19 گنا چھوٹا ملک ہے لیکن وہ خوراک برآمد کرنے والے دنیا کے سرفہرست ممالک میں شامل ہے۔
انہوں نے کہا کہ زیادہ پیداوار والی خوراک کی مصنوعات، خشک سالی سے بچنے والی فصلوں، پانی کے تحفظ، عمودی کاشتکاری اور اس طرح کی دیگر جدید طریقوں میں استعمال کی جانے والی ٹیکنالوجی غریب اور ترقی پذیر ملکوں کے ساتھ بھی شیئر کی جانی چاہیے تاکہ انہیں بھوک، غذائیت کی کمی، سٹنٹنگ اور غذائی عدم تحفظ کا مقابلہ کرنے کے قابل بنایا جاسکے۔
قبل ازیں اسلام آباد پالیسی ریسرچ انسٹی ٹیوٹ کے صدرسفیر ڈاکٹر رضا محمد نے صدر مملکت کا خیرمقدم کیا اور شرکاءکو قومی سلامتی، جیوسٹریٹیجی اور بین الاقوامی تعلقات سے متعلق مختلف موضوعات پر ہونے والے مباحثے سے آگاہ کیا۔

اسلام آباد: (ویب ڈیسک) پاک فضائیہ نے بحرین انٹرنیشنل ایئر شو 2022 میں جے ایف17 تھنڈر طیارے کی دوران اڑان ایندھن بھرنے کا مظاہرہ کیا۔
ترجمان پاک فضائیہ کے مطابق پاک فضائیہ آپریشنل مشنز اور مشقوں کے دوران اندرون ملک ہوا سے ہوا میں ایندھن بھرنے کا کامیابی سے انعقاد کرتی رہی ہے، تاہم طویل فاصلے کے فیری مشن کے دوران پی اے ایف کے اپنے ٹینکر طیارے کے ذریعے بین الاقوامی پانیوں پر ہوا سے ہوا میں ایندھن بھرنے کی صلاحیت کو مزید مستحکم کیا ہے۔
پاک فضائیہ نے اپنے تین جے ایف 17 لڑاکا طیارے بحرین انٹرنیشنل ایئر شو میں اپنے آئی ایل 78 ٹینکر طیارے کی معاونت کے ساتھ تعینات کئے، پاک فضائیہ کی ایک آپریشنل ایئر بیس سے بحرین جانے والے جیٹ طیاروں کی مسلسل پرواز اور انکی وطن واپسی کے دوران جے ایف17 تھنڈر طیاروں کی دورانِ پرواز ری فیولنگ سے پاک فضائیہ نے ایک اور سنگ میل حاصل کیا ہے جو مادر وطن کے ناقابل تسخیر فضائی دفاع کی جانب ایک اہم قدم ہے۔
یہ غیر معمولی اور اہم کامیابی پاک فضائیہ کے اہلکاروں کی بہترین پیشہ ورانہ مہارت اور اچھی تکنیکی تربیت کی عکاسی کرتی ہے، جہاں ایک طرف پاک فضائیہ کا جے ایف17 تھنڈر طیارہ بحرین انٹرنیشنل ایئر شو میں حاضرین کی توجہ کا مرکز رہا وہیں بین الاقوامی پانیوں پر دوران پرواز ایندھن بھرنے کے اس عہد ساز موقع نے پاک فضائیہ کے لڑاکا بیڑے کی صلاحیت، اہلیت اور مہلکیت میں اضافہ کیا ہے۔

اسلام آباد: (ویب ڈیسک) وفاقی وزیر برائے ہوا بازی و پاکستان ریلوے خواجہ سعد رفیق نے کہا ہے کہ عمران خان پر ووٹ چوری پہلے ثابت ہوچکی تھی، اب توشہ خانہ اور دوسری چوریاں بھی ثابت ہورہی ہیں، ایبسلوٹیلی ناٹ سے بات اب ایبسلوٹیلی فراڈ پر چلی گئی ہے۔
قومی اسمبلی اجلاس سے خطاب کرتے ہوئے پاکستان مسلم لیگ (ن) کے مرکزی رہنما خواجہ سعد رفیق نے کہا کہ پی ٹی آئی نے سوشل میڈیا مہم پر اربوں روپے خرچ کیے،عمران خان دھاندلی کرکے پارلیمنٹ میں آئے لیکن ان کی حکومت کو آئینی طریقے سے ہٹایا گیا۔
انہوں ںے کہا کہ سیاسی جماعتوں نے تحریک انصاف کی حکومت کو قبول نہیں کیا، تحریک انصاف حکومت میں سیاسی رہنماؤں کو جیلوں میں ڈالا گیا، عمران خان پر ووٹ چوری پہلے ثابت ہوچکی تھی، اب توشہ خانہ اور دوسری چوریاں بھی ثابت ہورہی ہیں۔
خواجہ سعد رفیق نے کہا کہ ایبسلوٹیلی ناٹ سے بات اب ایبسلوٹیلی فراڈ پر چلی گئی ہے، عمران خان کی سازش کو کامیاب نہیں ہونے دیں گے، گزشتہ دور حکومت میں قومی خزانے کو مال مفت سمجھ کر لوٹا گیا۔
انہوں ںے استفسار کیا کہ عمران خان! بتائیں سیلاب متاثرین کیلئے ملنے والے 13 ارب روپے کہاں ہیں؟ عمران خان کے ساتھ آج جو کچھ ہو رہا ہے وہ مکافات عمل ہے، عمران خان کس وجہ سے فوری انتخابات کا مطالبہ کررہےہیں؟
قومی اسمبلی اجلاس سے خطاب کرتے ہوئے وفاقی وزیر خواجہ سعد رفیق نے استفسار کیا کہ عمران خان کے اقتدار کے چار سال غیرقانونی تھے، کیا وہ بھی گنتی میں شامل ہوتے ہیں یا نہیں؟ عمران خان توشہ خانہ سے بڑے سے بڑے تحائف نکال کر بیچنے گئے۔

اسلام آباد: (ویب ڈیسک) وفاقی حکومت نے آرمی ایکٹ میں ترمیم سے متعلق قیاس آرائیوں کو یکسر مسترد کردیا۔
وفاقی وزیر دفاع خواجہ آصف نے نجی میڈیا سے گفتگو کرتے ہوئے کہا کہ حکومت آرمی ایکٹ میں کسی بڑی تبدیلی پر غور نہیں کررہی،پاکستان آرمی ایکٹ میں ترامیم سے متعلق قیاس آرائیاں غیر ضروری ہیں۔
انہوں نے کہا کہ سپریم کورٹ آف پاکستان نے سی پی 39 ، 2019 کے فیصلے میں پی اے اے کی شقوں پر نظر ثانی کا مطالبہ کیا تھا جس پر مناسب وقت میں عمل کیا جائے گا۔
واضح رہے کہ گزشتہ دو روز سے یہ افواہ زیر گردش تھی کہ حکومت آرمی ایکٹ میں ترمیم کرنے جارہی ہے جس کے بعد وزیراعظم کو یہ اختیار حاصل ہوگا کہ وہ کسی بھی فوجی افسر، اہلکار کو ریٹائرمنٹ کے باوجود خدمات جاری رکھنے کی ہدایت کرسکتے ہیں۔

اسلام آباد: (ویب ڈیسک) قومی اسمبلی کے اجلاس کے دوران پاک فوج کی حمایت میں متفقہ طور پر قرار داد منظور کر لی گئی۔
قومی اسمبلی کا اجلاس سپیکر راجہ پرویز اشرف کی زیر صدارت ہوا، اجلاس کے دوران مختلف معاملات پر بحث کی گئی، اسی دوران ملتان سے منتخب ہونے والے پاکستان تحریک انصاف کے منحرف رکن قومی اسمبلی احمد حسن ڈیہڑ نے قومی اسمبلی میں پاک فوج سے اظہار یکجہتی کے لیے قومی اسمبلی میں قرار داد پیش کی۔
پی ٹی آئی کے رکن کی طرف سے پیش کی گئی قرار داد کو متفقہ طور پر منظور کر لیا گیا، اس کے بعد اجلاس جمعہ صبح گیارہ بجے تک ملتوی کر دیا گیا۔