اسلام آباد: (ویب ڈیسک) وفاقی وزیر اطلاعات مریم اورنگزیب نے سابق وزیر اعظم عمران خان کے بیان پر ردعمل دیتے ہوئے کہا ہے کہ خیرات کے پیسوں کو پارٹی کی سیاست کےلیے استعمال کرنے کا جواب دو۔
مریم اورنگزیب نے کہا کہ عمران خان نے ملک کی معیشت اور سکیورٹی کو کمزور کیا، پاکستان کے لیے بڑا خطرہ عمران خان اور اس کی لائی ہوئی فارن فنڈنگ ہے۔
انہوں نے کہا کہ امریکا سے فنڈنگ لینے والے ملک کی سکیورٹی کا ٹھیکے دار نہ بنے ،اقتدار میں ملک کو کمزور،کشمیر کا سودا اور فارن فنڈرزکو خوش کیا۔

لاہور : (ویب ڈیسک) لاہور کی عدالت نے ایف آئی اے کے منی لانڈرنگ کیس میں وزیراعظم شہباز شریف اور حمزہ شہباز کو فرد جرم کے لیے طلب کرلیا۔
لاہور کی اسپیشل سینٹرل عدالت میں وزیراعظم شہباز شریف اور حمزہ شہباز سمیت دیگر کےخلاف منی لانڈرنگ کیس کی سماعت ہوئی جس میں شہباز شریف اور حمزہ شہباز نے ایک روز کی حاضری معافی کی درخواست دائر کی۔
دورانِ سماعت حمزہ شہباز کے وکیل نے ان کی میڈیکل رپورٹس عدالت میں پیش کیں۔شہباز شریف کے وکیل امجد پرویز نے کہا کہ کل شہباز شریف اسلام آباد میں سرکاری میٹنگز میں مصروف تھے، گزشتہ رات وہ اسلام آباد سے لاہور آنے کے لیے تیار تھے لیکن موسم کی خرابی پر انہیں سفر سے منع کیاگیا۔
ایف آئی اے کے وکیل نے کہا کہ انہیں شہباز شریف اور حمزہ کی حاضری معافی پر کوئی اعتراض نہیں ہے۔
ایف آئی اے پراسیکیوٹر نے اپنے دلائل میں کہا کہ ضمانت منظور ہوتے ہی ملزم نے عدالت میں پیش ہونا چھوڑ دیا ہے جب کہ ملزم ملک مقصود کا ڈیتھ سرٹیفکیٹ جمع کرادیا ہے ،ملزم کی موت کی تصدیق ہوگئی ہے ۔
دورانِ سماعت ایف آئی اے نے اشتہاری ملزم سلیمان شہباز کی جائیداد کا ریکارڈ پیش کیا۔
بعد ازاں عدالت نے آئندہ سماعت پر شہباز شریف اور حمزہ شہباز کو فرد جرم کے لیے طلب کر لیا اور سماعت 7 ستمبر تک ملتوی کردی۔

اسلام آباد: (ویب ڈیسک) وزیرداخلہ رانا ثنا اللہ نے عام انتخابات سے متعلق شیخ رشید کے بیان پر رد عمل کا اظہار کیا ہے۔
ایک بیان میں رانا ثنااللہ نے کہا کہ پی ٹی آئی، پنجاب اور کے پی اسمبلی توڑے اور اس کے ارکان قومی اسمبلی اپنے استعفے قبول کروائیں تو وہ یقین دلاتے ہیں کہ ملک میں ضمنی الیکشن نہیں بلکہ عام انتخابات ہوں گے۔
گزشتہ روز شیخ رشید نے دعویٰ کیا تھا کہ ملک میں ضمنی الیکشن کے بجائے نئے الیکشن پر معاملات طے پا گئے ہیں۔
ان کا کہنا تھا کہ اکتوبر میں الیکشن کی تاریخ، نئے الیکشن کمیشن، نگران حکومت کا فیصلہ قوم جلد سن لے گی، قرنطینہ والے بھی الیکشن کے لیے مان گئے ہیں، صرف مولانا فضل الرحمان رہ گئے ہیں۔

ڈیرہ غازی خان : (ویب ڈیسک) وزیرخارجہ بلاول بھٹو زرداری نے کہا ہے کہ ستمبر میں پاک بھارت وزرائے اعظم کے درمیان کوئی ملاقات پلان نہیں۔
شنگھائی تعاون تنظیم کے وزرائے خارجہ کی کونسل کے اجلاس کےموقع پر غیر ملکی ٹی چینل کو دیے گئے انٹرویو میں وزیرخارجہ بلاول بھٹونے کہا کہ باہمی تعلقات کے حوالے سے بھارتی وزیرخارجہ سے کوئی بات نہیں ہوئی۔
وزیر خارجہ نے تاشقند میں گفتگو کرتے ہوئے کہا ہے کہ بھارت کے ساتھ کسی دو طرفہ ملاقات کا پلان نہیں۔بھارتی سیاستدانوں کے اسلاموفوبیا پر مبنی بیانات بات چیت کو مشکل بنا رہے ہیں۔
انہوں نے کہا ہے کہ بھارت ہمارا پڑوسی ملک ہے۔ آپ بہت سی چیزوں کا انتخاب کرسکتے ہیں، پڑوسی کا نہیں۔ ہمیں اپنے پڑوسی کے ساتھ رہنے کی عادت ڈالنی چاہیے۔
ان کا کہنا ہے کہ شنگھائی تعاون تنظیم کی فیملی کا حصہ ہیں۔ اس موقع پر دو طرفہ ملاقاتیں بھی کیں۔امریکا سمیت تمام ممالک کے ساتھ معاشی تعلقات کے فروغ کے لیے کام کر رہے ہیں۔
بلاول بھٹو نے مزید کہا کہ عمران خان کے بیرونی سازش کےدعوؤں میں کوئی صداقت نہیں۔عمران خان نے امریکا سے تعلقات بہتر بنانے کی کوشش کی تھی، ناکام رہے تو اس میں ہمارا کیا قصور ہے۔
وزیر خارجہ بلاول بھٹو نے پاکستان کی سیاست پر بات کرتے ہوئے کہا کہ پنجاب میں پی ٹی آئی کو فتح نہیں شکست ہوئی ہے ضمنی انتخابات میں 20 نشستیں پی ٹی آئی کی تھیں جن میں سے 5 پر مسلم لیگ ن کو کامیابی حاصل ہوئی
ان کا کہنا ہے کہ پی ٹی آئی نے ضمنی انتخاب میں اپنی 5 نشتیں کھو دیں۔ ہم اس سیاسی ہنگامہ آرائی سے اگاہ ہیں ۔

ڈیرہ غازی خان : (ویب ڈیسک) ڈیرہ غازی خان میں سیلاب نے تباہی مچادی۔ سڑکیں بہہ گَئیں۔87 ہزار لوگ متاثر ہوئے۔
ڈی جی خان میں سیلاب سے ہونے والے نقصانات کی ابتدائی رپورٹ جاری کر دی گئی۔ سیلاب سےڈیرہ غازی خان کا ایک لاکھ 75 ہزار ایکڑ رقبہ زیرآب آیا۔
برساتی ندی نالوں کے سیلاب سے 87 ہزار لوگ متاثر ہوئے ۔ حادثات میں 8افراد جاں بحق ہوئے۔متاثرہ علاقوں میں 21 رابطہ سڑکیں مکمل اور جزوی متاثر ہوئِں۔ متاثرہ علاقوں میں 499 جانور بہہ گئے۔
متاثرہ علاقوں سے 972 افراد کو ریسکیو کیا گیا،14ریلیف کیمپ قائم کیے گئے ہیں۔ کمشنر عثمان انور کے مطابق سیلاب کا پانی اترنا شروع ہو گیا جس کے بعد متاثرین کی گھروں کو واپسی جاری ہے۔123افرادریلیف کیمپوں میں موجود ہیں۔
متاثرین میں خشک راشن اور 690خیمے،500ٹینٹ ،500چٹائیاں ،200مچھردانیا تقسیم کی گئیں ہیں ۔ نقصانات کا تخمینہ لگانے کے لیے سروے ٹیمیں تشکیل دیدی گئیں ہیں۔

اسلام آباد: (ویب ڈیسک) وزیراعظم شہباز شریف اور بل گیٹس کے درمیان ٹیلی فونک رابطہ ہوا ہے جس میں بل اینڈ میلنڈا گیٹس فاونڈیشن کے پاکستان میں صحت اور سماجی شعبے کے پروگرامز پر تبادلہ خیال کیا گیا۔
وزیراعظم نے بل اینڈ میلنڈا گیٹس فاؤنڈیشن کی پولیو کے خاتمے میں مدد کو سراہا، اور کہا کہ ملک سے پولیو کے خاتمے کیلئے حکومت پاکستان پرعزم ہے۔
بل گیٹس نے پولیو کے بڑھتے ہوئے کیسز پر اظہار تشویش کرتے ہوئے پاکستان کی مدد جاری رکھنے کی یقین دہانی کرائی۔