اسلام آباد: (ویب ڈیسک) اسلام آباد ہائیکورٹ نے عمران خان کو ملنے والے تحائف کی تفصیل عام کرنے کا حکم دے دیا۔ عدالت نے کہا کہ ایک حد تک پیسے دے کر تحفہ رکھ لینا کوئی بات نہیں۔
اسلام آباد ہائیکورٹ کے جسٹس میاں گل حسن اورنگزیب نے سابق وزیراعظم عمران خان کو ملنے والے تحائف کی معلومات پبلک کرنے کے کیس کی سماعت کی۔ جسٹس میاں گل حسن اورنگزیب نے ڈپٹی اٹارنی جنرل سے مکالمہ کرتے ہوئے کہا کہ ایک پالیسی بنائیں کہ جو بھی تحفہ آئے گا وہ خزانے میں جمع ہو گا، تحائف صرف ملتے ہی نہیں، واپس بیرون ملک لوگوں کو دیئے بھی جاتے ہیں، بیرون ملک جو تحائف جاتے ہیں وہ قومی خزانے سے خریدے جاتے ہیں۔
جسٹس میاں گل حسن نے کہا کہ باہر سے آئے سب تحائف بھی نمائش کیلئے رکھے جانے چاہئیں۔ جس پر ڈپٹی اٹارنی جنرل نے عدالت سے استدعا کی کہ مجھے تازہ ہدایات لینے کیلئے وقت چائیے۔ عدالت نے کہا کہ آپ ہدایات لیں لیکن تب تک انفارمیشن کمیشن کے حکم پر عمل کریں، انفارمیشن کمیشن نے کہا تحائف کی معلومات شہری کو دیں تو دے دیں۔

اسلام آباد: (ویب ڈیسک) وزیراعظم شہباز شریف کی زیر صدارت وفاقی کابینہ کا پہلا اجلاس جاری ہے، جس میں کابینہ کو معاشی صورتحال، توانائی اور امن و عامہ کی صورت حال پر بریفنگ دی گئی۔
وزیراعظم شہباز شریف نے مہنگائی کنٹرول کرنے کیلئے موثر اقدامات کرنے کی ہدایت کر دی۔ انہوں نے کہا کہ عوام کو ریلیف دینا ہی میری حکومت کا بنیادی مقصد ہے، رمضان المبارک کے بعد بھی عوام کو اشیائے خورونوش سستی ملنی چاہئیں۔

اسلام آباد: (ویب ڈیسک) 31 رکنی وفاقی کابینہ میں اب بھی کئی وزارتیں خالی جبکہ چار وفاقی وزیر تاحال قلمدان ملنے کے منتظر ہیں۔
ذرائع کے مطابق کئی اہم وزارتوں پر وزیروں کی تعیناتی، قلمدانوں کا نوٹیفکیشن جاری نہ ہو سکا۔ ان وزارتوں میں توانائی، بین الصوبائی رابطہ، اقتصادی امور، پارلیمانی امور اور سائنس اینڈ ٹیکنالوجی کی وزارتیں شامل ہیں جبکہ دوسری طرف گزشتہ روز حلف اٹھانے والے وفاقی وزراء میں ایاز صادق، خرم دستگیر، مرتضی جاوید عباسی، ریاض پیرزادہ اور وزیر مملکت عبدالرحمان کانجو کو تاحال کسی وزارت کا قلمدان نہیں دیا گیا ہے۔

لاہور: (ویب ڈیسک) لاہور ہائیکورٹ میں نو منتخب وزیراعلیٰ حمزہ شہباز سے عہدہ کا حلف نہ لینے کے خلاف درخواست سماعت کے لیے مقرر کر دی گئی۔ چیف جسٹس لاہور ہائیکورٹ محمد امیر بھٹی کل درخواست پر سماعت کریں گے۔
حمزہ شہباز نے بطور وزیراعلیٰ عہدے کا حلف نہ لینے کیخلاف اعظم نذیر تارڑ کی وساطت سے لاہور ہائیکورٹ میں آئینی درخواست دائر کر دی۔ حمزہ شہباز کی درخواست میں پرنسپل سیکرٹری ٹو گورنر پنجاب اور چیف سیکرٹری پنجاب کو فریق بنایا گیا۔ رجسٹرار آفس نے گورنر پنجاب کو براہ راست فریق بنانے پر اعتراض لگایا جس پر حمزہ شہباز نے گورنر پنجاب کے بجائے پرنسپل سیکرٹری ٹو گورنر کو فریق بنا کر درخواست دوبارہ دائر کر دی۔ رجسٹرار آفس نے درخواست سماعت کے لیے مقرر کر دی۔ چیف جسٹس لاہور ہائیکورٹ محمد امیر بھٹی کل درخواست پر سماعت کریں گے۔

لاہور: (ویب ڈیسک) گورنر پنجاب عمر سرفراز چیمہ نے کہا ہے کہ مسلم لیگ ن نے سب سے پہلے خود وزیراعلی کے غیر آئینی استعفی کے خلاف آواز اٹھائی۔
گورنر پنجاب عمر سرفراز چیمہ نے اپنے بیان میں کہا ہے کہ ‏مسلم لیگ ن نے لاہور ہائیکورٹ کے سامنے اس کو بدنیتی کی بناء پر چھپایا،‏ ن لیگ نے لاہور ہائیکورٹ سے اپنے حق میں فیصلہ لینے کے لئے عدالت کو گمراہ کیا ہے، ‏جرائم پیشہ لوگ ہر موقع پر واردات سے باز نہیں آتے۔

اسلام آباد: (ویب ڈیسک) مریم اورنگزیب نے کہا ہے کہ سوشل میڈیا پر بے بنیاد اور من گھڑت خبروں کا سلسلہ رکنا چاہیئے، وزیراعظم ہاؤس کے علاوہ کسی اور جگہ کو کیمپ آفس ڈکلیئر نہیں کیا۔
وزیر اطلاعات و نشریات مریم اورنگزیب نے اپنے بیان میں کہا ہے کہ وزیرِ اعظم شہباز شریف کے وزارتِ عظمی کا منصب سنبھالنے کے بعد میڈیا اور سماجی رابطوں کی ویب سائٹس پر بے بنیاد اور من گھڑت خبریں پھیلانے کا سلسلہ رکنا چاہئیے، وزیرِ اعظم ہاؤس کے علاوہ کسی اور جگہ کو کیمپ آفس ڈکلیئر کرنے کی خبریں بے بنیاد اور جھوٹ کا پلندہ ہیں۔
مریم اورنگزیب کا کہنا تھا کہ پولیس فورس اور انتظامی عملے کی کسی بھی جگہ تعیناتی کی خبروں میں بھی کسی قسم کی صداقت نہیں، ایسی کسی بھی بے بنیاد خبر نشر کرنے سے پہلے تصدیق کر لیں، سوشل میڈیا صارفین سے بھی گزارش ہے کہ ایسے منفی پراپیگینڈے کو مسترد کریں۔