سیئول: (ویب ڈیسک) یوکرین کے صدر وولودیمیر زیلنسکی نے جنوبی کوریا سے طیارہ شکن میزائل سسٹم اور جنگی ساز و سامان فراہم کرنے کا مطالبہ کردیا۔
عالمی خبر رساں ادارے کے مطابق یوکرین کے صدر وولودیمیر زیلنسکی نے جنوبی کوریا کی پارلیمنٹ سے خطاب میں کہا کہ روسی فوج نے ہزاروں شہریوں کا قتل عام کیا اور یہ سلسلہ اب بھی جاری ہے۔
اس موقع پر صدر زیلنسکی نے مطالبہ کیا کہ روسی جارحیت کا مقابلہ کرنے کے لیے ہمیں طیارہ شکن میزائل سسٹم، اینٹی ٹینک، اینٹی شپ اور جنگی ساز و سامان مہیا کیے جائیں۔
یوکرینی صدر نے مزید کہا کہ اگر جنگی ساز و سامان کی فراہمی میں کوئی قانون رکاوٹ بنتا ہے تو اس پر نظر ثانی کریں کیوں کہ اس کے بغیر روس کو جارحیت سے روکنا ممکن نہیں۔
خیال رہے کہ اس سے قبل یوکرین کے وزیر دفاع کی اینٹی ایئر کرافٹ کی فراہمی کے مطالبے کو پورا کرنے سے جنوبی کوریا کے وزیر دفاع نے معذرت کرلی تھی۔
جنوبی کوریا کے وزیر دفاع کا کہنا تھا کہ خطے میں موجودہ جنگی صورت حال اور ملکی قومی سلامتی اس بات کی اجازت نہیں دیتی۔

اوسلو: (ویب ڈیسک) نارروے کے 67 سالہ وزیر دفاع اوڈ روجر ایناکسن نے 18 سالہ لڑکی سے جنسی تعلق استوار رکھنے کا اسکینڈل سامنے آنے پر اپنے عہدے سے استعفیٰ دیدیا۔
عالمی خبر رساں ادارے کے مطابق کم عمر طالبہ سے غیر ازدواجی تعلق سامنے آنے پر نارروے کے وزیر دفاع اوڈ روجر ایناکسن نے اپنا استعفیٰ وزیراعظم جوناس گاہر اسٹور کو پیش کیا جو قبول کرلیا گیا۔
وزیر دفاع پر الزام تھا کہ 2005 میں اسکول کی طالبات پارلیمنٹ کا دورہ کرنے آئی تھیں جن میں سے ایک 18 سالہ لڑکی سے راز و نیاز سے بڑھائے جب وہ وزیر توانائی تھے۔ اُس وقت اوڈ روجر ایناکسن کی عمر 50 اور طالبہ کی 18 سال تھی۔
دونوں کے درمیان جنسی تعلق کئی برسوں تک جاری رہا۔ طالبہ کی عمر اب 30 سال ہوچکی ہے اور ان کا کہنا ہے کہ میں سیاست میں دلچسپی رکھتی تھی جس کا فائدہ وزیر نے اُٹھایا اور اپنی طاقت کے بل پر تعلق قائم کیے۔
خاتون کا یہ بھی کہنا تھا کہ میں 2006 سے 2007 کے درمیان وزیر سے 12 مرتبہ ان کے دفتر میں ملی۔ خاتون کے الزام کے جواب میں وزیر دفاع نے کہا کہ حکومت میں رہتے ہوئے انھوں نے کبھی خاتون سے جنسی تعلق استوار نہیں کیے۔
تاہم خاتون نے وزیر دفاع کے اس کو دعوے کو مسترد کردیا۔
وزیر دفاع اوڈ روجر ایناکسن نے استعفی پیش کرنے کے بعد اپنے بیان میں کہا کہ میں نے کئی بُرے فیصلے کیے، اپنے فعل پر معافی مانگتا ہوں جن کی وجہ سے دوسروں کی زندگی مشکل ہوئی۔
ادھر ناروے کے وزیراعظم جوناس گاہر سٹور نے پریس کانفرنس میں بتایا کہ وزیر دفاع کا استعفیٰ قبول کرلیا ہے کیوں کہ یہ ایک ضروری فیصلہ تھا۔ وزیر دفاع نے کابینہ میں شمولیت اختیار کرنے سے قبل اپنے اس تعلق سے متعلق نہیں بتایا تھا۔

کیف: (ویب ڈیسک) روس نے ایک بار پھر یوکرینی ریلوے سٹیشن پر شیلز برسا دیئے، “نی پرو” ائیرپورٹ پر راکٹ حملے میں چھ افراد زخمی ہو گئے۔ نیوزی لینڈ نے روس کا مقابلہ کرنے کے لیے یوکرین کو88 لاکھ ڈالرزکی فوجی امداد دینےکا اعلان کردیا۔
روس اوریوکرین میں چھڑی جنگ میں کمی نہ آ سکی۔ مشرقی یوکرین کے ریلوے سٹیشن پر پھر شیلنگ کی گئی جس سے 5 لوکو موٹیوز متاثر، ریلوے ٹریکس اور پاور لائنز کو نقصان پہنچا۔ روسی راکٹس نے “نی پرو” ائیر پورٹ پر بھی تباہی مچا دی، حملے میں چھ افراد زخمی ہوئے۔
ادھر نیوزی لینڈکی وزیراعظم جیسنڈرا آرڈرن نے برطانیہ کے ذریعے یوکرین کو 88 لاکھ ڈالرکی فوجی امداد دینے کا اعلان کر دیا، کہا کہ 2 ماہ کیلئے 50
افراد پر مشتمل امدادی ٹیم ” سی 130 ایچ ہرکولیس ٹرانسپورٹ ائیرکرافٹ” پر یورپ جائے گی جو یورپی ڈسٹری بیوشن سینٹرزمیں یوکرین کیلئے ساز و سامان مہیا کرے گی۔
دوسری جانب روس نے یوکرین کے مشرقی علاقے میں بڑا حملہ کرنے کی تیاری شروع کردی جس کے پیش نظر “یوکرینی فورسز “مورچہ بندی کرنے لگیں۔امریکی خبر ایجنسی کے مطابق روس کا مشرق میں ممکنہ نیا حملہ اب تک ہونے والی جنگ میں فیصلہ کن ثابت ہو سکتا ہے۔
ماہرین کا کہنا ہے کہ مشرق میں بڑا حملہ چند دنوں میں شروع ہو سکتا ہے، یوکرین کے فوجی کمانڈر کے مطابق روسی فورسز نے یوکرین کے دفاع کو توڑنے کے لیے ازیوم کی جانب تازہ فوجی دستے بھیج دیئے ہیں، روس خارکیف اور ماریوپل میں بھی اپنے حملے جاری رکھے ہوئے ہے۔