نئی دہلی: (ویب ڈیسک) بھارتی وزارت داخلہ نے ایک اور کشمیری حریت رہنما کو عسکریت پسند قرار دے دیا۔
کشمیرمیڈیا سروس کے مطابق بھارتی وزارت داخلہ نے مشتاق زرگر کو عسکریت پسند قرار دیتے ہوئے نوٹیفیکیشن جاری کردیا۔ غیر قانونی سرگرمیوں کی روک تھام کے کالے قانون کے تحت نوٹیفیکیشن جاری کیا گیا جس میں کہا گیا ہے کہ مشتاق زرگر سے نہ صرف بھارت بلکہ دنیا بھر میں امن کو خطرہ لاحق ہے۔
کیف: (ویب ڈیسک) روس کی یوکرین کےشہر ماریوپول اور خارکیف میں بمباری جاری ہے، روس نے کہا ہے کہ وہ اپنا تیل کسی بھی قیمت پر دوست ممالک کو فروخت کرنے کے لیے تیار ہے۔
روسی فوج نے ماریوپول میں اہم پوزیشنزپر قبضہ کر لیا، دوسری جانب روسی فوج کا اہم بحری جہاز “مسکووا ” بحیرہ اسود میں ڈوب گیا ہے جس سے روس کو یوکرین جنگ میں بڑا دھچکا پہنچا ہے۔ یوکرینی فورسز نے بحری جہاز کو گزشتہ روز میزائل سے نشانہ بنایا تھا۔
ادھر صدر پیوٹن نے کہا کہ روس اپنے تیل اور گیس کی ترسیل کا رخ باآسانی ایشیا کی جانب موڑ سکتا ہے جہاں انرجی کی ضروریات بڑھ رہی ہیں جبکہ روس کے وزیرتوانائی نے کہا ہے کہ دوست ممالک کو اپنا تیل کسی بھی قیمت پر فروخت کرنے کے لیے تیار ہیں۔
لاہور (سپورٹس رپورٹر) پاکستان آئندہ 12 ماہ مسلسل بین الاقوامی کرکٹ میں مصروف رہے
پاکستان کرکٹ بورڈ نے نیشنل مینز اور ویمنز کرکٹ ٹیموں کی آئندہ 12 ماہ کی مصروفیات پر مشتمل مکمل بین الاقوامی کرکٹ سیزن کی تفصیلات جاری کردی ہیں۔
تفصیلات کے مطابق مئی 2022 سے مئی 2023 تک پانچ مینز اور پانچ ویمنز غیرملکی کرکٹ ٹیمیں پاکستان کا دور ہ کریں گی۔اس دوران قومی مینز کرکٹ ٹیم 7 ٹیسٹ، 17 ون ڈے اور 25 ٹی ٹونٹی انٹرنیشنل میچز کھیلے گی۔ آئی سی سی ورلڈ ٹیسٹ چیمپئن شپ میں شامل یہ 7 ٹیسٹ میچز میں سے 2 سری لنکا، 3 انگلینڈ اور 2 نیوزی لینڈ کے خلاف کھیلے جائیں گے۔آئی سی سی مینز کرکٹ ورلڈکپ سپر لیگ میں شامل 12 ون ڈے انٹرنیشنل میچز ویسٹ انڈیز، سری لنکا، نیوزی لینڈ اور نیدرلینڈزکے خلاف کھیلے جائیں گے۔
اس عرصہ کے دوران قومی کرکٹ ٹیم اے سی سی ٹی ٹونٹی ایشیا کپ اور آئی سی مینز ٹی ٹونٹی ورلڈکپ میں بھی شرکت کرے گی۔ٹی ٹونٹی طرز کی کرکٹ میں ان دو ایونٹس کے علاوہ پاکستان کرکٹ ٹیم آئندہ 12 ماہ میں انگلینڈ کے خلاف 7 ، ویسٹ انڈیز کے خلاف 3 اور نیوزی لینڈ کے خلاف 5 ٹی ٹونٹی انٹرنیشنل میچز بھی کھیلے گی۔
نیوزی لینڈکی ٹیم اپریل 2023 میں دورہ پاکستان میں پانچ ون ڈےانٹرنیشنل سمیت پانچ ٹی ٹونٹی انٹرنیشنل میچز بھی کھیلے گی۔
دوسری جانب، قومی خواتین کرکٹ ٹیم کو بھی آئندہ 12 ماہ میں چیلجنگ کرکٹ کھیلنے کو ملے گی، جہاں انہیں اپنی صلاحیتوں کے اظہار کا بہترین موقع ملے گا۔اس دوران قومی خواتین کرکٹ ٹیم بسمہ معروف کی قیادت میں 8 انٹرنیشنل سیریزکھیلے گی۔ان انٹرنیشنل سیریز میں آئی سی سی ویمنز چیمپئن شپ، آئی سی سی ویمنز ٹی ٹونٹی ورلڈکپ، کامن ویلتھ گیمز، ایشین گیمزاور اے سی سی ویمنز ٹی ٹونٹی ایشیا کپ بھی شامل ہیں۔
سری لنکا کی خواتین کرکٹ ٹیم تین ون ڈے انٹرنیشنل میچز کھیلنے مئی میں پاکستان آئے گی۔ یہ پہلا موقع ہوگا کہ جب پاکستان آئی سی سی ویمنز چیمپئن شپ کے کسی میچ کی میزبانی کرے گا۔مہمان ٹیم کے اس دورہ میں تین ٹی ٹونٹی انٹرنیشنل میچز بھی شامل ہیں۔
قومی خواتین کرکٹ ٹیم ستمبر میں چین روانہ ہوگی، جہاں وہ ایشین گیمز میں شرکت کرے گی۔ پھر اکتوبر نومبر میں آئرلینڈ کی خواتین کرکٹ ٹیم پاکستان کا دورہ کرے گی۔ اس دوران مہمان ٹیم تین ون ڈے اور تین ٹی ٹونٹی انٹرنیشنل میچز کھیلے گی۔
اُدھر پاکستان شاہینز کی بھی 19ویں ایشین گیمز میں شرکت یقینی ہے، تاہم پی سی بی پاکستان شاہینز کے لیے مزید کرکٹ سیریز کے انعقاد کے لیے کوشاں ہے۔
پاکستان کی انٹرنیشنل سیریز (مئی 2022تا اپریل 2023، مقررہ تاریخوں/مقامات کا اعلان بعد میں کیا جائے گا):
24 مئی تا 5 جون: سری لنکا ویمنز کرکٹ ٹیم کا دورہ کراچی (3 ون ڈے اور 3 ٹی ٹونٹی)
5 تا 12 جون: ویسٹ انڈیزمینز کرکٹ ٹیم کا دورہ راولپنڈی (3 ون ڈےانٹرنیشنل میچز)
جولائی تا اگست: پاکستان مینز ٹیم کا دورہ سری لنکا (2 ٹیسٹ اور 3 ون ڈےانٹرنیشنل میچز)
12 تا 24 جولائی :قومی خواتین کرکٹ ٹیم کی بیلفاسٹ میں سہ فریقی ٹی ٹونٹی سیریز میں شرکت (4 ٹی ٹونٹی انٹرنیشنل میچز)
25 جولائی تا 8 اگست: قومی خواتین کرکٹ ٹیم کی برمنگھم کامن ویلتھ گیمز میں شرکت (7 ٹی ٹونٹی انٹرنیشنل میچز)
اگست : پاکستان مینز کرکٹ ٹیم کا دورہ نیدرلینڈز (تین ون ڈےانٹرنیشنل میچز)
یکم تا 17 ستمبر:اے سی سی مینز ٹی ٹونٹی کپ کے لیے قومی مینز کرکٹ ٹیم کی سری لنکا روانگی (5 ٹی ٹونٹی انٹرنیشنل میچز)
10 تا 25 ستمبر: پاکستان ویمنز اور پاکستان شاہینز کا 19ویں ایشین گیمز میں شرکت کے لیے چین کے شہر گانگزو کا دورہ
ستمبر تا اکتوبر: انگلینڈ مینز ٹیم کا دورہ پاکستان (7 ٹی ٹونٹی انٹرنیشنل میچز)
15 اکتوبر تا 15 نومبر: آسٹریلیا میں آئی سی سی مینز ٹی ٹونٹی ورلڈکپ
30 اکتوبر تا 19 نومبر: آئرلینڈ ویمنز کا دورہ لاہور/کراچی (3 ون ڈے انٹرنیشنل اور 3 ٹی ٹونٹی انٹرنیشنل میچز)
نومبرتا دسمبر : انگلینڈ مینز ٹیم کا دورہ پاکستان (3 ٹیسٹ میچز)
نومبرتادسمبر: اے سی سی ویمنز ٹی ٹونٹی ایشیا کپ ( 8 ٹی ٹونٹی انٹرنیشنل میچز)
دسمبرتاجنوری : نیوزی لینڈ مینز ٹیم کا دورہ پاکستان (2 ٹیسٹ اور 3 ون ڈےانٹرنیشنل میچز)
4 جنوری تا یکم فروری : پاکستان ویمنز ٹیم کا دورہ آسٹریلیا (3 ٹی ٹونٹی انٹرنیشنل اور 3 ون ڈے انٹرنیشنل میچز)
جنوری: ویسٹ انڈیز مینز ٹیم کا دورہ پاکستان (3 ٹی ٹونٹی انٹرنیشنل میچز)
جنوری تا فروری : آئی سی سی ویمنز انڈر 19 ٹی ٹونٹی ورلڈکپ، جنوبی افریقہ
2 تا 26 فروری: آئی سی سی ویمنز ٹی ٹونٹی ورلڈکپ، جنوبی افریقہ
اپریل تا مئی: نیوزی لینڈ مینز ٹیم کا دورہ پاکستان ( 5 ون ڈے انٹرنیشنل اور 5 ٹی ٹونٹی انٹرنیشنل میچز)
لاہور: (ویب ڈیسک) اداکارہ صاحبہ کو عید ٹیلی فلم “کانپیں ٹانگ رہی ہیں” میں کاسٹ کر لیا گیا۔
میڈیا رپورٹ کے مطابق صاحبہ نے اپنے نئے پراجیکٹ کے حوالے سے مداحوں کو سوشل میڈیا پر بتایا، انہوں نے جو تصویریں شیئر کی ہیں اس میں انہیں “کانپیں ٹانگ رہی ہیں” کا سکرپٹ پکڑے دیکھا جا سکتا ہے۔ یہ ٹیلی فلم ممکنہ طور پر عید کے موقع پر نجی ٹی وی چینل پر نشر کی جائے گی، سکرپٹ منصور احمد خان نے تحریر کیا ہے۔
واضح رہے کہ صاحبہ ماضی کی معروف اداکارہ نشو کی بیٹی اور اداکار افضل خان کی اہلیہ ہیں۔ اداکارہ ٹی وی کی بجائے فلم کے حوالے سے زیادہ جانی جاتی ہیں۔ انہوں نے منڈا بگڑا جائے ، چور مچائے شور، ہم تو چلے سسرال، ہم کسی سے کم نہیں، میں کھلاڑی تو اناڑی سمیت کئی مقبول فلموں میں اداکاری کے جوہر دکھائے۔
لاہور: (ویب ڈیسک) شان مسعود کاؤنٹی کرکٹ میں ڈبل سنچری سکور کرنے والے پہلے پاکستانی اوپنر بن گئے ہیں۔
شان مسعود نے ڈربی شائرکرکٹ کلب کی نمائندگی کرتے ہوئے سسیکس کے خلاف کاؤنٹی چیمپئن شپ کے میچ میں ڈبل سنچری بنائی جس کے بعد وہ کاؤنٹی کرکٹ میں یہ اعزاز حاصل کرنے والے پہلے پاکستانی اوپنر بن گئے۔
شان مسعود نے میچ کے پہلے روز ہی ڈبل سنچری سکور کی، اس سے قبل کاؤنٹی کرکٹ کے ڈیبیو میچ میں بائیں ہاتھ کے بلے باز نے بالترتیب اکانوے اور باسٹھ رنز کی اننگز کھیلی تھی۔
فیصل آباد: (ویب ڈیسک) بڑھتی ہوئی مہنگائی نے عوام کا جینا دوبھر کررکھا ہے، فیصل آباد میں اشیائے خور و نوش کی قیمتیں تاریخ کی بلند ترین سطح پر پہنچ گئیں۔
ماہ صیام کے دوران فیصل آباد میں گرانفروشوں نے پھل اور سبزیاں عوام کی پہنچ سے دور کر دی ہیں۔ عام آدمی فروٹ کو صرف دیکھ سکتا ہے خرید نہیں سکتا، منافع خور مہنگے پھلوں کی قیمتیں مزید مہنگی بناتے ہوئے کھلے عام سرکاری قیمت سے زائد پر فروخت کررہے ہیں۔
سرکاری ریٹ لسٹ کے مطابق سیب 180روپے کلو ہیں جو دکانوں پر 300 روپے میں فروخت کیے جارہے ہیں۔ پپیتا 170 کی بجائے 220، سٹابری 130 کی بجائے 160، لوکاٹ 165کی بجائے 200 روپے میں فروخت ہو رہے ہیں۔
سبزیوں کی قیمت بھی سرکاری ریٹ سے 15 سے 20 فیصد زائڈ وصول کی جا رہی ہے جبکہ لیموں تو عام آدمی خرید ہی نہیں سکتا جو 420 روپے کی بجائے 600 روپے کلو میں فروخت ہورہا ہے۔
اسلام آباد: (ویب ڈیسک) مریم اورنگزیب نے احساس پروگرام اور پناہ گاہیں بند کرنے کی خبروں کو جھوٹ قرار دے دیا۔ انہوں نے کہا کہ شہباز شریف نے وزیراعظم منتخب ہونے کے بعد قومی اسمبلی میں پہلے خطاب میں واضح کیا کہ عوامی خدمت کے منصوبے جاری رہیں گے۔
پاکستان مسلم لیگ (ن) کی ترجمان مریم اورنگزیب کا اپنے بیان میں کہنا تھا کہ بے نظیر انکم سپورٹ پروگرام نہ صرف جاری رہے گا بلکہ اسے مزید توسیع دی جائے گی، وزیراعظم شہباز شریف نے بے نظیر انکم سپورٹ پروگرام کو بچوں اور بچیوں کی تعلیم کا ذریعہ بنانے کا فیصلہ کیا ہے، کوئی پروگرام بند نہیں ہوا،عوام کی بھلائی کے ہر منصوبے کو مزید بہتر بنائیں گے، وزیراعظم نواز شریف کا شروع کردہ صحت کارڈ اسی طرح چلتا رہے گا، اسے مزید بہتر بنائیں گے۔
مریم اورنگزیب کا کہنا تھا کہ یہ جھوٹ وہ پھیلا رہے ہیں جنہیں وزیراعظم کی کرسی اور کنٹینر پر جھوٹ بولنے کی عادت ہے، آج ملک میں ایک منتخب وزیراعظم ہے جو عوام کا دکھ درد اور احساس رکھتا ہے، آج ملک میں ایسا منتخب وزیراعظم ہے جو عوام کے لئے فراخ دلی اوراُن کی خدمت کا جذبہ رکھتا ہے، آج ملک میں ایسا منتخب وزیراعظم ہے جو عوامی اور قومی سلامتی کے ایشوز کو اپنی سیاست کے لئے استعمال نہیں کرتا۔
اسلام آباد: (ویب ڈیسک) شیری رحمان نے کہا ہے کہ عمران خان نے اپنی ساکھ بچانے کیلئے خارجہ پالیسی کو داؤ پر لگایا، عمران خان نے ملکی مفاد پر ذاتی مفاد کو ترجیح دی۔
رہنما پیپلزپارٹی و سینیٹر شیری رحمان نے دیگر رہنماؤں کے ہمراہ نیوز کانفرنس کرتے ہوئے کہا کہ کل بہت سی چیزیں بے نقاب ہوئیں اور وضاحتیں آئیں، ڈی جی آئی ایس پی آر کی نیوز بریفنگ کو ویلکم کرتے ہیں، مراسلے کو اپوزیشن کیساتھ جوڑا گیا کہ سازش کی گئی ہے، کہا گیا اپوزیشن نے عالمی قوتوں کیساتھ مل کر سازش کی، عمران خان نے اپنی ساکھ بچانے کیلئے خارجہ پالیسی کو داؤ پر لگایا، عمران خان نے ملکی مفاد پر ذاتی مفاد کو ترجیح دی، وزیراعظم کو ملکی مفاد کو اولین ترجیح دینا ہوتی ہے۔
شیری رحمان کا کہنا تھا کہ 7 مارچ کو ایک ٹیلی گرام آیا جسے سازش کہا گیا، نیشنل سکیورٹی کونسل کے اعلامیے میں کسی سازش کا ذکر نہیں، امریکا نے کہا کسی ایک سیاسی جماعت کیساتھ تعلق نہیں رکھتے، پہلے چور ڈاکو کہا جاتا رہا اب کہا گیا سازش کی گئی ہے، کوئی عالمی سازش نہیں تھی، پاکستان کو بند گلی میں دھکیلنے کی کوشش کی جا رہی ہے۔
اسلام آباد: (ویب ڈیسک) اسلام آباد ہائیکورٹ نے پی ٹی آئی کے سوشل میڈیا ایکٹوسٹس کو ہراساں کرنے کی درخواست نمٹا دی۔ عدالت نے پی ٹی آئی کی درخواست ہدایات کے ساتھ نمٹائی۔
چیف جسٹس اطہر من اللہ نے پی ٹی آئی کی درخواست پر سماعت کی۔ عدالت نے ڈائریکٹر سائبر کرائم کو ہدایت کرتے ہوئے کہا کہ آپ کسی کو ہراساں نہ کریں، آپ نئے آئے ہیں، عدالت کو آپ پر مکمل اعتماد ہے، تنقید ہو سکتی ہے مگر کسی کو اشتعال نہیں دلا سکتے، ہم ڈی جی ایف آئی اے کو ہدائت کرتے ہیں کہ وہ کوئی مجاز افسر مقرر کریں جو آپ سے کوآرڈی نیٹ کرے۔
وکیل فیصل چودھری ایڈووکیٹ نے موقف اپنایا کہ ہمارے تین ورکرز لاہور میں اٹھائے تھے جنہیں جوڈیشل کر کے ضمانت کروا رہے ہیں۔ عدالت نے کہا کہ ہم یہ درخواست ہدایات کے ساتھ نمٹا رہے ہیں، اگر کوئی شکائت ہو تو ڈائریکٹر سائبر کرائم کو بتائیں، ہم نہیں چاہتے کہ یہ دوبارہ کورٹ آئیں۔
اسلام آباد: (ویب ڈیسک) وزیراعظم شہباز شریف نے اتحادیوں کو آج افطار ڈنر پر مدعو کرلیا، کابینہ کو حتمی شکل دی جائے گی۔
وزیراعظم شہباز شریف نے اتحادی جماعتوں کے سربراہوں کو آج افطار ڈنر پر مدعو کرلیا۔ سابق صدر آصف علی زرداری، بلاول بھٹو، خالد مقبول صدیقی، خالد مگسی، مولانا فضل الرحمان اور دیگر اتحادی رہنماؤں کو دعوت دی گئی ہے۔
ذرائع کا کہنا ہے کہ ملاقات میں سیاسی صورتحال کے علاوہ حکومت سازی کے امور بھی زیر غور آئیں گے جبکہ دعوت میں کابینہ کی تشکیل کو حتمی شکل دی جائے گی۔ ذرائع کا کہنا ہے کہ کابینہ ارکان کا اعلان بھی آج متوقع ہے۔
