پشاور: (ویب ڈیسک) کور ہیڈ کوارٹرز پشاور میں عسکری اعزازت دینے کی تقریب ہوئی جس میں شہداء کے اہلخانہ کو اعزازت دیئے گئے۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق کور ہیڈ کوارٹرز پشاور میں فوجی جوانوں کو اعزازت سے نوازنے کی تقریب ہوئی، تقریب میں شہدا کے اہل خانہ اور رشتہ داروں سمیت فوجی افسران نے شرکت کی۔ کور کمانڈر پشاور لیفٹیننٹ جنرل فیض حمید تقریب کے مہمان خصوصی تھے۔
آئی ایس پی آر کے مطابق تقریب کے دوران 43 شہدا کو تمغہ بسالت سے نوازا گیا، دو افسران کو ستارہ امتیاز (ملٹری) دیا گیا، 15 افسران کو تمغہ امتیاز (ملٹری) سے نوازا گیا۔

اسلام آباد: (ویب ڈیسک) سپیکر قومی اسمبلی راجہ پرویز اشرف نے پاکستان تحریک انصاف (پی ٹی آئی) کے ارکان اسمبلی کو استعفوں کی تصدیق کے لیے طلب کر لیا ہے۔
خیال رہے کہ پاکستان تحریک انصاف ( پی ٹی آئی) کے اراکین اسمبلی نے سابق وزیراعظم عمران خان کے خلاف تحریک عدم اعتماد کامیاب ہونے کے بعد قومی اسمبلی کے فلور پر مستعفی ہونے کا اعلان کیا تھا، شاہ محمود قریشی نے وزارتِ عظمیٰ کے الیکشن کے دوران تقریر میں کہا تھا ہم اس ایوان سے مستعفی ہوتے ہیں اور مطالبہ کرتے ہیں کہ نئے الیکشن کروائے جائیں۔
ترجمان قومی اسمبلی کے مطابق اسپیکر نے پی ٹی آئی کے استعفے دینے والے ارکان کو طلب کیا ہے۔ جس کے لیے مستعفی اراکین کو مراسلے جاری کردیے ہیں۔
ترجمان کے مطابق سپیکرنے پی ٹی آئی اراکین کوتصدیق کیلئے 6 جون کو طلب کیا ہے اور پی ٹی آئی کے مستعفی ارکان کی تعداد 131 ہے۔ استعفوں کی تصدیق کا عمل جمعہ 10 جون تک جاری رہے گا اور روزانہ 30 مستعفی ارکان سپیکر قومی اسمبلی سے ملاقات کریں گے۔
ترجمان قومی اسمبلی نے بتایا کہ اسپیکر قومی اسمبلی نے مستعفی اراکین کو قومی اسمبلی کے قواعد و ضوابط کے قاعدہ 43(2)(b) کے تحت تفویص اختیارات کو بروکار لاتے ہوئے مراسلہ جاری کیا۔
واضح رہے کہ تحریک عدم اعتماد کی کامیابی کے بعد پی ٹی آئی چیئر مین نے ایک ماہ کے دوران درجنوں جلسے کیے اور حکومت سے مطالبہ کیا کہ نئے الیکشن کروائے جائیں۔ بصورت دیگر لانگ مارچ کیا جائے گا، ایک لانگ مارچ 25 مئی کو کیا گیا تاہم عمران خان نے حکومت کو مزید چھ دن کا وقت دیا کہ فوری طور پر الیکشن کا اعلان کیا جائے اگر اعلان ہو جاتا ہے تو باقی معاملات پر حکومت کیساتھ مذاکرات کیلئے تیار ہیں۔

اسلام آباد: (ویب ڈیسک) تحریک انصاف کی منحرف خاتون ایم پی اے زہرہ بتول نے الیکشن کمیشن کے فیصلے کے خلاف سپریم کورٹ سے رجوع کر لیا۔
پی ٹی آئی کی منحرف رکن زہرہ بتول نےسپریم کورٹ میں دائر کی جانے والی اپیل میں موقف اپنایا کہ وزیراعلیٰ پنجاب کے الیکشن میں پارلیمانی پارٹی کی جانب سےکوئی ڈائریکشن جاری نہیں ہوئی تھی۔
پی ٹی آئی کی پارلیمانی پارٹی کا نہ کوئی اجلاس ہوا نہ ہی کوئی پالیسی طےہوئی،درخواست میں استدعاکی گئی کہ اپیل منظورکرکےالیکشن کمیشن کافیصلہ کالعدم قراردیا جائے۔

اسلام آباد: (ویب ڈیسک) وفاقی وزیر توانائی خرم دستگیر نے کہا ہے کہ مالیاتی بحران لوڈشیڈنگ کی وجہ ہے، اگر مالی وسائل فراہم کیے جائیں تو اگلے 48 گھنٹے میں لوڈشیڈنگ ختم کر سکتے ہیں، اگلے ماہ بجلی کی قیمت بڑھانے کی کوئی تجویز زیر غور نہیں۔
اسلام آباد میں نیوز کانفرنس کرتے ہوئے خرم دستگیر کا کہنا تھا کہ پاورڈویژن کو وسائل فراہم کیے جائیں تو کوئی لوڈشیڈنگ نہیں ہوگی، تیل، گیس مہنگی ہو رہی ہے، پچھلی حکومت نے گیس بھی نہیں خریدی، ان کو لرزہ طاری ہوجاتا تھا، روس، یوکرین جنگ کی وجہ سے کوئلے کی قیمت میں چار گنا اضافہ ہوا ہے۔
انہوں نے مزید کہا کہ ہم جامع توانائی کا ایک پروگرام لائیں گے، وزیراعظم جلد توانائی کے شعبے کے لیے منصوبہ بندی کا اعلان کریں گے، اگلے ماہ بجلی کی قیمت بڑھانے کی کوئی تجویز زیر غور نہیں،30 جون کے بعد بجلی کی قیمتوں میں ردوبدل پر بریفنگ دیں گے۔
وفاقی وزیر کا کہنا تھا کہ 25 مئی کا فسادی مارچ بری طرح ناکام ہوا، توانائی کے شعبے میں گردشی قرضہ 2460 ارب تک پہنچ گیا ہے، اتحادی حکومت قوم کو عذاب عمرانی سے نجات دلا رہی ہے، ملک کی توانائی ضروریات پورا کرنے کے لیے کوشاں ہیں۔
انہوں نے کہا کہ 5820 میگاواٹ کو فنکشنل کر دیا ہے، پاکستان میں بجلی بنانے کی کوئی صلاحیت نہیں، صرف مہنگے ایندھن کا مسئلہ ہے، بجلی کے بنیادی ٹیرف کی ری بیسنگ کی جا رہی ہے۔

لاہور: (ویب ڈیسک) سابق وفاقی وزیر داخلہ اور عوامی مسلم لیگ کے سربراہ شیخ رشید احمد نے کہا ہے کہ ایک ووٹ کی اکثریت پر قائم حکومت کسی وقت بھی دھڑم سے گرجائے گی، حکومت کا جانا ناگزیر ہے، عنقریب وہ وقت آئے گا جب صدر ان سے اعتماد کے ووٹ کے لیے کہے گا، جس سے سامراجی خواہشیں چکنا چور ہو جائیں گے۔
سماجی رابطے کی ویب سائٹ ٹویٹر پر اپنے ایک بیان میں سابق وفاقی وزیر اور عوامی مسلم لیگ کے سربراہ شیخ رشید کا کہنا تھا کہ 3 سیاسی چوہوں کا آپس میں اتحاد یہ تھا کہ ایک نے اپنے بیٹے کو چیف منسٹر بنا لیا ہے دوسرے نے وزیرخارجہ، اور تیسرے نے وزیر مواصلات، جبکہ غریب لوڈشیڈنگ، مہنگائی اور بے روزگاری سے مررہا ہے جس سے اب ان کو کوئی غرض نہیں، قوم کو گولی، سامراج کے اشارے پر اسرائیل سے دوستی بڑھائی جارہی ہے اور بھارت سے تجارت شروع ہونے والی ہے جبکہ ایران اور چین سے فاصلے پیدا ہونے والے ہیں۔
ان کا کہنا تھا کہ لاٹھی اور آنسو گیس سے دبانے کے لیے راناثناء جیسے اجرتی قاتل کرائے پر رکھ لیے گئے ہیں، اب حکومت کا مسئلہ 8 سے 12 گھنٹے لوڈ شیڈنگ نہی ہے بلکہ اپنے کیس نیب، ایف آئی اے اور اے این ایف سے ختم کروانا ہے، جس پر تیزی سے کام ہو رہا ہے۔
شیخ رشید احمد نے کہا کہ 1 ووٹ کی اکثریت پر قائم حکومت کسی وقت بھی دھڑم سے گرجائے گی، ابھی پٹرول اور بجلی میں اضافے کی پہلی قسط آئی ہے، 5 سے 25 جون تک دوسری قسط بھی آ جائے گی لوگ خود سڑکوں پر آئینگے اور غلامی کی زنجیریں توڑیں گے، حکومت کا جانا ناگزیر ہے، عنقریب وہ وقت آئے گا جب صدر ان سے اعتماد کے ووٹ کے لیے کہے گا، جس سے سامراجی خواہشیں چکنا چور ہو جائیں گے۔ ایک ووٹ کی اکثریت صرف غلامی کے سامراجی فیصلوں پر عمل در امد کے لیے دی گئی ہے، اور 1 ووٹ کی اکثریت والی حکومت 22 کروڑ لوگوں کی ترجمانی نہیں کرسکتی۔
سابق وفاقی وزیر نے کہا کہ ایک کروڑ اوورسیز پاکستانیوں کو سیاست اور ووٹ سے دور رکھنا قومی بددیانتی ہے، کیوں کہ اس پر 2018 میں سپریم کورٹ فیصلہ دے چکی ہے، اوورسیز پاکستانیز کا ووٹ کا حق دلانے کے لیے میں سپریم کورٹ جا رہا ہوں، جب اسمبلی کا ممبر 20 اور 25 کروڑ میں بک رہا ہو ایسے موقع پر اوورسیز پاکستانی ہی جمہوریت کو کسی بڑے حادثے سے بچا سکتے ہیں۔

لاہور: (ویب ڈیسک) پاکستان مسلم لیگ (ن) کی نائب صدر مریم نواز نے عمران خان پر الزام عائد کرتے ہوئے کہا ہے کہ پاکستان میں واحد تم ہو جس کا اسرائیل سے خاندانی واسطہ ہے۔
خیال رہے کہ گزشتہ روز عمران خان نے چارسدہ میں ورکرز کنونشن سے خطاب میں کہا تھا کہ ایک تصویر آئی ہے کہ ایک پاکستانی وفد پہلی بار اسرائیل گیا، یہ اسرائیل کو تسلیم کرنے جا رہے ہیں، یہ لوگ بھارت سے بھی سمجھوتا کر کے کشمیریوں کو بیچیں گے۔
سماجی رابطے کی ویب سائٹ ٹویٹر پر مریم نواز کا کہنا تھاکہ جھوٹے خط، جھوٹی عالمی سازش، قتل کا جھوٹا ڈرامہ فیل ہونے اور تاریخ کے سب سے ناکام لانگ مارچ کے بعد اب اسرائیل وفد بھیجے جانے کی انتشار خان کی ایک اور دو نمبری ہے۔ فتنہ خان پورے پاکستان میں واحد شخص تم ہو جس کا اسرائیل سے براہ راست خاندانی واسطہ ہے۔
ن لیگی کی نائب صدر کا کہنا تھا کہ ایک مسلمان پاکستانی کے مقابلے میں زیک گولڈ اسمتھ کی انتخابی مہم چلانے والے میں تمہیں وارننگ دیتی ہوں جھوٹ بولنے سے باز آجاؤ ورنہ منہ چھپانے کی جگہ نہیں ملے گی۔