کراچی: (ویب ڈیسک) مفتی اعظم پاکستان و صدر جامعہ دارالعلوم کراچی مولانا مفتی رفیع عثمانی انتقال کرگئے۔
مفتی رفیع عثمانی ،مفتی تقی عثمانی کے بڑے بھائی تھے، مرحوم رفیع عثمانی مفتی اعظم پاکستان تھے، مرحوم مفتی اعظم پاکستان مفتی شفیع عثمانی کے بیٹے اور مفتی تقی عثمانی کے بڑے بھائی تھے۔
مرحوم مفتی رفیع عثمانی وفاق المدارس العربیہ پاکستان کے سرپرست بھی تھے۔

لاہور: (ویب ڈیسک) وزیراعظم شہباز شریف نے فلسطین میں آتشزدگی کے باعث 8 بچوں سمیت 21 قیمتی جانوں پر افسوس کا اظہار کیا ہے۔
سماجی رابطے کی ویب سائٹ ٹویٹر پر اپنے ایک بیان میں وزیراعظم نے لکھا کہ غزہ میں ایک رہائشی عمارت میں آتشزدگی کے سانحے میں آٹھ بچوں سمیت 21 قیمتی جانوں کے ضیاع پر غمزدہ ہیں۔
انہوں نے لکھا کہ ہم سوگوار خاندان اور فلسطینی عوام سے دلی تعزیت کرتے ہیں۔

اسلام آباد: (ویب ڈیسک) وزیر داخلہ رانا ثنا اللہ نے کہا ہے کہ اہم تعیناتی پر اتفاق رائے ہو چکا ہے تاہم فیصلہ وزیر اعظم ہی کریں گے۔
وزیر داخلہ رانا ثنا اللہ نے میڈیا سے گفتگو کرتے ہوئے کہا کہ میرا تجربہ ہے حساس نوعیت کے فیصلے سے پہلے اتفاق رائے ہوتا ہے اور اہم تعیناتی پر اختیار وزیر اعظم کا ہے جبکہ اس معاملے پر اتفاق رائے ہوچکا ہے۔
انہوں نے کہا کہ آرمی چیف کی تعیناتی کا فیصلہ وزیر اعظم ہی کریں گے جو ان کا آئینی اختیار ہے اور تعیناتی پر یقینی طور پر وزیر اعظم نے عسکری لیڈر شپ سے بات کی ہو گی۔ آرمی چیف کی تعیناتی کسی کو سرپرائز دینے والی بات نہیں ہے۔
رانا ثنا اللہ نے کہا کہ کوئی ایسی بات نہیں کرنا چاہتا کہ فیصلے سے پہلے قیاس آرائی ہو اور اہم نوعیت کی تقرری کو پیپرز پر لانے سے پہلے انڈرسٹینڈنگ ضروری ہے۔ مشاورت سے مراد کسی کا اختیار تو نہیں ہوتا۔
انہوں نے کہا کہ وزیر اعظم کسی سے بھی بات کر سکتے ہیں لیکن فیصلہ وزیر اعظم نے ہی کرنا ہے۔ تعیناتی کا معاملہ پیپر پر آنا باقی ہے اور ایک سے 2 دن میں آرمی چیف کی تعیناتی کا فیصلہ ہو جائے گا۔
وزیر داخلہ نے کہا کہ آرمی چیف کی تعیناتی میں مزید تاخیر مناسب نہیں ہو گی اور نواز شریف نے کبھی بھی کسی آرمی چیف سے وہ باتیں نہیں کیں جو یہ منسوب کرتا ہے۔ اسحاق ڈار کی جہاں مدد درکار تھی وہ حاصل کی گئی۔ عمران خان نے ہمیشہ غلط بیانی سے کام لیا ہے۔
انہوں نے کہا کہ عمران خان کو معلوم ہے اپریل، مئی سے پہلے الیکشن نہیں ہو سکتے اور عمران خان کا لانگ مارچ کہیں نظر نہیں آرہا بس لانگ مارچ کے نام پر ضلعی سطح پر تماشا ہو رہا ہے۔ پی ٹی آئی جماعت میں کوئی قابل اعتبار نہیں ہے کیونکہ شاہ محمود قریشی، پرویز خٹک اور فواد چودھری سے کئی بار مختلف معاملات پر بات چیت ہوئی ہے۔

کراچی: (ویب ڈیسک) ایم کیو ایم رابطہ کمیٹی کے رکن وسیم اختر نے کہا ہے کہ آج رات حلقہ بندیاں درست کر لیں، الیکشن کل کرا لیں، ہم الیکشن سے بھاگ نہیں رہے ہیں، درست حلقہ بندیاں چاہتے ہیں۔
انہوں نے خواجہ اظہار الحسن کے ہمراہ پریس کانفرنس سے خطاب کرتے ہوئے کہا کہ ٹیکس دینے والے شہریوں کے مسائل کا حل نکالا جائے۔
سابق میئر کراچی وسیم اختر نے کہا کہ کئی بار وفاقی حکومت کو بھی یاد دہانی کرائی ہے مگر کچھ نہ ہوا، بلدیاتی نظام کو مضبوط ہونا چاہیے، بلدیاتی نظام کے معاملے پر ہم سپریم کورٹ گئے، ہم نے بلدیاتی نظام پر تمام جماعتوں سے بات چیت بھی کی۔
انہوں نے کہا کہ ووٹر لسٹوں میں خامیاں ہیں، حلقہ بندیوں میں بھی مسائل ہیں، حلقہ بندیوں میں ایم کیو ایم کا ووٹ بینک کم کیا گیا ہے، یہ جدوجہد سیاسی فائدہ اٹھانے کیلئے نہیں بلکہ کراچی کے مسائل کے حل کیلئے کر رہے ہیں۔
وسیم اختر نے کہا کہ میئر کوئی بھی آئے مگر مضبوط ہونا چاہئے جس کے پاس اختیارات ہوں، جماعت اسلامی اور پی ٹی آئی والے چاہتے ہیں بلدیاتی الیکشن جلد از جلد ہو جائیں، یوں لگتا ہے ان دونوں جماعتوں کو کسی نے کہہ دیا ہے کہ تم جیت جاؤ گے۔
ایم کیو ایم رابطہ کمیٹی کے رکن وسیم اختر نے کہا کہ کراچی کی ترقی کیلئے پی ٹی آئی کے اتحادی بنے تھے، سابق وزیراعظم عمران خان سے 4 سال کے دوران کئی میٹنگز ہوئیں، عمران خان کو کراچی کے مسائل کے حوالے سے کئی بار آگاہ کیا، ایم کیوایم نے پیپلزپارٹی کے ساتھ معاہدہ سندھ کے مسائل کے حل کیلئے کیا۔
انہوں ںے کہا کہ بلدیاتی نمائندوں کے پاس اختیارات نہیں ہیں اس سلسلے میں عدالت بھی گئے، عدالت نے کہا بلدیاتی نظام کو مضبوط ہونا چاہیے، ہماری ترجیح بلدیاتی نظام سے متعلق عدالتی فیصلے پرعملدرآمد کروانا ہے۔
وسیم اختر نے پریس کانفرنس سے خطاب کرتے ہوئے کہا کہ آصف زرداری اور بلاول بھٹو کے ساتھ میٹنگز میں بھی مطالبات رکھے گئے، آصف زرداری اور بلاول نے کہا ایم کیوایم کے مطالبات جائز ہیں عملدرآمد ہونا چاہیے، ذاتی مراعات کیلئے نہیں، عوامی مسائل کے حل کیلئے کوشش کر رہے ہیں۔

لاہور: (ویب ڈیسک)مسافر ٹرینوں میں خواتین کے ساتھ جنسی ہراسگی کے بڑھتے واقعات کی روک تھام کے لیے ٹرینوں میں سی سی ٹی وی کیمرے نصب کرنے کا فیصلہ کر لیا گیا۔ نیوز ویب سائٹ’پروپاکستانی‘ کے مطابق وزیرریلوے خواجہ سعد رفیق کی طرف سے ریلوے حکام کو ہدایت کی گئی ہے کہ سفر کو محفوظ بنانے کے لیے تمام ٹرینوں میں سی سی ٹی وی کیمرے فوری نصب کیے جائیں۔
اس حوالے سے خواجہ سعد رفیق کی صدارت میں ایک اجلاس کا انعقاد ہوا، جس میں چیئرمین ریلویز ظفر زمان رانجھا، ایڈیشنل سیکرٹری ریلویز سید مظہر علی شاہ اور دیگر حکام شریک ہوئے۔ اجلاس میں وفاقی وزیر نے ٹرین منیجر کے کردار کے احیاءکی بھی ہدایت کی، جو تمام مسافر ٹرینوں کی نگرانی کا ذمہ دار ہو گا۔ انہوں نے کہا کہ ٹرین منیجر اور پولیس سی سی ٹی وی کیمروں کے ذریعے مسافروں کی نگرانی کریں گے۔