اسلام آباد: (ویب ڈیسک) شیری رحمان نے کہا ہے کہ حکومت نے آئی ایم ایف کی ناقابل قبول شرائط تسلیم کیں، ایک ارب ڈالر قرضہ ملنے پر جشن نہیں افسوس کرنے کی ضرورت ہے۔
نائب صدر پیپلز پارٹی و سینیٹر شیری رحمان نے آئی ایم ایف قرضے پر ردعمل دیتے ہوئے کہا کہ ایک ارب ڈالر کی قسط کے لئے عوام پر اربوں روپے کے ٹیکس لگائے گئے، معیشت میں استحکام آئی ایم ایف کے قرضے سے نہیں معاشی پالیسی سے آتا ہے جو اس اس حکومت کے پاس نہیں، ‏انہوں نے صرف 3 سال میں قرضوں میں 60 فیصد اضافہ کیا، پی ٹی آئی نے 20.7 کھرب روپے کے قرضے لئے جو کسی بھی حکومت کی جانب سے سب سے زیادہ لیا گیا قرضہ ہے۔
شیری رحمان کا کہنا تھا کہ مجموعی قرضہ 50 کھرب روپے سے تجاوز کر گیا ہے، قرض پر چلنے والی حکومت ہر روز 17 ارب روپے سے زائد قرضہ لے رہی ہے، ‏جو جماعت آئی ایم ایف نا جانے کی سیاست کرتی رہی آج اس کے وزراء قرض کی قسط ملنے پر خوشی کا اظہار کر رہے ہیں، حکومت میں آنے سے پہلے کہتے تھے کشکول توڑ دینگے، اب ہر حکومتی نمائندے کے ہاتھ میں کشکول ہے، 1 ارب ڈالر کی قسط کے لئے انہوں نے منی بجٹ بلڈوز کر کے عوام پر مہنگائی کا بوجھ ڈالا۔

لاہور(اپنے سٹاف رپورٹر سے) مسلم لیگ (ن) کے صدر اور قومی اسمبلی میں قائد حزب اختلاف شہباز شریف اور پاکستان تحریک انصاف کے رہنماجہانگیر ترین کے کیسز کی تحقیقات کرنے والے 5 ایف آئی اے افسران کے تبادلے منسوخ کر دیئے گئے۔ایف آئی اے کے ڈائریکٹر نے افسران کے تبادلے کی منسوخی کا نوٹیفکیشن جاری کیا۔ جن افسران کے تبادلے منسوخ کئے گئے ان میں اسسٹنٹ ڈائریکٹر سید علی مردان شاہ ، اسسٹنٹ ڈائریکٹر ارشد بٹ، اسسٹنٹ ڈائریکٹر زوار احمد ، اسسٹنٹ ڈائریکٹر شیراز عمر اور اسسٹنٹ ڈائریکٹر رانا فیصل منیر کے نام شامل ہیں۔واضح رہے کہ وزیر اعظم کے مشیر برائے احتساب شہزاد اکبر کے استعفی دینے کے بعد ڈی جی ایف آئی اے نے معروف اور اہم ترین کیسوں جن میں شوگر اور منی لانڈرنگ کے کیس بھی شامل ہیں، کی تحقیقات کرنے والے ایف آئی اے کے افسران کو ایک روز قبل تبدیل کر دیا گیا تھا۔

اسلام آباد: (ویب ڈیسک) وزیراعظم عمران خان آج سے چین کا تین روزہ دورہ کریں گے۔ ونٹر اولمپکس کی افتتاحی تقریب میں شرکت اور چینی قیادت سے ملاقاتیں کریں گے۔
ترجمان دفتر خارجہ کے مطابق وزیراعظم عمران خان ونٹر اولمپک گیمز کی افتتاحی تقریب میں شرکت کریں گے۔ وزیراعظم کے ہمراہ کابینہ ارکان، سرکاری افسران سمیت اعلیٰ سطح وفد بھی ہوگا۔ چینی صدر اور وزیراعظم سے ملاقاتوں میں دو طرفہ تعلقات کا جائزہ لیا جائے گا۔ دونوں ممالک کی قیادت علاقائی اور عالمی امور کا جائزہ لے گی۔ وزیراعظم دورے کے دوران متعدد ایم او یوز اور معاہدوں پر دستخط کریں گے۔

اٹلی : (ویب ڈیسک) آئی ایم ایف نے اعلامیہ جاری کیا ہے کہ پاکستان کو ایک ارب ڈالر فوری جاری ہوں گے، جبکہ مزید ایک ارب کے اجرا سے قرض پروگرام کی جاری رقم 3 ارب ڈالرہوگی۔
اعلامیہ میں کہا گیا ہے کہ پاکستان نے کورونا سےمتاثرمعیشت کوسنبھالا ہے، پاکستان کا کرنٹ اکائونٹ خسارہ بڑھا جس کےباعث ڈالرمہنگا ہوا ہے۔
آئی ایم ایف اعلامیے میں مزید کہا گیا ہے کہ پاکستان نے معاشی اصلاحات کیلئے بروقت اقدامات کیے۔ اسٹیٹ بینک کی خودمختاری مالیاتی استحکام لائےگی۔ پاکستان میں معاشی ترقی روزگارکےفروغ کا ذریعہ بنےگی۔ پاکستان میں سرکاری اداروں کے نقصانات کم کرنا بڑاچیلنج ہے اور توانائی کےگردشی قرض پرقابوپانا بھی ایک چیلنج ہے۔
اعلامیے کے مطابق پاکستان میں رواں مالی سال معاشی ترقی کی شرح 4 فیصد ہوسکتی ہے۔ پاکستان میں مہنگائی بڑھنےکی شرح 10.2 فیصد ہے۔رواں سال مالیاتی خسارہ معیشت کا 6.9 فیصد ہوسکتا ہے۔ پاکستان کی معیشت کے لحاظ سے قرضوں کا بوجھ 86.7 فیصد ہے۔

راولپنڈی : (ویب ڈیسک) راولپنڈی میں ٹرک نے گاڑی کو روند ڈالا، حادثے میں کارسوار 4 نوجوان شدید زخمی ہوگئے۔
3 کی حالت تشویشناک بتائی جارہی ہے، مری روڈ پر ناز سینما کے قریب تیزرفتار مہران کار اور ٹرک ٹکرا گئے۔ ریسکیو1122 کے عملے نے زخمیوں کو بینظیربھٹوشہید اسپتال منتقل کردیا۔زخمیوں میں سے ایک کی حالت خطرے سے باہربتائی جارہی ہے۔