All posts by Khabrain News

اہم خبریں, پاکستان

راولپنڈی: زینب زیادتی و قتل کیس کے مجرموں کو دو دو مرتبہ سزائے موت کا حکم

راولپنڈی: عدالت نے 9 سالہ بچی زینب سے زیادتی اور قتل کے کیس میں مجرموں کو سزا سنادی۔

راولپنڈی کی سیشن عدالت نے تھانہ سول لائنز کی حدود میں 9سال کی زینب سے زیادتی اور قتل کیس کا فیصلہ سنایا جس میں عدالت نے جرم ثابت ہونے پر مجرم بابر مسیح اور محمد عدنان کو دو دو مرتبہ سزائے موت کا حکم دیا۔

عدالت کی جانب سے مجرمان کو 5،5 لاکھ روپے جرمانے کی سزا بھی سنائی گئی ہے جب کہ مجرمہ کویتا کو جرم چھپانے پر 7سال قید اور ایک لاکھ روپے جرمانے کی سزا سنائی گئی۔

واضح رہےکہ 22 مارچ 2021 کو 9 سالہ زینب سے زیادتی اور قتل کا مقدمہ تھانہ سول لائنز میں درج کیا گیا تھا جب کہ مجرم نے دوران تفتیش زیادتی کا اعتراف بھی کیا تھا۔

اہم خبریں, پاکستان

وزیراعظم سے آرمی چیف کی ملاقات، ڈی جی آئی ایس آئی فیض حمید بھی شریک

وزیراعظم عمران خان سے آرمی چیف جنرل قمر جاوید باجوہ کی ملاقات ہوئی ہے۔

ذرائع کے مطابق وزیراعظم سے آرمی چیف کی ملاقات علیحدگی میں ہوئی، بعد میں ڈائریکٹر جنرل انٹر سروسز انٹیلی جنس (ڈی جی آئی ایس آئی) لیفٹیننٹ جنرل فیض حمید بھی ملاقات میں شامل ہوگئے۔

ذرائع کے مطابق ملاقات میں ملک کی داخلی اور امن و امان کی صورتحال کا جائزہ لیا گیا۔

اہم خبریں, پاکستان

آزادکشمیر رجمنٹ کے بہادر سپوت نائیک سیف علی جنجوعہ شہید کا 73 واں یوم شہادت

آج نائیک سیف علی جنجوعہ شہید کا 73 واں یوم شہادت ہے۔ پاک فوج کے بہادرسپوت نے وطن کی حفاظت کرتے ہوئے 26 اکتوبر 1948 کو جام شہادت نوش کیا تھا۔ نائیک سیف علی جنجوعہ نے 18 سال کی عمر میں برٹش انڈین آرمی کی رائل کور میں بطور سپاہی شمولیت اختیار کی اور دوسری جنگ عظیم میں چار سال بیرون ملک محاذ پر بھی تعینات رہے۔ قیام پاکستان کے بعد وہ سردار فتح محمد کریلوی کی حیدری فورس میں شامل ہوگئے جو بعد ازاں آزاد کشمیر رجمنٹ کا حصہ بنی۔ نائیک سیف علی جنجوعہ نے 1948 کی جنگ میں بھارتی فوج کی بریگیڈ کا مقابلہ ایک پلاٹون سے کرتے ہوئے نہ صرف دشمن کو پسپا کیا بلکہ ایک جہاز بھی مارگرایا۔ پاک فوج کے بہاد ر سپوت نے وطن کی حفاظت کرتے ہوئے 26 اکتوبر 1948 کو جام شہادت نوش کیا۔ 14 مارچ 1949 کو حکومت آزاد کشمیر نے شہید نائیک سیف علی جنجوعہ کو ہلال کشمیر عطا کیا جو نشان حیدر کے مساوی اعزاز ہے، حکومت پاکستان نے ان کی لازوال قربانی کی یاد میں 30 اپریل 2013 کو ایک یادگاری ٹکٹ بھی جاری کیا۔

انٹر نیشنل, اہم خبریں

پاک-امریکا تعلقات کیلئے امریکی سینیٹر باب میننڈیز، جو بائیڈن کی عمران خان سے بات چیت کے خواہاں

امریکی سینیٹر باب مینڈیز نے کہا کہ انہوں نے امریکی سیکریٹری اسٹیٹ انٹونی بلنکن سے کہا ہے کہ صدر جو بائیڈن پر زور دیں کہ پاکستان کے ساتھ تعلقات دوبارہ استوار کی کوشش کے سلسلے میں وزیراعظم عمران خان سے بات کریں۔

سرکاری خبررساں ادارے اے پی پی کی رپورٹ کے مطابق امریکی سینیٹ کی کمیٹی برائے خارجہ تعلقات کے چیئرمین نے امیریکن پاکستانی پولیٹیکل ایکشن کمیٹی (اے پی پی اے سی) کے بورڈ رکن ڈاکٹر طارق ابراہیم کی رہائش گاہ پر منعقدہ ایک فنڈ ریزنگ تقریب سے خطاب میں اس قسم کی بات چیت کی اہمیت کو اجاگر کیا۔

امریکی سیکریٹری اسٹیٹ سے کی گئی درخواست کا حوالہ دیتے ہوئے سینیٹر نے کہا کہ ’میرے خیال میں اس طرح کی بات چیت کرنا ہمارے لیے اچھا ہوگا اور آپ جانتے ہیں ہماری جب ایسی بات چیت ہوتی ہے وہ ایماندار ہوتے ہیں اور اس کا مطلب یہ کہ وہ شفاف بھی ہیں‘۔

انہوں نے کہا کہ ایسی صورت میں کہ جب کوئی معاہدہ ہوگا ہم اس پر تعلقات تعمیر کریں گے اور جب کوئی اختلاف ہوگا ہم اس پر بات کریں گے کہ اس اختلاف کو کس طرح دور کرسکیں۔

امریکی سینیٹر کا کہنا تھا کہ مجھے لگتا ہے کہ یہ ایک غیر معمولی لمحہ ہے جس میں ایک ایسا رشتہ ہے جو دوبارہ پہلے جیسا بنایا جاسکتا ہے۔

ان کا مزید کہنا تھا کہ ’اگر ہم اس پر(تعلقات) دوبارہ استوار کرسکتے ہیں تو مجھے امید ہے کہ ہم اسے توسیع دے سکتے ہیں، صرف پاکستان کے فوجی اور سیکیورٹی تناظر میں میں نہیں بلکہ بہت وسیع تناظر میں، اتنی بڑی نوجوان آبادی کے بارے میں بات کی جائے تو یہ اس معاشی حرکیات کو استوار کرنے کا زبردست موقع ہے جو ہم تخلیق کرتے ہیں‘۔

کھیل

ٹی 20 ورلڈکپ، پاکستان آج رات 7 بجے نیوزی لینڈ سے ٹکرائے گا

ٹی 20 ورلڈکپ میں پاکستان کا دوسرا مقابلہ آج نیوزی لینڈ سے ہو گا، دبئی کے میدان میں رات سات بجے دونوں ٹیمیں اِن ایکشن ہوں گی۔ دبئی انٹرنیشنل اسٹیڈیم میں ایک اور بڑا معرکہ، ٹی 20 ورلڈکپ گروپ ٹو کی بڑی ٹیمیں پاکستان اور نیوزی لینڈ مدمقابل ہوں گی، میچ رات سات بجے ہی شروع ہو گا۔ دونوں ٹیموں نے پریکٹس مکمل ، پلان بھی فائنل کر لئے۔ قومی ٹیم کی طرف سے وِننگ کمبی نیشن کے ساتھ میدان میں اترنے کا امکان ہے جس میں کپتان بابر اعظم پھر دم دکھائیں گے، محمد رضوان بنیں ٹیم کی شان بنیں گے۔ شاہین آفریدی کی شاہینوں جیسی اڑان ہو گی، فخر زمان اور حسن علی نے بھی فُل تیاری کر لی۔ حریف کیویز بھی جیت کے لیے پرجوش ہے۔ ہیمسٹرنگ انجری کا شکار کپتان کین ولیمسن نیوزی لینڈ کے لیے بڑا جھٹکا ہے، مارٹن گپٹل، ایش سوڈھی اور ٹِم ساؤتھی پر گزارا کریں گے۔ ٹی 20 فارمیٹ میں پاکستان کا پلہ بھاری ہے، چوبیس میں سے چودہ میچ جیتے، دس میں کیویز کو فتح ملی۔ بیس اوور کے ورلڈکپ مقابلوں میں پانچ بار دونوں ٹیمیں آمنے سامنے آئیں، گرین شرٹس کو تین، بلیک کیپس کو دو کامیابیاں ملیں۔

انٹر نیشنل, اہم خبریں

ترک صدر نے 10 ممالک کے سفیروں کو ملک سے نکالنےکی وارننگ واپس لے لی

استنبول: ترک صدر طیب اردوان نے 10 ممالک کے سفیروں کو ملک سے نکالنےکی وارننگ واپس لےلی۔

طیب اردوان نےکہاکہ 10 ممالک کے سفیروں کو سبق مل گیا اور اب وہ محتاط رہیں گے۔

ترک صدر کا کہنا تھا کہ ہمارا مقصد بحران پیدا کرنا نہیں بلکہ اپنی عزت، فخر اور خودمختاری کا تحفظ کرنا ہے، ان ملکوں کے بیانات سےلگتا ہے کہ وہ ہمارے ملک کےخلاف بہتان تراشی سے پیچھے ہٹ گئے ہیں۔

خبر ایجنسی کے مطابق صدر  نے وارننگ 10 ممالک کے بیانات کے بعد واپس لی ہے۔

امریکا سمیت کئی ممالک نے ایک جیسے بیانات جاری کیے تھے جن میں کہا گیا تھا کہ وہ یو این کنونشن کا احترام کرتے ہیں جس میں سفارتکاروں کو میزبان ملک کے اندرونی معاملات میں مداخلت نہ کرنے کا کہا گیا ہے۔

انٹر نیشنل, اہم خبریں, پاکستان

وزیراعظم عمران خان کا چینی صدر سے ٹیلی فونک رابطہ چینی کمیونسٹ پارٹی کی صد سالہ تقریب پر مبارکباد دی،خطے کی صورتحال اور علاقائی امور پر تبادلہ خیال کیا

اسلام آباد: وزیراعظم عمران خان نے چین کے صدر شی جن پنگ سے ٹیلی فونک رابطہ کرکے انہیں چینی کمیونسٹ پارٹی کی صد سالہ تقریب پر مبارکباد دی۔

وزیراعظم آفس کے مطابق عمران خان اور شی جن پنگ میں علاقائی اوربین الاقوامی صورتحال پرتبادلہ خیال کیا گیا اور پاک چین اسٹریٹجک تعاون پر مبنی شراکت داری کے تمام پہلوؤں کاجائزہ لیا گیا جب کہ وزیراعظم نے غربت کےخاتمےکی جنگ میں بے مثال فتح، اصلاحات اور چین کی شاندار ترقی کوسراہا۔

وزیراعظم عمران خان نے کورونا کے خلاف چین کے اقدامات کی تعریف کی اور ترقی پذیر ممالک کے لیے چین کی انسداد کورونا امداد سمیت موسمیاتی تبدیلیوں سے نمٹنے کے لیے چینی اقدام کو سراہا۔

وزیراعظم آفس کے مطابق دونوں رہنماؤں نے افغانستان کی تازہ صورتحال اور بین الاقوامی صورتحال پر بھی بات چیت کی جب کہ اس موقع پر وزیراعظم کا کہنا تھا کہ افغانستان کوانسانی بحران سے بچانے کے لیے مدد کرنی ہوگی اور افغان عوام کو معاشی مسائل سے نکالنے کے لیے دنیا کردار ادا کرے۔

وزیراعظم اور چینی صدر نے مختلف شعبوں میں تعاون سمیت پاک چین اقتصادی اور  تجارتی تعلقات کو مزید مضبوط بنانے پر اتفاق کیا جب کہ وزیراعظم نے سی پیک کے تحت بننے والے منصوبے کے معیار اور بروقت تکمیل کو سراہا۔

وزیراعظم عمران خان نے سی پیک میں چینی سرمایہ کاروں کی دلچسپی کاخیر مقدم کیا۔

وزیراعظم آفس کے مطابق وزیراعظم عمران خان نے چینی صدر کو جلد دورہ پاکستان کی بھی دعوت دی ہے۔

انٹر نیشنل, اہم خبریں, پاکستان

پاکستان موسمیاتی تبدیلی کے حوالے سے چھٹا غیر محفوظ ملک: اقوام متحدہ رپورٹ

اقوام متحدہ کی رپورٹ کے مطابق پاکستان موسمیاتی تبدیلی کے حوالے سے چھٹا غیر محفوظ ملک ہے۔ پانی کی قلت، کم زرعی پیداوار، سیلاب، جنگلات کا رقبہ کم ہونا، مون سون نظام میں تغیر، گلیشئرز کا تیزی سے پگھلنا، غذائی قلت اور دیگر مسائل موسمیاتی تبدیلی کے فوری اثرات ملک میں مختلف حوالے سے دیکھے جاسکتے ہیں۔ رپورٹ میں کہا گیا ہے کہ بڑھتے درجہ خرارت کا ایک بڑا اثر برفانی جھیلوں کا بننا ہے جن کے پھٹنے سے انفراسٹرکچر کو نقصان پنچتا ہے اور انسانی زندگی متاثر ہوتی ہے۔ اقوام متحدہ کی رپورٹ کے علاوہ ایشیاءترقیاتی بینک اور عالمی بینک کی طرف سے ’کلائمیٹ رسک کنٹری پروفائل‘ کے نام سے جاری رپورٹ میں کہا گیا ہے کہ پاکستان کو موسمیاتی تبدیلی کے باعث سالانہ 3 ارب 80 کروڑ ڈالر کے معاشی نقصانات کا سامنا کرنا پڑ رہا ہے۔ اس رپورٹ میں موسمیاتی تبدیلی کے اثرات سے متعلق بعض دیگر اہم انکشافات بھی کیے گئے ہیں۔

اہم خبریں, پاکستان

عمران خان سے جان کیری کی ملاقات‘ تعلقات بہتر کرنے پر اتفاق

وزیراعظم عمران خان نےکہا ہےکہ دنیا کے 10 فیصد ملک 80 فیصد ماحولیاتی تبدیلیوں کے ذمہ دار  ہیں۔

سعودی دار الحکومت ریاض میں مڈل ایسٹ گرین انیشیٹو کانفرنس  سے خطاب کرتے ہوئے  وزیراعظم  نےکہا کہ  حکومت پاکستان ماحولیاتی تبدیلیوں سے نمٹنے کیلئے اقدامات کر رہی ہے ، 2030  تک پاکستان 60 فیصد قابل تجدید توانائی ذرائع پر منتقل کر دیا جائے گا ۔

وزیراعظم عمران خان کا کہنا تھا کہ 10بلین ٹری سونامی منصوبے کا مقصد قدرتی طریقے سے ماحولیاتی چیلنجوں پر قابو پانا ہے، 2023 تک ایک ارب مینگروز کے درخت لگائے جائیں گے۔

ان کا کہنا تھا کہ ماحول کے تحفظ کے لیے ہزاروں افرادکو روزگار کے مواقع فراہم کیےگئے، پاکستان دنیا کا واحد ملک ہے جو ماحولیاتی تحفظ کے لیے44 فیصد سرمایہ کاری کر رہا ہے۔

 انہوں نے مزید کہا کہ عالمی حدت میں دن بدن اضافہ ہورہاہے،موسمیاتی تبدیلیوں کے باعث دنیا بھر میں گلیشیئرز  تیزی سے پگھل رہے ہیں،دنیا کو ماحولیاتی مسائل سے نمٹنے کے لیے سنجیدگی کا مظاہرہ کرناہوگا۔