اسلام آباد: (ویب ڈیسک) اسلام آباد ہائی کورٹ کے چیف جسٹس اطہر من اللہ نے چیئرمین نیب کی تعیناتی کے لیے چیف جسٹس آف پاکستان سے مشاورت کی درخواست ناقابل سماعت قرار دے کر خارج کردی۔
چیف جسٹس اسلام آباد ہائیکورٹ جسٹس اطہر من اللہ نے شہری محمد فہد کی درخواست پر سماعت کی، درخواست گزار نے مؤقف اختیار کیا کہ چیف جسٹس پاکستان کی مشارت کے بغیر نئے چیئرمین نیب کی تعیناتی روکی جائے، عدالت عظمیٰ نے 2001 میں فیصلہ دیا جس پر تاحال عمل نہیں کیا گیا۔
درخواست میں مؤقف اختیار کیا گیا کہ سپریم کورٹ نے نیب آرڈی نینس کے سیکشن 6 میں ترمیم کا حکم دیا تھا جو چیئرمین نیب کی تعیناتی سے متعلق ہے، 20 برس گزرنے کے باوجود نیب آرڈی نینس میں چیئرمین کی تعیناتی سے متعلق شق میں ترمیم نہیں کی جا سکی، لہذا وزارت قانون کو چیئرمین نیب کی تعیناتی کے طریقہ کار میں ترمیم کی ہدایت کی جائے۔
درخواست گزار نے مزید کہا کہ قومی اسمبلی میں قائد ایوان اور قائد حزب اختلاف کی مشارت سے چیئرمین نیب کا تقرر ہوتا ہے جب کہ سپریم کورٹ نے سیکشن 6 میں ترمیم کر کے چیف جسٹس کی مشاورت کا کہا جبکہ سپریم کورٹ کے فیصلے پر عمل نہیں کیا گیا۔
دوران سماعت چیف جسٹس اسلام آباد ہائی کورٹ اطہر من اللہ نے ریمارکس دئیے کہ عدالت عظمیٰ کے جس فیصلے کا آپ نے حوالہ دیا اس کے بعد کئی فیصلے آ چکے ہیں، اس فیصلے میں سپریم کورٹ کی صرف آبزرویشن تھی۔ یہ اختیار پارلیمنٹ کا ہے اور عدالت پارلیمنٹ کو ہدایات نہیں دے سکتی۔
چیف جسٹس اسلام آباد ہائی کورٹ اطہر من اللہ نے دلائل کے بعد درخواست ناقابل سماعت قرار دے کر خارج کردی۔

لاہور: (ویب ڈیسک) لاہور ہائیکورٹ نے وزیر اعلیٰ پنجاب حمزہ شہباز کے انتخاب کو کالعدم قرار دینے کیلئے درخواست پر حمزہ شہباز کو نوٹس جاری کر دیئے۔ عدالت نے اسی درخواست پر اٹارنی جنرل پاکستان اور ایڈووکیٹ جنرل پنجاب کو بھی معاونت کیلئے طلب کرلیا۔
لاہور ہائیکورٹ کے جسٹس شجاعت علی خان نے تحریک انصاف کی رکن اسمبلی زنیب عمیر سمیت تین ارکان اسمبلی کی درخواست پر ابتدائی سماعت اپنے چیمبر میں کی۔ درخواست گزار رکن اسمبلی کے وکیل اظہر صدیق نے بتایا کہ سپریم کورٹ کے فیصلے کے بعد منحرف اراکین کی پوزیشن واضح ہو چکی ہے اور منحرف اراکین کے ووٹ منفی ہونے سے حمزہ شہباز اکثریت نہیں رکھتے.
پنجاب حکومت کے وکیل اسسٹنٹ ایڈووکیٹ جنرل طیب جان نے درخواست کے قابل سماعت ہونے پر اعتراض اٹھایا اور نشاندہی کی کہ درخواست گزار تحریک انصاف کی اراکین ہیں. انکے پاس اسمبلی سے رجوع کرنے کا اختیار ہے.سرکاری وکیل طیب جان نے موقف اختیار کیا کہ درخواست گزار حمزہ شہباز کے خلاف تحریک عدم اعتماد لا سکتے ہیں، اس لیے درخواست قابل سماعت نہیں ہے۔
طیب جان نے عدالت سے استدعا کی کہ درخواست کو مسترد کیا جائے. درخواست پر مزید کارروائی 20 جون کو ہوگی.۔

لاہور: (ویب ڈیسک) ملک میں بجلی کا بحران جاری ہے، شارٹ فال 6 ہزار 99 میگا واٹ ہو گیا، پیداوار 19 ہزار901 اور طلب 26 ہزار میگا واٹ ہے۔ شدید گرمی میں بجلی کے بار بار تعطل کے سبب عوام کا جینا محال ہو گیا۔
تفصیلات کے مطابق ملک کے مختلف علاقوں میں 16 گھنٹے تک لوڈشیڈنگ کے باعث عوام کا جینا محال ہو گیا، لائن لاسز والے علاقوں میں دورانیہ زیادہ ہے۔ ذرائع کا کہنا ہے کہ پانی سے 4 ہزار 193میگاواٹ بجلی پیدا کی جارہی ہے ، سرکاری تھرمل پلانٹس 1 ہزار 261 میگاواٹ بجلی پیدا کررہے ہیں، نجی شعبے کے بجلی گھروں کی مجموعی پیداوار 11ہزار 565 میگاواٹ ہے۔ونڈ پاور پلانٹس 1ہزار347 میگاواٹ اور سولرپلانٹس سے پیداوار118 ہے ، بگاس سے چلنے والے پلانٹس 181 میگاواٹ بجلی پیدا کررہے ہیں جبکہ جوہری ایندھن 1ہزار 237 میگاواٹ بجلی پیدا کی جارہی ہے۔
اسلام آباد ریجن میں 6گھنٹے تک لوڈ شیڈنگ کی جا رہی ہے، زیادہ نقصانات والے علاقوں میں لوڈشیڈنگ کا دورانیہ زیادہ ہے۔بجلی کے تعطل کے سبب شدید گرم موسم میں عوام کا جینا محال ہے، کاروبار میں بھی کمی آنے لگی۔ شہریوں نے شکوہ کیا ہے کہ حکومت کے تمام تر دعووں کےباوجود صورتحال میں کوئی قابل ذکر تبدیلی نہیں آ رہی، حکومت باتوں کی بجائے سنجیدہ اقدامات اٹھائے۔

اسلام آباد: (ویب ڈیسک) رہنما مسلم لیگ ن شاہد خاقان عباسی نے کہا ہے کہ جب تک نیب کا ادارہ رہے گا حکومتی معاملات نہیں چل سکتے، ٹھنڈے دماغ سے سوچنا چاہئے کہ نیب کا ادارہ ہے کیا اور اس نے کیا کیا ہے۔
اسلام آباد میں میڈیا سے گفتگو کرتے ہوئے پاکستان مسلم لیگ ن کے سینئر رہنما شاہد خاقان عباسی نے کہا ہے کہ چیئرمین نیب کی آج بھی کوشش ہے وہ دوبارہ عہدے پر آجائیں، چیئرمین نیب روزانہ کی اجرت پر کام کرتے رہے۔
انہوں نے مزید کہا کہ نیب نے ایک پیسے کی کرپشن نہیں روکی، اگر کرپشن پکڑنی تو کوئی کمی نہیں، بدعنوانی روکنے کیلئے ایف آئی اے سمیت دیگر ادارے موجود ہیں، سیاست پر اثرانداز ہونا ہے تونیب کی ضرورت ہے، نیب ملک کا سب سے کرپٹ ادارہ ہے، چیئرمین نیب کو جوابدہ ہونا پڑے گا، 22 سال میں کتنے سیاستدانوں کو جیل میں ڈالا اور جرم ثابت ہوا؟
شاہد خاقان عباسی کا کہنا تھا کہ اکتوبر 2023 میں انشااللہ الیکشن ہوجائیں گے، ریٹائرڈ افسران اگر الیکشن چاہتے ہیں تو پھر الیکشن ہو جائیں گے، ملکی معیشت تباہ ہو رہی تھی تو ریٹائرڈ افسران 8 مارچ سےقبل کہاں تھے، آج سے ساڑھے 3 گھنٹے سے کم لوڈشیڈنگ ہوا کرے گی۔

لاہور: (ویب ڈیسک) موسم کا حال بتانے والوں کے مطابق آج پنجاب اور سندھ میں موسم شدید گرم رہے گا، بالائی خیبرپختونخوا اور گلگت بلتستان میں بارش کا امکان ہے۔
محکمہ موسمیات کے مطابق آج پنجاب میں موسم شدید گرم رہے گا، لاہور میں درجہ حرارت 45، بہاولپور اور ملتان میں 46، فیصل آباد اور سرگودھا میں 47 تک جانے کی پیشگوئی ہے۔ سندھ میں دادو، موہنجو داڑو، نوابشاہ میں پارہ 48 کو چھونےکی توقع ہے، خیبرپختونخوا میں چترال، دیر، سوات اور دیگر علاقوں میں بارش کا امکان ہے۔
کوئٹہ سمیت بلوچستان کے اکثرعلاقوں میں بھی آج موسم شدید گرم اور خشک رہے گا، محکمہ موسمیات کے مطابق کوئٹہ میں زیادہ سے زیارہ درجہ حرارت 32 سے 34، قلات میں 29 سے 31، گوادر اور جیونی میں 35 سے 37، نوکنڈی میں 38 سے 40، تربت میں 43 سے 45، سبی میں 47 سے 49 سینٹی گریڈ تک رہنے کا امکان ہے۔ صوبہ کے بیشتر علاقوں میں تیز ہوائیں چلنے کا بھی امکان ظاہر کیا گیا ہے۔