پاکستان اور آسٹریلیا کے مابین ون ڈے سیریز کا پہلا میدان آج سجے گا

لاہور: (ویب ڈیسک) کرکٹ کے لمبے امتحان کے بعد شارٹ فارمیٹ کا آغاز ہو گیا، پاکستان اور آسٹریلیا کے درمیان ون ڈے سیریز کا پہلا میدان آج لگے گا، دونوں ٹیموں نے تیاریاں مکمل کر لیں۔
زندہ دلان کے شہر لاہور میں کرکٹ میلہ عروج پر ہے، قذافی سٹیڈیم کے تاریخی میدان میں ٹیسٹ کے بعد ون ڈے سیریز کا آغاز ہونے جا رہا ہے، ٹرافی کی تقریب رونمائی ہو گئی، کپتان بابراعظم اور ایرون فِنچ نے شرکت کی۔ چوبیس سال بعد دورہ پاکستان کو یادگار بنانے والے آسٹریلین سے پھر شاہین دوبدو ہوں گے، دونوں ٹیمیں سہ پہر تین بجے مدمقابل ہوں گی۔ چوکے چھکے کی بہار آئے گی، وکٹیں بھی لگاتار گریں گی۔
کھلاڑی پرعزم ہیں تو پرستار بھی پرجوش ہیں۔ کھلاڑیوں نے تیاریاں مکمل کر لیں، نیٹ پریکٹس میں بیٹنگ، بولنگ، فیلڈنگ اور فزیکل فٹنس پر خصوصی توجہ دی۔ قومی بلے باز فخر زمان کا کہنا ہے کہ آسٹریلیا آسان حریف نہیں، ساتھ ہی ون ڈے سیریز میں اچھا پرفارم کرنے کی امید دلا دی۔
پاکستان اور آسٹریلیا کے درمیان کھیلے گئے ایک سو چار میچز میں کینگروز کا پلہ بھاری رہا، اڑسٹھ میچوں میں فتح یاب رہے جبکہ 32 مرتبہ شاہینوں نے اونچی اڑان بھری۔ ون ڈے سیریز کے تینوں میچز آئی سی سی ورلڈ سپر لیگ کا حصہ ہیں ۔