اسلام آباد : (ویب ڈیسک) پاکستان تحریک انصاف کے رہنما اسد عمر نے کہا ہے کہ عوام نے حکومت کو مسترد کردیا ،عدم اعتماد کی تحریک کے بعد ملک کے معاشی حالات بدترہوگئے۔
تفصیلات کے مطابق وزیراعظم شہباز شریف کی تقریر پر ردعمل دیتے ہوئے اسد عمر نے کہا کہ امپورٹڈ حکومت سے معیشت سنبھالی نہیں جا رہی، یہ مزید مہنگائی کرنے جا رہے ہیں، یوٹیلیٹی اسٹور پر سستا آٹا دینے کے حوالے سے عوام کو بیوقوف بنایا گیا
انہوں نے مزید کہا کہ حکومت غیر فطری اتحاد پر مبنی ہے، یہ نہ فیصلے کر سکتے ہیں نہ ذمہ داریاں پوری کرنے کی سکت رکھتے ہیں، کرپشن پر لیکچر شہباز شریف کے منہ سے اچھا نہیں لگتا۔

لاہور : (ویب ڈیسک) پیٹرولیم مصنوعات کی قیمت میں اضافے کے بعد ٹرینوں کے کرایوں میں بھی 20 فیصد اضافے کا فیصلہ کر لیا گیا۔
ذرائع کے مطابق ریلوے انتظامیہ کی جانب سے ٹرینوں کے کرایوں میں اضافہ کی سمری وفاقی حکومت کو بھجوا دی گئی، ریلوے انتظامیہ نے کرایوں میں اضافہ کی تین تجاویز تیار کی تھیں، انتظامیہ کی جانب سے وزارت ریلوے کو کرایوں میں 10، 15 اور 20 فیصد اضافے کی تجویز دی گئی ہے۔
پیٹرولیم مصنوعات کی قیمتوں میں اضافہ سے ریلوے کو روزانہ ایک کروڑ 84 لاکھ روپے کے اضافی مالی بوجھ کا سامنا ہے، سسٹم پر روزانہ 4 لاکھ لیٹر ڈیزل استعمال ہوتا ہے، یکم نومبر کو ریلوے کی جانب سے کرایوں میں 10 فیصد اضافہ کیا گیا تھا، وفاقی حکومت کی منظوری کے بعد کرایوں میں اضافہ کا حتمی نوٹیفکیشن جاری کیا جائے گا۔

لاہور: (ویب ڈیسک) پنجاب حکومت نے لاہور کے گریٹر اقبال پارک میں جلسوں پر مکمل پابندی لگانے کا اعلان کر دیا۔
وزیر اعلیٰ پنجاب حمزہ شہباز نے گریٹر اقبال پارک میں جلسوں پر پابندی لگانے کی منظوری دے دی۔ وزیر اعلیٰ پنجاب حمزہ شہباز نے کہا کہ تاریخی پارک کو جلسوں کے لیے استعمال کرنا کسی طور پر مناسب نہیں۔
وزیر اعلیٰ پنجاب حمزہ شہباز نے گریٹر اقبال میں داخلہ فیس لگانے کی تجویز بھی مسترد کرتے ہوئے کہا کہ یہ غریب آدمی کا پارک ہے اور کسی صورت داخلہ فیس عائد نہیں ہو گی۔
وزیر اعلیٰ پنجاب حمزہ شہباز نے سابقہ دور میں پودوں کے بیج بروقت نہ خریدنے پر برہمی کا اظہار کیا۔ وزیر اعلیٰ پنجاب نے بروقت بیج نہ خریدنے کے حوالے سے انکوائری کا حکم بھی جاری کر دیا۔
حمزہ شبہاز نے ہدایت دی کہ خالی مقامات پر درخت، پودے اور گھاس لگانے کا کام جلد شروع کیا جائے اور جنوبی پنجاب میں بھی خالی اراضی کی نشاندہی کر کے پودے لگانے کا پلان مرتب کیا جائے۔
وزیر اعلیٰ پنجاب کو بریفنگ دی گئی کہ پی ٹی آئی کے جلسے سے گریٹر اقبال پارک میں پودے اور گھاس تباہ ہوئی جبکہ جلسے سے پارک کو تقریباً 50 لاکھ روپے کا نقصان ہوا۔

اسلام آباد: (ویب ڈیسک) پاکستان تحریک انصاف (پی ٹی آئی) قیادت کے خلاف چھٹا مقدمہ درج کر لیا گیا۔
پی ٹی آئی قیادت کے خلاف لانگ مارچ، جلاؤ گھیراؤ اور توڑ پھوڑ پر مقدمات کے اندراج کا سلسلہ جاری ہے اور آج اسلام آباد کے تھانہ کراچی کمپنی میں پی ٹی آئی قیادت کے خلاف چھٹا مقدمہ درج کر لیا گیا۔
پی ٹی آئی چیئرمین عمران خان، سابق وزیر خارجہ شاہ محمود قریشی، سابق وفاقی وزیر اسد عمر، علی نواز، فیصل جاوید، علی امین گنڈا پور، راجہ خرم نواز، سیف اللہ نیازی، ملک رفیق، شیریں مزاری اور زرتاج گل کو مقدمہ میں ملزمان نامزد کیا گیا ہے جبکہ مقدمہ میں 200 نامعلوم افراد بھی نامزد کیے گئے ہیں۔
درج کردہ مقدمے کے متن کے مطابق ملزمان نے حکومت مخالف ریلی نکالی، نعرہ بازی اور دفعہ 144 کی خلاف ورزی کی۔ ملزمان نے پولیس پر پتھراؤ کیا اور سرکاری و پرائیویٹ گاڑیوں کو نقصان پہنچایا۔
پی ٹی آئی قیادت کے خلاف مقدمہ سب انسپکٹر سید عاصم غفار کی مدعیت میں درج کیا گیا ہے۔

اسلام آباد: (ویب ڈیسک) دفتر خارجہ نے امریکہ میں اسیر پاکستانی ڈاکٹر عافیہ صدیقی کی رہائی سے متعلق کی جانے والی کوشش کی رپورٹ اسلام آباد ہائی کورٹ میں جمع کرا دی۔
ڈاکٹر عافیہ صدیقی کی امریکی جیل میں موجودگی سے متعلق دفتر خارجہ کی جانب سے اسلام آباد ہائی کورٹ میں جمع کرائی گئی رپورٹ میں کہا گیا ہے کہ امریکی فیڈرل میڈیکل سینٹر میں عافیہ صدیقی کو ٹیلی فون تک رسائی حاصل ہے اور عافیہ صدیقی کو اپنے خاندان سے بات چیت کی بھی مکمل آزادی ہے۔ قونصلر رسائی کے وقت ڈاکٹر عافیہ بالکل صحت مند تھیں۔
رپورٹ میں کہا گیا کہ پاکستانی قونصلر عافیہ صدیقی کے خاندان کو ان کی صحت سے متعلق آگاہ کرتے ہیں اور یہ معلومات قونصلر کی رسائی کی بنیاد پر ہی حاصل کی جاتی ہیں۔ پاکستانی قونصلیٹ نے ایک بار پھر جلد عافیہ تک قونصلر رسائی کی درخواست دی ہے۔
عافیہ صدیقی امریکی ریاست ٹیکساس کی جیل میں 2008 سے قید ہیں اور حکومت کی جانب سے عافیہ صدیقی کی رہائی کے لیے مسلسل کوششیں کی گئیں اور پاکستانی حکام نے یہ معاملہ مسلسل ہر سطح پر امریکی حکام کے سامنے اٹھایا۔
رپورٹ میں کہا گیا کہ عافیہ صدیقی کے قانونی و انسانی حقوق کا معاملہ امریکی حکام کے سامنے اٹھایا جاتا ہے اور عافیہ صدیقی کے حقوق کا معاملہ اسلام آباد اور واشنگٹن میں امریکی حکام کے سامنے بھی اٹھایا جا رہا ہے۔ ہوسٹن میں پاکستانی سفارت خانے اور قونصلیٹ جنرل نے ٹرائل، سزا اور قید کے دوران عافیہ صدیقی سے رابطہ رکھا جبکہ ہوسٹن میں پاکستانی قونصلیٹ جنرل ہر 3 ماہ بعد عافیہ صدیقی سے ملاقات کرتے ہیں۔
دفتر خارجہ کے مطابق عافیہ کی سلامتی کو یقینی بنانے کے لیے فیڈرل میڈیکل سینٹر کے ساتھ مکمل رابطے میں ہیں اور عافیہ صدیقی یا ان کے خاندان کی طرف سے مسائل کے حل کے لیے کوشاں ہیں۔ پاکستانی قونصلر کو عافیہ تک آخری بار رسائی 28 جنوری 2022 کو دی گئی تھی اور قونصلر رسائی کے دوران ڈاکٹر عافیہ نے قونصلر سے بات کرنے سے انکار کر دیا تھا، انہوں نے اپنی بہن فوزیہ، بھائی محمد علی اور اپنی وکیل ماروا ایلبیالی کو اس فہرست میں شامل کیا ہے۔
رپورٹ میں کہا گیا کہ ڈاکٹر عافیہ صرف اپنے مقرر کردہ افراد کے ساتھ اپنی صحت کے بارے میں معلومات شیئر کرتی ہیں۔