لاہور: (ویب ڈیسک) گورنر پنجاب عمر سرفراز چیمہ کا بڑا فیصلہ سامنے آگیا۔ گورنر پنجاب نے پرنسپل سیکٹری کو عہدے سے ہٹانے کا حکم دے دیا۔
ذرائع کے مطابق گورنر پنجاب عمر سرفراز چیمہ نے حمزہ شہباز کی حلف برداری اور سیکرٹری پنجاب اسمبلی کی رپورٹ کے معاملے پر اپنے پرنسپل سیکرٹری کے خطوط لکھنے اور پھر انہیں فاش کرنے پر شدید برہمی کا اظہار کیا ہے۔ گورنر کی جانب سے پرنسپل سیکرٹری راشد منصور کے خط لکھنے کی تحقیقات کی گئی ہیں، جس کے بعد گورنر پنجاب عمر سرفراز چیمہ نے پرنسپل سیکٹری کو عہدے سے ہٹانے کا حکم دے دیا ہے اور اس ضمن میں چیف سیکرٹری کو خط لکھ دیا ہے۔ پرنسپل سیکرٹری راشد منصور کی جگہ اسپیشل سیکرٹری کو عہدے کا اضافی چارج دے دیا گیا ہے۔
ذرائع کے مطابق گورنر کی جانب سے اعتراض کیا گیا ہے کہ پرنسپل سیکرٹری گورنر کو کیسے دباؤ میں لانے کے ہتھکنڈے استعمال کر سکتا ہے، جس معاملے پر رائے مانگی ہی نہیں اس پر پرنسپل سیکرٹری از خود کیسے خط لکھ سکتا ہے۔ پرنسپل سیکرٹری کیسے خط لکھ کر سیاسی مخالفین کو سیاست کے لئے خط لیک کرسکتا ہے۔ گورنر نے پرنسپل سیکرٹری کے خطوط منظر عام پر آنے کے بعد انکوائری کی اور خفیہ خطوط میڈیا تک پہنچنے کے معاملے پر چیف سیکرٹری کو تحقیقات کرنے کی ہدایت کی ہے۔ ابتدائی طور پر خود انکوائری کے بعد گورنر نے پرنسپل سیکرٹری کو عہدے سے ہٹانے کے لئے خط لکھ دیا۔
یاد رہے کہ پرنسپل سیکرٹری نے گورنر کو دو خطوط لکھے، ایک خط میں پرنسپل سیکرٹری نے گورنر کو حمزہ شہباز سے حلف لینے کا کہا جبکہ دوسرے خط میں پرنسپل سیکرٹری نے گورنر کو موصول ہونے والی سیکرٹری اسمبلی کی رپورٹ کو ازخود مسترد کیا اور گورنر کو بھی مختلف معاملات پر ایڈوائس کیا۔

لاہور: (ویب ڈیسک) وزیراعلی پنجاب کے انتخاب میں حمزہ شہباز کو ووٹ دینے پر تحریک انصاف کے 26 منحرف ارکان کے خلاف الیکشن کمیشن میں ریفرنس دائر کر دیا گیا۔ سپیکر پرویز الہی کی جانب سے ریفرنس الیکشن کمیشن کو جمع کرائے گئے۔
تحریک انصاف کے 26 منحرف ارکان کے خلاف ریفرنس سپیکر پنجاب اسمبلی چودھری پرویزالہی کی جانب سے الیکشن کمیشن کو موصول ہوگئے۔ ریفرنس آج سپیکر کے نمائندے نے الیکشن کمیشن میں جمع کرا دیئے۔ 26 منحرف ارکان کے خلاف ریفرنس آرٹیکل 63 اے کے تحت الیکشن کمیشن کو جمع کرائے گئے، ان منحرف ارکان نے وزیراعلی کے انتخاب میں حمزہ شہباز کو ووٹ دیکر 63 اے کی خلاف ورزی کی۔ ان منحرف ارکان کے خلاف آرٹیکل 63 اے کے تحت کارروائی عمل میں لانے کا مطالبہ کیا گیا ہے۔
منحرف ارکان راجہ صغیر، ملک غلام رسول سنگھا، سعید اکبر نوانی، محمد اجمل، فیصل حیات جبوانہ، مہر محمد اسلم، خالد محمود، عبد العلیم خان کے خلاف ریفرنس جمع کرایا گیا ہے۔ نذیر چوہان، محمد امین ذوالقرنین، نعمان لنگڑیال، نعیم سلمان، زوار حسین وڑائچ، نذیر احمد خان، فدا حسین، زہرہ بتول، محمد طاہر، عائشہ چودھری، ساجدہ یوسف، ہارون گل، عظمی کاردار، ملک اسد کھوکھر کے خلاف بھی ریفرنس جمع کرا دیا گیا ہے۔ اعجاز مسیح گل، سبطین رضا، جاوید اختر، محسن عطا کھوسہ کے خلاف بھی ریفرنس الیکشن کمیشن میں جمع ہوگئے ہیں۔
خیال رہے تحریک انصاف کے تمام ارکان پنجاب اسمبلی کو لیٹر جاری کر کے پابند کیا تھا کہ وہ وزیراعلی کے الیکشن میں پرویز الہی کو ووٹ دیں، مگر ان 26 ارکان نے پارٹی پالیسی کے خلاف حمزہ شہباز کو وزارت اعلی کا ووٹ دیا۔

لاہور: (ویب ڈیسک) تیز رفتار موسمیاتی تبدیلیوں کے باعث رواں موسم گرما شدید ترین رہنے کا امکان سامنے آگیا۔ مارچ اور اپریل کے دوران ہی گرمی نے اپنے بھرپور تیور دکھا دئیے ہیں۔ مون سون کے دوران معمول سے کم بارشیں ہونے کے خدشات بھی ظاہر کئے جا رہے ہیں۔
ہمارے ملک میں ہرگذرنے دن کے ساتھ موسمیاتی تبدیلیوں کا عمل تیز ہوتا جا رہا ہے۔ اِسی تناظر میں مارچ اور اپریل کے دوران وقت سے پہلے اور زیادہ پڑنے والی گرمی نے پوری طرح سے واضح کر دیا ہے کہ موسم گرما کے باقی مہینوں کے دوران کیا صورت حال رہنے والی ہے۔
اندازہ اِسی سے لگا لیجئے کہ 1961 سے اب تک رواں برس مارچ کا مہینہ 9 واں بڑا خشک سالی کا مہینہ رہا جس دوران اوسط درجہ حرارت تقریباً چار ڈگری زیادہ ریکارڈ کیا گیا۔ یہی صورت حال ماہ اپریل کے دوران بھی جاری ہے۔ متوقع طور پر اِس سال مون سون کے دوران بھی معمول سے کم بارشیں ہوں گی، جس وجہ سے موسم گرما زیادہ شدید اور طویل ہوگا۔
کلائمیٹ چینج کے باعث ہی ملک میں گرمیوں کا اوسط دورانیہ 145 سے بڑھ کر 170 دنوں تک پہنچ چکا ہے۔

کراچی: (ویب ڈیسک) پولیس نے شہر قائد میں مبینہ مقابلوں کے دوران ایک ملزم کو ہلاک، 6 کو زخمی حالت میں گرفتار کر لیا۔
کراچی کے علاقے سکھن میں بھینس کالونی کے قریب مبینہ پولیس مقابلے کے دوران 2 ملزمان کو زخمی حالت میں گرفتار کرلیا گیا۔ پولیس کے مطابق گرفتار ملزمان میں پناہ اور عامر قادر شامل ہیں۔ ملزموں کے قبضے سے اسلحہ اور مسروقہ سامان برآمد کرلیا گیا ہے۔
ملیر کالا بورڈ سے بھی مقابلے کے بعد ایک ملزم کو زخمی حالت میں دھر لیا گیا جبکہ لانڈھی ریڑھی گوٹھ میں مبینہ پولیس مقابلے کے دوران 2 ملزمان کو زخمی حالت میں گرفتار کرلیا گیا۔ پولیس کے مطابق ملزمان کی شناخت عمر اور حنیف کے ناموں سے کرلی گئی ہے۔
ادھر نارتھ کراچی سیکٹر 5ڈی میں لوٹ مار کی کوشش کرنے والا ڈاکو مبینہ پولیس مقابلے کے دوران زخمی حالت میں گرفتار کر لیا گیا۔ پولیس کے مطابق فائرنگ کے تبادلے کے دوران ملزم کا ساتھی فرار ہو گیا۔ لانڈھی اور نارتھ کراچی سے گرفتار ملزمان کے قبضے سے اسلحہ اور موٹر سائیکل برآمد کرلی گئی ہے۔

کراچی: (ویب ڈیسک) کراچی میں ماہ رمضان میں پیشہ وار بھکاریوں نے یلغار کر دی، چوک چوراہوں پر قبضہ کر لیا جس سے شہری پریشان ہو گئے۔ بھیک مانگنے والوں کی تعداد میں اضافہ مستحق سفید پوش طبقے کی حق تلفی کا سبب بننے لگا۔
شہر قائد میں ماہ صیام کے دوران پیشہ ور گداگروں کی بھرمار ہو گئی، شہری بھیک مانگنے والوں کے نرغے میں پریشانی سے دوچار رہتے ہیں۔ ملک کے مختلف مقامات سے بڑی تعداد میں آنے والے بھکاریوں نے شہر میں ڈیرے ڈال لئے۔
سڑکوں،چوہراہوں،مارکیٹوں،بس سٹاپس، مساجد اور فوڈ سٹریٹ سمیت دیگر مصروف مقامات پر منظم طریقے سے گداگر مافیا سرگرم ہوگیا ہے، کراچی میں مخیر حضرات کی جانب سے ماہ صیام میں بڑے پیمانے پر خیرات ، زکوۃ ، فطرہ اور عطیات دئیے جانے کے باعث منظم مافیا نے گداگری کو بھی منافع بخش کاروبار بنا لیا ہے۔
غیر سرکاری اعدادوشمار کے مطابق رمضان میں سندھ، پنجاب اور بلوچستان کے پسماندہ علاقوں سے پانچ لاکھ کے لگ بھگ پیشہ وار بھکاری شہر میں گداگری کیلئے لائے جاتے ہیں، انسداد گداگری کا قانون موجود نہ ہونے کے باعث منظم مافیا ، خواتین عمر رسیدہ افراد سمیت کم عمر بچوں کو بھی بھیک مانگنے کیلئے استعمال کیا جاتا ہے جومستحق افراد کی حق تلفی کا سبب بھی بن رہا ہے۔
شہر میں بھکاریوں کی تعداد میں بے حد اضافہ سے جہاں شہری تنگ دکھائی دیتے ہیں وہیں ان کا کہنا ہے کہ صاحب استطاعت افراد ضرورت مندوں کی مدد ضرور کریں لیکن پیشہ وار بھکاریوں کی حوصلہ افزائی نہ کریں۔