واشنگٹن : (ویب ڈیسک) امریکہ نے کیوبا کے گوانتاناموبے جیل سے دو بھائیوں کو پاکستان منتقل کردیا ہے جس کے بعد گوانتاموبے میں قیدیوں کی تعداد 32 رہ گئی ہے ۔
2002 میں گوانتاناموبے کیمپ کو ریپبلکن صدر جارج ڈبلیو بش نے نیویارک اور پینٹاگون پر 2001 کے طیارہ حملوں کے بعد غیر ملکی دہشت گردی میں ملوث مشتبہ افراد کیلئے قائم کیا تھا ، حملے میں تقریباً 3ہزار افراد ہلاک ہوئے تھے۔
یہ امریکہ کی “دہشت گردی کے خلاف جنگ” کیلئے کیے جانیوالے اقدامات میں سب سے انتہائی قدم تھا کیونکہ تفتیش کے سخت طریقوں کے بارے میں ناقدین اس پر بات کرتے رہے ہیں ۔
2021 میں ڈیموکریٹ صدر جو بائیڈن نے اقتدار سنبھالا تو اس جیل میں 40 قیدی تھے ، اس حوالے سے صدر بائیڈن کا کہنا ہے کہ وہ اس مرکز کو بند کرنے کا ارادہ رکھتے ہیں ، اس ضمن میں حکومت کو قانون کے ذریعے گوانتانامو بے کے قیدیوں کو امریکی سرزمین کی جیلوں میں منتقل کرنے سے روک دیا گیا ہے۔
اسی سلسلے میں جمعرات کو پینٹاگون نے عبدالربانی اور محمد ربانی کو پاکستان واپس بھیجنے کا اعلان کیا ہے، دونوں کو 2002 میں گرفتار کیا گیا تھا۔
پینٹاگون کی ویب سائٹ کے مطابق عبدالربانی القاعدہ کا سہولت کار تھا جبکہ محمد ربانی القاعدہ کے اہم رہنماؤں کے لیے مالی اور سفری سہولتوں میں معاونت فراہم کرتا تھا۔
پینٹاگون نے ایک بیان میں کہا ہے کہ امریکہ پاکستان اور دیگر شراکت داروں کی جانب سے امریکی کوششوں کی حمایت کے لیے آمادگی کو سراہتا ہے۔
پینٹاگون نے اپنے بیان میں مزید کہا ہے کہ جیل میں مجموعی طور پر اب 32 قیدی باقی ہیں جن میں سے 18 منتقلی کے اہل ہیں۔

کیف : (ویب ڈیسک) روس کے حملے کو ایک سال مکمل ہونے پر یوکرین نے خصوصی یادگاری نوٹ جاری کر دیا۔
24 فروری 2022 کو روس کی جانب سے یوکرین پر حملہ کرتے ہوئے جنگ کا اعلان کیا گیا تھا ، ایک سال مکمل ہونے کے موقع پر یوکرین کے مرکزی بینک نے خصوصی یادگاری نوٹ کی نقاب کشائی کی۔
رپورٹس کے مطابق مرکزی بینک کی جانب سے یوکرینی کرنسی Hryvnia کا 20 کے خصوصی نوٹ کے ایک طرف تین فوجیوں کو قومی پرچم بلند کرتے ہوئے دکھایا گیا ہے جبکہ نوٹ کی دوسری طرف رسی سے بندھے ہوئے دو ہاتھوں کی تصویر ہے جو مبینہ طور پر جنگی جرائم کی نشاندہی کرتی ہے۔
رپورٹس کے مطابق گورنر نیشنل بینک آف یوکرین نے اس حوالے سے کہا کہ جنگ کو ایک سال مکمل ہونے کے موقع پر ہم نے ایک یادگاری نوٹ جاری کرنے کا فیصلہ کیا جو کاغذ کے ایک چھوٹے سے ٹکڑے پر سال بھر کے جذبات، مواد اور نمایاں ہونیوالی چیزوں کی عکاسی کرے گا، اس نوٹ کو ڈیزائن اور تیار کرنے میں تقریباً 8 ماہ کا وقت لگا ہے ۔
واضح رہے کہ برطانوی خبر رساں ایجنسی کے مطابق گزشتہ سال سے اب تک روس یوکرین جنگ میں 42 ہزار سے زائد افراد ہلاک جبکہ 56 ہزار سے زائد زخمی ہوچکے ہیں، اس کے علاوہ 15 ہزار افراد لاپتہ ہیں۔

قاہرہ : (ویب ڈیسک) مصرکی حکومت نے رواں سال موٹاپے سمیت متعدد بیماریوں کا شکار افراد کو حج پر جانے سے روکنے کا فیصلہ کیا ہے ۔
عرب میڈیا رپورٹس کے مطابق حج کے لیے دی جانیوالی درخواست میں ان بیماریوں سے محفوظ ہونا بھی قرار دیا گیا ہے، مصر میں حج درخواستیں آئندہ 6 مارچ تک جمع کروائی جاسکیں گی ۔
وزارت داخلہ نے اس سال مناسک حج ادا کرنے کیلئے متعدد گروپوں کے سفر پر پابندی لگانے کا فیصلہ کیا ہے کیونکہ ایسے افراد میں انفیکشن کے سب سے زیادہ خطرات لاحق ہوتے ہیں۔
وزارت کے مطابق پابندی میں گردے کے وہ مریض جن کے علاج کے لیے ڈائیلاسز سیشنز کی ضرورت ہوتی ہے ، پھیپھڑوں کے فائبروسس اور موٹاپے کے مریض، امراض قلب کے ایڈوانس کیسز، جگر کی سروسس اور ٹیومر والے افراد شامل ہیں ۔ اس کے ساتھ ساتھ پہلے اور آخری مہینوں کی حاملہ خواتین ، ذہنی مریضوں اور الزائمر کے مریضوں کو بھی حج پر جانے سے روک دیا جائے گا۔
مصری وزارت نے یہ شرط بھی عائد کی ہے کہ عاز مین حج حفاظتی ٹیکوں کے بنیادی کورس لازمی لگوائیں جبکہ کورونا وائرس کے خلاف بین الاقوامی طور پر منظور شدہ ویکسین کی بوسٹر خوراک بھی لگی ہونا چاہیے، ویکسی نیشن کے سرٹیفکیٹ کی کاپی فراہم کرنا بھی ضروری قرار دیا گیا ہے۔