اوتاوا: (ویب ڈیسک) بین الاقوامی شہرت یافتہ کینیڈین گلوکار جسٹن بیبر کووڈ19 میں مبتلا ہوگئے ہیں۔
غیرملکی میڈیا کی رپورٹ کے مطابق پاپ اسٹار جسٹن بیبر کے کورونا وائرس ٹیسٹ کی رپورٹ مثبت آگئی جس کے باعث انہیں اپنا کنسرٹ بھی ملتوی کرنا پڑ گیا۔
رپورٹ میں بتایا گیا کہ امریکی ریاست نیواڈا کے شہر لاس ویگاس میں جسٹن بیبر کا کنسرٹ شیڈول تھا جسے گلوکار نے کورونا وائرس کی تشخیص کے باعث چند مہینوں تک ملتوی کردیا ہے۔
یہ بھی دعویٰ کیا جارہا ہے کہ اسٹار گلوکار کی ٹیم کے دیگر اراکین میں بھی کورونا کی تصدیق ہوئی ہے تاہم اس حوالے سے مصدقہ تفصیلات سامنے نہیں آئیں۔
جسٹن بیبر کے کنسرٹ کی نئی تاریخ رواں سال 28 جون مقرر کی گئی ہے۔ وہ مداح جو کنسرٹ کے ٹکٹ واپس کرنا چاہتے ہیں انہیں ری فنڈ کی سہولت میسر ہے۔
کینیڈین گلوکار نے کورونا ٹیسٹ مثبت آنے اور کنسرٹ کی منسوخی پر افسوس کا اظہار کیا اور یہ بھی کہا مداحوں کی صحت کی حفاظت اولین ترجیح ہے، موجودہ صورت حال سے نکل کر پھر سامنے آئیں گے۔
