نیویارک: (ویب ڈیسک) تصور کیجئے کہ آپ کے لباس پر نصب ایک چھوٹا سی بَیج نما سینسر نہ صرف اطراف کی ہوا کو محسوس کرسکتا ہے بلکہ سارس کوو2 سے بھرپور ماحول سے بھی خبردار کرسکتا ہے۔
مشہور ییل یونیورسٹی نے اس چھوٹے سے سینسر کو ’فریش ایئرکلپ‘ کا نام دیا ہے جو بالخصوص چاردیواری کے اندر مہلک وائرس سے فوری طور پر خبردار کرے گا۔ یہ ہلکا پھلکا سسٹم کسی دقت کے بغیرلباس سے چپک سکتا ہے اور اطراف میں اڑنے والے سارس کوو2 وائرس کو فوری طور پر محسوس کرلیتا ہے۔
سستے اور ہلکے پھلکے آلے کو کالر سے بھی جوڑا جاسکتا ہے جو آپ کے منہ اور ناک کی اطراف میں پرواز کرنے والے سارس کوو2 وائرس کو شناخت کرسکتا ہے۔
اس پر پولی ڈائی میتھائل سائلوکسین کی تہہ چڑھائی گئی ہے جو وائرس کو جمع کرتی رہتی ہے اور بعد میں اسے تجربہ گاہ میں ٹیسٹ کیا جاسکتا ہے۔ ابتدائی تجربات میں یہ ننھا منا سینسر بہت ہی مؤثر ثابت ہوا ہے۔ اس کے لیے خاص ماحول میں کام کرنے والے 62 رضاکاروں کے لباس پر اسے لگایا گیا ہے۔ پانچ روز کے بعد جب بَیج سینسر کو تجربہ گاہ میں جانچا گیا تو ان میں سے پانچ میں کووڈ 19 کی تصدیق ہوگئی۔
اس نظام کو بازاروں اور ہوٹلوں میں استعمال کیا جاسکتا ہے۔ اِن ڈور کھانے کے مقامات سے اس نے دو مثبت کیس شناخت بھی کیے ہیں۔ اس طرح بہت درستگی کے ساتھ سارس کوو2 وائرس کو ماحول میں دیکھا جاسکتا ہے۔

لندن: (ویب ڈیسک) سائنس فکشن جیسی اس کار کو دیکھ کر آپ کچھ بھی کہیں لیکن یہ بیٹ مین کی گاڑی لگتی ہے اور اپنے جدید ڈیزائن کی بنیاد پر رن وے کے بغیر سیدھا اوپر اٹھنے والی کار ہے جس کی کامیاب آزمائش دبئی میں کی گئی ہے۔
میڈیا رپورٹ کے مطابق برطانوی کمپنی بیل ویدر نے اسے بنایا ہے اور اس کی نصف جسامت ماڈل نے ٹیسٹ فلائٹ میں متوقع نتائج دکھائےہیں۔ اسے وولر ای وی ٹی او ایل کا نام دیا گیا ہے۔ ماہرین اسے ہائپر کار قرار دے رہے ہیں۔ نصف جسامت پر اڑنے کے باوجود اس نے سائنس دانوں اور انجینئروں کا دل خوش کر دیا ہے۔
نظری طور پر یہ 135 میل فی گھنٹہ کی رفتار سے لگ بھگ 3 ہزار فٹ کی بلندی پر جا سکتی ہے۔ ماحول دوست، برق رفتار اور بے آواز وولر کار مکمل طور پر برقی توانائی سے چلتی اور پرواز کرتی ہے۔

سان فرانسسكو: (ویب ڈیسک) ٹویٹر پر مسلسل نظر رکھنے والے ایک ماہر نے بعض اسکرین شاٹ پوسٹ کئے ہیں جن میں ٹویٹر پروفائل تصاویر میں این ایف ٹی خاکہ دیکھا جاسکتا ہے جو بلاک چین پر بنا ہے اور صارف کو اس کی ملکیت ظاہر کرتا ہے۔
گزشتہ برس نومبرمیں ٹویٹر نے این ایف ٹی شامل کرنے کا عندیہ دیا تھا۔ نان فنجیبل ٹوکن (این ایف ٹی) کی عالمی مقبولیت کے تحت ٹویٹر نے صرف این ایف ٹی کے اصل مالکان کو ہی اس کی سہولت فراہم کی ہے۔
اس کے بعد عام افراد بھی پروفائل پر کلک کرکے این ایف ٹی کی تمام ضروری تفصیلات جان سکتے ہیں۔ لیکن اس پر رائٹ کلک کرکے اسے ڈاؤن لوڈ نہیں کیا جاسکتا ہے۔ ٹویٹر نے این ایف ٹی تصویر محفوظ بنانے کے لیے چھ کونوں والا پی ایف ی فارمیٹ پیش کیا ہے جو ڈجیٹل نقب زنی کو ناکام بناتا ہے۔
دلچسپ بات یہ ہے کہ این ایف ٹی کی خریدوفروخت کی بحثیں فیس بک کی بجائے ٹویٹرپرجاری ہیں۔ اسی ایپ پر لوگ این ایف ٹی تصاویر بھی شیئر کرتے ہیں اور بطورِ خاص ٹویٹراسپیس اس کا مرکز بن چکا ہے۔ تاہم اب بھی این ایف ٹی کی خریدوفروخت میں کاپیاں ہی دستیاب ہیں اور مکمل حقوقِ ملکیت نہیں دیئے جارہے ۔ اس طرح این ایف ٹی کے قانونی پہلو یا ان میں ترمیم کے بہت سے راستے ہیں جن پرغور کرنے کی ضرورت ہے۔
این ایف ٹی کی پوری دھوم کے باوجود صرف مٹھی بھر افراد ہی اس سے رقم بنارہے ہیں اور مخصوص لوگ امیر سے امیر تر ہوتے جارہے ہیں۔ لیکن سال 2021 میں اس کی حجم 25 ارب ڈالر دیکھا گیا تھا۔