اسلام آباد: (ویب ڈیسک) سپریم کورٹ آف پاکستان نے کہا ہے کہ ہنگامی حالت کے بغیر آرڈیننس کا اجراء آئین سے انحراف ہے، آئینی شرائط کے بغیر صدر و گورنرز آرڈیننس نافذ نہیں کر سکتے۔
عدالت عظمیٰ نے آرڈیننس سے متعلق تحریری فیصلہ جاری کر دیا، جسٹس قاضی فائز عیسیٰ نے 30 صفحات پر مشتمل فیصلہ تحریر کیا۔
سپریم کورٹ نے فیصلے میں کہا کہ آئین کے ہر لفظ پر سختی سے عمل ہونا چاہیے، آرڈیننس جاری کرنے کیلئے آئین میں طریقہ کار دیا گیا ہے، ہنگامی حالات کے بغیر آرڈیننس جاری کرنا آئین سے انحراف ہے۔
فیصلے کے مطابق آئینی شرائط کے بغیر صدر اور گورنرز آرڈیننس نافذ نہیں کر سکتے، آرڈیننس کچھ ماہ بعد ختم ہو جاتے ہیں، آرڈیننس کے ذریعے طویل مدتی حقوق اور ذمہ داریاں دینے سے گریز کرنا چاہیے، جمہوری ملک میں عوام منتخب نمائندوں کے ذریعے اپنی رائے کا اظہار کرتے ہیں۔ قانون سازی کے عمل میں یقینی بنایا جائے کہ عوام کے حقوق پامال نہیں ہوئے۔
سپریم کورٹ کی طرف سے جاری کردہ فیصلے کے مطابق انکم سپورٹ لیوی ایکٹ 2013ء کی سینٹ سے منظوری نہیں لی گئی، عوامی نمائندوں کے ذریعے ہونے والی قانون سازی آئینی تقاضا ہے، ملک میں نمائندہ جمہوریت عوام کو متحد اور خیر سگالی کو جنم دیتی ہے۔ پارلیمنٹ کے ذریعے ہونے والی قانون سازی سے عوام با اختیار اور وفاق مضبوط ہو تا ہے۔
سپریم کورٹ نے انکم سپورٹ لیوی 2013 کیلئے کمشنر ان لینڈ ریونیو کی جانب سے دائر درخواستیں خارج کردیں، 581 فریقین نے سندھ ہائیکورٹ میں درخواستیں دائر کی تھیں، سندھ ہائیکورٹ نے انکم سپورٹ لیوی 2013ء کو غیر آئینی قرار دیا تھا۔

اسلام آباد: (ویب ڈیسک) جمعیت علمائے اسلام (جے یو آئی) کی ذیلی تنظیم انصار الاسلام نے پارلیمنٹ لاجز کے اندر کیمپ قائم کر دیا ہے۔
تفصیلات کے مطابق حکومت مخالف اپوزیشن جماعتوں کی تحریک عدم اعتماد پر پیش رفت جاری ہے اور اسی سلسلہ میں جمعیت علمائے اسلام (جے یو آئی ف) کی ذیلی تنظیم انصار الاسلام پارلیمنٹ لاجز کے باہر پہنچی جہاں پر اپوزیشن کے ممبران کو بھرپور سکیورٹی دینے کا فیصلہ کیا گیا۔
جے یو آئی کے سربراہ مولانا فضل الرحمان کی ہدایت پر سکیورٹی پر عملدرآمد شروع ہوگا، انصار الاسلام کے رضا کاروں نے پارلیمنٹ لاجز کے باہر مختصر ریہرسل بھی کی۔
بعدازاں انصار الاسلام کے رضا کاروں نے پارلیمنٹ لاجز کے اندر کیمپ قائم کردیا ہے جو کہ عدم اعتماد کی کامیابی تک لاجز میں رہیں گے۔
انصار الاسلام کے سربراہ انجنئیر عبدالزاق عابد لاکھو نے کہا کہ ہم پوری اپوزیشن کے ممبران کو سکیورٹی فراہم کریں گے، ایسے موقع پر ممبران کو اغوا کیا جاتا ہے۔

اسلام آباد: (ویب ڈیسک) الیکشن کمیشن آف پاکستان نے سندھ میں مئی کے آخری ہفتے میں بلدیاتی انتخابات کے انعقاد کا فیصلہ کرلیا۔
چیف الیکشن کمشنر کی سربراہی میں الیکشن کمیشن حکام کا اہم اجلاس ہوا، جس میں سیکریٹری الیکشن کمیشن ، چیف سیکرٹری سندھ اور الیکشن کمیشن حکام نے شرکت کی۔
اجلاس میں سندھ میں بلدیاتی انتخابات کے انعقاد کے حوالے سے گفتگو کی گئی جبکہ تمام شرکا نے سندھ میں مئی کے آخری ہفتے میں بلدیاتی انتخابات کروانے پر اتفاق کیا۔
الیکشن کمیشن آف پاکستان کی جانب سے جاری اعلامیے کے مطابق سندھ میں بلدیاتی انتخابات دو مرحلوں میں کروائے جائیں گے۔

لاہور: (ویب ڈیسک) پاکستان مسلم لیگ ن کی نائب صدر مریم نواز نے وزیراعظم پر شدید تنقید کرتے ہوئے کہا ہے کہ تمہاری جماعت کے بخیے ادھڑ رہے ہیں اور اس کی ذمہ دار نہ اپوزیشن ہے اور نہ کوئی ملکی یا غیر ملکی سازش۔
سماجی رابطے کی ویب سائٹ ٹویٹر پر اپنے سلسلہ وار ٹویٹ میں پاکستان مسلم لیگ ن کی نائب صدر نے وزیراعظم پر طنز کرتے ہوئے لکھا کہ غصہ، اشتعال، دھمکیاں، گالیاں، زبان درازی __ گھبرا گئے ہو نا!
عمران خان کو مخاطب کرتے ہوئے انہوں نے مزید لکھا کہ تم نے پاکستان کو تباہی و بربادی کے گڑھے میں پھینک دیا۔ چاروں طرف غربت، مہنگائی، بیروزگاری، بدامنی، دہشتگردی کا راج ہے۔ قوم تمہاری نااہلیت، جہالت اور کھلنڈرے پن کی بہت قیمت ادا کر چکی ہے۔ مزید کی کوئی گنجائش نہیں۔
مریم نواز نے مزید لکھا کہ اپنی ناکامیوں کا الزام اپوزیشن کو دو نہ دوسرے ممالک کو۔ سازش کا واویلا کر کے تم قوم کو بے وقوف نہیں بنا سکتے۔ جس شخص کو تاریخ کا علم ہو نہ جغرافیہ کا، جسے خارجہ پالیسی کا پتہ ہو نہ سفارتی تعلقات کا، جسے حکومت چلانا آیا ہو نہ عوام کے مسائل حل کرنا، وہ وہی کچھ کرسکتا تھا جو تم نے پونے چار سالوں میں کیا۔
پاکستان مسلم لیگ ن کی نائب صدر نے کہا کہ تمہارا کارنامہ یہ ہے کہ تم نے پاکستان کو اندرونی طور پر تباہ و برباد اور بیرونی طور پر تنہا کر دیا ہے۔ دنیا میں ہمارے دشمنوں کے لیے تم سے بہتر کون ہوگا۔ اپنا انجام دیکھ کر گھبراؤ نہیں- ڈرامہ بازی بند کرو۔ یہ دن تو آنا ہی تھا۔
انہوں نے مزید لکھا کہ آنکھیں کھول کے دیکھو، تمہاری جماعت کے بخیے ادھڑ رہے ہیں اور اس کی ذمہ دار نا اپوزیشن ہے اور نا کوئی ملکی یا غیر ملکی سازش۔ اس کے ذمہ دار آپ خود ہیں، آپ کی گندی زبان ہے، آپ کا تکبر اور غرور ہے اور اپنے ممبران کو احترام نہ دینا ہے۔ اب بہت دیر ہو چکی۔ آپ کی خالی دھمکیاں اب کسی کام کی نہیں۔

اسلام آباد:(ویب ڈیسک) وزیراعظم عمران خان کے خلاف تحریک عدم اعتماد کی ریکوزیشن جمع کروانے کے بعد سیاسی ملاقاتیں عروج پر پہنچ گئیں، ایم کیو ایم کے وفد کی پی ڈی ایم سربراہ مولانا فضل الرحمان سے ملاقات ہوئی ہے۔
متحدہ قومی موومنٹ (ایم کیو ایم) وفد خالد مقبول صدیقی کی قیادت میں مولانا فضل الرحمان سے ملاقات کے لیے پہنچا تو پی ڈی ایم سربراہ نے خود استقبال کیا۔
ملاقات میں خالد مقبول صدیقی، امین الحق، وسیم اختر،عامر خان، کنور نوید شامل ہیں جبکہ جمعیت علمائے اسلام (ف) کی نمائندگی اکرم خان درانی، مولانا لطف الرحمان کر رہے ہیں۔
اس سے قبل متحدہ قومی موومنٹ (ایم کیو ایم) کے وفد نے خالد مقبول کی قیادت میں زرداری ہاؤس میں سابق صدر آصف علی زرداری سے ملاقات کی تھی، ملاقات میں پاکستان پیپلز پارٹی کے شریک چیئر مین بلاول بھٹو زرداری بھی موجود تھے۔
واضح رہے کہ پیپلز پارٹی سے ملاقات سے قبل ایم کیو ایم رہنماؤں نے مسلم لیگ ق کے وفد سے بھی ملاقات کی تھی اور سیاسی صورتحال پر تبادلہ خیال کیا گیا تھا۔

لاہور: (ویب ڈیسک) وزیراعظم عمران خان نے کہا ہے کہ ملکی تاریخ میں پہلی مرتبہ پورے پنجاب میں ترقیاتی منصوبے شروع کئے گئے ہیں۔
وزیراعظم عمران خان سے صوبائی وزراء سردار آصف نکئی اور سیّد صمصام بخاری نے ملاقات کی، ملاقات میں صوبے کی سیاسی صورتحال پر گفتگو کی، اس کے علاوہ متعلقہ وزارتوں میں جاری ترقیاتی منصوبوں پر بھی گفتگو کی گئی۔
ملاقات کے دوران وزیراعظم نے کہا کہ ماضی میں پنجاب کا سارا ترقیاتی بجٹ مخصوص شہروں تک محدود رکھا جاتا رہا، پسماندہ اور ماضی میں نظر انداز کئے ہوئے شہروں کی ترقی حکومت کی اولین ترجیحات میں شامل ہے۔
انہوں نے کہا کہ ملکی تاریخ میں پہلی مرتبہ پورے پنجاب میں ترقیاتی منصوبے شروع کئے گئے ہیں۔

لاہور: (ویب ڈیسک) ذرائع کا کہنا ہے کہ ترین گروپ اور علیم خان گروپ کے درمیان اختلافات بڑھنے لگے۔
جہانگیر ترین گروپ اور علیم خان گروپ کے مابین اختلافات بڑھنے لگے ہیں اور ان دونوں گروپس کی راہیں جدا ہونے کا امکان ہوگیا ہے۔
ذرائع کا کہنا ہے کہ ترین گروپ میں شامل چند سخت گیر ارکان کے دباؤ کی وجہ سے جہانگیرترین علیم خان سے ملاقات کرنے سے گریزاں ہیں، اس بات کا اندازہ اس بات سے لگایا جاسکتا ہے کہ ترین گروپ میں شمولیت کے بعد سے اب تک جہانگیر ترین اورعلیم خان کا کوئی براہ راست رابطہ نہیں ہوا، جس کی وجہ یہ ہے کہ ترین گروپ کے سخت گیر ارکان علیم خان کی گروپ میں شمولیت کو ”گروپ ہائی جیک“ تصور کرتے ہیں۔
ذرائع نے بتایا کہ علیم خان گروپ تحریک انصاف میں رہتے ہوئے پنجاب میں تبدیلی کا خواہشمند ہے، جب کہ ترین گروپ کی ترجیح وفاق میں تبدیلی تاہم بیانات کی حد تک وزیر اعلی پنجاب کی تبدیلی کا مطالبہ ہے، ایک طرف علیم خان گروپ کے پاس 15 سے زائد اراکین پنجاب اسمبلی کی بھرپور حمایت موجود ہے، اور گروپ میں کوئی ایم این اے شامل نہیں۔ جب کہ دوسری طرف ترین گروپ میں شامل متعدد اراکین قومی اسمبلی کے مسلم لیگ (ن) سے معاملات طے پانے کے قریب ہیں۔
ذرائع نے بتایا کہ گزشتہ رات علیم خان گروپ کی اہم شخصیت نے ترین گروپ کے سینئر رہنما عون چوہدری کو اپنے تحفظات سے آگاہ کردیا تھا۔ ذرائع کا یہ بھی کہنا ہے کہ دونوں گروپس کے سرکردہ رہنما اختلافات کے خاتمے کے لئے متحرک ہیں اور آئندہ 24 گھنٹے دونوں گروپس کیلئے اہم ہیں۔

لاہور: (ویب ڈیسک) منی لانڈرنگ کیس میں شہباز شریف اور حمزہ شہباز کو فرد جرم کے لیے 25 مارچ کو طلب عدالت طلب کرلیا گیا۔
ایف آئی اے منی لانڈرنگ کیس میں بڑی پیش رفت سامنے آئی ہے جس میں عدالت نے شہباز شریف اور حمزہ شہباز کو 25 مارچ کو فرد جرم کے لیے طلب کرلیا، عدالت نے عدالتی دائرہ اختیار پر وکلاء کو آئندہ دلائل دینے کی ہدایت کردی۔
اسپیشل سینٹرل عدالت لاہور میں شوگر کےکاروبار کے ذریعے منی لانڈرنگ کے مقدمے کی سماعت ہوئی جس میں شہباز شریف اور حمزہ شہباز پیش ہوئے۔
شہباز شریف کے وکیل امجد پرویز نے کہا کہ بینک ملازمین کے بیانات کی کاپیاں ہمیں فراہم نہیں کی گئیں، قانون کے مطابق بینک ملازمین کے بیانات کی کاپیاں ہمیں فراہم کرنی چاہئیں، بیانات کی کاپیاں نہ دینے سے فئیر ٹرائل کا تصور ختم ہو جائے گا، تفتیش کے دوران کچھ افراد کے جوڈیشل مجسٹریٹ کے روبرو بیانات ریکارڈ کروائے لیکن پراسکیوشن نے ان افراد کے بیانات کی کاپیاں فراہم نہیں کیں۔
ایف آئی اے نے کہا کہ جن افراد کے بیانات ریکارڈ ہوئے وہ ہمارے گواہ نہیں ہیں جس پر وکیل نے کہا کہ اگر گواہ نہ بھی ہوں تب بھی بیانات کی کاپیاں فراہم کرنا ایف آئی اے کی ذمہ داری ہے، قانون کے مطابق اس وقت تک ٹرائل نہیں ہوسکتا جب تک ملزمان کو تمام مٹیریل فراہم نہ کر دیا جائے۔
ایف آئی اے وکیل نے کہا کہ یہ آج عدالت کا وقت ضائع کررہے ہیں، ملزمان کو تمام ضروری دستاویزات فراہم کرچکے ہیں۔
بعدازاں عدالت نے ایف آئی اے کو بیانات کی کاپیاں فراہم کرنے کی درخواست پر تحریری جواب جمع کرانے کی ہدایت کردی۔ عدالت نے ایف آئی اے کی روزانہ کی بنیاد پر سماعت کرنے کی درخواست مسترد کردی اور ایف آئی اے کو تین روز میں بینک ملازمین کے بیان کی کاپیاں فراہم کرنے کا حکم دے دیا۔