اسلام آباد: (ویب ڈیسک) پاکستان کو عالم اسلام کی پہلی جوہری طاقت بننے کے 24 سال مکمل ہو گئے ہیں، پورے ملک میں آج یوم تکبیر جوش و جذبے سے منایا جا رہا ہے۔
تفصیلات کے مطابق آج سے 24 سال پہلے آج ہی کے دن وطن عزیز نے اسلامی دنیا میں ایک نئی تاریخ رقم کی تھی، پاکستان نے بھارتی ایٹمی دھماکوں کا منہ توڑ جواب دیتے ہوئے اپنی جوہری طاقت کا بھرپور مظاہرہ کیا تھا۔
آج یوم تکبیر کے حوالے سے ملک بھر میں تقاریب منعقد کی جائیں گی، پوری قوم ملک کا دفاع ناقابل تسخیر بنانے والوں کو سلام پیش کر رہی ہے۔
واضح رہے کہ پاکستان نے بھارت کے جواب میں 28 مئی 1998 کو چاغی کے پہاڑوں میں اٹیمی دھماکے کئے تھے، پاکستان نے ایٹمی صلاحیت حاصل کرنے کے بعد ایسے کئی میزائل بھی بنائے اور کامیاب تجربات کیے جو ایٹمی ہتھیار لے جانے کی صلاحیت بھی رکھتے ہیں۔

لاہور : (ویب ڈیسک) سابق وزیرداخلہ شیخ رشید کا کہنا ہے کہ آج گر ے یا کل یہ حکومت ختم ہوکر رہے گی، یہ نہیں بچ سکتی۔معیشت بچانے کے لیے بڑے فیصلے کرنے ہوں گے ۔
سابق وزیر داخلہ شیخ رشید کا کہنا ہے کہ 30روپے فی لیٹر پیٹرول مہنگا کرنے کے بعد2ہزارروپے مہینے کی خیرات معیشت کو تباہی سے نہیں روک سکتی۔
ان کا کہنا ہے کہ معیشت تباہ حال اور ملک ڈیفالٹ ہونے کے قریب ہے۔معیشت بچانے کے لیے بڑے فیصلے کرنے ہوں گے ۔معیشت بچانے کے لیے عدلیہ اور دیگر اداروں کو آگے آنا ہوگا اور فیصلے کرنے ہوں گے۔
ان کا کہنا ہے کہ آج گر ے یا کل یہ حکومت ختم ہوکر رہے گی، یہ نہیں بچ سکتی۔وزیراعظم اور وزیراعلیٰ 20کروڑروپے میں رکن کو خرید کر بھی اپنی حکومت نہیں بچاسکتے۔لوگ چوروں کے اس فرسودہ نظام کے خلاف جہاد کررہے ہیں۔
انہوں نے کہا ہے کہ جو وزیراعظم کرپشن پر فخر کریں اور ایف آئی اے ہاتھ جوڑ کرکھڑی تو انصاف کا اللہ ہی حافظ ہے۔وزیراعظم سمیت سب کرپشن کےمقدمات والے عنقریب جیلوں میں جائیں گے۔

لاہور: (ویب ڈیسک) وزیراعظم شہباز شریف کے خطاب پر تحریک انصاف کا ردعمل آگیا۔ فواد چودھری نے کہا کہ شہبازشریف کا خطاب ایک ہارے ہوئے شخص کا خطاب تھا۔ خطاب میں کھوکھلے الفاظ زبان کا ساتھ دینے سے انکاری تھے۔
فواد چودھری کا کہنا ہے کہ انہیں مشکلات کا ادراک ہے نہ بحران کا احساس۔ تین دنوں سے عوام پر لاٹھی چارج،آنسو گیس شیلنگ کے بعد اظہار آزادی کا دعویٰ کیا جا رہاہے۔ ہماری غلطی سے یہ لوگ پاکستان پر مستقل مسلط ہو گئے تو اگلی نسل تباہ ہو جائیگی۔
سابق وزیر خزانہ شوکت ترین ہے کہا کہ شہبازشریف کو سمجھ آنی چاہیے مجموعی قرض کا 80 فیصد نہیں لیا گیا۔ قرض 18 ٹریلین ضرور ہے لیکن معیشت بھی 72 فیصد بڑھی ہے۔
ان کا کہنا ہے کہ پی ٹی آئی نے عوام کو سبسڈی دی اور اس کا پلان رکھا تھا۔ ہمیں روس سے پیٹرول 30 فیصد سستا مل رہا تھا۔ ان کے دماغ خراب ہو گئے ہیں انہیں سمجھ نہیں آرہا کیا کرنا ہے۔ ان کے 2 وزیرخزانہ ہیں ایک یہاں دوسرا لندن میں بیٹھا ہوا ہے۔
اسد عمر نے کہا عدم اعتماد کی تحریک کے بعد ملک میں خوفناک معاشی حالات دیکھنے کو ملے ۔ حکومت سے معیشت سنبھالی نہیں جا رہی ۔ یہ چیزوں کی قیمتیں بڑھائے جا رہے ہیں ۔
ان کا کہنا ہے کہ آئی ایم ایف کی خوشنودی کیلئے پٹرولیم مصنوعات کی قیمت 30 روپے بڑھا دی، چلتی ہوئی معیشت کو بریک انہوں نے لگائی۔ آزاد فیصلہ کرنے والے لیڈر دنیا کی آنکھ میں کھٹکتے ہیں۔
انہوں نے کہا ہے کہ اختلافات کے باوجود بھارتی لیڈر شپ نے آزادانہ فیصلہ کیا۔ یہ بات ٹھیک ہے کہ ہم نے ان کے انتہائی قریبی دوستوں کو ناراض کیا جن میں نریندر مودی شامل ہے۔

لاہور : (ویب ڈیسک) وزیر اعظم شہباز شریف اور وزیر اعلیٰ پنجاب حمزہ شہباز منی لانڈرنگ کیس میں اسپیشل کورٹ سینٹرل پیش ہوگئے۔
لاہور کی اسپیشل کورٹ سینٹرل میں شہباز شریف اورحمزہ شہباز کے خلاف منی لانڈرنگ کیس کی سماعت ہورہی ہے۔
منی لانڈرنگ کیس، شہباز، حمزہ پر فرد جرم آج بھی عائد نہ کی جا سکی
شریک ملزمان سلمان شہباز، طاہر نقوی، ملک مقصود اور غلام شبیر کی گرفتاری سے متعلق رپورٹ عدالت میں پیش کردی گئی۔
عدالت نے شہباز شریف اور حمزہ شہباز کو آج طلب کر رکھا تھا، شہباز شریف کے وکیل امجد پرویز عبوری ضمانت کی توثیق کے لیے دلائل دیں گے۔
عدالت نے شریک ملزمان کی گرفتاری سے متعلق رپورٹ طلب کر رکھی تھی۔

کراچی : (ویب ڈیسک) کراچی کے سائٹ ایریا میں ٹیکسٹائل فیکٹری میں لگی آگ پر قابو پالیا گیا ہے۔
فائر افسر سائٹ محمد اکرم نے میڈیا سے گفتگو کرتے ہوئے کہا کہ سائٹ ایریا میں ٹیکسٹائل فیکٹری میں لگی آگ پر ڈھائی گھنٹے کی جدوجہد کے بعد قابو پالیا گیا ہے۔
محمد اکرم کا کہنا ہے کہ کولنگ کا عمل جاری ہے، آگ بجھانے میں 9 فائر ٹینڈر، 2 باوزر اور ایک اسنارکل استعمال کی گئی۔
فائر افسر نے کہا کہ آگ فیکٹری کی دوسری منزل پر لگی تھی، تاہم جس کی وجہ فوری طور پر معلوم نہیں ہوسکی، آگ لگنے سے کوئی جانی نقصان نہیں ہوا۔
دوسری جانب فیکٹری کے ملازم کا کہنا ہے کہ رات میں صرف چوکیدار اور چند ایک لوگ ہوتے ہیں، تمام لوگوں کو بحفاظت باہر نکال لیا گیا ہے۔