اسلام آباد: (ویب ڈیسک) سپریم کورٹ نے بلدیاتی اختیارات کیس میں ایم کیو ایم کی درخواست نمٹا دی۔ عدالت نے سندھ لوکل گورنمنٹ ایکٹ کی شق 74 اور 75 کالعدم قرار دے دی۔
سپریم کورٹ نے سندھ میں بلدیاتی اداروں کے اختیارات سے متعلق فیصلہ سنا دیا۔ فیصلے میں کہا گیا کہ لوکل گورنمنٹ اختیارات کے تحت مقامی حکومتوں کے پاس بلدیاتی اختیارات ہیں، آرٹیکل 140 کے تحت لوکل گورنمنٹ کا قیام عمل میں آتا ہے، سندھ حکومت بااختیار بلدیاتی ادارے قائم کرنے کی پابند ہے، ماسٹر پلان بنانا اور اس پرعملدرآمد بلدیاتی حکومتوں کے اختیارات ہیں۔

لاہور: (ویب ڈیسک) لاہور کی اسپشل سینٹرل کورٹ نے منی لانڈرنگ کے مقدمے میں نامزد شہباز شریف اور حمزہ شہباز کی عبوری ضمانتوں میں 10 فروری تک توسیع کر دی۔ عدالت نے آئندہ سماعت پر چالان کی کاپیاں ملزمان کو فراہم کرنے کی ہدایت کر دی۔
اسپشل سینٹرل کورٹ کے جج اعجاز اعوان نے اپوزیشن لیڈر شہباز شریف اور حمزہ شہباز کی عبوری ضمانتوں پر سماعت کی۔ حمزہ شہباز نے عدالت پیش ہو کر حاضری لگوائی تاہم شہباز شریف کورونا کے باعث پیش نہیں ہوئے اور حاضری معافی کی درخواست دائر کی۔
عدالتی استفسار پر وکیل نے بتایا کہ شہباز شریف کو کورونا کا شکار ہوئے سات روز گزر چکے ہیں، کل دوبارہ ٹیسٹ ہوگا۔ ایف آئی اے کے وکیل نے موقف اختیار کیا کہ ملزم کے پیش نہ ہونے پر عدالت ضمانت کینسل کرسکتی ہے۔
دوران سماعت ایف آئی اے کے وکیل نے بیان دیا کہ وہ درخواست ضمانت پر بحث کے لیے تیار ہیں، ملزمان کے وکیل نے کارروائی ملتوی کرنے کی استدعا کی۔ عدالت نے شہباز شریف اور حمزہ شہباز کی عبوری ضمانتوں میں دس فروری تک توسیع کر دی۔

پشاور: (ویب ڈیسک) پشاور کی انتظامیہ نے پٹرول پمپس پر پٹرول کی فراہمی کی بندش اور ذخیرہ اندوزی پر 13 فلنگ سٹیشنز سیل کرتے ہوئے مینجروں کو گرفتارکرلیا۔
ضلعی انتظامیہ کے مطابق شہر بھرمیں فلنگ سٹیشنوں کا معائنہ کیا گیا، پمپس پر پٹرول کی فروخت کی بندش اور ذخیرہ اندوزی پر 13 فلنگ سٹیشن سیل کئے گئے، کارروائی کے دوران 13 فلنگ سٹیشنوں کے مینجروں کو گرفتار کیا گیا۔
کورونا ایس او پیزکی خلاف ورزی پر شہر بھر میں 22 ریسٹورنٹ مینجروں کو گرفتار کیا گیا، ریسٹورنٹس میں پابندی کے باوجود ریسٹورنٹس میں کھانا کھلایا جا رہا تھا۔

لاہور: (ویب ڈیسک) بولان، قصور اور دریا خان میں ٹریفک حادثات میں 8 افراد جاں بحق جبکہ متعدد زخمی ہوگئے۔
بولان کے علاقے بی بی نانی کے قریب دو وینز ٹرکرا گئیں، حادثے میں دو افراد جاں بحق جبکہ تیرہ زخمی ہوئے۔ دریاخان میں تیز رفتار کار بے قابو ہو کر درخت سے ٹکرا گئی، جس سے دو نوجوان جاں بحق ہوگئے۔ لاشوں کو اسپتال منتقل کر دیا گیا۔
قصور میں دھند کے باعث کوسٹر نے موٹرسائیکل سواروں کو کچل دیا، حادثے میں دو طالب علم موقع پر ہی دم توڑ گئے۔ پھالیہ میں کالج کی وین کو ڈمپر نے ٹکر مار دی، حادثے میں 11 طالبات زخمی ہوگئے۔

اسلام آباد: (ویب ڈیسک) شاہد خاقان عباسی کا کہنا ہے پاکستان دنیا کا واحد ملک ہے جہاں چور دوسروں کا احتساب کر رہے ہیں، فرار ہونے والے مشیروں کو حساب دینا ہوگا، یہاں کرسیاں چھوڑنے کا نہیں ان سے چمٹے رہنے کا رواج ہے، نواز شریف علاج مکمل ہوتے ہی واپس آ جائیں گے۔
سابق وزیراعظم و رہنما مسلم لیگ نون شاہد خاقان عباسی نے اسلام آباد میں میڈیا سے گفتگو کرتے ہوئے کہا کہ چیئرمین نیب کو صرف اپوزیشن نظر آتی ہے، کیا چیئرمین نیب سے کسی دن یہ سوال نہیں ہوگا، وزیراعظم کے مشیر فرار ہوگئے، فرار ہونیوالے مشیران اپنے اثاثوں کا جواب دیں، احتساب میں یہ نہیں ہوتا کہ جعلی کیسز بنائے جائیں، نیب کا تماشہ لگا رہے گا، لانگ مارچ عوام کیساتھ اظہار یکجہتی ہوتا ہے۔
ادھر اپوزیشن لیڈر پنجاب اسمبلی حمزہ شہباز نے لاہور میں میڈیا سے گفتگو کرتے ہوئے کہا کہ آٹے کا بحران ہو یا چینی کا، آج کسان کھاد کی عدم دستیابی پر دہائیاں دے رہا ہے، نیا پاکستان بنانیوالوں نے ملک کیساتھ کھیل کھیلا، ن لیگ کے خلاف کیسز میں 4 سال سے ایک پائی کرپشن ثابت نہیں ہوسکی، الیکشن کمیشن کی اسکروٹنی کمیٹی نے عمران خان کو چور ڈکلیئر کر دیا۔
لیگی رہنما نے کہا کہ کیا کبھی وزراء کے منہ سے سنا کہ مہنگائی بہت زیادہ ہوگئی، خیبرپختونخوا میں پادری کا قتل ہوگیا ابھی تک ملزمان کی نشاندہی نہیں ہوئی، عمران نیازی نے ن لیگ کے قائدین کو جیل میں ڈالا کوئی بات نہیں، آج مارکیٹ میں بخار کی دوا دستیاب نہیں۔

اسلام آباد: (ویب ڈیسک) سپریم کورٹ کے رجسٹرار آفس نے سپریم کورٹ بار کی جانب سے تاحیات نااہلی کے خلاف درخواست اعتراضات لگا کر واپس کر دی۔
ذرائع کے مطابق تاحیات نااہلی کے معاملہ پر سپریم کورٹ بار کی درخواست پر رجسٹرار آفس نے اعتراض لگاتے ہوئے کہا ہے کہ تاحیات نااہلی کے معاملہ پر سپریم کورٹ کا پانچ رکنی لارجر بینچ فیصلہ دے چکا۔ دوسری طرف سپریم کورٹ بار نے رجسٹرار آفس کے اعتراضات کے خلاف اپیل کرنے کا فیصلہ کیا ہے۔

لاہور: (ویب ڈیسک) جائیداد کے لالچ میں بیٹا باپ کو ذہنی معذور قرار دینے کیلئے عدالت پہنچ گیا۔ کورٹ نے بیٹے کو 2 لاکھ روپے جرمانہ کرتے ہوئے درخواست مسترد کر دی۔
لاہور ہائیکورٹ کے جسٹس طارق سلیم شیخ نے فیصلہ سنایا۔ جس میں کہا گیا کہ بیٹے کی نظر والد کی جائیداد اور پیسے پر ہے، چند ماہ قبل والد نے جائیداد کا کچھ حصہ بیٹی کے نام کیا، جس پر بیٹا ناراض ہوا اور باپ کو ذہنی معذور قرار دیا، یہ بہت حیران کن ہے دنیاوی فائدے کے لئے بیٹا اس حد تک گر گیا۔
جسٹس طارق سلیم نے اپنے فیصلے میں مزید لکھا کہ درخواست گزار تین ماہ کے اندر 2 لاکھ جرمانہ والد محمد شریف کو ادا کرے، اگر والد جرمانہ کی رقم لینے سے انکار کرے تو جرمانہ شوکت خانم میں جمع کرایا جائے، ڈپٹی کمشنر لاہور عدالتی فیصلے پر عمل درآمد کروا کر رپورٹ ڈپٹی رجسٹرار جوڈیشل کے ذریعے جمع کرائیں۔