پراویڈنس: (ویب ڈیسک) انڈر 19 ورلڈ کپ کا آج سے ویسٹ انڈیز میں آغاز ہو رہا ہے، آئی سی سی نے شریک 16 ٹیموں کیلئے بائیو سکیور ببل میں سختی نہ کرنے کا فیصلہ کرتے ہوئے افغان ٹیم کی آمد کے سبب گروپ سی کا شیڈول تبدیل کر دیا۔
میڈیا رپورٹ کے مطابق افتتاحی روز میزبان ویسٹ انڈیز کا مقابلہ آسٹریلیا سے ہو گا جبکہ جارج ٹٓاون میں سکاٹ لینڈ کو سری لنکا کے چیلنج کا سامنا ہو گا۔ دلچسپ بات یہ ہے کہ آئی سی سی کے چیف ایگزیکٹو جیف آلر ڈائس نے سخت بائیو سکیور ببل کے نفاذ سے انکار کے ساتھ واضح کر دیا کہ وہ نوجوان پلیئرز کو لطف اٹھانے کا تجربہ فراہم کرنا چاہتے ہیں البتہ انہیں آزادی اوروائرس سے مبتلا ہونے کے خطرات میں خود توازن پیدا کرنا ہو گا۔
ویزا مسائل کے باعث افغان ٹیم کی تاخیر سے آمد کے سبب گروپ سی کی شیڈولنگ میں تبدیلی کی گئی ہے اور افغان ٹیم اپنا پہلا میچ 16 کی بجائے 18 جنوری کو پاپوانیوگنی کے خلاف کھیلے گی جبکہ زمبابوے اور پاپوانیوگنی کا 20 جنوری کو شیڈول میچ کل کھیلا جائے گا اور پاکستانی ٹیم اپنی مہم جوئی 17 جنوری کو زمبابوے کے خلاف شروع کرے گی ورنہ یہ میچ 22 جنوری کو شیڈول تھا۔
پاکستان کا 15 جنوری کو پاپوانیو گنی کیخلاف شیڈول مقابلہ اب 22 جنوری کو جبکہ افغانستان کے خلاف 20 جنوری کو ہو گا اور افغانستان کا زمبابوے کیخلاف میچ 16 کی بجائے 22 جنوری کو ہو گا۔

لاہور: (ویب ڈیسک) آئی سی سی تاحال رمیزراجہ کی ’’بگ4‘‘ سیریز کی تجویز سے لاعلم ہے، چیف ایگزیکٹیو جیف ایلر ڈائس نے کہا ہے کہ اس حوالے سے چیئرمین پی سی بی سے کوئی خط و کتابت نہیں ہوئی، جب تک یہ اندازہ نہ ہوکہ وہ کیا سوچ رہے ہیں اس پر تبصرہ کرنا مشکل ہوگا۔ تفصیلات کے مطابق چیئرمین پی سی بی رمیز راجہ آئی سی سی کے آئندہ اجلاس میں پاکستان، بھارت آسٹریلیا اور انگلینڈ پر مشتمل4 ملکی ٹی ٹوئنٹی سیریز کروانے کی تجویز پیش کرنا چاہتے ہیں،ان کا خیال ہے کہ سالانہ ایونٹ سے ایشز کھیلنے والی دونوں ٹیموں کے ساتھ روایتی حریفوں پاکستان اور بھارت کے میچز بھی باقاعدگی سے کروانے کا موقع ملے گا، ذرائع آمدنی بھی بڑھیں گے جو کرکٹ برادری کے کام آسکتے ہیں۔ ممکنہ پلان کیلیے سابق کپتان نے نیا فنانشل ماڈل بنانے کی بھی تجویز پیش کردی ہے۔ رمیزراجہ کا یہ بیان آسٹریلوی اور پھر پاکستانی میڈیا میں بھی توجہ کا مرکز بنا،اس کو سراہنے اور ناقابل عمل قرار دینے والے بھی میدان میں آگئے۔ سوشل میڈیا پر کئی صارفین نے کہا کہ منصوبہ مکمل ہوجائے تو دولت کی ریل پیل ہوسکتی ہے، دیگر کا کہنا تھا کہ بھارتی حکومت کسی ایسی پلاننگ میں اپنے بورڈ کو شریک نہیں ہونے دے گی جس سے پاکستان کا فائدہ ہو، دوسری جانب آئی سی سی اس تجویز سے ابھی تک لاعلم ہے۔ کرکٹ ویب سائٹ سے گفتگو کرتے ہوئے چیف ایگزیکٹیو جیف ایلرڈائس نے کہا کہ اس آئیڈیے کے بارے میں ہماری چیئرمین پی سی بی سے کوئی خط و کتابت نہیں ہوئی،جب تک یہ اندازہ نہ ہوکہ وہ کیا سوچ رہے ہیں اس پر تبصرہ کرنا مشکل ہوگا، میڈیا رپورٹس سامنے آئی ہیں مگر فی الحال رمیز راجہ سے ہمارا اس معاملے میں کوئی تبادلہ خیال نہیں ہوا۔