اسلام آباد: (ویب ڈیسک) ن لیگی رہنما شاہد خاقان عباسی نے کہا ہے کہ وزیراعظم بلیک میل نہیں ہوتے، ہر معاملے پر یوٹرن لے لیتے ہیں، سرپرائز اپوزیشن کو نہیں، عثمان بزدار کو ملا ہے۔
اسلام آباد میں میڈیا سے گفتگو کرتے ہوئے انہوں نے کہا کہ وزیراعظم بتانے کو تیار نہیں کہ دھمکی کس نے دی ہے، وزیراعظم خط کو پارلیمان میں لانا چاہئے تھا۔ حقیقت یہ کہ خط نہیں صرف شعبدہ بازی ہے۔ واقعی مسئلہ ہے تو نیشنل سکیورٹی کمیٹی میں جا کر بتائیں کہ کس نے خط لکھا ہے۔
شاہد خاقان عباسی نے مزید کہا کہ چند ووٹوں کی خاطر عثمان بزدار کی قربانی دی گئی،یکم سے 4 اپریل کے درمیان ووٹنگ ہونی ہے،جلد عوام کے مینڈیٹ کی حکومت وجود میں آئے گی۔ کسی کے آنے جانے سے فرق نہیں پڑتا،ق لیگ اپنا فیصلہ کرچکی ہے، ق لیگ عمران خان کا بوجھ اٹھا کر چلےگی تو پتہ لگ جائے گا،معاشی صورتحال پرحکمرانوں نے آنکھیں بند کر رکھی ہیں۔

لاہور: (ویب ڈیسک) چوہدری شجاعت حسین کہتے ہیں کہ تمام سیاسی فیصلے میری مشاورت سے ہوئے، میری مکمل حمایت حاصل ہے، ہمارا خاندان اور جماعت ایک ہی پیج پر ہیں، اختلافات کا غلط پروپیگنڈا کر کے جو لوگ سیاسی فائدہ اُٹھاناچاہتے ہیں انہیں بڑی مایوسی ہو گی۔
چوہدری شجاعت حسین نے اپنے ردعمل میں کہا کہ جو افواہیں چل رہی ہیں اور چلوائی جارہی ہیں وہ غلط ہیں۔ اب تک پارٹی یا گھر میں جو بھی فیصلے ہوئے ہیں وہ میری مشاورت اور رضامندی کے ساتھ ہوتے ہیں، وضاحت پر یقین نہیں رکھتا لیکن اس کے باوجود میں کہنا چاہوں گا کہ مجھے خاندان کا سربراہ سمجھا جاتا ہے۔
چوہدری شجاعت حسین نے کہا کہ نوجوانوں کی تعداد موجودہ اسمبلی میں سابقہ اسمبلیوں سے زیادہ ہے، ان پر الزام لگانا اور شک کرنا غلط بات ہے۔ پیسے کے لین دین کے لفظ کا استعمال نہیں ہونا چاہیے، خاص کر پڑھے لکھے لوگ اس بات کوپسند نہیں کرتے۔ غلط قسم کا پروپیگنڈا کرنا اور حقائق کو جوڑ توڑ کر پیش کرنا یا کروانا انتہائی غیرمناسب ہے۔ چوہدری شجاعت حسین نے کہا کہ مجھے بتایا گیا ہے کہ آپ کے خاندان میں اختلافات ہیں ایسی بے بنیادخبروں میں کوئی صداقت نہیں۔

اسلام آباد: (ویب ڈیسک) وزیر خارجہ شاہ محمود قریشی 3 روزہ دورے پر چین روانہ ہو گئے جہاں وہ افغانستان سے متعلق ٹرائیکا پلس اجلاس میں شرکت کریں گے۔
بتایا گیا ہے کہ شاہ محمود قریشی اپنے چینی ہم منصب وانگ ژی کی دعوت پر چین گئے ہیں، وزیرخارجہ افغانستان کے ہمسایہ ممالک کے تیسرے اجلاس میں شرکت کریں گے جس میں افغانستان اور خطہ میں امن کے لیے مشترکہ کوششوں پرغورو حوض کیا جائے گا۔ شاہ محمود قریشی اجلاس میں امن سے متعلق پاکستانی موقف بھی اجاگر کریں گے۔
شاہ محمود قریشی کی چین میں ایران کے وزیر خارجہ حسین امیر کے علاوہ روسی ہم منصب سرگئی لاروف کے ساتھ بھی ملاقاتیں شیڈول ہیں۔

لاہور: (ویب ڈیسک) پاکستان میں سیاست میں جوڑ توڑ اور ڈیلوں کو سلسلہ عروج پر ہے، اپوزیشن اور حکومت کے مابین آر پار کی جنگ آخری مراحل میں داخل ہو چکی ہے۔
گزشتہ روز وزیر اعظم عمران خان نے وزیر اعلی عثمان بزادار کی جگہ ق لیگ کے چوہدری پرویز الہی کو پنچاب کی وزارت اعلی کی پیش کش کر دی تھی، جس کے بعد ایک بار پر حالات حکومت کے حق میں جاتے دکھائی دے رہے ہیں۔
لاہورمیں ترین گروپ نے سیاسی صورتحال پر مشاورت کے لیے آج اجلاس طلب کر لیا ہے،جہاں ترین گروپ کے ارکان اسمبلی اور رہنما موجودہ صورتحال پر مشاورت کریں گے۔
ذرائع کے مطابق ترین گروپ کی جانب سے پرویز الہٰی کی حمایت کا امکان ہے، تاہم حتمی فیصلہ جہانگیرترین سے مشاورت کے بعد اجلاس میں کیا جائے گا۔
دوسری جانب علیم خان نے بھی اپنے ساتھیوں کو آج مشاورت کے لیے بلا لیا ہے، ترجمان کا کہنا ہے کہ علیم خان گروپ پرویزالہٰی سے متعلق مشاورت کرکے جواب دے گا، پرویزالہٰی کی حمایت کرنی ہے یا نہیں فیصلہ علیم خان کریں گے۔

اسلام آباد: (ویب ڈیسک) تحریک عدم اعتماد سمیت مسلسل بدلتی سیاسی صورت حال پر مشاورت کیلئے تحریک انصاف کی سیاسی کمیٹی آج پھر سرجوڑ کر بیٹھے گی۔
بتایا گیا ہے کہ وزیراعظم عمران خان مسلم لیگ ق کے رہنما پرویزالٰہی کو وزیراعلیٰ پنجاب نامزد کرنے کے فیصلے پر پارٹی کو اعتماد میں لیں گے۔ گذشتہ روز عثمان بزدار نے پنجاب کی وزارت اعلی سے استعفی دے دیا تھا، انہون نے استعفیٰ وزیراعظم عمران خان کو پیش کیا جس کے بعد پی ٹی آئی حکومت نے پرویز الٰہی کو وزیراعلیٰ پنجاب نامزد کرنے کا فیصلہ کیا۔
وزیر مملکت برائے اطلاعات و نشریات فرخ حبیب کا کہنا تھا کہ چودھری پرویز الہی کی وزیراعظم عمران خان کیساتھ ملاقات ہوئی، ملاقات میں تمام معاملات طے ہوگئے۔ ق لیگ نے وزیراعظم پر اعتماد کا اظہار اور حمایت کا اعلان کر دیا۔
دوسری جانب وزیراعظم عمران خان کو تحریک عدم اعتماد کا چیلنج بھی درپیش ہے جس سے متعلق آج کے اجلاس میں پارٹی پالیسی پر تفصیلی بات چیت ہو گی۔ گذشتہ روز قومی اسمبلی کے اجلاس کے دوران پاکستان مسلم لیگ ن کے صدر اور قومی اسمبلی میں اپوزیشن لیڈر میاں محمد شہباز شریف نے وزیراعظم عمران خان کے خلاف تحریک عدم اعتماد پیش کر دی تھی جو کہ بحث کیلئے منظور بھی ہو گئی تھی، قومی اسمبلی کا آئندہ اجلاس 31 مارچ بروز جمعرات کو طلب کیا گیا ہے۔