امریکہ : (ویب ڈیسک) امریکہ نے القاعدہ کے رہنما الظواہری کو مارنے کے لیے چاقوؤں سے لیس میزائل کا استعمال کیا۔
اے ایف پی کی رپورٹ کے مطابق امریکہ نے ممکنہ طور پر “ہیل فائر آر نائن ایکس” نامی مخصوص میزائل استعمال کیا جس میں بارودی مواد کے بجائے بلیڈز اور چاقو لگے ہوئے تھے۔ یہ بلیڈز اپنے ہدف کے جسم کو نشانہ بناتے ہیں تاہم اس سے آس پاس کے لوگ متاثر نہیں ہوتے نہ ہی کسی عمارت کو کوئی بڑا نقصان پہنچتا ہے۔
الظواہری کی ہلاکت میں بھی ہیل فائر ڈرون ان کے گھر کی بالکونی میں پہنچا، اور اپنے ہدف کا شکار کر لیا، لیکن گھر پر موجود ان کی بیٹی اور بیوی کو کوئی نقصان نہیں پہنچا۔
امریکہ نے سرکاری طور پر اس میزائل کے استعمال کی تصدیق نہیں کی، تاہم اے ایف پی کے مطابق امریکہ اب تک یہ میزائل چھ سے زائد مرتبہ استعمال کر چکا ہے۔ ابھی تک امریکہ نے یہ معلومات بھی ظاہر نہیں کیں کہ یہ میزائل فائر کرنے والا ڈرون کہاں سے اڑا تھا۔
گزشتہ روز امریکی صدر نے ڈرون حملے میں القاعدہ کے رہنما الظواہریکی ہلاکت کی تصدیق کی تھی، امریکہ کی جانب سے کارروائی افغانستان میں کی گئی، امریکی سینئررہنما کا کہنا تھا کہ امریکی کارروائی میں کسی سویلین کی ہلاکت نہیں ہوئی۔
امریکی صدرجوبائیڈن نے قوم سے خطاب میں کہا کہ انٹیلی جنس ایجنسیوں نے رواں سال ایمن الظواہری کی موجودگی کا پتہ لگا لیا تھا۔ ہم نے القاعدہ کو مکمل طور پر ختم کردیا ہے، ایمن الظواہری نائن الیون حملے کی منصوبہ بندی میں شامل تھا۔ امریکی ڈرون حملے میں کسی عام شہری کی ہلاکت نہیں ہوئی۔ جو لوگ ہمارے لیے خطرہ ہیں ان کا تعاقب کریں گے، ہر قیمت پر امریکہ کا دفاع کریں گے۔

برطانیہ : (ویب ڈیسک) ہیکرز سے خطرہ، برطانیہ میں نئے وزیراعظم کا انتخاب تاخیر کا شکار ہو گیا۔
رپورٹ کے مطابق GCHQ جاسوسی ایجنسی نے خبردار کیا ہے کہ ووٹنگ بیلٹس پر سائبر حملہ ہو سکتا ہے جو نتیجہ بدل سکتا ہے۔ 1 لاکھ 60 ہزار پارٹی ممبرز کیلئے بیلٹس بھی گزشتہ روز بھیجے جانے تھے، لیکن اس میں تاخیر ہوئی اور اب یہ عملی 11 اگست تک مکمل ہو گا۔ سائبر حملے سے بچنے کیلیے برطانیہ کی نیشنل سائبر سیکورٹی سنٹر نے آن لائن ووٹنگ کی تجویز پیش کی ہے۔
سابق وزیر خزانہ رشی سونک اور سابق وزیر خارجہ لز ٹرس میں سخت مقابلہ ہے، دونوں امید واروں میں سے کوئی ایک ایک ماہ میں کنزرویٹو پارٹی اور برطانیہ کی سربراہی کا منسب سنبھالے گا۔
اوپینین پول میں ٹرس کو برتری حاصل ہے، لیکن اصل فیصلہ ووٹنگ کے بعد 5 ستمبر کو ہو گا۔
یاد رہےبرطانیہ میں برٹش انڈین رشی سونک کے کنزر ویٹو وزیراعظم بن کر نئی تاریخ رقم کرنے سے ایک قدم دور ہیں،رشی سونک برطانیہ میں پیدا ہوئے اور اُنہوں نے آکسفورڈ یونیورسٹی سے فلسفہ اور معاشیات میں ڈگری حاصل کی۔
اُن کے والدین بھارتی نژاد ہیں جو 1960 کی دہائی میں برطانیہ منتقل ہوئے، اُن کی والدہ ایک فارماسسٹ اور والد نیشنل ہیلتھ سروس کے جنرل پریکٹیشنر تھے۔
رشی سونک پہلی بار 2015 میں رچمنڈ، یارکشائر سے منتخب ہو کر ایم پی بنے تھے، بریگزٹ مطالبات کے حامی رشی کو 2020 میں برطانوی کابینہ میں وزیرِ خزانہ تعینات کیا گیا۔
اُنہوں نے وبائی امراض کے دوران کاروبار اور ملازمین کی مدد کے لیے اپنے معاشی پیکیج سے مقبولیت حاصل کی۔ اس پیکیج میں ملازمتوں کو برقرار رکھنے کا پروگرام شامل تھا، جس نے مبینہ طور پر برطانیہ میں بڑے پیمانے پر بے روزگاری کو روکا تھا۔

امریکا : (ویب ڈیسک) امریکی صدر جوبائیڈن کا کورونا ٹیسٹ تیسری بار مثبت آگیا ہے۔
امریکی صدر کا منگل کے روز کورونا ٹیسٹ کیا گیا جو مثبت آیا، وائٹ ہاوس کے مطابق امریکی صدر کی طبعیت بہتر ہے اور ان میں کورونا کی معمولی علامات ہیں۔
امریکی صدر جوبائیڈن کا کورونا ٹیسٹ 21 اور 27 جولائی کو بھی مثبت آیا تھا۔
دوبارہ ٹیسٹ مثبت آنے کے بعد سے، بائیڈن کو مشی گن اور ڈیلاویئر کا اپنا سفر منسوخ کرنا پڑا۔ یاد رہے گزشتہ رات انہوں نے القاعدہ کے رہنما ایمن الظواہری کی ہلاکت کی تصدیق کی تھی، اس پریس کانفرنس میں امریکی صدر کا مائیک صحافیوں سے بہت فاصلے پر لگایا گیا تھا۔

چین : (ویب ڈیسک) امریکی ایوان نمائندگان کی اسپیکر نینسی پلوسی کے دورہ تائیوان پر چینی وزارت خارجہ نے امریکی سفیر کو طلب کر لیا۔
چینی وزارت خارجہ نےاسپیکر نینسی پلوسی کے دورہ تائیوان پر امریکی سفیر کے سامنے شدید احتجاج ریکارڈ کروایا۔
چینی نائب وزیر خارجہ کی جانب سے کہا گیا ہے کہ امریکی اقدام پر چین خاموش نہیں رہے گا۔امریکی اقدام انتہائی جارحانہ نوعیت کا ہے۔
انہوں نے امریکہ کو تنبیہہ کی ہے کہ امریکی اقدام کے انتہائی سنجیدہ نتائج ہوں گے۔
واضح رہے کہ چین نے اسپیکر نینسی پلوسی کے دورہ تائیوان کو چین کے اندرونی معاملات میں مداخلت قرار دیتے ہوئے دورہ کرنے سے باز رہنے کی وارننگ دی تھی۔
تاہم چین کی وارننگ کی باوجود امریکی اسپیکر گزشتہ رات تائیوان کے دورے پر پہنچیں۔نینسی پلوسی 25 سال میں تائیوان کا دورہ کرنے والی پہلی اعلیٰ سطح کی امریکی شخصیت ہیں۔