لاہور: (ویب ڈیسک) مقبوضہ جموں و کشمیر میں قابض فوج کی بربریت جاری ہے، جنوری کے مہینے میں قابض فوج نے 22 کشمیریوں کو شہید کر دیا۔
کشمیر میڈیا سروس کی رپورٹ کے مطابق کالے قانون کے تحت سال کے پہلے ماہ میں 45 سے زائد افراد کو حراست میں لیا گیا اور پُرامن مظاہروں پر فائرنگ سے 17 افراد زخمی ہوئے۔
کشمیر میڈیا سروس کے ریسرچ سیکشن کی طرف سے جاری کردہ اعداد و شمار کے مطابق قابض فوجیوں نے ان میں سے 4نوجوانوں کو جعلی مقابلوں میں شہید کیا۔
رپورٹ میں مزید بتایا گیا کہ قابض فوج نے نام نہاد سرچ آپریشن کی آڑ میں 7 گھروں کو بھی تباہ کیا۔ جبکہ ایک خاتون کو بھی اپنی درندگی کا شکار بنایا گیا۔
یاد رہے پاکستان میں 5 فروری 2022 کو یومِ یکجہتیِ کشمیر منایا جائے گا تو دوسری طرف مقبوضہ کشمیر میں اگست 2019 سے جاری غیر انسانی لاک ڈاؤن کو 915 دن ہو چکے ہوں گے۔

سعودی عرب: (ویب ڈیسک) مسجد نبوی میں دو سال بعد رمضان المبارک میں اجتماعی افطاری کی جا سکے گی۔
سعودی عرب کی حکومت کا کہنا ہے کہ ماہ رمضان کے دوران مسجد نبوی میں اجتماعی افطاریوں کے لیے کورونا ویکسین اور دیگر ایس او پیز کی پابندی ضروری ہو گی۔
مسجد نبوی میں صرف ان افراد کو اجتماعی افطاریوں میں شرکت کی اجازت ہو گی جنہوں نے کورونا ویکسینیشن مکمل کروا رکھی ہے۔
سعودی عرب کی حکومت نے اس سال رمضان المبارک میں اجتماعی افطاری بحال کرنے کا فیصلہ کیا ہے۔ کورونا وبا کی وجہ سے گزشتہ دو سال سے رمضان المبارک میں اجتماعی افطاریوں پر پابندی تھی۔
مسجد نبوی کے امور کی نگرانی کرنے والے ادارے کی طرف سے جاری ایس او پیز میں کہا گیا ہے کہ اجتماعی افطاری میں شرکت کے لیے کچھ ایس او پیز پر عمل درآمد ضروری ہے۔
اگرسماجی فاصلے کی پابندی برقرار رہی تو ایک دسترخوان پرزیادہ سے زیادہ 5 افراد کوبیٹھ کرافطاری کرنے کی اجازت ہوگی۔ ایک ہی خاندان کے زیادہ افراد بھی ایک ساتھ بیٹھ کر افطاری کر سکتے ہیں۔
کورونا کیسز کم ہونے پر سماجی فاصلے کی پابندی ختم کر دی گئی تو ایک دسترخوان پر12 افراد افطاری کرسکیں گے۔
اجتماعی افطاری کرانے والی کمپنیوں کو پرمٹ کے لیے درخواست دینا ہو گی۔ افطاری کرانے میں شریک تمام افراد کو کورونا نیگیٹو کا سرٹیفکیٹ اور کورونا ویکسین کا سرٹیفکیٹ دکھانا لازم ہو گا۔

بنگلہ دیش: (ویب ڈیسک) دنیا کی نئی خوبصورت عمارت کا اعزاز بنگلہ دیش کے دور دراز کے گاؤں میں موجود ہسپتال کو دیا گیا ہے۔
بنگلہ دیش کے جنوب مغربی ضلع ساتخیرا کے گاؤں شیام نگر میں موجود فرینڈ شپ اسپتال کو یہ اعزاز رائل انسٹیٹوٹ آف برٹش آرکیٹیکٹ (آر آئی بی اے) کی جانب سے دیا گیا ہے۔
یہ ایسا علاقہ ہیں جہاں سمندری طوفان کا خطرہ ہمیشہ موجود رہتا ہے، اس لیے یہاں اسپتال ہونا بھی ضروری ہے۔
طوفان سے متاثرہ اس علاقے میں 80 بستروں پر مشتمل اسپتال مقامی طور پر تیار کی گئی اینٹوں سے تعمیر کیا گیا ہے۔اس اسپتال میں ایک نہر موجود ہے، جو اس کی خوبصورتی میں اضافہ کرتی ہے۔
اور یہی نہر اسپتال کے مخلتف حصوں کو الگ کرنے میں بھی مدد دیتی ہے۔
رپورٹ کے مطابق نہر اسپتال کو ٹھنڈا رکھنے میں بھی مدد دیتی ہے، جس سے ایئر کنڈیشننگ کے استعمال کی بہت کم ضرورت پڑتی ہے اور بجلی کی بچت بھی ہوتی ہے۔
اسپتال میں متعدد راہداریاں، باغات، پولز، درخت، سبزہ موجود ہیں، جو سورج کی روشنی اور ہوا کے تمام جگہوں پر پہنچاتے ہیں۔ آرکیٹیکٹس کا کہنا ہے کہ اس منصوبے کو ڈیزائن کرنے کے پیچھے آب و ہوا کی تبدیلی کے اثرات کا ایک بڑا خیال تھا۔
عوام کا کہنا ہے کہ ہم نے ایسا اسپتال نہیں دیکھا، جو فطرت کے اتنا قریب ہے، یہاں کچھ بھی مصنوعی تیار نہیں کیا گیا یہاں تک کہ اینٹیں بھی قدرتی ہیں۔

ممبئی: (ویب ڈیسک) بھارت میں انتہا پسند ہندووں کی ایک اور سازش، ہندو مذہبی رہنماؤں نے عام ہندوؤں سے مطالبہ کیا ہے کہ وہ بھارت کو ‘ہندو راشٹر‘ یعنی ہندو ریاست لکھنا اور کہنا شروع کر دیں، جس کے بعد حکومت بھی یہ بات تسلیم کرنے پر مجبور ہو جائے گی۔
ان مذہبی رہنماوں نے یہ بھی مطالبہ کیا ہے کہ ہندوؤں کا ‘احترام‘ نہ کرنے والے مسلمانوں کو پاکستان بھیج دیا جائے۔
دسمبر کے بعد ہندوں کی مذہبی پارلیمنٹ کا دوسرا اجلاس منعقد ہوا، جس میں پہلے کے مقابلے کہیں زیادہ اشتعال انگیز تقریریں کی گئیں۔اجلاس میں ہندوؤں کے مذہبی لحاظ سے انتہائی محترم سمجھے جانے والے متعدد لیڈروں سمیت تقریباً 400 سنت شریک ہوئے۔
اس اجلاس میں قرارداد پیش کی گئی، جس کے تحت تبدیلی مذہب کو ملک سے غداری اور ایسا کرنے میں ملوث پائے جانے والوں کے لیے سزائے موت کا مطالبہ بھی کیا گیا۔
یاد رہے پربودھانند نے اس اجلاس میں انتہائی اشتعال انگیز تقریر کرتے ہوئے بھارتی مسلمانوں کے لیے روہنگیا باشندوں کے قتل عام جیسی کارروائی کا مشورہ دیا تھا۔
انہوں نے بھارتی پولیس، فوج اور سیاست دانوں سے مسلمانوں کی نسل کشی کے لیے متحد ہوجانے کی اپیل بھی کی تھی۔