واشنگٹن: (ویب ڈیسک) تائیوان کو آزادی دلانے کی امریکی سازش سے پردہ فاش کرتے ہوئے چین نے امریکا کو فوجی تصادم کی دھمکی دے دی ہے۔
نیو یارک پوسٹ کے مطابق امریکا میں چین کے سفیر کن گینگ نے کہا ہے کہ تائیوان کی حیثیت سے متعلق مسئلے پر چین اور امریکا میں تصادم کا خطرہ ہے۔ انہوں نے کہا کہ امریکا کی جانب سے تائیوان کو آزادی حاصل کرنے کیلئے ابھارا جارہا ہے، اگر تائیوان کے حکام امریکا کی شہہ پر اسی روش کو اپنائے رہے تو بہت ممکن ہے امریکا اور چین میں فوجی تصادم ہوجائے۔
سفیر کا مزید کہنا تھا کہ چین کے امریکا سے تعلقات بڑی اہمیت کے حامل ہیں۔ انہوں نے ایغور مسلم کمیونٹی کی نشل کُشی کے الزام کی بھی تردید کی۔ انہوں نے ان قسم کے الزامات کو اس صدی کا سب سے بڑا جھوٹ قرار دیا۔
دوسری جانب امریکی وزارت خارجہ نے بیان جاری کیا جس میں کہا گیا کہ تائیوان کی سرحد پر چینی فوجی سرگرمیاں تشویش ناک ہیں۔ یہ خطے کے امن اور استحکام کیلئے خطرہ ہے۔ امریکا تائیوان کی حمایت میں ثابت قدم ہے اور امریکا اس تعلق کو مزید مضبوط کرے گا۔
امریکا کی ہاؤس فارن افیئرز کمیٹی کے ممبر مائیکل میکول نے خدشہ ظاہر کیا ہے کہ چین اپنے سرما اولمپکس کے اختتام کے بعد تائیوان پر حملہ کردے گا۔

نئی دہلی: (ویب ڈیسک) بھارتی ریاست کرناٹکا کے ایک اسکول میں طلبا کو نماز کے لیے جگہ دینے پر استاد کو محکمہ تعلیم نے معطل کردیا۔
بھارتی میڈیا کے مطابق ریاست کرناٹکا کے ماڈل ہائر اسکول کے ایک ٹیچر کو جنونی ہندوؤں کے دباؤ پر معطل کردیا گیا۔ انتہا پسند ہندو ٹیچر کی جانب سے طلبا کو نماز پڑھنے کی اجازت دینے پر برہم تھے۔
اس معاملے کا آغاز اُس وقت ہوا جب سوشل میڈیا پر ایک ویڈیو وائرل ہوئی جس میں ایک کلاس میں 20 لڑکوں کو نماز پڑھتے دیکھا جا سکتا تھا۔
جیسے ہی انتہا پسند ہندوؤں کو یہ پتہ چلا کہ ویڈیو ماڈل ہائر اسکول کی ہے انھوں نے اسکول پر دھاوا بول دیا اور ہیڈ ماسٹر کو نماز کی اجازت دینے والے ٹیچر کیخلاف کارروائی کیلیے مجبور کیا۔
واضح رہے کہ مودی سرکار کے اقتدار میں اقلیتوں پر عرصہ حیات تنگ ہوتا جا رہا ہے اور کسی نہ کسی بہانے سے ہندو انتہا پسند اقلیتوں سے مذہبی آزادی کا حق چھین لیتے ہیں۔

آکلینڈ: (ویب ڈیسک) نیوزی لینڈ کی وزیراعظم جسینڈا آرڈن نے پرواز کے مسافروں میں کورونا کی تصدیق کے بعد خود کو گھر میں قرنطینہ کرلیا۔
عالمی خبر رساں ادارے کے مطابق نیوزی لینڈ کی وزیراعظم جسینڈا آرڈن ملک کی گورنر جنرل کنڈی کائرو کے ہمراہ اندرون ملک پرواز کے ذریعے آکلینڈ پہنچی تھیں۔
اس پرواز کے مسافروں میں کورونا کی تصدیق ہوئی جس پر وزیراعظم اور گورنر جنرل نے خود کو احتیاطاً قرنطینہ کرلیا۔ نیوزی لینڈ میں کسی شخص میں کورونا کی تصدیق کے بعد اس سے ملاقات کرنے والے تمام افراد کو کورونا ٹیسٹ کروا کر نتیجہ آنے تک قرنطینہ کرنا لازمی ہوتا ہے۔
وزیراعظم کے دفتر سے جاری بیان میں کہا گیا ہے کہ جسینڈا آرڈن کا کورونا ٹیسٹ کیا جائے گا اور نتیجہ آنے تک وہ قرنطینہ میں ہی رہیں گی۔ فی الحال وزیراعظم میں کورونا کی کوئی علامت ظاہر نہیں ہوئی ہے۔
متاثرہ پرواز سے آنے والے تمام مسافروں کا جینوم ٹیسٹ کیا گیا ہے جس کا نتیجہ ایک روز بعد آئے گا جس کے بعد ہی تصدیق کی جا سکے گی کہ متاثرہ افراد میں کورونا کی نئی شکل اومیکرون موجود تھا یا نہیں۔

بھارتی ذرائع ابلاغ کی رپورٹ کے مطابق واشنگٹن سے یہ حکم جاری ہونے کے علاوہ بائیڈن انتظامیہ نے یوکرین کو نیٹو (NATO) میں شامل نہ کرنے کی روسی مطالبہ بھی مسترد کردیا ہے۔جوبائیڈن نے یوکرین پر حملے کی صورتحال میں روس کو سنگین نتائج بھگتنے کی وارننگ بھی دی ہے۔

بائیڈن نے کہا ہے کہ اگر روس نے یوکرین پر حملہ کیا، تو وہ روس کی 85 ہزار کروڑ روپے کی ’نیرڈ اسٹریم 2‘ گیس پائپ لائن کو  بند کر دیں گے۔ روسی پائپ لائن سے یوروپ کو قدرتی گیس سپلائی کرنے کا منصوبہ ہے۔خاص بات یہ ہے کہ اب تک نیٹو سے الگ ہونے کی قیاس آرائیوں کا سامنا کرنے والے جرمنی نے بھی امریکہ کا ساتھ دیا ہے۔ دوسری جانب روس اور یوکرین نے دونوں ممالک کی سرحد پر جنگ بندی کے لئے پیرس مذاکرات جاری رکھنے کا اعلان کیا ہے۔

واضح رہے کہ روس اور یوکرین کے درمیان تنازع کافی عرصے سے جاری ہے۔ یوکرین 24 اگست 1991 کو سوویت یونین سے الگ ہو گیا تھا۔ سوویت یونین سے علیحدگی کے بعد یوکرین کو مغربی ممالک کی حمایت حاصل تھی۔ نیٹو کا قیام 1949 میں ہوا تھا جس کا مقصد یہ تھا کہ اس کے آس پاس کے ممالک سوویت یونین سے اپنا دفاع کر سکیں۔2014 میں یوکرین میں جو حکومت تھی، وہ کافی حد تک روس نواز تھی۔ اسی وجہ سے یوکرین نے نیٹو( NATO )میں شامل نہ ہونے کا فیصلہ کیا۔ تاہم نیٹو میں دوبارہ شمولیت کی تحریک تیز ہو گئی ہے۔ یوکرین دو حصوں مغربی یوکرین اور مشرقی یوکرین پر مشتمل ہے۔ مشرقی یوکرین میں روس کے حامیوں کی بڑی تعداد موجود ہے۔