لاہور: (ویب ڈیسک) گورنرپنجاب نے وزیراعلی عثمان بزدار سے رابطہ کرلیا، تحریک انصاف کی سوشل میڈیا ٹیم کے ارکان کو ہراساں کرنے کے واقعات کی تحقیقات کروانے کی ہدایت کردی۔
تحریک انصاف کی سوشل میڈیا ٹیم کو ہراساں کرنے کے واقعات کے بعد گورنر پنجاب عمر سرفراز چیمہ نے وزیر اعلی پنجاب عثمان بزدار سے ٹیلی فون پر رابطہ ہوا، جس میں دونوں رہنماؤں نے سوشل میڈیا ٹیم کو ہراساں کرنے کے واقعات کی مذمت کی۔
گورنر پنجاب نے وزیر اعلی پنجاب کو واقعات کی تحقیقات کرنے کی ہدایت کی۔ گورنر پنجاب عمر سرفراز چیمہ کا کہنا تھا کہ حکومت نوشتہ دیوار پڑھ لے، عوام حکومت کے خلاف سڑکوں پر نکل چکی ہے، عوام نے سڑکوں پر آ کر عمران خان کی قیادت پر اعتماد اور حکومت کے خلاف فیصلہ دے دیا ہے، حکومت اوچھے ہتھکنڈوں اور انتقامی کارروائیوں پر اتر آئی ہے۔

کراچی: (ویب ڈیسک) کراچی کے علاقے بھینس کالونی میں ڈکیتی کی واردات، چار ملزمان نے شہری کا پیچھا کر کے اسے لوٹ لیا۔
واقع کی سی سی ٹی وی فوٹیج میں شہری کو موٹر سائیکل پر گلی سے گزرتے دیکھا جا سکتا ہے۔ پیچھے سے آنے والے ایک موٹر سائیکل پر سوار 2 ملزمان نے روکا، ایک ملزم نے اترتے ہی شہری کو تشدد کا نشانہ بنانا شروع کر دیا، اسی دوران پیچھے سے ملزمان کے دو مزید ساتھی آ پہنچے۔
فوٹیج کے مطابق ڈکیتی کے دوران مزاحمت پر شہری کو بدترین تشدد کا نشانہ بناتے رہے، واردات کے وقت گلی میں موجود شہری تماشا دیکھتے رہے۔ ملزمان شہری کو تشدد کا نشانہ بنا کر موبائل فون اور نقدی لوٹ کر فرار ہوگئے۔

اسلام آباد: (ویب ڈیسک) وزیراعظم شہباز شریف نے مبارکباد دینے پر بھارتی ہم منصب کا شکریہ ادا کرتے ہوئے کہا کہ پاکستان بھارت سے پر امن تعلقات کا خواہاں ہے۔
وزیراعظم شہباز شریف نے سماجی رابطے کی ویب سائٹ پر ٹویٹ کرتے ہوئے کہا کہ کشمیر سمیت تمام تنازعات کا حل ناگزیر ہے، دہشتگردی کیخلاف جنگ میں پاکستان کی قربانیوں سے سب آگاہ ہیں، آئیے امن کو محفوظ بنائیں اور اپنے لوگوں کی سماجی و اقتصادی ترقی پر توجہ دیں۔

لاہور: (ویب ڈیسک) لاہور ہائیکورٹ نے وزیراعلیٰ پنجاب کے انتخاب کیلئے ووٹنگ کرانے کی درخواست پر فیصلہ محفوظ کرلیا۔
چیف جسٹس لاہور ہائیکورٹ جسٹس امیر بھٹی نے وزیر اعلیٰ پنجاب کے انتخاب سے متعلق دائر درخواست پر سماعت کی۔ وکیل ق لیگ نے موقف اپنایا کہ ڈپٹی اسپیکر پر اعتماد نہیں ہے وہ صاف الیکشن نہیں کروا سکتے، ڈپٹی اسپیکر نے ابھی سے سیکرٹری پنجاب اسمبلی پر پابندیاں عائد کرنا شروع کردی ہیں۔ چیف جسٹس نے استفسار کیا پھر ایسی صورتحال میں کیا کیا جائے؟ ہمیں وزیر اعلی پنجاب کے انتخاب صاف اور شفاف کروانے ہیں۔
چیف جسٹس لاہور ہائیکورٹ نے ریمارکس دیئے کہ تمام فریقین مشترکہ طور پر ووٹنگ کے لیے پرائزئیڈنگ افسر مقرر کریں۔ وکیل حمزہ شہباز نے کہا کہ پنجاب اسمبلی میں چار آزاد حیثیت سے ممبران ہیں، ان میں سے ایک کو ووٹنگ کے لیے پرایزئیڈنگ افسر مقرر کر دے، چاروں ممبران باعزت اور اچھی شہرت کے حامل افراد ہیں۔
وکیل ق لیگ نے کہا کہ جگنو محسن نے شہباز شریف کے ساتھ ہے اور اس کے ساتھ پریس کانفرنس کی، ہمیں چاروں ممبران پر اعتماد نہیں ہے۔ وکیل حمزہ شہباز نے کہا کہ کیا پھر ہوائی مخلوق الیکشن کروانے آئے، ہر ایک پر اعتماد نہیں ہے تو حمزہ شہباز کو بلا مقابلہ منتخب کروا دیں۔ عدالت نے دلائل مکمل ہونے کے بعد فیصلہ محفوظ کرلیا۔

اسلام آباد: (ویب ڈیسک) شہباز گل اور شہزاد اکبر کا نام سٹاپ لسٹ میں ڈالنے کے خلاف درخواست دائر کی گئی تھی،عدالت نے ایف ائی اے کا نوٹیفکیشن معطل کر دیا۔
اسلام آباد ہائیکورٹ نے سیکریٹری داخلہ اور ڈی جی ایف آئی اے کو نوٹس جاری کر دیا۔
مرزا شہزاد اکبر نے کہا کہ ایشو یہ ہے کہ عجیب حالات میں مجھ سمیت پانچ افراد کے نام پی این آئی ایل میں شامل کیے گئے، وکیل شہباز گل نے کہا کہ واچ لسٹ، بلیک لسٹ، سٹاپ لسٹ سمیت چار نام ہیں اس کے۔
چیف جسٹس اطہر من اللہ نے کہا کہ بلیک لسٹ کو تو یہ کورٹ کہہ چکی ہے کہ یہ غیر قانونی ہے۔ وکیل نے کہا کہ دلچسپ بات یہ ہے کہ جب نام شامل کیے گئے اس وقت کوئی حکومت نہیں تھی۔
مرزا شہزاد اکبرنے کہا کہ ڈی جی ایف آئی اے سے پوچھا جائے کہ ریکوئسٹ کس نے کی؟ چیف جسٹس نے کہا کہ آپ کل تک تو کہیں نہیں جا رہے؟ انہیں بلا کر پوچھ لیتے ہیں، آپ انچارج رہے ہیں، آپ نے اس کو ختم نہیں کرایا؟
مرزا شہزاد اکبر نے کہا کہ میں انچارج نہیں، وزیراعظم کا مشیر برائے داخلہ رہا ہوں۔

اسلام آباد: (ویب ڈیسک) عوامی مسلم لیگ کے سربراہ شیخ رشید نے قومی اسمبلی سے استعفیٰ دے دیا.
شیخ رشید نے استعفی ٰچیف وہیپ قومی اسمبلی ملک عامر ڈوگر کو بھجوایا، رکن قومی اسمبلی شیخ راشد نے شیخ رشید کا استعفیٰ پہنچایا۔
گزشتہ روزسابق وزیر داخلہ شیخ رشید کا کہنا تھا کہ ہم قومی اسمبلی سے استعفے دے رہے ہیں ،قبول نہ ہوئے تو دیکھ لیں گے۔ یہ بھی رائے ہے کہ مرکز کے بعد صوبوں میں بھی استعفے دیئے جائیں۔
ان کا کہنا ہے کہ سب متفقہ طور پر استعفے دے رہے ہیں،یہ عمران خان کا فیصلہ ہے۔عمران خان نے فیصلہ کیا کہ مقصود چپڑاسی کو تسلیم نہیں کرینگے۔
ان کا مزید کہنا تھا کہ عمران خان نے تین دفعہ میری تعریف کی ہے ،عمران خان نے کہا کہ شیخ رشید کا استعفوں کا فیصلہ درست تھا۔ جب تک الیکشن نہیں ہونگے ہم چین سے نہیں بیٹھیں گے۔شہبازشریف کی کرپٹ حکومت کونہیں چلنے دیں گے۔
یاد رہے گزشتہ روز شہباز شریف کے وزیراعظم منتخب ہونے سے پہلے ہی پاکستان تحریک انصاف نے قومی اسمبلی میں استعفوں کا اعلان کر دیا تھا، اور کئی ارکان نے استعفی ٹوئٹر پر بھی شئیر کیے، جن میں سابق وزیر مواصلات مراد سعید، علی حیدر زیدی، سابق وزیر شیریں مزاری کے نام شامل ہیں۔

لاہور: (ویب ڈیسک) شہباز شریف کی کابینہ میں رانا ثنااللہ کو کابینہ میں وزارت داخلہ اور مریم اورنگزیب کو اطلاعات کا قلمدان دیئے جانے کا امکان ہے۔
وزیر اعظم شہباز شریف نے وزارت عظمیٰ کا چارج سنبھالنے کے بعد کابینہ کی تشکیل پر کام شروع کر دیا۔ وزارتوں کی تقسیم کے لے اتحادیوں نے رابطوں کا سلسلہ جاری ہے۔
مسلم لیگ نے مختلف وزراتوں کے لیے ناموں پر غور شروع کر دیا۔ ذرائع کے مطابق رانا ثنااللہ کو کابینہ میں وزارت داخلہ اور مریم اورنگزیب کو اطلاعات کا قلمدان دیئے جانے کا امکان ہے۔
وزیراعظم شہبازشریف آج اتحادی جماعتوں کے سربراہوں سے ملاقاتیں کریں گے۔ملاقات میں وفاقی کابینہ میں حصہ داری کےحوالے سے فیصلہ کیاجائےگا۔
ذرائع کا کہنا ہے کہ آج وفاقی کابینہ کے لیے وزرا کے ناموں کو حتمی شکل دی جائےگی اوررات تک وزرا کا اعلان کر دیا جائے گا۔