اسلام آباد: (ویب ڈیسک) رکن قومی اسمبلی جنید انوار چوہدری کو وزیر اعظم کا معاون خصوصی مقرر کر دیا گیا جس کا نوٹیفکیشن بھی جاری کر دیا گیا ہے۔
تفصیلات کے مطابق معاون خصوصی جنید انوار کا عہدہ وزیر مملکت کے برابرہوگا ۔ اس حوالے سے جنید انوار کا کہنا تھا کہ اعتماد کرنے پر وزیر اعظم میاں شہباز شریف کا شکر گزار ہوں ، اپنی ذمہ داریاں پوری محنت اور اخلاص سے نبھائوں گا، حکومت ملکی ترقی اور عوام کی خوشحالی کے لیے دن رات کوشاں ہے ۔

کوئٹہ: (ویب ڈیسک) بلوچستان کے علاقے قلعہ سیف اللہ کے قریب مسافر وین کو خوفناک حادثہ پیش آیا جس کے نتیجے میں 8 افراد جاں بحق جبکہ متعدد زخمی ہو گئے۔
بتایا گیا ہے کہ حادثہ قلعہ سیف اللہ کے علاقہ اخترزئی کے مقام پر کوئٹہ ژوب روڈ پر پیش آیا جہاں ڈرائیور کی جانب سے کنٹرول کھو دینے کے سبب مسافر وین کھائی میں جا گری۔ حادثے کے فوری بعد امدادی کارروائی شروع کر دی گئی اور شدید زخمی افراد کو ہسپتال منتقل کر دیا گیا جبکہ 8 لاشوں کو بھی ہسپتال بھجوایا گیا ہے۔
حکام کے مطابق حادثے میں کئی مسافر شدید زخمی ہوئے ہیں جس کے باعث ہلاکتوں میں اضافے کا خدشہ ہے۔ انتظامیہ کی جانب سے قلعہ سیف اللہ کے ہسپتالوں میں ایمرجنسی نافذ کر دی گئی ہے۔

لاہور : (ویب ڈیسک) وزیراعظم شہباز شریف کی زیر صدارت قومی اقتصادی کونسل کا اجلاس آج ہوگا، کونسل رواں سال کی اقتصادی کارکردگی کی منظوری دے گی ، اجلاس میں 800 ارب روپے کے پی ایس ڈی پی کی بھی منظوری دی جائے گی۔
کونسل مجوزہ میکرو اکنامک فریم ورک کی منظوری بھی دے گی، اگلے مالی سال کے لیے شرح نمو کا ہدف 5 فیصد رکھا گیا ہے۔ زراعت میں شرح نمو 3.9 اور صنعت میں 5.9 فیصد رکھنے کا ہدف ہے۔ آئندہ مالی سال کے لیے ترقیاتی بجٹ دو ہزار ایک سو چوراسی ارب روپے رکھنے کی تجویز ہے۔ گزشتہ سال کے ترقیاتی بجٹ میں صرف 50 ارب روپے کا اضافہ کیا گیا ہے۔
ذرائع کے مطابق صوبوں کیلئے میں 1384 ارب کے ترقیاتی بجٹ تجویز کیے گئے ہیں، چاروں صوبے بھی 276 ارب روپے بیرونی امداد سے حاصل کریں گے، صوبوں کے ترقیاتی پروگرام میں 97 ارب 84 کروڑ اضافے کی تجویز ہے، وفاق کا ترقیاتی بجٹ 800 ارب مختص جس میں 70 ارب کی بیرونی امداد شامل ہے، اراکین قومی اسمبلی کی پبلک اسکیم کے لیے 91 ارب روپے تجویز، اراکین قومی اسمبلی کو پی ایس ڈی پی کے تحت فنڈز دیے جائیں گے۔
وفاقی ترقیاتی بجٹ 800 ارب روپے مختص کرنے کی تجویز ہے، انفراسٹرکچر کی تعمیر پر 433 ارب روپے خرچ کرنے کا پلان، سماجی منصوبوں پر 144 ارب خرچ کرنے کا تخمینہ لگایا گیا ہے، انرجی 84 ارب اور ٹرانسپورٹ مواصلات کیلئے 227 ارب روپے شامل ہیں، پانی کے منصوبوں کیلئے 83 ارب، پلاننگ، ہاوسنگ کیلئے 39 ارب مختص ہیں، زراعت کی ترقی کیلئے 13 ارب اور انڈسٹریز کیلئے صرف 5 ارب کی تجویز، نئے بجٹ میں ایرا کیلئے کوئی فنڈز نہیں رکھے جارہے۔
ذرائع کے مطابق مالی سال ترقیاتی منصوبوں کا نظرثانی شدہ بجٹ 550 ارب ہے، رواں سال وفاقی ترقیاتی پروگرام کیلئے 900 ارب رکھے گئے تھے، طلب کے دباو کے باعث ترقی کی رفتار پر اثرات کے خدشات سامنے آئے ہیں، ادائیگیوں کے توازن نے ترقی کی رفتار کو محدود کیا ہے، اجناس کی قیمتوں میں عالمی اضافے سے درآمدات بڑھی ہیں، عالمی سطح پر مہنگائی سے معیشت کو بڑا چیلنج درپیش ہوگا، قیمتوں کے دباؤ سے مہنگائی توقع سے زیادہ دیر تک بلند رہے گی۔

اسلام آباد: (ویب ڈیسک) سابق وزیر اعظم اور سینیٹر یوسف رضا گیلانی نے چیئرمین سینٹ کا الیکشن سپریم کورٹ میں چیلنج کر دیا۔
یوسف رضا گیلانی نے اسلام آباد ہائیکورٹ کے فیصلے کے خلاف سپریم کورٹ میں اپیل دائر کر دی، اپیل میں اسلام آباد ہائیکورٹ کا فیصلہ کالعدم قرار دینے کی استدعا کی گئی ہے۔
درخواست میں کہا گیا ہے کہ اسلام آباد ہائیکورٹ کا سنگل اور ڈویژن بینچ کا فیصلہ قانون و حقائق کے منافی ہے، ہائیکورٹ کا فیصلہ سپریم کورٹ کے ڈپٹی سپیکر رولنگ فیصلہ میں طے پیرامیٹرز کے برعکس ہے۔
درخواست گزار کے مطابق یوسف رضا گیلانی نے چیئرمین سینیٹ الیکشن میں سب سے زیادہ ووٹ لیے جبکہ سابق کے 7 ووٹوں کو غلط مسترد کیا گیا، پریزائڈنگ آفیسر نے بدنیتی سے سات ووٹر مسترد کیے۔
یوسف رضا گیلانی کی جانب درخواست میں استدعا کی گئی ہے کہ اسلام آباد ہائیکورٹ کا فیصلہ کالعدم قرار دیا جائے۔

لاہور: (ویب ڈیسک) حکومت کے وعدے وفا نہ ہوسکے، اسلام آباد، کراچی، لاہور، پشاور سمیت ملک بھر میں لوڈشیڈنگ کا مسئلہ جوں کا توں، بجلی کا شارٹ فال چھ ہزار میگاواٹ سے زیادہ ہو گیا۔
کراچی میں لوڈشیڈنگ کا دورانیہ سولہ گھنٹے تک پہنچ گیا، اسلام آباد میں 4سے 6 گھنٹے تک بجلی بند رہی، جبکہ لاہور میں سات سے آٹھ گھنٹے، پشاور اور کوئٹہ میں دس دس گھنٹے کی لوڈشیڈنگ جاری ہے۔
کراچی میں شدید گرمی کے ساتھ سولہ گھنٹے کی لوڈشیڈنگ سے شہری بلبلا اٹھے، سرجانی ٹاؤن ، نیو کراچی، لیاری، اورنگی ٹاؤن، کورنگی، بلدیہ اور لانڈھی کے علاقے سب سے زیادہ متاثر ہوئے ہیں۔
کے الیکٹرک نے واجبات کی عدم ادائیگی کو لوڈشیڈنگ کی وجہ بتایا ہے۔
لیسکو کی طلب 5700 میگاواٹ تک جاپہنچی ہے، جبکہ شارٹ فال 800 میگاواٹ ہے، نیشنل گرڈ اسٹیشن سے لیسکو کو4ہزار 900 میگاواٹ بجلی کی فراہمی جاری ہے، ترجمان کا کہنا ہے کہ لیسکو نے ساڑھے 3گھنٹے بجلی لوڈشیڈنگ کا شیڈول جاری کیا ہے۔
ملک میں بجلی کا شارٹ فال 5 ہزار 307 میگاواٹ ہے ،ذرائع پاور ڈویژن کے مطابق بجلی کی مجموعی پیداوار 21 ہزار 293 میگاواٹ ہے، ملک میں بجلی کی طلب 26 ہزار 600میگاواٹ ہے، پانی سے 4 ہزار 688 میگاواٹ بجلی پیدا کی جارہی ہے، سرکاری تھرمل پلانٹس ایک ہزار 314میگاواٹ بجلی پیدا کررہے ہیں۔
نجی شعبے کے بجلی گھروں کی پیداوار 12 ہزار 182 میگاواٹ ہے ، ونڈ پاور پلانٹس ایک ہزار 567 میگاواٹ اور سولرپلانٹس سے پیداوار 118 ہے ، بگاس سے چلنے والے پلانٹس 187 میگاواٹ بجلی پیدا کررہے ہیں، جوہری ایندھن ایک ہزار 237میگاواٹ بجلی پیدا کی جارہی ہے، ملک کے مختلف علاقوں میں 14 گھنٹے تک کی لوڈشیڈنگ جاری، اسلام آباد ریجن میں بھی 4 گھنٹے تک لوڈ شیڈنگ کی جا رہی ہے، زیادہ نقصانات والے علاقوں میں لوڈشیڈنگ کا دورانیہ زیادہ ہے۔

اسلام آباد: (ویب ڈیسک) سندھ اسمبلی میں اپوزیشن لیڈر حلیم عادل شیخ کی حفاظتی ضمانت کی درخواست مسترد، اسلام آباد ہائی کورٹ نے درخواست گزار وکیل کے دلائل کے بعد درخواست خارج کی۔
چیف جسٹس اطہر من اللہ نے کہا کہ یہ عدالت پہلے ہی ایک مقدمہ میں حفاظتی ضمانت دے چکی ہے، حلیم عادل شیخ کو تین ہفتے کی حفاظتی ضمانت دی تھی ، حفاظتی ضمانت کے دوران ان کو متعلقہ عدالت میں پیش ہونا تھا ، یہ عدالت سندھ ہائیکورٹ کے دائرہ اختیار میں نہیں جا سکتی، درخواست گذار کو سندھ ہائی کورٹ سے رجوع کرنا چاہئیے۔
وکیل حلیم عادل شیخ نے کہا کہ سندھ حکومت جھوٹے نامعلوم مقدمات میں گرفتار کر کے آج سندھ اسمبلی بجٹ اجلاس میں شرکت سے روکنا چاہتی ہے۔