لاہور: (ویب ڈیسک) پاکستان تحریک انصاف (پی ٹی آئی) اور مسلم لیگ ق کے مشترکہ امیدوار سبطین خان پنجاب اسمبلی کے سپیکر منتخب ہوگئے۔
پینل آف چیئرمین وسیم بادوزئی کی جانب سے سبطین خان کی کامیابی کا اعلان کیا گیا اور کہا گیا کہ سبطین خان ہاؤس کے نئے کسٹوڈین ہوں گے۔سبطین خان کی کامیابی پر تحریک انصاف اور مسلم لیگ ق کے ارکان کی جانب سے ایوان میں نعرے بازی کی گئی۔ مسلم لیگ ن اور اتحادی جماعتوں کے امیدوار ملک سیف الملوک کھوکھر نے سبطین خان کو سپیکر منتخب ہونے پر مبارکباد دی۔ تاحال یہ اعلان نہیں کیا گیا کہ کس امیدوار نے کتنے ووٹ حاصل کیے۔
خیال رہے کہ سپیکر پنجاب اسمبلی کا انتخاب چوہدری پرویز الہٰی کے وزیر اعلیٰ پنجاب بننے کے بعد کرایا گیا۔ پنجاب اسمبلی میں ہونے والی ووٹنگ کئی گھنٹوں تک جاری رہی جس کے دوران ارکان نے خفیہ طریقے سے اپنے ووٹ کاسٹ کیے۔ ووٹنگ کے دوران ایک بار اس وقت تنازعہ پیدا ہو جب مسلم لیگ ن کے احتجاج کے باعث کچھ منٹوں کیلئے پولنگ روکنا پڑی۔

لاہور: (ویب ڈیسک) ملک میں محرم الحرام کا چاند نظر نہیں آیا جس کے بعد یکم محرم الحرام 1444 ہجری 31 جولائی اتوار کو ہوگی۔
محرم الحرام کا چاند دیکھنے کیلئے مرکزی رویت ہلال کمیٹی کا اجلاس چیئرمین مولانا عبدالخبیر آزاد کی زیر صدارت کوئٹہ میں ہوا۔
اجلاس کے بعد اعلان کیا گیا کہ ملک میں کہیں سے بھی چاند نظر آنے کی شہادت موصول نہیں ہوئی۔
مرکزی رویت ہلال کمیٹی کے مطابق یکم محرم الحرام 31 جولائی اتوار کو ہوگی اور یوم عاشور 9 اگست بروز منگل کو ہوگا۔

لاہور: (ویب ڈیسک) وزیراعلیٰ پنجاب پرویز الٰہی نے صوبے بھر میں نئی بھرتیوں پرپابندی عائد کردی۔
نئی بھرتیوں پر پابندی کا نوٹیفکیشن جاری کردیا گیا ہے۔ نوٹیفکیشن کے مطابق صوبے بھر میں نئی بھرتیوں پرپابندی ہوگی تاہم پنجاب پبلک سروس کمیشن کےتحت بھرتیوں کا عمل جاری رہے گا۔

پشاور: (ویب ڈیسک) پی ڈی ایم کے سربراہ مولانا فضل الرحمان نے کہا ہے کہ ہم پی ٹی آئی کو پاکستان کی سیاست سے باہر کر دیں گے۔
پاکستان تحریک انصاف (پی ٹی آئی) کے رہنما افتخار مہمند جمیعت علمائے اسلام میں شامل ہو گئے۔ اس موقع پر مولانا فضل الرحمان نے پریس کانفرنس کرتے ہوئے کہا کہ ہم افتخار مہمند اور ان کے ساتھیوں کو خوش آمدید کہتے ہیں۔
انہوں نے کہا کہ پی ٹی آئی نے نئی نسل کو گالیوں کے علاوہ کوئی درس نہیں دیا اور ہم اس جماعت کو پاکستان کی سیاست سے باہر کر دیں گے کیونکہ عمران خان نے ہماری نسل کی اخلاقیات کو ختم کر دیا ہے۔
مولانا فضل الرحمان نے کہا کہ ہم چاہتے ہیں الیکشن کمیشن فارن فنڈنگ سے متعلق کیس کا فیصلہ جلد سنائے۔ فارن فنڈنگ میں پی ٹی آئی نے اسرائیل اورہندوستان سے پیسے لیے۔
انہوں نے کہا کہ عمران خان ہر ایک کو چور کہتا ہے مگر پنجاب کو ایک ڈاکو کے حوالے کیا، ہم پورے ملک میں متحد ہو کر ان کا مقابلہ کریں گے۔

اسلام آباد: (ویب ڈیسک) الیکشن کمیشن آف پاکستان نے تحریک انصاف کے گیارہ اراکین قومی اسمبلی کو ڈی نوٹیفائی کردیا۔
اسپیکر قومی اسمبلی نے پاکستان تحریک انصاف کی مرکزی رہنما علی محمد خان، فضل محمدخان، شوکت علی، فخرزمان خان، فرخ حبیب ، اعجازشاہ، جمیل احمد، اکرم چیمہ، عبدل الشکور، شیریں مزاری اور شاندانہ گلزار کے استعفے منظور کیے گئے ہیں جسے الیکشن کمیشن نے بھی دی نوٹیفائی کردیا ہے۔
اسپیکر قومی اسمبلی نے گیارہ اراکین کو ڈی نوٹیفائی کرنے کے لئے الیکشن کمیشن کو مراسلہ بھیجا تھا۔
ترجمان قومی اسمبلی کا کہنا تھا کہ اسپیکر قومی اسمبلی نے استعفے آئین پاکستان کی آرٹیکل 64 کی شق (1) کے تحت منظور کیے۔

اسلام آباد: (ویب ڈیسک) وزیراعظم شہباز شریف نے کہا ہے کہ فنانشل ٹائمز کی رپورٹ عمران نیازی کے خلاف سنگین فرد جرم ہے۔
سماجی رابطے کی ویب سائٹ ٹوئٹر پر پیغام جاری کرتے ہوئے وزیراعظم شہباز شریف نے لکھا کہ معتبر عالمی ادارے فنانشل ٹائمز کی تحقیقاتی رپورٹ عمران نیازی کے خلاف سنگین فرد جرم ہے، پی ٹی آئی کی فارن فنڈنگ، غیر قانونی بھاری رقوم کی ترسیل کے حقائق بے نقاب کر دیئے ہیں۔
انہوں نے اپنے ٹوئٹ میں مزید لکھا کہ رپورٹ میں بیان کردہ ٹھوس حقائق چیخ چیخ کر بتا رہے ہیں کہ عمران نیازی جھوٹ، تضادات اور منافقت کا پیکر ہے۔

اسلام آباد: (ویب ڈیسک) سپریم کورٹ کے جج جسٹس طارق مسعود نے جوڈیشل کمیشن کے اجلاس پر ارکان کو خط لکھ دیا جس میں انہوں ںے چیف جسٹس کے رویے کو غیر جمہوری عمل قرار دے دیا۔
جسٹس سردار طارق مسعود نے چیف جسٹس اور جوڈیشل کمیشن کے ارکان کو خط لکھتے ہوئے کہا کہ جوڈیشل کمیشن کا اجلاس شروع ہوا تو چیف جسٹس نے اپنے نامزد ججز کے کوائف کے بارے میں بتایا، پھر جسٹس ریٹائرڈ سرمد جلال عثمانی نے چار ججز کی تقرری کے حق میں جب کہ ایک جج کی تقرری کے خلاف رائے دی۔
جسٹس سردار طارق مسعود نے خط میں کہا کہ میں نے بھی اپنی باری پر رائے دی اور چیف جسٹس اسلام آباد ہائی کورٹ جسٹس اطہر من اللہ کی سپریم کورٹ میں تقرری کی رائے دی، کیونکہ چیف جسٹسز ہائی کورٹس میں جسٹس اطہر من اللہ سینئر ترین جج ہیں۔
جسٹس طارق مسعود نے کہا کہ جسٹس اعجاز الاحسن اور جسٹس سجاد علی شاہ نے چیف جسٹس کے دیے گئے ناموں کی منظوری دی، میں نے بھی سندھ ہائی کورٹ کے تین اور لاہور ہائی کورٹ کے ایک جج کی نامزدگی کو نامنظور کیا، پھر اٹارنی جنرل ، وزیر قانون اور بار کونسل کے نمائندوں نے مجھ سے اتفاق کرتے ہوئے چار نامزد ججز کی تقرری کو نامنظور کیا۔
خط میں کہا گیا کہ جسٹس قاضی فائز عیسی نے چیف جسٹس کے نامزد ججوں کو نامنظور کرنے کے حوالے سے میری رائے سے اتفاق کیا، پھر جب جسٹس قاضی فائز عیسی چیف جسٹس کے ناموں کو نامنظور کرنے کی وجوہات بتا رہے تھے تو جسٹس قاضی فائز عیسی کی رائے کے دوران ہی چیف جسٹس غیر معمولی اور غیر جمہوری عمل کرتے ہوئے کمیشن کا فیصلہ لکھوائے بغیر اجلاس سے اٹھ کر چلے گئے۔
جسٹس طارق مسعود نے کہا کہ معاملہ واضح ہوگیا تھا کہ کمیشن کے پانچ ارکان نے نامزدگیوں کو نامنظور کر دیا تھا، تو چیف جسٹس عمر عطا بندیال رائے سننے کے بعد فیصلہ سنانے کی بجائے اچانک میٹنگ سے اٹھ گئے۔
جسٹس طارق مسعود نے کہا کہ سپریم کورٹ ترجمان کی طرف سے جاری کردہ اعلامیہ حقائق کے برعکس ہے، سپریم کورٹ ترجمان جوڈیشل کمیشن کا ممبر ہے نہ سیکریٹری، سپریم کورٹ کے اعلامیے میں کہا گیا کہ اجلاس موخر کردیا گیا مگر فیصلہ جاری کردیا گیا۔
جسٹس سردار طارق مسعود نے مزید کہا کہ اجلاس میں ارکان نے پانچ اور چار کے تناسب سے پانچوں نام مسترد کیے، چیف جسٹس صاحب فوری طور پر جوڈیشل کمیشن اجلاس کے درست منٹس جاری کریں کیوں کہ جوڈیشل کمیشن کے تفصیلی منٹس پبلک کرنے سے افواہوں کا خاتمہ ہوگا۔