اسلام آباد: (ویب ڈیسک) اسلام آباد میں کسان اتحاد کا دھرنا تیسرے روز میں داخل ہوگیا ہے، مطالبات کے حق میں کسانوں کی بڑی تعداد خیابان چوک پر موجود ہے۔ کسان رہنمائوں کے وفد نے وزیر داخلہ رانا ثنااللہ سے مذاکرات کیے۔
رہنما کسان اتحاد کا مطالبہ ہے کہ وفاقی حکومت ہمیں فی یونٹ کی قیمت مختص کرکے دے تب ہم احتجاج ختم کریں گے، ہمارا احتجاج پرامن ہے، ہمیں کوئی جلدی نہیں، اپنا حق لے کر یہاں سے اٹھیں گے۔
مہنگی بجلی۔مہنگے کھاد اور بھاری ٹیکسوں سے پریشان کسانوں کا دھرنا اسلام آباد میں جاری ہے۔مظاہرین نے مطالبات کی منظوری کے بغیر دھرنا ختم نہ کرنے کا اعلان کردیا۔ کسان اتحاد کے ایک وفد نے وزیر داخلہ رانا ثناءاللہ کے ساتھ مذاکرات کیے۔ وفاقی حکومت کی جانب سے کسانوں کا ابتدائی طور پر ٹیوب ویل کے مطالبہ منظورکیا گیا ہے جبکہ دیگر مطالبات بھی جلد منظور کیے جانے کی یقین دہانی کرائی گئی۔
یہ بھی پڑھیں: اسلام آباد: حکومت اور کسان مظاہرین کے مذاکرات ناکام، ڈی چوک کیطرف پیش قدمی کی تیاری
تاہم کسان رہنمائوں کا کہنا ہے کہ وفاقی حکومت ہمیں فی یونٹ کی قیمت مختص کرکے دے تب ہم احتجاج ختم کریں گے۔ دھرنے میں موجود کسانوں کا کہنا ہے کہ ہمارا احتجاج پرامن ہے۔ ہمیں کوئی جلدی نہیں۔ اپنا حق لے کر یہاں سے اٹھیں گے۔ دھرنے کے شرکاء کھلے آسمان تلے موجود ہیں۔
ریڈ زون میں جانے سے روکنے اور سیکورٹی کیلئے پولیس کی نفری بھی تعینات ہے۔

کراچی : (ویب ڈیسک) رہنما مسلم لیگ ن اور سابق وزیراعظم شاہد خاقان عباسی کا کہنا ہے کہ نیب سے پوچھا جائے کہ جھوٹے کیس کس کے کہنے پر بنائے گئے ؟ سابق چیئرمین نیب نے لوگوں کی زندگیاں خراب کی ہیں وہ جواب دہ ہیں۔
کراچی میں پریس کانفرنس کرتے ہوئے شاہد خاقان نے کہا کہ انصاف کے نظام کو درست کرنے کی ضرورت ہے، سابق چیئرمین نیب عوام کو حقائق بتائیں، احتساب کرنے والوں کو خود سب کے سامنے حساب دینا ہوتا ہے، یہ معاملات ایسے نہیں چلتے ، ایک دن ان کو حساب دینا ہوگا، جواب حکومتیں نہیں لیتیں، عدالتیں لیتی ہیں، عدالتوں میں لوگ 6،6 سال سے کیسز چلاتے ہیں، ہم کہتے ہیں کہ انصاف کے نظام کو چلنا چاہیے، 4 سال کی غفلت 4 ماہ میں ٹھیک نہیں ہوتی۔
ن لیگی رہنما نے مزید کہا کہ تیل کی قیمتیں حکومت نہیں اوگرا طے کرتی ہے، اوگرا عالمی منڈی کی قیمتیں اور دیگر عنصر کو شامل کرکے قیمتوں کا تعین کرتی ہے، بجلی کے معاملات نیپرا کا ادارہ دیکھتا ہے حکومت نہیں دیکھتی، نیپرا اور اوگرا آزاد ادارے ہیں، پہلے 30 دن بعد تیل کی قیمت کا تعین کیا جاتا تھا، اب ہر 15 روز بعد تیل کی قیمت کا تعین کیا جاتا ہے، تیل میں کوئی سیلز ٹیکس شامل نہیں ہے، حکومت جتنا ریلیف عوام کو دے سکتی ہےدے رہی ہے، امید ہے آج پیٹرولیم مصنوعات کی قیمتیں کم ہوجائیں گی۔

کراچی : (ویب ڈیسک) کراچی کے ایماندار پولیس اہلکارنے شہری کا گرا ہوا پرس اور پیسے اسے ڈھونڈ کر واپس کر کے نئی اعلی مثال قائم کر دی۔
ڈپٹی انسپکٹر جنرل ٹریفک پولیس کراچی احمد نواز نے جمعرات کے روز اپنے دفتر میں سلطان آباد ٹریفک سیکشن ضلع ویسٹ کے کانسٹیبل نیاز علی کو اپنے پیشہ وارانہ فرائض کی سر انجام دہی کے دوران ایمانداری کی اعلی مثال قائم کرنے کے اعتراف میں تعریفی سند اور انعام دیا۔
یاد رہے کہ گزشتہ روز ٹریفک پولیس کانسٹیبل نیازعلی این ایل سی چوک سلطان آباد ٹریفک سیکشن ضلع ویسٹ میں ڈیوٹی پر تھا جب اسے ایک شہری کا پرس ملا جس میں شناختی کارڈ بینک کارڈ اور تیرہ ہزار روپے نقد موجود تھے۔
ٹریفک پولیس کانسٹیبل نیازعلی نے پرس میں موجود شناختی دستاویزات کی مدد سے حقیقی مالک سے رابطہ کیا اور تصدیق کے بعد اسے پرس واپس لوٹا دیا۔

لاہور: (ویب ڈیسک) امریکہ نے چیئرمین پی ٹی آئی عمران خان کے الزامات کو ایک بار پھر مسترد کردیا،امریکی سفیر ڈونلڈ بلوم کا کہنا ہے کہ سازشی نظریات بدقسمتی ہیں ان میں کوئی صداقت نہیں۔
امریکی سفیر ڈونلڈ بلوم نے کہا کہ آزاد ،خوشحال اور مضبوط پاکستان دیکھنا چاہتے ہیں، معمول کی سفارتی ملاقاتوں میں ایشوز پر کبھی اتفاق ہوتا ہے کبھی نہیں ہوتا ہے، توانائی کی بڑھتی ضروریات پوری کرنے کیلئے پاکستان سے تعاون کریں گے، ہم موسمیاتی تبدیلی پر کام کر رہے ہیں جوموجودہ وقت کا اہم مسئلہ بن چکا ہے، علاقائی سلامتی پاکستان اوراس کے ہمسایہ ممالک کےلیے اہم مسئلہ ہے۔
امریکی سفیر نے مزید کہا کہ پاکستان غیر ملکی سرمایہ کاروں کو راغب کرنے کے لیے نئے راستے تلاش کرے گا، پاکستان کو بین الاقوامی تجارتی طریقے کو تبدیل کرنے پر سوچنا ہوگا، پاکستان کے پاس افراد قوت ، ہنر اور مہارت بہت زیادہ ہے، امریکہ اور پاکستان مل کر عملی طور پر مسائل سے نمٹتے ہیں۔

راولپنڈی: (ویب ڈیسک) سربراہ عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ کمیشن خورمافیا ہمیشہ این آر او لے لیتا ہے، جیلیں صرف غریبوں کے لئے بنی ہیں۔
سماجی رابطے کی ویب سائٹ ٹویٹر پر اپنے پیغام میں شیخ رشید احمد نے لکھا کہ پاکستان میں ہر کیس کے پیچھے بڑا چہرہ ہوتا ہے، لوگ چہرے دیکھتے ہیں، کیس نہیں،عوامی حمایت کے بغیر ملک نہیں چل سکتا۔
سربراہ عوامی مسلم لیگ نے کہا کہ جہاں ہر چیزبکتی ہو، وہاں قوم نہیں بنتی، 50 کروڑ سے کم کرپشن کی کھلی چھٹی ہے، یہ مٹھائی بھی اپنے گھرمیں بانٹتے ہیں۔

لاہور: (ویب ڈیسک) وزیراعظم شہباز شریف منی لانڈرنگ کیس میں لاہور کی سپیشل کورٹ میں پیش ہوئے۔
وکیل نے عدالت کو بتایا کہ شہباز شریف کی آج کابینہ کی میٹنگ تھی پھر بھی وہ لاہور آئے ہیں جبکہ حمزہ شہباز بیمار ہیں، وکیل نے حمزہ شہباز کی میڈیکل گراؤنڈ پر حاضری معافی کی درخواست دائر کی۔
سماعت کے دوران شہباز شریف نے کمرہ عدالت سے واپس جانے کی اجازت مانگ لی اور کہا میں عدالتی حکم پر پیش ہوا ہوں، میری اسلام آباد میں مصروفیات ہیں، میں جانا چاہتا ہوں عدالت اجازت دے۔
شہباز شریف نے مزید کہا کہ میرے خلاف جھوٹا منی لانڈرنگ کا کیس بنایا گیا، 20 سال وزیر اعلیٰ رہا، جس دوران ایسے فیصلے کیے جس سے خاندان کے کاروبار کو نقصان پہنچا، میں نے شوگر ملز کو سبسڈی دینے کی سمری مسترد کی، میں نے انکار کیا اور کہا کہ یہ پنجاب کی غریب عوام کا پیسہ ہے، مجھے سفارش بھی آئی مگر میں نے سمری مسترد کی۔
وزیراعظم کے وکیل نے کہا کہ ایف آئی آر درج ہوئی تب شہباز شریف جیل میں تھے، ایف آئی آر کے متن میں کم اجرت والے ملازمین نے یہ نہیں کہا کہ یہ اکاؤنٹس شہباز شریف کے کہنے پر کھلے ہیں، استغاثہ کہتا ہے کہ چار ارب روپے کی چینی کی فروحت کو چھپایا گیا، دیکھنا یہ ہے کہ کیا ایف آئی اے کو کارروائی کرنے کا اختیار ہے؟ اس میں ایف بی آر یا انکم ٹیکس والے کاروائی کرسکتے ہیں۔
بعدازاں لاہور کی عدالت نے وزیراعظم شہبازشریف کو واپس جانے کی اجازت دے دی جس کے بعد شہباز شریف کمرہ عدالت سے واپس روانہ ہو گئے۔