اسلام آباد: (ویب ڈیسک) وزیر اعظم شہباز شریف آج خیبر پختونخوا کے سیلاب سے متاثرہ علاقوں کا دورہ کریں گے۔
وفاقی وزیر اطلاعات مریم اورنگزیب نے سماجی رابطے کی ویب سائٹ ٹوئٹر پر لکھا کہ وزیر اعظم شہباز شریف آج خیبر پختونخوا کے ضلع ٹانک اور ضلع ڈیرہ اسماعیل خان کے سیلاب سے متاثرہ علاقوں کا دورہ کریں گے۔
انہوں نے کہا کہ وزیر اعظم سیلاب سے متاثرہ علاقوں میں جاری امدادی کاموں کا جائزہ لیں گے۔
وزیر اعظم کے دورے کے موقع پر ان کے ہمراہ وفاقی وزیر برائے مواصلات مولانا اسعد محمود اور نیشنل ڈیزاسٹر مینجمنٹ (این ڈی ایم اے) کے چیئرمین لیفٹیننٹ جنرل اختر نواز بھی ہوں گے۔
گزشتہ روز وزیر اعظم شہباز شریف نے بلوچستان کا دورہ کیا تھا اور بارشوں سے ہونے والی تباہی کا جائزہ لیا تھا۔

اسلام آباد:(ویب ڈیسک) سیلابی ریلوں نے بلوچستان، پنجاب، سندھ اور خیبر پختون خوا میں تباہی مچا دی. بلوچستان میں سیلابی ریلے 124 جانیں لے گئے۔
ملک بھر میں سیلاب کے باعث سیکڑوں دیہات ڈوب گئے، بستیاں اجڑ گئیں، لاکھوں افراد بے یار و مددگار ہو گئے۔ ہزاروں جانور سیلابی ریلوں میں بہہ گئے۔لاکھوں ایکڑ پر کھڑی فصلیں بھی زیر آب آ گئیں۔خیبر پختون خوا میں ایک روز میں 10 افراد دم توڑ گئے۔بلوچستان میں ہلاکتوں کی تعداد124 ہو گئی۔
بلوچستان میں خضدار، نصیر آباد، لسبیلہ میں ہر طرف تباہی کے مناظر ہیں، سندھ میں ٹھٹھہ، خیرپور سمیت دیگر علاقوں میں سیلابی پانی سب بہا لے گیا۔
دریائے چناب میں طغیانی پنجاب کے کئی علاقوں میں سیلاب کا باعث بن گئی۔ جھنگ کے مقام پر دریائے چناب میں پانی کی سطح میں میں کمی نہ آسکی۔ ستر سے زائد دیہات زیر آب آگئے۔ شہر سے زمینی رابطہ بھی منقطع ہو گیا۔
سرگودھا کے کئی علاقے بھی سیلاب سے متاثر ہوئے ہیں۔ سیلاب متاثرین شدید مشکلات کا شکار ہیں،، سیلابی پانی سے فصلیں زیر آب آ گئیں۔ کئی علاقوں میں ابھی تک تین سے چار فٹ تک پانی کھڑا ہے۔ پنجاب میں ڈیرہ غازی خان، راجن پور ، ڈی آئی خان، مردان میں بھی سیلاب نے تباہی مچا دی۔

اسلام آباد:(ویب ڈیسک) پاکستان میں کورونا وائرس سے مزید ایک شخص جاں بحق ہو گیا جبکہ 661 سے زائد نئے کیسز رپورٹ ہوئے۔
قومی ادارہ برائے صحت (این آئی ایچ) کے مطابق گزشتہ 24 گھنٹے میں 20 ہزار 800 کورونا ٹیسٹ کیے گئے جن میں 661 افراد میں کورونا کے مثبت کیسز کی تشخیص ہوئی۔
ملک میں مثبت کیسز کی شرح 3.29 فیصد تک پہنچ گئی جبکہ 171 افراد کی حالت تشویش ناک ہے۔ گزشتہ 24 گھنٹوں میں کورونا وائرس سے مزید ایک شخص جاں بحق ہو گیا۔
واضح رہے کہ کورونا وائرس کے ایک بار پھر سر اٹھانے پر حکومت کی جانب سے ٹیسنگ کا عمل تیز کر دیا گیا ہے۔

لندن: (ویب ڈیسک) سابق وزیراعظم اور پاکستان مسلم لیگ ن کے قائد میاں محمد نواز شریف نے کہا ہے کہ پاکستان تحریک انصاف (پی ٹی آئی)کے فارن فنڈنگ کیس تاریخ میں قانون کی تذلیل کی بدترین مثال ہے۔
اپنے ایک ویڈیو بیان میں فارن فنڈنگ سے متعلق بات کرتے ہوئے انہوں نے کہا کہ ایک صاف اور سیدھا مقدمہ گزشتہ 6 سال سے الیکشن کمشن میں لٹکا ہوا ہے، فیصلہ صرف اس لیے نہیں ہو رہا کیونکہ سامنے میں نہیں عمران خان ہے، فنڈنگ کے مقدمے میں ملوث جماعت کا نام مسلم لیگ ن نہیں پی ٹی آئی ہے۔
اپنی بات کو جاری رکھتے ہوئے سابق وزیراعظم نے کہا کہ 2017ء میں منتخب وزیراعظم کو نکالنے کیلئے تیز رفتاری سے کارروائی کی گئی، سپریم کورٹ کے ججز نے وٹس ایپ کے ذریعے جے آئی ٹی قائم کی، 60 دنوں میں جے آئی ٹو کو رپورٹ دینے کا حکم دیا گیا اور پھر کس تیزی سے پانامہ کیس میں میرے خلاف فیصلہ آیا۔
مسلم لیگ ن کے قائد کا مزید کہنا تھا کہ بیٹے سے تنخواہ نہ لینے پر ایک وزیراعظم کو نااہل کر دیا گیا، پھر احتساب عدالت کو پابند کیا گیا 6 ماہ کے اندر فیصلہ دیا جائے، چابک مارنے کے انداز میں ایک نگران جج بٹھا دیا گیا۔
نواز شریف نے کہا کہ اس کے بعد یہ حکم صادر کیا گیا احتساب عدالت ہفتہ وار چھٹی بھی نہ کرے، جج محمد بشیر کو توسیع بھی دی گئی۔ یہ تصویر کا ایک رخ ہے جبکہ دوسرا رخ بالکل مختلف ہے، پی ٹی آئی کی فارن فنڈنگ کی تحقیقات کیلئے 2014ء میں مقدمہ قائم ہوا، یہ مقدمہ مسلم لیگ ن نہیں ان کی جماعت کے اپنے پارٹی عہدیدار نے دائر کیا، اس سادہ مقدمے کی 70 سماعتیں ہو چکی ہیں، صادق و امین کے نعرے لگانے والا عمران خان کہتا تھا احتساب مجھ سے شروع کیا جائے، اب انصاف کی راہ میں سب سے بڑی رکاوٹ عمران خان خود ہے، اس نے 30 بار کیس ملتوی کروایا، 8بار وکیل بدلے۔ الیکشن کمشن کے 20احکامات کو ردی کی توکری میں ڈال دیا گیا، پی ٹی آئی کا فارن فنڈنگ کیس تاریخ میں قانون کی تذلیل کی بد ترین مثال ہے، مارچ 2018ء میں الیکشن کمشن نے پی ٹی آئی فارن فنڈنگ کے جائزے کیلئے سکروٹنی کمیٹی بنائی۔ عمران خان نے تسلیم کیا فارن فنڈنگ میں خرابیاں ہوئیں۔
سابق وزیراعظم نے کہا کہ امریکا میں رجسٹرڈ کمپنیاں عمران خان کے حکم پر وجود میں آئیں، یہ کمپنیاں عمران خان کی نگرانی میں چلائی جاتی رہیں، سٹیٹ بنک نے 23 بنک اکاونٹس کی تفصیلات دیں، عمران خان نے اکاونٹس چھپائے جو قانون کی سنگین خلاف ورزی ہے، شفافیت کا ڈھول پٹنے والا عمران خان کے مالی معاملات میں شفافیت کا نام و نشان نہیں۔
اپنی بات کو جاری رکھتے ہوئے نواز شریف نے کہا کہ عمران خان کیخلاف ٹھوس ثبوت ہیں، قوم جاننا چاہتی ہے جو پیسہ جمع ہوا وہ کہاں گیا، الیکشن کمشن کیوں اس معاملے پر فیصلہ نہیں کر رہا، اگر ان پیسوں میں کرپشن نہیں ہوئی تو چھپایا کیوں گیا، یہ غیر شفاف اکاونٹس منی لاڈرنگ کے زمرے میں نہیں آتے، اس میں کوئی شک نہیں عمران خان مجرم ہے، فرار کی خاطر اپنا جرم ایجنٹوں پر ڈال رہا ہے۔

اسلام آباد: (ویب ڈیسک) صدر عارف علوی نے ہجری سال نو پر قوم کے نام اپنے پیغام میں کہا ہے ماہ محرم امت مسلمہ میں حق وباطل سےمتعلق صحیح فہم وشعور بیدار کرتا ہے۔
صدر مملکت ڈاکٹر عارف علوی نے ہجری سال نو 1444 کے موقع پر قوم کے نام اپنے پیغام میں کہا ہے کہ ماہ محرم امت مسلمہ میں حق وباطل سےمتعلق صحیح فہم وشعور بیدار کرتا ہے۔
صدر مملکت نے مزید کہا کہ اسلامی ہجری سال مسلمانوں کو عظیم ہجرت کی یاد دلاتا ہے۔ ہجری سال یاد دلاتا ہے کہ اسلام اور ایمان کے لیے اگر اپنا گھر بار بھی چھوڑنا پڑے تو چھوڑ دو۔
عارف علوی نے اپنے پیغام میں مزید کہا کہ محرم الحرام کی اسلامی تاریخ میں بے پناہ اہمیت اور فضیلت ہے۔ دین اسلام کی سربلندی کیلئے بندۂ مومن کو حتی الامکان کوشش کرنی چاہیے اور اللہ تعالیٰ کی راہ میں اپنی جان کا نذرانہ پیش کرنے سے بھی گریز نہیں کرنا چاہیے۔

اسلام آباد: (ویب ڈیسک) وزیراعظم شہبازشریف کی تمام مسلمانوں کو نئے اسلامی سال کی مبارک . اسلامی سال کا پہلا مہینہ محرم ہے،اس کے آغاز پر اللہ تعالی سے خصوصی دعائیں کی جائیں .اسلام میں محرم الحرام ایک عظیم مہینہ ہے.چار مقدس مہینوں میں محرم الحرام کا مہینہ بھی شامل ہے.دنیا ان چار مقدس مہینوں میں لڑائی اورجنگ بندی کی روایت اپنائے.ان چار مقدس مہینوں میں جنگ بندی کرکے پوری دنیا کو امن کا گہوارہ بنایاجاسکتا ہے

لاہور: (ویب ڈیسک) پاکستان مسلم لیگ ن کی نائب صدر مریم نواز نے کہا ہے کہ آزمائشوں نے مجھے مضبوط اور ہمارا عزم مزید پختہ کر دیا ہے۔
سماجی رابطے کی ویب سائٹ ٹویٹر پر اپنے ایک بیان میں انہوں نے لکھا کہ ظلم و ستم کے خلاف 1999میں بھی کھڑے تھے اور 23 سال بعد بھی ڈٹے ہیں۔
مریم نواز نے لکھا کہ فرق یہ ہے آزمائشوں نے مجھے مضبوط اور ہمارا عزم مزید پختہ کر دیا ہے۔
لیگی نائب صدر نے لکھا کہ ظالمانہ اور غیر منصفانہ سلوک کے لئے میاں نواز شریف کو اکیلا کرنا تب سے ختم نہیں ہوا ہے۔ ہمت نہیں ہاریں گے، انشاء اللہ