کراچی: (ویب ڈیسک) شہر قائد کے علاقے گلستان جوہر میں دو ڈاکو اسلحے کے زور پر شہری سے چھ لاکھ سے زائد رقم چھین کر فرار ہو گئے، ادھر ڈیفنس فیز 2 میں ملزمان کی دن دیہاڑے واردات کی فوٹیجز سامنے آگئیں۔
کراچی کے علاقے گلستان جوہر میں موٹرسائیکل سوار دو ملزمان نے بائیک پر بیٹھے شہری کو لوٹ لیا، ملزمان میں سے ایک نے موٹرسائیکل سے اتر کو شہری کو اسلحہ دکھا کر ہراساں کیا جبکہ موٹرسائیکل سوار ملزم نے شہری کا بیگ چھین لیا، بیگ میں 6 لاکھ 20 ہزار روپے اور دیگر کاغذات تھے۔
متاثرہ شہری کے مطابق گلستان جوہر بلاک 7 میں نجی بینک سے رقم نکلوائی تھی، ایک مقام پر رک کر موبائل فون پر بات کررہا تھا کہ تعاقب کرنے والے ملزمان پہنچ گئے۔
دوسری جانب ڈیفنس فیز 2 میں ملزمان نے دن یدہاڑے واردات کر ڈٓالی، دو موٹر سائیکلوں پر سوار2 ملزمان نے گھر کی دہلیز پر کارسوار فیملی کو لوٹ لیا، ملزمان فیملی سے موبائل فون اور نقد رقم لے کر فرار ہوئے، واردات کی سی سی ٹی وی پولیس کو موصول ہونے کے باوجود ملزمان پولیس کی گرفت میں نہ آسکے۔

کراچی: (ویب ڈیسک) کراچی کے مختلف علاقوں میں فائرنگ کے واقعات میں 5 افراد زخمی ہوگئے۔
لیاری کھارادر میں نامعلوم افراد نے فائرنگ کرکے تین افراد کو زخمی کردیا۔ پولیس کے مطابق زخمیوں میں میڈیکل سٹور کا ملازم 50 سالہ حبیب، 15 سالہ احمد رضا اور ایک راہ گیر شامل ہے۔ دوسری جانب منگھوپیر نیا ناظم آباد میں کار پر فائرنگ سے 2 افراد زخمی ہوگئے۔
زخمیوں کی شناخت نوراسلام اور خالد کے نام سے ہوئی ہے۔ واقعہ ابتدائی طور پر ڈکیتی مزاحمت کا شاخسانہ معلوم ہوتا ہے۔

بہاولپور: (ویب ڈیسک) وزیراعظم عمران خان نے کہا ہے کہ ہیلتھ کارڈ سے صحت کے شعبے میں انقلاب آئے گا،ن لیگ نے قرضے لے کر گروتھ حاصل کی، فیکٹری پر ڈاکو بٹھا دیں گے تو وہ دیوالیہ ہو جائے گی۔
وزیراعظم نے بہاولپور میں قومی صحت کارڈ اجرا کی تقریب سے خطاب کرتے ہوئے کہا کہ سابقہ حکومتوں نے کبھی عوام پر اتنا پیسہ خرچ نہیں کیا، برطانیہ جاکردیکھاکہ انسانیت کیاہوتی ہے جہاں پیسےدےکراورمفت علاج کرانیوالوں میں فرق نہیں کیاجاتا۔برطانیہ کاہیلتھ بجٹ پاکستان کےبجٹ سےکئی گنازیادہ ہے۔ انتہائی افسوس سے کہنا پڑتا ہے کہ مسلم ممالک فلاحی ریاست سےبہت دورہیں۔
انہوں نے کہا کہ خیبرپختونخواحکومت نےسب سےپہلےہیلتھ کارڈجاری کیا، یونیورسل ہیلتھ کوریج امیرترین ممالک میں بھی نہیں ملتی، اس اقدام سے نجی سیکٹرچھوٹےشہروں میں ہسپتال بنائےگا، ہیلتھ کارڈ صحت کےشعبے میں انقلاب لانے کا سبب بنے گا۔
عمران خان نے کہا کہ ہمارامقابلہ ڈاکوؤں کےٹولےسےہے، یہ چوری کریں تو کہتے ہیں ہمیں این آراودےدو، یہ کہاں کا انصاف ہے کہ غریب چوری کرے تو اسےجیل میں ڈال دو۔ لندن کی سب سے مہنگی جگہ پرانکےگھرہیں، بی بی سی نےانکی کرپشن پرڈاکو مینٹریز جاری کیں۔ ن لیگ نے قرضے لے کر گروتھ حاصل کی، فیکٹری پر ڈاکو بٹھا دیں گے تو وہ دیوالیہ ہو جائے گی۔

اسلام آباد: (ویب ڈیسک) این سی او سی کے سربراہ اسد عمر نے کہا ہے کہ کورونا کی ویکسینیشن کی خصوصی مہم شروع کردی ہے۔مہم کے تحت ٹیمیں گھر گھر جا کر ویکسین لگائیں گی۔عوام ہر صورت ویکسینیشن کرائیں۔
معاون خصوصی ڈاکٹر فیصل سلطان کے ہمراہ گفتگو کرتے ہوئے انہوں نے کہا ہے کہ کورونا سے بچاؤ کا صرف ایک ہی طریقہ ہے کہ ہر شہری ویکسینیشن کروائے۔ پاکستان میں ویکیسن کی 18 کروڑ خوراکیں لگائی جا چکی ہیں۔
ان کاکہنا ہے کہ بڑی تعداد میں لوگ بوسٹرز بھی لگوا چکے ہیں۔بوسٹر ڈوز لگوانے والے افراد کو کورونا ہونے کے باوجود کم مسائل کا سامنا کرنا پڑا۔کورونا ویکسین کے لیے خصوصی مہم شروع ہو چکی ہے۔ عوام کورونا ویکسین کے لیے گھرگھر مہم سے فائدہ اٹھاسکتے ہیں۔
معاون خصوصی برائے صحت ڈاکٹر فیصل سلطان نے کہا کہ کورونا کا بھرپور طریقے سے مقابلہ کیا جا رہا ہے۔ 55ہزار ٹیمیں ویکسین کی خصوصی مہم میں حصہ لے رہی ہیں۔ کورونا سے بچاؤ کا بہترین طریقہ ویکسی نیشن ہے۔
ڈاکٹر فیصل سلطان نے کہا کہ 25لاکھ افراد بوسٹر ڈوز لگوا چکے ہیں۔ بوسٹر ڈوز لگوانے سے قوت مدافعت میں اضافہ ہوتا ہے۔ بوسٹر ڈوز بھی مفت فراہم کی جا رہی ہے عوام سے اپیل ہے کہ ویکسین والے عملے کے ساتھ بھرپور تعاون کریں۔

خیبرپختونخوا بلدیاتی انتخابات : (ویب ڈیسک) ضلع بنوں کی تحصیل بکاخیل میں امن و امان کیس میں الیکشن کمیشن نے اہم فیصلہ جاری کردیا ہے۔
فیصلے میں الیکشن کمیشن نے صوبائی وزیر شاہ محمد کو ذمہ دار قرار دے دیا، الیکشن کمیشن نے صوبائی وزیر شاہ محمد کو پانچ سال کے لیے نااہل قرار دے دیا۔
الیکشن کمیشن نے صوبائی وزیر شاہ محمد کے بیٹے مامون رشید کو بھی الیکشن لڑنے کے لیے نااہل قراردیا ہے، شاہ محمد ایم پی اے بکاخیل پولنگ اسٹیشنز پر حملہ میں ملوث تھے۔
الیکشن کمیشن نے ایم پی اے شاہ محمد کو ڈی نوٹیفائی کردیا۔

کراچی: (ویب ڈیسک) اے این ایف انٹیلی جنس نے کراچی میں بڑی کارروائی کر کے ملزمان سے 94 کلو گرام سے زائد چرس برآمد کر لی، منشیات کے دھندے میں ملوث تین کارندے دھر لئے گئے۔
کراچی میں اے این ایف نے منشیات کا دھندا کرنے والے نیٹ ورک کے تین کارندے گرفتار کر لئے، ملزمان کے قبضے سے 94.80 کلو گرام منشیات برآمد ہوئی ہے۔ ترجمان اے این ایف کے مطابق کارروائی کے دوران مجموعی طور پر 1200 گرام منشیات کے 79 پیکٹ برآمد ہوئے ہیں۔
جوہر چورنگی کے قریب دوران تلاشی رکشہ سے 2 پیکٹ منشیات برآمد ہوئی، گرفتار رکشہ ڈرائیور محمد آصف کی نشاندہی پر اے این ایف نے گلستان جوہر میں ورکشاپ پر چھاپہ مار کر وہاں کھڑی سلمان زمان اور سعید خان نامی دو ملزمان کی ٹیوٹا وٹز کار سے 47 پیکٹ چرس برآمد کر لئے جبکہ گرفتار ملزمان کی نشاندہی پر اے این ایف نے صفورہ گوٹھ میں ملزم سعید خان کے گھر پر چھاپہ مار کر ملزم کے گھر سے منشیات کیلئے بنائے گئے خفیہ خانوں سے 30 پیکٹ منشیات برآمد کی۔
گرفتار ملزمان بلوچستان اور پشاور سے منشیات کراچی میں سمگل کرکے مقامی منشیات فروشوں کو فروخت کرتے ہیں تاہم نیٹ ورک کے مزید کارندوں کی گرفتاری کے لیے ملزمان سے تفتیش جاری ہے۔

اسلام آباد: (ویب ڈیسک) وزیراعلیٰ مراد علی شاہ نے کہا یہ کہنا کہ وزیر اعظم، وزیراعلیٰ اور کابینہ کے اختیارات لوکل کونسلز کو دئیے جائیں تو کیا باقی سب گھر بیٹھ جائیں ؟ آرٹیکل ایک سو چالیس اے کی پوری پاسداری کی، سپریم کورٹ کے فیصلے پر عمل کریں گے، کوئی قابل اعتراض بات ہوئی تو اپیل کا حق ہے۔
وزیراعلیٰ سندھ مراد علی شاہ نے اسلام آباد میں میڈیا سے گفتگو کرتے ہوئے کہا کہ یوسف رضا گیلانی سینیٹ میں اپوزیشن لیڈر ہیں، سینیٹ میں دیگر جماعتوں کے سینیٹرز بھی غیر حاضر تھے، اجلاس شروع ہوا تو حکومت کے لوگ بھی پورے نہیں تھے، حکومت کو بل پاس کرانے کیلئے چیئرمین سینیٹ کے ووٹ کا سہارا لینا پڑتا ہے، ہمارے لئے تشویش کی بات ہے چیئرمین سینیٹ نے آئی ایم ایف کی غلامی کے بل پر ووٹ دیا۔
مراد علی شاہ کا کہنا تھا کہ آرٹیکل 158 کے تحت صوبوں کو وہاں سے پیدا ہونیوالے معدنیات پر پہلا حق ہے، ہمارے ڈومیسٹک صارفین کو گیس فراہم نہیں کی جا رہی، گیس بحران تب ہی ختم ہوگا جب یہ نااہل یہاں سے نکلیں گے، حکومت سے گیس کی عدم دستیابی کا کہیں تو کہتے ہیں پچھلی حکومت چور ہے، حکومت کے پاس ایک ہی ریکارڈ ہے جو بار بار پلے ہو کر گھس گیا، اپنی نااہلی چھپانے کیلئے وفاقی حکومت ٹرک کی بتی کے پیچھے لگا دیتی ہے۔
وزیراعلیٰ سندھ نے مزید کہا کہ ہم نے بلدیاتی ایکٹ میں ترمیم اسمبلی میں بل لاکر کی، اٹھارویں ترمیم پیپلزپارٹی لے کر آئی تھی، اسپتالوں میں سہولیات کو بہتر کیا ہے۔ انہوں نے کہا کہ صدارتی نظام کیلئے انہیں دستور ساز اسمبلی بنانا ہوگی، ملکی نظام میں صدارتی نظام کی کوئی گنجائش نہیں۔ ان کا کہنا تھا کہ ٹی وی سے سنا وزیراعظم نے پٹرولیم مصنوعات کی قیمتوں میں اضافے کی سمری مسترد کر دی،دوسری طرف بجلی کی قیمتوں میں اضافہ کر دیا گیا، ایک جیب سے پیسے نہیں نکل رہے تو وفاقی حکومت دوسری جیب سے نکال لیتی ہے۔

لاہور: (ویب ڈیسک) چودھری شجاعت حسین نے کہا ہے کہ صرف عمران خان کو مہنگائی کا ذمہ دار ٹھہرانا زیادتی ہے، بعض اندرونی، بیرونی عناصر بھی معاشی بحران کے ذمہ دار ہیں۔
صدر مسلم لیگ ق چودھری شجاعت حسین نے اپنے بیان میں کہا کہ زراعت کے شعبے کو ٹارگٹ کر کے تمام چیزوں کو مہنگا کیا جا رہا ہے، مصنوعی مہنگائی کے اثرات براہ راست عوام پر پڑتے ہیں، پاکستان ایک زرعی ملک ہے، اس کی زراعت کو ٹارگٹ کر کے پورے ملک کو نقصان پہنچایا جا رہا ہے، صرف ٹماٹر ہی دیکھ لیں کہ کسان آڑھتی کو ٹماٹر 25 روپے کلو فروخت کرتا ہے، دوسرے دن وہی ٹماٹر مختلف ذرائع سے ہوتا ہوا بازار میں عوام کو 150 روپے کلو میں ملتا ہے جس کا دھچکا کسان کو پہنچتا ہے، پھر کہا جاتا ہے کسان کو ہونے والے اس بھاری نقصان کا ذمہ دار صرف عمران خان ہے جو زیادتی ہے۔
چودھری شجاعت حسین کا کہنا تھا کہ آج کل کھاد کے بحران کی وجہ سے گندم کے مہنگا ہونے کا شور ہے، کھاد کی کمی کی وجہ سے مہنگائی کا ایک نیا طوفان سر اٹھائے کھڑا ہے، اس مصنوعی مہنگائی کے ذمہ دار ذخیرہ اندوز بھی ہیں، تمام ارکان اسمبلی اپنے اپنے علاقوں میں ذخیرہ اندوزوں کی نشاندہی کریں اور کھاد ریلیز کروائیں۔