لاہور: (ویب ڈیسک) ڈیفنس گارڈن میں واقع گھر سے 51 کلو چرس برآمد کرکے خاتون کو گرفتار کرلیا گیا۔
اے این ایف کے مطابق انٹیلیجنس کی اطلاع پر اے این ایف لاہور نے ڈیفنس گارڈن میں واقع ایک گھر میں بڑی کارروائی کرتے ہوئے 51 کلو چرس برآمد کرلی، جب کہ گھر میں موجود رخسانہ بی بی نامی ملزمہ کو گرفتار کر لیا گیا، ملزمہ کے خاوند لیاقت علی کی گرفتاری کے لیے ٹیمیں تشکیل دیدی گئی ہیں۔
ترجمان اے این ایف نے بتایا کہ ڈیفنس گارڈن میں واقع گھر پر چھاپہ خفیہ اطلاع پر مارا گیا، گھر میں منشیات موجودگی کی مستند اطلاع تھی اور پتہ چلا تھا کہ مذکورہ گھر منشیات ذخیرہ کرنے کیلئے استعمال کیا جاتا ہے، یہ مکروہ دھندہ ایک پورا گروہ کرتا ہے، اور اس نیٹ ورک سے تعلق رکھنے والی خاتون گرفتار کرلی گئی ہے۔ جب کہ مزید ملزمان کی گرفتاری بھی جلد عمل میں لائی جائے گی۔

لاہور: (ویب ڈیسک)حمزہ شہباز ماڈل ٹاؤن میں مہمانوں کے سامنے گانا گارہے ہیں اور حاضرین محظوظ ہورہے ہیں۔
مسلم لیگ ن کے رہنما اور پنجاب اسمبلی میں اپوزیشن لیڈر حمزہ شہباز اپنی رہائش ماڈل ٹاؤن میں مہمانوں کے سامنے گفتگو کے دوران فرط جذبات پر قابو نہ پا سکے، اور بھارتی گلوکار محمد رفیع کا گانا گنگنا دیا۔ حمزہ شہباز کی گانا گاتے ہوئے ویڈیو بھی وائرل ہوگئی، جس میں حاضرین ان کی ویڈیو بنارہے ہیں۔
حمزہ شہباز نے گلوکار محمد رفیع کا گانا ” زندگی تو بے وفا ہے اک دن ٹھکرائے گی، گایا، جس کے اختتام پر حاضرین نے تالیاں بجاکر خوب داد بھی دی، اور حاضرین محفل حمزہ شہباز کا گانا محظوظ ہوکر سنتے رہے۔

اسلام آباد: (ویب ڈیسک)محکمہ موسمیات نے ملک کے بالائی اور وسطی علاقوں میں آندھی، تیز ہواؤں اور گرج چمک کے ساتھ بارش کی پیشگوئی کی ہے۔
محکمہ موسمیات نے منگل سے جمعرات کے دوران ایک بار پھر ملک کے بالائی اور وسطی علاقوں میں آندھی، تیز ہواؤں اور گرج چمک کے ساتھ بارش کا امکان ظاہر کیا ہے، اور خدشہ ظاہر کیا ہے کہ آندھی تیز ہواؤں اور ژالہ باری کے باعث خیبر پختونخوا، بالائی پنجاب اور کشمیر میں کھڑی فصلوں و اسٹرکچرز کو نقصان ہوسکتا ہے۔
محکمہ موسمیات کا کہنا ہے کہ پیر اور منگل کو بلوچستان، جنوبی پنجاب اور سندھ کے علاقوں میں آندھی، تیز ہوائیں اور جھکڑ چلنے سے اسٹرکچر اور کھڑی فصلوں کو نقصان کا خدشہ ہے، جب کہ مری گلیات، نتھیا گلی، ناران، کاغان، دیر، سوات، شانگلہ، بونیر، نیلم ویلی، اسکردو، استور اور ہنزہ میں درمیانی اور شدید برفباری سے رابطہ سڑکیں بند ہونے کا خطرہ ہے۔ محکمہ موسمیات نے تمام متعلقہ اداروں کو الرٹ رہنے کی ہدایت کردی ہے۔

کراچی: (ویب ڈیسک) انسداد دہشتگردی کی خصوصی عدالت نے مہاجر قومی موومنٹ کے 3 کارکنوں کے قتل میں ملوث ایم کیو ایم کے رئیس ماما، شاہد جاپانی سمیت دیگر ملزمان کو بری کردیا۔
کراچی سینٹرل جیل میں انسداد دہشتگردی کمپلیکس میں خصوصی عدالت نے مہاجر قومی موومنٹ کے 3 کارکنوں کے قتل کا فیصلہ سنا دیا۔
پراسیکیوشن ایم کیو ایم کے رئیس مما، شاہد جاپانی سمیت دیگر پر جرم ثابت کرنے میں ناکام رہا۔
عدالت نے ایم کیو ایم کے رئیس ماما و دیگرکو عدم ثبوت کی بناء پر بری کردیا، بری ہونے والے ملزمان میں کاشف، عاطف علی، ایاز اور شاہد جاپانی شامل ہیں، عدالت نے حکم دیا کہ ملزمان کسی اور مقدمہ میں نامزد نہیں تو رہا کردیا جائے۔
پولیس کے مطابق ملزمان نے 2013 میں لانڈھی میں ایم کیو ایم کی اعلیٰ قیادت کی ہدایت پر ہنگامہ آرائی کی، ہنگامہ آرائی کے دوران ملزمان نے مہاجر قومی موومنٹ کے 3 کارکنوں کو قتل کیا تھا۔

کراچی: (ویب ڈیسک) گلشن اقبال میں دو گھریلو ملازمائیں 45 لاکھ کا سونا لوٹ کر فرار ہو گئیں، 2 روز قبل ہونے والی واردات کا مقدمہ درج کر لیا گیا۔
واقعہ گلشن اقبال بلاک 13 میں پیش آیا جہاں دو گھریلو ملازمائیں بنگلے کا صفایا کر گئیں،دونوں خواتین ملزمان آپس میں ماں بیٹی ہیں، انہوں نے باقاعدہ منصوبہ بندی کرکے گھر میں موجود معمر افراد کو نشہ آور چائے پلاکر بے ہوش کر دیا اورکمروں میں رکھے گئے سونے کی بھاری مقدار جس کی مالیت 45 لاکھ روپے بتائی گئی ہے، لوٹ کر فرار ہو گئیں۔
کراچی پولیس نے 2 روزقبل واقعے کا مقدمہ گلشن اقبال تھانے میں درج کیا جس کے مطابق تاجر نے 5 ماہ قبل ماں، بیٹی شمیم اور حمیرا کو گھر کے کام پر رکھا، دونوں ملازمائیں صبح 8 بجے آتیں، 4 بجے واپس جاتی تھیں، انہوں نےاہلخانہ پر پہلے اپنا اعتماد قائم کیا اور بعد ازاں واردات کر ڈالی۔